我唔再係度打日記嫁啦，如果仲想知道更多有關我嘅野，歡迎ｃｌｉｃｋ入我呢個ｂｌｏｇ度睇啦∼

↓↓↓↓　↓↓↓↓

http://hk.myblog.yahoo.com/love_dicky_2005/

∼ｇｏｏｄｂｙｅ∼

今日係Ｆ１至Ｆ４同Ｆ６嘅結業禮同頒獎典禮，
本來以為會有好多制服隊伍黎當值，
點知淨係得幾個人去當值，
交安得４個人；紅十字會有４／５個；女童軍有幾個，
好似好冷清咁．．．

我覺得今次個結業禮當值好似好混亂咁，
明明係好大型嘅儀式，
但點知ｄ人好似唔係咁重視佢咁，
上次Ｆ５同Ｆ７嘅畢業典禮都有好多人去當值啦，
仲有上年嘅結業禮．．．
總之就好唔滿意今次嘅安排∼

由早會完左之後當到１０點幾，
跟住就上左４１３室睇直播，
原本個典禮係話１０點４５完結，
但最後都搞到１１點幾先完．．．
跟住就上班房等派成績表∼

今個學期嘅成績，
始終都唔理想，
好失望囉果陣，
好似有種患得患失嘅感覺，
心情即刻跌到落谷底∼
唔知下年又會點．．．！？

聽日仲要返去註冊同訂書、暑期作業，
返埋之後就正式放暑假∼（其實係聽日開始放暑假）
下年入邊班就要到８月１０號先知，
遲ｄ８月都仲要返去補習，（１５－１７日）
今個暑假好似好忙咁．．．

咁就完左Ｆ２，
好似好求其咁，
完全唔知自己係今年做過ｄ乜，
好似成年都渾渾噩噩咁，
希望下一年嘅成績會有進步、一切都順順利利，
同埋可以同ｄ　ｆｄ一班，
唔好再遇到ｄ勁黑我憎嘅人，
咁就好啦∼

話咁快，
今日就係Ｆ２最後一日上堂嘅日子，
聽日就到我最期待嘅日子啦，
就係派成績表∼
希望聽日派返黎嘅結果會令我滿意嫁啦．．．

今日最後一日玩試後活動，
第一節就係勁低Ｂ、超白痴嘅「班際師生競技同樂日」∼
我覺得超無聊囉個遊戲∼
都唔知玩黎有咩意思！
除左要班學生係操場曬之外，
我都唔知呢個咁嘅節目要黎做咩．．．
我就無端端要出去玩第二個遊戲－－行運一條龍∼
淨係聽個名都知唔荒好野．．．

個遊戲就要１０個人用ｄ報紙整個類似車轆嘅物體，
然後就要企入去，
將個車轆推前，
最快到終點或者最近終點就贏∼

我地本來都係最快果隊黎嫁啦，
但行行下，
ｄ報紙就斷開哂，
搞到我地又要返起點再黎，
所以後來就俾人超前左啦∼
到左差唔多夠鐘嘅時候，
我地ｄ人已經完全放棄左，
仲要整爛哂個報紙車轆，
但個個人都好似好開心咁，
都唔知咩心態．．．

完左個比賽之後就即刻上班房涼冷氣，
跟住就排隊落ｈａｌｌ聽講座，
然之後就返班房訓覺∼（班主任節）
佢地班人仲話今日要去觀塘打邊爐，
個個都要去，
真係睬你都傻．．．
大熱天時打邊爐！？
仲要去到觀塘！？
雖然話有冷氣啫，
但係ｄ咁有「意義」嘅聯誼活動，
都係唔啱我嫁啦．．．
難得嘅係某ｄ同學同２個班主任都仲係好興致勃勃咁傾今晚去打邊爐嘅事，
真係好佩服佢地仲咁多精力去搞活動∼

好期待聽日嘅結業禮呀，
但係希望到時ｄ嘉賓唔好講咁耐野，
我唔想坐到訓著．．．

今日又係一年一度嘅交安結業禮，
今次就由王華湘做主場，
係學校度舉行呢個結業禮∼

返到去都已經有好多人，
跟住其他學校同長官就陸陸續續出場，
搞到小食部果度迫爆人∼
之後又坐左一陣，
到左１點幾果陣就出去綵排∼
本來諗住今次唔洗出去步操嫁嘛，
點知最後都係走唔甩．．．

今日有成３３度，
淨係係出面企一陣，
個太陽就幾乎可以煎熟隻蛋啦．．．
一路係度綵排，
２隻腳就一直俾太陽曬住，
係勁熱同唔舒服嫁囉．．．
練左一陣之後就可以休息∼

返到去小食部坐，
有人話雪櫃有凍水，
我地ｄ人就即刻湧埋去攞，
但有ｄ其他學校嘅人竟然都好厚面皮咁走埋黎攞，
仲要一攞就攞幾支，一ｄ禮貌都冇！！！
飲完水之後就去搵筆寫名，
然後就放返入雪櫃雪∼
之後就去廁所戴帽，
跟住就到正式嘅結業禮∼

出到去又係得個曬字，
熱死啦．．．
完左之後就去影相，
影完就入ＳＡＣ坐∼
跟住我就去返雪櫃攞水飲，
點知俾唔知邊個人咁衰，
攞左我支水！！！
搞到我冇得飲凍水，
跟住就唯有飲返支唔凍嘅水．．．

然後就一肚火咁入返ＳＡＣ，
俾ｄ冷氣吹熄我ｄ怒火∼
之後就一直坐，
坐到３點５０幾就同珊珊出去等芬姐，
因為佢地約好左去坑口搵工喎．．．
跟住就走囉．．．

今日黎講都唔算太辛苦，
只係覺得俾個太陽曬住好熱囉．．．
聽日又要做埋哂ｄ體力勞動嘅野啦，
救命．．．

今日本來係話１：００ｐｍ返學，
但點知馮ｓｉｒ話今日要１２：００ｐｍ返到去ＳＡＣ開大食會，
所以就．．．

返到去勁無聊，
我都冇食到野，
淨係係度睇馮ｓｉｒ「精心炮製」嘅影片，
仲要聽佢至愛嘅古巨基ｄ歌－－－「平凡」．．．
（佢真係好鍾意古巨基．．．）
之後就同左珍姐出去傾計，
點知就係我同珍姐出去嘅呢段時間裡面，
發生左一件令人十分十分十分羨慕（？）嘅事∼

件事係咁嘅，
珊珊佢冇食到任何野，
淨係一支公企左係ＳＡＣ度，
冇人同佢傾計，
跟住咁就惹起左馮ｓｉｒ對佢嘅「關注」∼
之後馮ｓｉｒ就走埋去問下珊珊係咩唔食野、係咪ｄ野唔啱胃口，
跟住珊珊就話唔係，
係佢自己唔想食，
跟住馮ｓｉｒ又問佢想食咩／飲咩，
佢可以出去同佢買∼

係咁尷尬嘅情況下，
珊珊梗係覺得好「受寵若驚」同「不知所措」啦，
因為果陣ｄ人全部都望住佢地，
而且馮ｓｉｒ又企係佢隔離∼
好彩呢個時候有２個人行左入黎，
就「救」左珊珊一命∼
之後芬姐就俾珊珊拉左入ＳＡＣ陪佢，
點知馮ｓｉｒ仲「鍥而不捨」咁走埋去問珊珊係咪唔開心、芬姐係咪安慰緊佢，
仲話「我都知你唔開心嫁啦」咁樣，
搞到個誤會越黎越大．．．

跟住就要出去操場排隊，
咁呢個誤會就咁不了了之左啦．．．
之後就上左ｈａｌｌ睇個比賽，
無聊都我唔想多講，
因為真係悶到我都唔知講咩好∼
只係覺得好哂時間∼

聽完珊珊咁講之後，
我覺得好羨慕囉，
我前日都係得一個人傻下傻左咁企左係ＳＡＣ度（因為果日要返去步操），
又唔見馮ｓｉｒ走埋黎對我「噓寒問暖」咁喎，
真係「同人唔同命」∼
不過我都知馮ｓｉｒ其實係好關心我地ｄ交安嘅，
入左交安２年，
我都從來冇見過佢發脾氣鬧我地，
我知佢都好錫我地嘅∼
＾，＾

最後返學日子：倒數４日∼

好熱呀．．．好熱呀．．．好熱呀．．．好熱呀．．．

今日朝早得Ｆ１同我地Ｆ２要返去，
所以今朝個早會我覺得勁冷清∼
第一節試後活動就係去ｈａｌｌ聽一個關於環保嘅講座，
我覺得超無聊囉，
完全冇心聽佢講，
因為我極眼訓．．．

之後成級Ｆ２就去左沙田文化博物館，
又係一個勁無聊加哂錢同哂時間嘅「試後活動」，
我對呢ｄ野係一ｄ興趣都冇∼
去到之後見到好多其他學校嘅人，
簡直係去到邊都咁人頭湧湧∼
成個參觀我都係求求其其咁行，
行完之後我只係得一個感覺，
就係好頭痛∼

返到學校就即刻衝上課室，
點知全級課室ｄ門都ｌｏｃｋ左，
之後ｄ人又鼓譟囉∼
激死人啦，
都唔明ｄ校工點解唔可以早ｄ上黎開門．．．

聽日返１：００ｐｍ，
放３：００ｐｍ，
返去ｈａｌｌ睇個幼稚比賽，
好想唔返．．．

最近ｄ人係咁講話想搵暑期工，
我都想做呀，
因為我又冇＄＄，
放暑假係屋企又悶喎，
所以都想試下做暑期工∼
但係又搵唔到，
又唔知做咩好∼
而且我又未夠１５歲，
不過可能遲ｄ同ｄ同學去觀塘睇下會唔會有人請ｄ未夠歲數嘅暑期工，
但係我諗通常都冇嫁啦．．．

最後返學日子：倒數５日∼

今日終於都派哂所有卷啦，
ｄ成績，
實在比我預期中低好多囉，
好失望呀．．．

今次有好多份卷都係錯係ｄ唔應該錯嘅地方上，
答嘅答案又唔中ｐｏｉｎｔ喎，
所以咪咁低分囉，
我估今次考試平均分都一定冇７０分嫁啦，
唉．．．

ｅ＋公佈下ｄ成績先啦：
中文：Writing：67.4/100　Reading：56/100　Listening：27.5/40　Speaking：31/40
英文：Writing：71/100　Reading：75/118　Listening：45/69　
數學：LQ：53/100　MC：58/100
中外歷史：63/100
電腦：50/80
普通話：77.5/100
視覺藝術：72/100
體育：56或者57/100
科學：LQ：67/100　EX：18/50
通識：58/100

咁多科入面，
最令我失望嘅係中文閱讀卷、數學LQ同MC、中外歷史同通識∼
我溫左好耐，
明明係好俾心機去溫，
點知最後出黎嘅結果係咁樣，
真係令我覺得好「灰」囉．．．
反而今次英文、普通話同視覺藝術都俾左我好大嘅驚喜，
諗唔到冇咩點溫到嘅科目會有咁好嘅成績∼
但係我知道今次都係因為好彩，
所以先會咁高分∼

今次唯一一科肥左嘅就係科學EX（實驗），
我都估到呢科會肥嫁啦∼
但今年科學科嘅成績令到我對黎緊Ｆ４選修理科嘅信心大跌好多，
咁嘅成績，
咁同人爭入理科班呀？
年年嘅入理科班名額都有唔少人爭，
如果我Ｆ４真係入唔到王華湘嘅理科班，
我諗我可能會轉校∼
但係我真係唔係幾想轉校，
始終都係覺得適應左王華湘之後就唔想轉去另一個環境度讀書∼

ｅ＋都唔知點面對自己同屋企人，
總之就好失望啦．．．
唉．．．

最後返學日子：仲有６日∼

今日對左中文所有卷、數學ＬＱ同普通話，
有幾份卷差唔多「炒」左，
中文ｄ卷好多都比上學期低分，
數學ＬＱ就接近「肥佬」，
事實證明我係一ｄ數學天份都冇．．．
普通話反而最高分，
高過上次好多，
算係有ｄ安慰啦∼
（ｄ分我會係星期五先一次過打哂出黎）

聽日就派我都幾冇信心會考得好嘅英文同數學ＭＣ，
我估都唔會高分得去邊嫁囉．．．
唉，
仲諗住今次會有好成績啦，
點知第１日對卷就有咁大嘅刺激，
都唔知今次平均分有冇７０以上囉．．．

最後返學日子：倒數１０日

終於都到左最後一日考試啦，
今日考視覺藝術同中文口試，
視覺藝術考得ｏｋ啦，
不過有ｄ我都係亂做；
中文口試就麻麻地，
講野講到口窒窒咁，
實俾人扣好多∼

考完哂所有科目之後，
我以為我會覺得好輕鬆同好開心，
但係我發覺到我真正考哂所以科之後，
我竟然一ｄ感覺都冇∼
考試之前，
我有曾經緊張過、驚過，
但當我考到一半嘅時候，
我發現我已經對呢次嘅考試冇哂任何感覺，
之前所有嘅緊張同期待都好似消失哂咁，
都唔知自己想點．．．

下個星期成個禮拜都對卷，
我對呢樣野就有期待嘅感覺啦∼
對完卷就試後活動，
所以由下個星期開始我就放半日啦，
下個星期同７月３至７月１０號就放１２：１０ｐｍ，
除左７月５號之外係放３：００ｐｍ∼
因為果日係１：００ｐｍ返學∼
哈哈∼

最後返學日子：倒數１１日∼

今日考電腦同體育，
２科都冇咩信心，
不過我諗會有好多人同我一樣∼

聽日係最後一日啦，
考視覺藝術同中文口試，
就黎對卷啦．．．

心情依然好差，
好想發脾氣，
好想有人俾我發泄，
不過．．．
咁係冇可能嘅事∼

今日淨係考中外歷史一科，
有ｄ題目唔識答囉，
又有ｄ字寫錯左，
總之就扣好多分啦．．．

聽日考電腦同體育．．．

心情勁差，
唔想多講．．．

今日考普通話同ＩＳ（科學）ＬＱ同實驗，
普通話有ｄ唔識，
應該又冇左１０幾分．．．
ＩＳ　ＬＱ都ｏｋ，
我有好多題都老作，
希望過到關啦！！！
實驗就死哂，
我有好多步驟都做錯左，
又唔識做ｄ問題，
我諗實驗係肥梗嫁啦．．．

做實驗果陣超緊張，
搞到我手忙腳亂咁，
做電路果陣仲恐怖，
個安培計郁都唔郁下咁，
激鬼氣！！！
果ｄ燈泡仲閃下閃咁，
而且又有ｄ火花出現，
好驚會有意外，
個伏特計支針仲識不停擺動，
我都唔知個度數係咩．．．
後尾先知原來有好多人都有咁嘅情況出現，
唔知係邊個錯呢．．．？

聽日放假，
正，正，正！！！
後日就考勁多野背嘅中外歷史，
一定要高分ｄ呀！！
ｅ＋已經死左幾科嫁啦，
中外歷史唔衰得嫁！
努力，加油！！！

落雨，落雨，我鍾意！！！

今日考我冇咩信心嘅通識同中文聆聽，
本來以為今次通識都會肥嫁啦，
但原來份卷好易做，
而且唔係有好多條問題，
不過又有ｄ唔係幾識做，
但係應該影響唔大嘅．．．
＾＾

但係中文聆聽就比較難，
我有ｄ唔識同做唔哂，
某某人出卷好似真係難左ｄ．．．

下個星期一考ＩＳ（科學）ＬＱ同實驗試，
我諗ＬＱ應該都冇咩問題嘅，
但實驗試就可能難ｄ，
因為份卷係某人出嘅．．．
但係考完試就有得放假，
又有得食糭，
正呀！！！

今日係最輕鬆嘅一日，
淨係考一科，
９：３０ａｍ就走得，
而且仲係考唔洗溫書嘅英文聆聽添∼

不過聽日就冇咁好彩啦，
因為聽日考通識呀！！！
好驚又係做唔哂同低分呀，
其實得一個鐘做通識卷係絕對唔夠嫁囉．．．

今日去禮堂考聆聽果陣，
俾我留意到一個好特別嘅現象∼
呢份卷係ｍｉｓｓＳ出嘅，
咁佢今日就係禮堂度睇住啦，
點知，
咁就吸引左好多「狂風浪蝶」黎∼
有個係教我地級英文嘅，（１）
所以佢係度睇住係冇問題嘅；
另一個就係教我地級數學嘅，（２）
好明顯佢就唔應該係度嫁啦；
之後又有２個好生面口嘅呀ｓｉｒ黎左睇住（３，４），
但我記得佢地都好似同我地呢級冇咩關係，
咁點解佢地又會係呢度出現呢？

我覺得（１）同（２）係度出現都未算有問題，
最離奇嘅係２個同我地呢級冇任何關係嘅人都走左入黎囉∼
（１）同（２）其實都俾人話佢地係ｍｉｓｓＳ嘅「裙下之臣」黎嫁啦，
但係另外果２個又係咪ｍｉｓｓＳ嘅「觀音兵」呢？
我就覺得係囉∼
其中（３）個樣最乞我憎囉，
佢好似係度扮有型、扮靚仔咁喎，
唔該，
我睇到你副「尊容」就想嘔囉，
我就最憎ｄ人係我面前扮哂野咁嫁啦，
真係見佢前面憎佢後面呀！！！
都唔知佢想博咩囉．．．

跟住有個專係３樓教書嘅ｍｉｓｓＬ走左入黎，
我見到佢個樣就好想笑囉∼
佢「幾廿歲人」，
仲扮哂可愛咁「殯」辮喎，
咁「ｃｕｔｉｅ」嘅髮型再加埋佢個「靚樣」，
真係「靚到殺死人」囉．．．

哈哈哈，
估唔到一個小小嘅英文聆聽考試，
都可以俾我睇到咁多咁搞笑嘅事，
呢ｄ都係「拜咁多位老師所賜」咋．．．
真係「飯焦花呢麥廚」囉∼

今日又係考我最驚嘅科目－－英文，
不過今次考試我有信心ｄ，
因為ｄ卷易做左好多∼
＾︶＾

今朝又見到好耐冇見嘅陳國鈞（不過我唔知佢見唔見到我），
再加上ｅ＋放學返屋企嘅時候成日都見到陳國威ｄ人，
搞到我ｅ＋好懷念以前係小學讀書嘅時光∼
雖然係好懷念以前，
但係我都唔係幾想返去小學，
因為ｄ熟嘅老師都差唔多走哂，
返去，
已經冇咩意思∼

聽日考英文聆聽，
唔洗溫書囉，
好正！！！
聽日仲要放９：３０ａｍ，
真係搞笑∼
既然淨係考一科就應該搭埋其他科一次過考吖嘛，
住得遠果ｄ都俾佢搞到蝕哂ｄ車錢．．．
（好慶幸我住得唔遠，行路就去到學校．．．）

今日考中文作文同閱讀，
我算係「付付碌碌」咁捱過左啦．．．
琴日又為左追睇《放羊的星星》而冇溫到書，
仲破左我個人上網嘅記錄添．．．
所以話呢，
有時人係會為自己嘅心頭好而浪費時間同金錢嫁∼＾＾

中文作文就分２ｐａｒｔ，
一ｐａｒｔ係實用文，
一ｐａｒｔ就係佢俾２條題目你叫揀一條黎作∼
第一ｐａｒｔ話唔可以作多過１５０字，
但如果要跟格式作就一定多過１５０字嫁啦，
所以我諗全級都作多過１５０字嫁啦∼
第二ｐａｒｔ就有２條題目（４００字以上），
第１條係「有人說：『香港是一個沒有閱讀風氣的城市』。你的看法是甚麼？」
第２條就係「記一次受傷的經歷。」
我就揀左第１條黎作∼
我覺得第２條好無聊呀，
而且又係作左好多次嘅記敍文喎，
所以我咪作好玩ｄ嘅第１條囉∼

閱讀卷就有ｄｄ難度，
頭果幾部分就ｏｋ啦，
但係之後果幾部分就麻麻地啦．．．
我一共唔見左１０分，
好多都唔識，
不過我諗都應該唔會低分得去邊嘅∼
（＾＾哈哈哈哈＾＾）

聽日考英文，
好多野要記呀．．．
今次份英文卷我諗會難ｄ囉，
出卷果個人好似不嬲都係出ｄ有難度嘅卷嫁，
唔知聽日會點呢？

好想快ｄ到下個禮拜呀，
我要追《放羊的星星》呀！！！

今日就係Ｆ２最後一個學期嘅第一日考試啦，
第一日就考我最唔掂嘅數學，
真係攞命．．．

ＬＱ果度都有ｄ唔識，
不過我諗應該會高分過上次，
因為份卷簡單左好多呀！！！
ＭＣ果度就死得囉，
超多唔識做，
都話某某人出卷實好難嫁啦．．．
唉，
今次死得啦．．．

聽日考中文，
我對呢科都叫做有ｄｄｄｄ信心啦，
但係就有好多野要死記囉．．．
我諗可能會冇咁高分啦．．．

最近好似覺得自己冇咩方向，
唔知自己想點咁，
唔知呢ｄ係咪叫「試前綜合症」呢？
呢個，
我諗係一個「不解之謎」．．．

《放羊的星星》越黎越好睇啦，
ｅ＋ｄ劇情超緊湊，
搞到我一日唔睇都好似好唔自然咁．．．
唉．．．
＾＾

終於都黎到Ｆ２最後一日嘅正式上堂啦，
記得上年嘅最後一日又係咁嘅天氣，
唔知下年又會唔會一樣呢？

今日全日都過得好輕鬆，
話哂都係ｌａｓｔ　ｄａｙ，
始終都覺得咁嘅感覺最好∼

話咁快就已經要升Ｆ３，
心理同生理都仲未準備好，
下年就要選科、ＴＳＡ（全港系統性評估），
但係小學畢業都仲好似係琴日嘅事．．．
我對今年嘅感覺冇上年咁好，
但係我對２Ｂ都仲有一份唔算深嘅感情，
終於我都係呢一班讀過一年書，
而且，
「人非草木」∼

今日既然係最後一日正式上堂，
就趁Ｅ＋講一下我對今年ｄ老師嘅睇法啦∼

中文（CWL）：本身以為佢上堂會好嚴厲，但經過一年嘅「相處」之後，我覺得佢都唔係想像中咁惡，反而上佢堂仲好好笑添．．．＾＾
英文（THY）：佢上英文堂都ｏｋ啦，上佢堂都好輕鬆，佢冇咩點俾功課，不過有時都幾恐怖．．．
數學（CYK）：本來我係好唔ｌｉｋｅ佢，但最近唔知係咪因為最後正式上堂嘅關係，佢個樣好似越黎越順眼∼不過我都係麻麻地鍾意佢教數學∼
科學（LTY3）：有時我會覺得佢講野好廢，但係佢係一個好識搞氣氛同好多鬼主意嘅人，有陣時上佢堂都會覺得好好笑∼
體育（CMM）：我唔鍾意上體育堂，所以我對體育堂就只有無窮嘅厭惡同憎恨，不過佢都係一個唔錯嘅老師∼
電腦（CSY2）：佢教書都係好唔掂，有時我甚至會覺得我自己學都好過佢教∼
通識（SCC）：佢教通識都唔錯，而且份人都幾好，不過有陣時就真係太嚴厲啦，搞到唔少人都對佢有ｄ不滿∼
中史（CYP）：佢教中史，算ｏｋ啦，我有時真係悶到好想好想訓覺嫁，但我知道係我冇心上堂啫．．．
視藝（CSY2）：又係佢呀，佢教視藝好過電腦好多，起碼我會覺得學到野∼
普通話（THY）：同英文科一樣啦，又係輕鬆同自由∼
ＤＴ（CTF）：佢上年又係我班主任，對佢我都幾了解，但有陣時就真係唔知點解咁多學生鍾意佢囉，佢又唔係靚仔，教書又唔係好好，但佢就真係好受歡迎咁囉．．．
家政（LKF）：佢教家政就真係麻麻地，佢同普通一個識煮野嘅人係冇分別囉，而且我覺得上佢堂除左煮野之外，我都冇點學到野．．．
戲劇（SL）：極度唔ｌｉｋｅ佢，上佢堂就好似接受酷刑咁，超唔ｌｉｋｅ佢同呢堂！！！！！！！！
生教（CWM）：我又係唔ｌｉｋ佢，有時仲會覺得佢係可有可無嘅添．．．

講完科任老師，
就梗係要講下班主任啦，
就係THY同LTY3啦，
我覺得佢地２個好好傾，
呀ｓｉｒ有陣時好似一個大細路，
成日都會激到ｍｉｓｓ唔知好嬲定好笑咁，
不過我都幾鍾意佢地嘅組合，
有佢地係度，
就一定有歡笑聲；
佢地２個一齊，
就好似最佳組合咁，
好有默契∼
雖然表面上ｍｉｓｓ同呀ｓｉｒ好似唔係幾夾咁，
但我知道佢地其實好好傾同好ｆｒｉｅｎｄ∼
我都唔係好討厭佢地，
反而我會覺得佢地係會為一個死氣沈沈嘅班別帶黎生氣添∼
總括黎說，
我都幾鍾意佢地∼

話咁快下個星期就開始考試囉，
好緊張呀！！！
我唔知道仲會係２Ｂ上幾多次堂，
但係我知我會好好珍惜埋最後呢幾日嘅相處∼
總之就要珍惜啦∼＾＾

琴晚返左學校當值，
因為琴晚係第四屆中五同中七嘅畢業典禮∼
所以琴日就見到好多我舊年嘅社長同社幹事，
感覺就好似見到ｄ好耐冇見嘅老朋友咁，
好開心∼

比起今年，
我真係覺得今年嘅社長同社幹事好陌生，
因為我都ｅ＋都仲未認得邊個係我嘅社幹事，
除左社長之外，
我冇一個認得．．．
所以就算見到佢地，
我都冇任何感覺∼
而且，
今年嘅社長同社幹事都唔係幾做得野，
佢地好似都冇為過仁社做過ｄ咩，
所以我都係覺得上年嘅果班人好好多，
而且見到佢地畢業，
自己竟然有ｄ唔捨得，
因為佢地對我黎講就好似係我嘅偶像．．．

睇住佢地畢業，
我諗起３年後，
或者係１年後，
當我都係呢間學校畢業嘅時候，
我會唔會唔捨得呢？
我嘅答案係：或者會∼
只係知道我小學畢業嘅時候，
我係冇任何感覺∼

不過琴晚嘅當值真係好無聊呀，
５點幾當到６點４５，
之後就入左ｓａｃ睇現場直播，
睇到９點１０先走得∼
坐低嘅時間竟然多過當值嘅時間．．．！？
我只可以話，
無奈；無聊；無謂∼

今日就比較開心ｄ，
因為今日我終於買到我恨左好耐嘅果款遮啦∼
本身係諗住有人陪我去嫁，
點知ｄ人竟然個個都話唔去；唔得閒，
呢ｄ究竟係咩朋友？？？？
不過我大人有大量，
就放過你地啦∼

今次可以咁順利完成交易，
都要係度多謝賣家同攞遮俾我嘅果個人，
我都有係今次嘅交易入面付出左好多嫁，
因為今次係我第一次係ｙａｈｏｏ拍賣入面買野，
仲要自己一個打電話俾賣家傾時間、地點去交收ｄ遮同自己一個人去觀塘見一個陌生人攞遮∼
咁對於一向係內向嘅我同從未試過用網上拍賣黎買自己心頭好嘅我黎講，
實在係一個好好嘅經驗同嘗試∼
因為咁真係要克服好多嘅心理障礙∼

下個禮拜就係最後嘅上課周啦，
之後就要開始考試，
我發誓今次嘅考試平均分一定要有７０分！！！
不過我真係好驚下個星期嘅來臨，
因為下個星期有好多好恐怖嘅挑戰．．．
但係下個星期唔過去，
安穩舒適嘅日子就永遠唔會出現．．．
ｅ＋真係覺得好矛盾．．．
唉．．．
（強顏歡笑中．．．）

今日，
又係一個令人唔想返學嘅日子，
又要ｔｅｓｔ、ｔｅｓｔ、ｔｅｓｔ．．．
唉，
救命．．．

今日奮進堂果陣，
全班幫梁德元搞左個一ｄ都唔盛大、一ｄ都唔熱鬧嘅生日會，
（ｍｉｓｓ　ｔｏ仲話佢今年都３字頭嫁啦喎，
不過就算佢唔講我都估到佢幾多歲啦∼）
呢個生日會只係有１個芒果蛋糕同一ｄ用廢紙整成嘅紙碎，
場面一ｄ都唔熱鬧，
因為我地有好多人都做緊自己野，
冇理到出面∼
難得嘅係壽星仔唔介意．．．！？

首先我地就將ｄ用廢紙整成嘅紙碎潑落梁德元度，
搞到佢個樣勁狼狽，
我諗佢真係唔知好嬲定好笑囉．．．
之後全班（？）就唱生日歌，
佢就許願、切蛋糕，
不過就係由ｍｉｓｓ分ｄ蛋糕俾我地∼
我冇食到，
不過淨係聞到ｄ又香又甜，
又係我摯愛嘅芒果味就已經令人口水都流埋出黎啦∼
雖然呢個生日會冇咩禮物、冇咩驚喜、冇咩特別，
但我都知佢個心一定係好開心嫁啦．．．

始終例牌ｄ都要講句：
Happy Birthday to Steven，（佢嘅英文名）
「祝你福如東海、壽比南山，
年年有今日、歲歲有今朝！」
以上講嘅野都係廢話，
以下呢ｄ先係真：
３字頭啦，（雖然已經係左好耐．．．）
希望你唔好再咁兒嬉、成日玩玩下咁啦，
要成熟ｄ啦，
不過都唔好變到咁古板同嚴肅呀，
得閒講下笑都ｏｋ嘅∼
總之就祝你生日快樂啦∼

聽日就係我最驚嘅日子啦，
普通話要考口試、ｄｒａｍａ要自己一個上台做戲、通識要小測、電腦要默書．．．
總之就想死啦．．．
遲ｄ音樂堂又要出去唱歌，
唉，
點解一到學年尾就有咁多野搞嫁．．．
越黎越唔想係王華湘度讀啦．．．