話說舅父接咗我之後, 就帶我上佢架私家車, 出發去老家...

由 馬尼拉機場 至小弟ge老家相隔 半個呂宋島, 大約400公里,
車程係意想唔到咁 需時12個鐘!  @Д@〣...
雖然小弟家鄉北面 佬沃市有機場, 車程唔洗兩個鐘,
但係因為冇合時ge航班ge關係, 所以被迫要飛去 馬尼拉果度...

頭果一兩個鐘頭, 小弟仲好高興咁望住出面啲風景,
但係進入高速公路之後冇幾耐, 小弟已經失晒興致,
因為出面除咗一盞又一盞刺眼ge車頭燈之外, 就乜都見唔到,
慢慢咁就陷入咗昏睡狀態...
當小弟醒返ge時候, 車停泊咗喺路邊, 而舅父就訓緊覺,
話晒佢都拃咗好耐車(仲要一來一回), 所以小弟都係唔阻住佢休息...
過咗一陣, 舅父都醒埋, 於是繼續行程...

由深夜至到早晨, 都喺高速公路上面奔馳,
間唔中會停低休息一吓, 食吓野...
大約朝早7點, 車停咗喺一間餐廳外面, 我同舅父喺果間餐廳度食早餐...

菲律賓人ge早餐 都係以食飯為主,
簡單咁一小碗飯､一小碟小菜, 就成為一餐 早餐,
份量相比起 香港果度實在少好多,
眾所周知 小弟係一個頗為大食ge人, 雖然係咁, 但係小弟今次其實食得唔多,
一黎唔想浪費舅父咁多錢, 二黎小弟唔太習慣 菲律賓菜...
食完早餐之後, 又再次繼續行程...

喺行程ge途中, 舅父部車有時「唔聽使」, 需要停低修理...
就單單呢一次行程入面, 最少都停低咗兩次 (唔知我訓緊果陣有冇停過呢?),
真係辛苦晒舅父, 同埋佢部車喇...─▽─〣...

之後一路「呆坐」到晏晝兩點, 終於返到去老家!
一班 舅父呀姨､表弟表妹 都係老家出面迎接小弟~
佢地見到小弟, 第一句就係例牌咁講:「好耐冇見喇! 歡迎你返黎呢度!」,
但係之後果一句 意想唔到咁竟然係:「你好肥呀! XD」
小弟當堂「O晒嘴」, 真係叫人無奈...
算啦...反正事實都係咁...= ="

經過12個鐘頭ge車程, 終於都返到黎老家..
啊...多麼懷念呀...

待續...

正如上一篇Blog提到, 因為爸爸媽媽出咗一啲意外 而令到今次ge菲律賓旅程 只得小弟 自己一個人去,
所以, 由香港保安檢查 直到 通過菲律賓海關 都係得自己一個人搞掂...
雖然小弟曾經出國, 但已經係八年前ge事, 對於機場､出入境 可能有啲唔熟悉,
更何況今次仲要得自己一個人去, 其實出事起上黎都唔知應該點做好 XD
所以屋企人唔係咁放心比我一個人出國, 就係咁解...

登機之前兩個鐘, 爸爸陪我行到關口前面,
一如以往, 都係小弟平時出街 果幾句:「小心啲呀...」､「得啦得啦...」､「*(#$*#......」
但今次特別唔同ge係, 唔知點解小弟雙腳都好難提起,
可能因為唔捨得吧...不過走始終都係要走 (又唔係死...=.="),
反正一個星期之後又會返黎度, 所以...都係要走...(=.="...)

基本上 過香港ge關口都冇乜大問題, 因為小弟 近年都多咗少少上大陸,
唔少唔少都有返啲經驗, 所以好快就可以過到關...

距離登飛仲有一個鐘頭多啲, 小弟喺禁區入面周圍「遊蕩」, 打發時間,
行到攰, 就坐低食吓野...就咁, 一個鐘就浪費咗喺呢啲冇意義ge事情上面...

臨登機之前, 小弟望住個月亮, 突然間諗返起媽媽,
唔知點解覺得 佢地去唔到, 得自己一個人去 好有罪惡感,
就算媽媽話 唔使擔心佢, 叫自己玩得開心啲,
始終都有少少唔放心...

飛機上面, 坐我隔離ge係一位菲律賓男人, 最初對佢好有戒心,
之後佢見小弟冇筆填表格, 就好好心咁借咗佢枝筆比我,
仲同我傾計, 傾吓傾吓, 就到咗 馬尼拉機場,
同佢祝聖誕快樂之後, 就各自行lu~

入境ge時候, 小弟如常咁比證件人地檢查,
但麻煩ge野就喺呢個時候出現,
因為小弟唔識答 喺菲律賓居住ge地址, 所以啲關員就不斷咁檢查我證件,
就連 小弟香港ge身份證, 甚至 學生證都要檢查...
就咁, 就擾攘咗一個鐘頭...最後, 佢地都係比我通過,
不過, 當我去拎行李果陣, 發現佢地冇喺我本Passport度 給印,
小弟又再次 返過去關口果度問啲關員, 跟住佢地又再次咁問我一啲唔識答ge問題...=.=
最後佢地 給咗印, 小弟先鬆一口氣...

出咗機場, 小弟又遇到另一個麻煩, 就係搵唔到 我舅父話比我知ge指定位置,
所以就不斷咁打電話比佢, 但係因為 口音問題, 佢又唔知我講乜, 我又唔知佢講乜,
所以一時小弟走去搵 我舅父, 一時佢又搵小弟......
沿途又有好多人問小弟:「Taxi? (你要撘的士嗎?)」,
小弟又不斷搖頭...真係覺得麻煩...
最後終於都搵到我舅父, 第一件事就係大大力咁相擁對方,
話晒都有成八年冇見, 如果唔係有 名牌 的話, 我諗佢都唔認得我喇 XD

跟住佢帶我坐佢ge私家車, 向老家 出發!

待續...

大約八年前, 離開 菲律賓老家之前, 有一位Uncle問我幾時會再返黎, 五年之後?
當時得十歲ge小弟就話:「No! After one year!」
但因為種種原因令小弟返唔到菲律賓──當地天氣問題､ 忙碌､ 會考, 等等...
直至今次, 小弟為咗去得成菲律賓, 犧牲咗合唱團演出機會 同埋 推辭咗好多朋友ge約會,
去換取一星期ge旅程...雖然只得好少時間, 但係小弟已經非常興奮~

旅程為期一個星期, 由12月23號開始, 至12月30號...
原定小弟會同爸爸媽媽一齊去, 但出發之前幾日發生咗一啲事而令到佢地唔去得,
所以呢次 重返菲律賓旅程 只有小弟一個人自己去...
呢一次旅程可以話係小弟第一次自己出國, 但就係因為呢個原因,
屋企人都唔太放心, 所以一早就幫我安排咗好多野──金錢､物資､ 接送, 等等...

越接近機場, 小弟就越興奮, 心入面不斷咁諗:
「老家有冇太大轉變呢? 表弟表妹們ge樣會變成點呢? 果度啲狗仲會唔會驚我呢?
婆婆仲好健康嗎? Uncle Auntie們 仲會認我嗎?......」
數之不盡

起飛之前三個鐘 已經到咗機場,
但係小弟 急不及待, 希望快啲上機,
所以等上飛機 果幾個鐘, 小弟都係不斷咁走黎走去...
順帶一提, 小弟坐正窗口位,
但因為坐夜機關係, 除咗地上面ge燈光之外, 其他風景都係漆黑一片,
但都好過冇啦...─▽─〣

↓往 馬尼拉的航班

飛機終於 起飛, 見住香港啲燈光 續漸消失,
唔知點解突然感到 唔習慣, 可能因為住咗香港咁多年, 有少少唔捨得啦 XD
但點都好...「菲律賓老家, I'm Coming Back!!! XDDDDD」

↓再見香港

待續...

將近半年冇影過軍事相了...
係時候又拎相機出黎, 頂吓手癮~

小弟以往都係每個人都影啲,
但今次只係集中喺一個人身上,
因為活動當中黎咗兩位攝影朋友 幫小弟影其他人,
除咗可以分擔任務, 令自己冇咁辛苦之外,
仲可以集中喺自己ge Idea入面,
今次可以話係好輕鬆咁拍攝到作品

請按下列連結觀看完整作品:
《沉默獵手》

今日係我合唱團第一次公開表演, 地點仲係意想唔到ge文化中心~!
相比起VTC畢業禮 果一次表演, 今次係明顯感到興奮好多~
由於上一次表演吸收咗經驗, 今次小弟對獨唱《Do you hear the people sing?》再冇感到緊張了
反而有小小擔心《Carmen No.26》, 因為平時練習都唔係幾 上到高音,
而且今次枝咪係對正我, 所以都幾驚嫁 XD

本來小弟邀請咗 小弟ge老師 謝太 黎觀賞音樂會, 但係唔知點解佢冇聯絡我,
搞到浪費咗兩張入門票...唯有將果兩張入門票送咗比我爸爸媽媽去睇啦...=v="

由於 爸爸媽媽 會喺第一場出現, 所以小弟 喺果場用晒啲力, 最起碼唔好衰比佢地睇吖...─▽─〣
有幸ge係, 小弟果場ge表現係歷黎最好, 連 石太 都話小弟進步咗 XD

雖然每次唱完都會特別攰, 但係聽到觀眾們ge掌聲,
疲倦ge感覺都會冇晒~ 特別係見到 爸爸媽媽 開心個樣果陣 XD

睇黎小弟對唱歌 中毒已深了,
雖然過程非常辛苦, 又有汗又有淚,
但係最後都係得到人地ge欣賞,
真係非常非常Enjoy : P