自細以黎, 小弟思想一直都係非常保守,
可能因為約束得自己太多, 連一啲正常人覺得冇問題ge野 都覺得好有問題,
雖然咁樣會對我本身嘅 品味上､ 人際關係上､ 甚至心理上 都有一定嘅缺陷,
但係小弟仍然會堅信我嘅思想係冇乜大問題...

今日, 小則 同學 同小弟一齊塔火車返屋企, 其中一個話題正正就係講呢樣野,
雖然小弟仲係好年輕, 但係就咁睇上去好似二十幾歲, 太過成熟 (其實好多人以前都係咁同小弟講過 ─▽─〣...),
但係小弟始終都係開始諗 自己係唔係真係需要「年輕化」呢?

只不過, 「年輕化」之後嘅Christopher又如何呢?
「成熟穩重」仲可以用黎形容小弟嗎?
生活會起 重大變化, 變得更好嗎?

小弟一早已經放棄自己嘅青春了,
期望嘅, 就只有安定嘅生活 同埋 夢想...

大家玩得開心啲喇~ : P

又係合唱團練歌ge日子, 今日小弟都唔知點解成個癲佬咁 係咁整啲野出黎引團員笑...
尤其出去獨唱ge時候走去同Robert「認親認戚」, 搞到石生好無奈咁笑...─▽─〣

今日聽 石生講佢會Cut獨唱一半人手, 由六個Cut到三個,
睇黎小弟危機黎臨喇...驚驚~!
我要多啲練習, 唔可以病!
唔可以衰比自己睇嫁! 加油! .\"/.

BTW, 見到合唱團不斷咁進步起黎,
小弟真係非常高興 XD

P.S.
「爸爸!」，「仔仔!」

正如小弟上一篇 打得「不似人形」嘅論文提及到, 唔少嘅年青人都好渴望談戀愛,
唔好啲咁講一句, 簡直可以用「當神咁拜」黎形容...
但係, 有乜野會令佢地覺得「戀愛大過天」呢?
背後一定有啲因素令佢地沉醉於「愛 (毒) 海」之中

小弟認為有兩個因素:
一. 外界嘅荼毒
二. 缺乏其他方面 (例如: 友情､ 親情､ 師生情, 等等) 嘅關懷

首先要明白嘅係, 年青人們點樣知道有「愛情」呢樣東西,
其實好簡單, 大眾媒體 就係其中一個 主要 並 影響得最深 嘅來源
打開電視､ 收音機, 一大堆「愛情」野 即刻滿天飛,
更壞嘅係, 呢種情況日趨嚴重,
就以近期大熱嘅《烈火雄心》為例,
1998年播映嘅 第一集 大多數都係見到 救火情景 (愛情為副),
但而家嘅 第三集, 主線竟然轉移到 主角之間嘅愛情衝突 (以前嘅主變為副)
一場又一場嘅接吻 同埋 擁抱鏡頭, 令年青人 極度心動
又引用另一事例,
而家聽每首流行音樂, 都係圍繞住「愛情」,
相比起「半斤八兩」､「紅日」時代 真係多得非常離譜

另一方面, 家庭､ 學業, 甚至 人際關係 上未免會受到負面嘅沖擊 (尤其發育年期),
令年青人只感受到「愛情的偉大」, 因而覺得愛情會「大過天」

以上兩點可以引致不良後果

其一, 年青人過度重視愛情, 會忽略 其他方面嘅情, 長遠落去會造成依賴,
萬一不幸咁失去咗愛情, 會因為帶黎嘅傷痛而不惜作出一啲不智嘅舉動 (例如: 自殘､ 自殺)

其二, 沉迷愛情會觸發其他問題,
例如 家庭問題, 大多數家長都會反對自己嘅子女談戀愛, 但由於年青人覺得「戀愛大過天」,
會以各種理由去堅持自己嘅觀念, 因而產生爭執, 到最後 親子關係出現深深嘅裂縫,
甚至作出一啲不智嘅舉動
另一方面, 因為「愛情的功力」, 會令年青人經常「發白日夢」, 會多次錯過教學嘅重點,
返到屋企又只顧同伴侶MSN之類, 冇晒溫書嘅時間,
持續咁樣落去會令學業成績日走下坡

其三, 由於年青人未曾體驗「愛情」, 對「愛情」理解並不多,
往往會出現 觀念上嘅錯誤, 以為 對人有好感就係 「愛情」, 又或者接吻 同埋 擁抱就係 「愛情」,
加上現時不良資訊氾濫, 引發 不道德舉動 或 罪行 (例如: 未成年性行為､ 強姦)
到最後, 必招惹損失──金錢上､ 人際關係上､ 心靈上､ 生理上､ 貞操上 皆會

為防止「愛情」對青年人產生不良影響:
一. 必須 教育青年人對愛情嘅 價值觀──世界上唔係只有「愛情」會「偉大」, 然而, 「愛情」係一個責任
二. 家長､ 教師嘅關心係非常重要, 多了解年青人嘅需要, 減少年青人對「愛情」嘅依賴
三. 各界所做嘅每一件事都會影響到年青人嘅思維, 所以發佈有關資訊前, 請三思而後行

喺呢個社會裡面,「愛情」呢個話題唔再陌生,
街道上面不時見到一對又一對嘅情侶, 拖住手咁甜言蜜語,
實在令大多數人羨慕, 尤其係年青一代

近年黎, 好多學生喺初中時代已經開始談戀愛,
連佢地自己嘅 部落格 同埋網上討論區 都充斥住數量驚人嘅「愛情金句」同埋所謂嘅「風格圖」,
可見佢地對「愛情」係非常渴求...
小弟都唔例外, 其實我都好想拍拖...(汗...)

小弟好多 身邊嘅朋友都嘗試過戀愛嘅滋味,
但係最諷刺嘅係, 小弟少見 自己朋友同佢地嘅伴侶 維持得到長期嘅關係,
長則一年有多, 短嘅就只有三日...
唔係話 識得小弟就會「衰硬」, 而係 根本就唔知道 何謂「愛情」

每個人對「愛」都有唔同見解,
「愛係無私嘅付出」､「係生存嘅意義」､「為咗延續落去」......
喺咁多解釋之中, 都有一個共通點, 就係「一生的承諾」
但奇怪嘅係, 只有極少數人先真正得到「一生的承諾」?

小弟問過唔少女性朋友 有關愛情上嘅問題,
開始談戀愛嘅, 就會問: 「點解會同佢拍拖?」､「點識嫁?」､「識咗幾耐?」, 等等 呢啲象徵式問題;
反之, 如果係 關係破裂嘅, 小弟就會追問原因

大多數人覺得「因為佢好人」､「因為佢同我傾得埋」､「因為佢靚仔/女 又有錢」, 所以就可以嘗試發展關係,
但往往因為自己或對方 觀念上嘅錯誤 以及 另有所圖, 而最後令自己承受不可磨滅嘅烙印
其中以 前者為常見嘅事例, 由於「鍾意」同埋「愛」意思接近, 所以好多人認為兩者係相同,
實際上, 「鍾意」同埋「愛」嘅觀念差別係非常之大

「鍾意」一詞, 鍾即鍾愛; 意即合意, 純粹係一種對別人嘅傾慕, 繼而想了解佢多一啲, 增進彼此感情
「愛」係感情上嘅頂峰, 非常著重兩者之間嘅關係 同埋信任
正正就係因為 特別熱衷「愛情」, 而令自己混淆咗兩者嘅分別, 以一個錯誤嘅態度去對待感情,
到最後, 當不幸的事情發生, 傷嘅就自有自己
小弟喺某年識咗一個女仔, 當時我有點兒傾慕佢, 想同佢發展關係,
但佢突然間問我 係唔係只不過想同佢發生性關係, 當時我聽到之後嚇到呆咗喺度...
原來佢有一個唔愉快嘅前科──佢前度男朋友曾經同佢發生性行為,
事後不幸咁, 果個女仔發現佢嘅男朋友原來結識咗第二個女朋友,
雖然發現到問題, 但已經對果個女仔造成 永久嘅傷害...

有啲人亦視「愛情」為遊戲, 小弟對呢個睇法係非常反感!

喺同人相處之前, 最好再三諗清楚, 你係「鍾意」佢 抑或係「愛」佢,
亦唔好隨便同對方講:「我愛你」, 因為「我愛你」係表達緊「一生的承諾」

另一方面, 小弟喺度要講:「人係最醜惡」, 有啲人會為咗自己嘅利益 同埋 私慾, 不惜欺騙對方嘅感情,
令對方傷得更重, 更痛苦...
近期, 小弟聽聞有個男仔鍾意咗 我一個朋友, 但係經小弟明查暗訪, 知道原來佢對小弟ge朋友有不軌意圖,
幸好, 果位女性朋友對感情提唔起興趣, 先可以逃過呢一次「災難」...

想喺呢度特別講, 「想搵人黎錫/攬」並唔係愛情, 只不過係滿足自己肉體上嘅慾望,
雖然 攬攬錫錫 係表達愛嘅一種方式, 但你唔會發覺得對方 攬你錫你 係出自真心 定係只係滿足佢地自己肉體上嘅慾望,
同樣, 如果你唔係真係愛對方的話, 就唔好隨便對佢 進行曖昧行為

好喇...講咗咁多反面例子, 究竟乜野叫「愛」呢?

由宗教黎睇, 根據 格林多前書 13:4-7,
「愛是含忍的, 愛是慈祥的, 愛不嫉妬, 不誇張, 不自大, 不作無禮的事, 不求已益, 不動怒,
不圖謀惡事, 不以不義為樂, 卻與真理同樂: 凡事包容, 凡事相信, 凡事盼望, 凡事忍耐」
愛一個人, 自然要接受佢嘅好同唔好嘅地方,
由於世人上只有一個真正ge愛人, 「包容」就顯得更加重要,
當遇到意見不合嘅時候, 雙方都應該作出讓步 (不自大) 以及 忍耐 (不動怒),
更加唔應該利用對方對自己嘅愛 (不作無禮的事, 不求已益, 不圖謀惡事),
反而要無時無刻 無私咁關心對方

除咗以上各點之外, 小弟認為「愛」要包含以下條件:
一. 對伴侶有足夠嘅了解──如果缺乏了解的話, 就好容易產生爭執...再者, 缺乏了解就好似跟陌生人走一樣, 係非常危險
二. 需要長時間去建立──愛情並唔係一朝一夕就可以發展到
三. 終身責任──唔會話因為冇晒感覺而拋棄, 相反, 愛情係一個永不止息嘅感情

最後, 小弟希望你最少都諗吓乜野係「愛」,  無論你同唔同意小弟啲廢話都好...