尋日，我放假之際兼細佬岩岩完成左一科會考科數學，咁又見未咁快再黎下一科，咁就不如去鬆下啦!咁本來我同細佬打算踩由上水去屯門黃金海岸，點知覺得唔夠喉，索性去埋荃灣，呢次路程真係唔簡單，當中遇到落雨既阻礙，由其係回程既時候!
咁我地尋日由計劃至出發用左半個鐘就換衫啦!開頭踩河上鄉其實都無乜野，咁都係好似平時同朋友碌車咁架咋，不過我就覺得豆腐花廠以前就好似話比人停牌，但我就覺得佢好似仲係營業緊，但係有冇人係個邊當食就真係唔知啦!
一過左豆腐花廠，好快就到青山公路，咁向來河上鄉個邊都係多車d，有時都幾挨煙，因為個邊向住落馬洲真係好多車，即係d中港司機過關同埋d人揸車搭車出元朗!搞到成條路其實都幾塞。
一路踩主要都係見到車房、士多仔、村路、爛地....去到元朗，我就帶細佬唔好咁快行青公入市中心，我係覺得尿急同想抽煙...搞掂哂入到市中心就開始落雨，唉!大件事...
大件事既原因就係話當地面濕既時候，你既駕駛既集中力就要加大，但你既車速就要減少，同時要保持剎車距離...有幸佢只係落左一陣就唔落!yeah!
之後我地離開市中心，向洪水橋同埋藍地方向行，個邊其實係日頭就麻麻地好玩，主要因為燈位既問題，成日就要停下塞下，所以就真係要比d耐性先玩到!咁其實洪水橋輕鐵站一帶真係好少野，零星既村屋，惠康一間咁大把，仲有d小酒吧之類!有時我覺得呢類村屋地方幾好，講真可以遠離城市既麻煩感，即係返工對住個城市，放工又係對住個城市，我覺得唔快樂...
咁好快一路行已經入左新墟段...青山灣...屯門市中心，老實講呢個地方比到我好多回憶，例如係自己往日係市中心係california fitness玩，同frances去街...不過俱往已，自己唔珍惜，只可以講往事只能回味...
轉多幾個街口，已經入左去三聖，講真我自己都未去過三聖，其實都唔知入面有d乜，但係三聖比我既感覺係屋邨，有d大排檔，好似幾正咁!其實我一直好渴望自己係住公屋，基本上我覺得落街有大排檔，可以好方便食野，屋邨樓下多數都會有7仔或者OK，可以好方便咁買宵夜同煙...
過左三聖，足之都到左黃金海岸，不過其實我覺得黃金海岸唔係理想之中咁好，即係話一個咁既豪宅，好似做到咩都有哂咁，有時外出下先至好...我地係黃金海岸影下相，講真我都係人生第一次踩到呢個地方...
休息左一陣，我地決定殺入荃灣!咁當中都有經過深井，其實我從來都冇去過，深井原來好細架咋!
咁到左汀九段，亦都係可以踩得好快既一段!個段平路真係好平，亦都好大風，裝左刀鈴既自己亦都係有少少比風吹起左既感覺。汀九橋，唔錯!幾靚!
最後，我地到左荃灣，我地係三棟屋附近一間叫潮記既潮式打冷店食野...個蠔仔粥好夠蠔，揚州炒飯....粒蝦好大粒!之後我地仲叫左獅威啤，實情黎個「醉酒駕駛」!
當然我地唔係飲完就即揸車啦!坐一輪，hea一輪先揸，咁就好好多啦!
回程之際，我地本來想行大埔道返沙田...當我地問過阿傑，佢就話好危險，講真夜晚加上有天雨，行唔通!大埔道曾經係有人做到110km/h既單車行速!咪搞啦!原來回程好過啦!
一路回程既時間，我地都係成水咁返去，細佬直頭有爆計，講真佢耐力唔得，只係可以講要繼續練習...我地回返去洪水橋，我覺得係時間要比細佬休息下，始終佢都係由荃灣挨到返黎，我地係輕鐵站食powerjel，我只見細佬係一面倦容，無計!適應唔到水戰...
最後，我地23:30返到屋企，一路上都係好平靜咁返去!
|
