今日淨係返半日，
１２點幾就走得∼
終於都開始放假啦，
好開心呀∼
哈哈！！！
走果陣係門口見到ｍａｙ姐，
跟住就同佢一齊走∼
之後佢話想去將軍澳廣場買ｄ野，
咁我就陪佢去∼
點知佢太慷慨啦，
竟然買左２件蒜蓉多士（＄５）俾我，
真係覺得好唔好意思，
不過點都要係度多謝一下佢∼^,^

之後陪佢買完野就各自走啦∼
返到屋企差唔多１點１５，
食完飯、睇左陣電視之後就即刻開機∼
本來之前上網果陣睇到ｙａｈｏｏ拍賣果度有得賣上面松本潤攞住嘅果款遮，
我都諗住買嫁啦，
今日都係諗住同賣家傾下交收ｄ野，
點知原來把遮已經俾人截左糊先．．．

賣唔到，
真係好失望，
我想買果把遮好耐嫁啦，
但係一直都冇咁嘅機會遇到「佢」，
點知之前咁啱俾我搵到佢，
我本來以為呢把遮會係我嫁啦，
但原來．．．
或者我同佢真係冇咁嘅緣份，
之前咁啱俾我搵到佢，
原來只係個天同我開嘅玩笑．．．
真係諗起都想喊．．．
只係差果一少少，
就可以擁有佢嫁啦，
點知最後我都係同佢擦身而過．．．

唉，
或者人係永遠都冇辦法將一ｄ本來唔係屬於佢嘅野留係身邊，
又或者得到手；
唔係屬於你嘅野，
始終都唔會係你嘅∼

ｅ＋個心情勁ｄｏｗｎ呀．．．
不過我都唔會放棄繼續搵呢款遮，
因為我相信只係果把遮同我冇緣份，
唔係所有同款嘅遮都同我冇緣∼
越難得到嘅野，
人就會越珍惜，
所以我希望有一日我真係買到呢把遮嘅時候，
我係會用珍惜同感謝嘅心黎對待佢，
我仍然相信我總有一日會得到我想要嘅野，
只係唔知道距離呢一日仲有幾長嘅路要行．．．

雖然以上講嘅野實在唔似係我打出黎嘅野，
不過，
以上講嘅野全部都係我心入面諗緊嘅野黎嫁，
我希望藉住呢個機會，
當係提醒自己又好，
其他人都好，
做咩事都唔好咁輕易俾眼前嘅野影響到自己嘅決心，
因為，
萬一就係因為ｄ咁小嘅困難就被考起，
咁將來就會好後悔∼
無論想做咩都好，
都要記住勇往直前，
只要堅持住自己嘅信念，
就冇任何野可以影響到自己∼

講完呢ｄ「懶」感人嘅野之後，
我都要收拾心情啦，
因為我又要繼續搵果款遮啦∼
順便係到賣下廣告，
如果有任何有心人見到果款遮，
就請你同我講啦∼

「在此致以１２萬分感激！！！」

今日１０點半就搭地鐵去左坑口，
全日都落住大雨，
ｄ風係咁吹埋黎，
勁爽∼
不過就淋雨淋到成身濕哂．．．

一去到就開始當值，
同珊珊去左企出口，
仲有２個ｆｏｒｍ１一齊負責唔俾人係果度入∼
有ｄ人好離譜，
因為工作人員係可以係出口入去會場，
有ｄ人就貪方便扮哂野咁跟住佢地入；
有ｄ就話佢地都入得點解我唔入得呀咁喎．．．
都已經話佢地係工作人員所以先可以係出口度入去會場，
但佢地都依然係咁，
真係激死我．．．

之後就俾人捉左上台搬「鄧」，
勁無奈囉．．．
跟住又企到３點幾先有得再上台搬「鄧」，
企到隻腳斷咁濟，
不過就見到呀姐汪明荃，
佢著果件衫好似ｔｖｂ係做慶祝新年ｓｈｏｗ嘅時候著嘅衫，
呀姐佢都差唔多６０歲，
仲ｋｅｅｐ到好似４０幾歲嘅咁，
真係好勁∼

跟住又再上台再落台，
再當值再行黎行去，
搞到４點幾先可以走∼
但我仲未食飯．．．
好彩個機構俾左＄３０午飯津貼我地，
跟住就走得啦∼
行左好耐先搵到吉野家，
食左個＄１６嘅牛肉飯下午茶餐，
雖然唔係咁飽但係都好好味∼
之後又陪珊珊去食ｍ記，
搞到５點幾又返左去會場度睇，
睇左一陣去搭地鐵走人啦∼

返到屋企都７點啦，
功課又未做；涼又未沖；飯又未食，
搞掂哂所有野都已經１０點幾，
唉，
攰；攰；攰∼
聽日仲要返學，
唉．．．

今個禮拜又係好忙，
星期一至星期五都過得好「充實」．．．
最開心嘅就係距離考試唔夠一個月，
諗起好快就升ｆｏｒｍ３就覺得好ｈａｐｐｙ，
因為終於都可以唔洗對住ｄ我唔ｌｉｋｅ嘅人啦∼

不過下個星期開始就有好多測驗啦，
又要溫書啦．．．
星期日本來打算留係屋企做功課，
點知又要去東港城當值，
１１ａｍ－６ｐｍ呀，
變態嫁．．．
遲ｄ　ｄｒａｍａ堂、ｂｃ堂同英文堂又要出去做話劇啦，
ｄｒａｍａ堂就要自己一個人上台對住全班做；
ｂｃ堂同英文堂就要一組組咁出去做．．．
我覺得好乞人憎呀．．．
好驚呀．．．
唉．．．

今日上ｄｔ堂果陣無端端俾鄭ｓｉｒ叫左出去做示範短片嘅「女主角」，
超無奈＋勁樣衰囉．．．
我憎死「１８號」呢個學號呀！！！
最ｌｉｋｅ嘅都係上年嘅「１６號」，
因為佢係由我最鍾意嘅數字－「４」自乘出黎嘅∼

下個星期就正囉，
星期三果日有ｄ老師要去新加坡考察，
所以我地淨係返半日學；
星期四就放佛誕假；
星期五就教師發展日，
唔洗返，
再加上星期六、日，
即係放４日半假，
正呀！！！
不過就有勁多功課囉，
差唔多都有七、八樣，
你話係咪好掃興吖．．．？

今日全日都只可以用「忙」黎形容．．．
上堂上左３堂，
３堂都悶到我想訓覺．．．
之後食完飯就要落去小食部集合，
去參觀海防博物館．．．

上到車，
超臭，
成個車都好似佈滿哂廢氣咁．．．
臭到想嘔．．．
去到果度淨係覺得好悶囉，
ｄ展覽品勁無聊，
冇咩興趣睇∼
不過果度嘅風景超靚，
有個海，
又大風又舒服∼
直頭舒服到唔捨得走∼
我將來一定一定一定要買到／住到一間可以對住個大海嘅屋呀！！！
聽呀ｓｉｙ講話對面岸係調景嶺喎，
調景嶺隔離就係將軍澳，
由我地學校望出去就係海防博物館（鯉魚門）呢邊啦喎．．．

成班人睇完ｄ咁靚嘅風景之後，
呀ｓｉｙ就帶我地遊花園＋行山，
冇計啦，
鬼叫呢間博物館係係山上面嘅咩，
想睇哂ｄ展品就要行下山啦．．．
睇山下面嘅展品果陣，
成個人都提唔起精神同興趣去睇，
虛脫啦．．．

下午嘅天氣勁好，
又熱又焗，
啱啱都係一路吹住海風一路曬太陽．．．
所以上到車之後，
ｄ人幾乎都訓著哂．．．
我都有訓，
不過只係合埋眼嘅果種訓∼

跟住ｄ人勁快咁跑上６樓，（都唔知佢地係咪呌足精神先咁好精力．．．）
點知上到去發現課室鎖住左，
成班人就係度鼓譟，
後尾見到校工攞住鎖匙，
ｄ人就衝左出去攞，
十足十有著數攞嘅咁．．．

返到黎就即刻沖涼，
洗走哂ｄ臭氣同汗，
舒服哂∼

今日２點就落左禮堂綵排陣間嘅週會，
唔洗上數學堂呀，
正！！！
不過就少左一堂，
佢今堂教新野啦，
冇左一堂就更加追唔上．．．

落到去就同一個一陣間會接受訪問嘅人講下一陣嘅訪問程序，
之後珊珊同我講話果個人本來係警察，
為左爭取升職嘅機會，
就應承左上司去黑社會度做臥底，
點知最後俾佢地發現左，
仲將佢打到殘廢（隻腳跛左．．．）∼
我覺得佢好慘囉，
只係為左想升職啫，
就搞到咁．．．
我以後一定唔會同警察拍拖，
因為做警察嘅女朋友係好冇安全感，
你唔會知當佢返左工之後仲會唔會可以平安無事咁返到黎．．．（好似將個話題扯得太遠．．．）

之後等到ｄ人落哂黎就開始週會，
講完開場白就開始睇ｄ傷殘人士演嘅話劇，
個話劇超好笑．．．
之後珊珊就上左台訪問ｄ演員，
佢講到唔係好順暢∼
套話劇嘅導演好搞笑，
好鍾意叫ｄ人做「ｂｂ」．．．
原來佢老婆最近生左個仔，
所以就係咁叫ｄ人做「ｂｂ」．．．=,="

跟住我地就去到一樓嘅會議室，
食左ｄ茶點同埋同ｄ人傾下計咁∼
我食左２件西餅，
味道都唔錯，
不過ｄ西餅好似擺左好耐，
有ｄ硬．．．
之後再搞多一陣就搭電梯上課室執野∼
返到去先發覺數學有功課，
但我地都冇上到堂，
咁點算呢？
於是就傻下傻下咁攞左本數學書返屋企慢慢鑽研．．．
點知落到去見到思琪姐，
佢話我地聽日唔洗交數學功課喎，
真係好無奈．．．

今日２點２０就去到調景嶺地鐵站，
本來以為我會係最早到嘅一個，
估唔到楊芷欣仲快過我．．．
之後等左一陣余晉亨就黎到，
２點半過ｄ之後ｄ人就到齊啦，
跟住１０個人就「浩浩蕩蕩」咁搭地鐵去到九龍塘∼

出左地鐵之後，
我地成班人都好似「迷途的小羔羊」同「自由行旅客」咁，
完全失哂方向，
跟住就係咁係又一城度兜黎兜去，
班男仔就自己走左，
淨返我地ｄ女仔繼續係又一城度出出入入、上上落落，
最後，
我地終於都行到去我地嘅目的地－－香島中學啦∼

雖然呢間學校個名叫香島中學，
但係我覺得呢間學校地下嘅女廁超臭囉．．．
個操場又細、地方又好殘舊咁，
真係好想走．．．
跟住我地ｄ女仔同男仔就分開坐，
點知對面突然有個「四眼鹹濕仔」不斷向我地發出一ｄ極度唔「友善」嘅眼神，
原來佢係度「莊」我地嘅裙底（因為我地坐左係度，條裙就「扯」左上去，所以對面果個「四眼鹹濕仔」就睇到哂），
有２個組員仲好不幸咁俾佢「莊」到哂，
我地梗係極速逃離現場啦，
雖然已經蝕哂底俾個賤人．．．

跟住就上到４樓開始比賽啦，
ｄ人超勁囉，
我淨係覺得我地上台係出醜嫁囉，
一路讀野一路忍笑，
都唔知點解莊ｓｉｒ仲肯俾我地上台映衰佢，
星期一返到去實俾人串死．．．
之後４點幾就走囉，
落到下面仲見到果個鹹濕仔，
佢仲係咁望住我地組嘅果２個「受害人」添．．．
差ｄ忍唔住衝過去打佢一身∼
（「o靚仔」，
唔好再俾我見到你，
如果唔係就見你一次打你一次，
行街睇路呀，
小心會．．．）

跟住我同糖姐、珍姐、楊芷欣同珊珊就一齊搭地鐵走，
我、糖姐、珍姐同楊芷欣就去左鑽石山嘅荷里活廣場行街＋影貼紙相，
首先大家就不斷係度行花園，
行行行，
行到自己都覺得好白痴．．．
之後就一齊搵影貼紙相嘅舖頭，
搵到好耐先搵到，
搞到大家都好煩躁、好唔耐煩，
ｓｏｒｒｙ呀，
最衰都係我唔記得果間舖頭係邊所以先令到大家陪我行左咁耐，
真係好對唔住呀．．．

因為珍姐唔影貼紙相，
所以佢就出左去，
過左一陣之後珍姐就走左囉，
可能係因為佢太悶同太攰啦掛．．．
跟住我地就好快咁影好，
之後就去畫野∼
我地本來影左８個造型，
點知我地揀唔切，
所以最後就只係得返３個造型留得低．．．
我覺得今次裝飾ｄ野都整得幾靚，
但係最衰就只係得返３個造型，
有ｄ唔開心囉．．．
跟住去剪野、過膠，
６點幾就走囉∼

跟住我地就各散東西啦，
最早走嘅係楊芷欣，
因為佢住觀塘；
跟住就到糖姐，
佢住彩明苑；
最後係我，
最遙遠嘅尚德邨∼
６點５０就返到屋企，
返到屋企先發覺我隻右腳腳「爭」俾新鞋整傷左，
流左ｄ血∼
其實一直都覺得隻右腳腳「爭」痛嫁啦，
本身以為係著唔慣新鞋而有嘅刮腳ｆｅｅｌ，
冇諗過原來係右腳腳「爭」俾新鞋整到甩皮同流血．．．

總結今日嘅事黎講，
就只有痛、無奈、憤怒、激氣、出醜、瘀到爆、無聊同小小失望．．．
今日，
就係咁過左啦．．．
唉．．．

今日，
上嘅堂超悶．．．
中文堂，
全組又要出去朗誦，
２個字就可以用黎形容我地嘅表現：「獻醜」．．．
ｂｃ堂，
悶到訓著咁濟，
無聊人講無聊野．．．
ｄｔ堂，
整果個好耐冇掂過嘅模型，
完全唔記得做過ｄ咩，
淨係覺得好好笑．．．
數學堂，
佢又講新野，
完全唔明佢講乜，
成堂係度發「吽哣」（發呆），
就咁就渾渾噩噩過左１堂．．．
中史堂，
講果個又悶，
聽果個仲悶．．．

放左學之後就同左糖姐去大眾書局同佢隔離果間賣碟嘅舖頭睇碟，
我想買Eason嘅新碟《認了吧》，
大眾冇得賣住，
佢隔離果間舖頭就賣＄８５，
不過就唔知有冇ｐｏｓｔｅｒ送．．．
去到大眾，
又睇中左《轉角＊遇到愛》嘅原聲碟（＄９９）同珍藏手繪本（＄９３），
因為原聲碟送寫真集；珍藏手繪本ｄ畫勁靚，
不過我諗諗下都係決定唔買原聲碟，
因為貴，
而且好聽嘅歌我都ｄｏｗｎ哂∼
可能遲ｄ５月中至６月左右就可以買到∼
^,^

跟住再行多一陣就走，
點知咁啱俾莊ｓｉｒ同ｍｉｓｓ莊見到我地，
佢地話：「放左學好耐嫁啦喎，仲唔返屋企？快ｄ返屋企啦∼」
勁無奈．．．
我地係度講緊ｄ人嘅壞話就無啦啦俾佢地見到，
唔知佢地有冇聽到我地講咩．．．
好彩冇做衰野，
如果唔係，
俾佢地睇到同聽到就大件事嫁啦．．．
真係好ｌｕｃｋｙ．．． 

今日超開心，
因為ｍｉｓｓ　ｔｏ今日冇返，
所以我地上少２堂，
再加埋今日唔洗上我最唔ｌｉｋｅ嘅ｄｒａｍａ堂，
一共唔洗上３堂呀！！！

不過就覺得好悶，
因為坐係個位度都唔知做乜．．．
又睇哂ｄ書喎．．．
本來最後一堂呀ｓｉｒ話去買／租「翻生茱羅館」嘅ｖｃｄ俾我地係實驗室度睇，
但佢最後都係失左蹤，
搞到我地仲鬼咁期待添．．．
以後佢講嘅野都係唔好信十足，
因為信佢一成都死．．．
奮進去左４樓補返一堂生命教育，
超級無聊．．．

我唔覺得每個ｄａｙ３上一堂生命教育會令到我地嘅人生觀念改變囉，
淨係坐係度睇ｄ　ｖｅｄｉｏ同聽佢講ｄ自以為好感人嘅說話，
聽到我係咁釣魚囉．．．
又學唔到ｄ咩真係有用嘅野，
又唔係要考試，
咁仲有邊個會真係好留心咁聽佢講野呀？

聽日又放假啦，
又可以訓到「日上三竿」啦，
爽呀！！！﹥﹏ ﹤

終於都到星期四啦，
聽日因為學校借左ｄ課室出黎做會考／高考試場，
所以唔洗返∼
下個星期五都係∼^_^

體育堂玩手球，
佢話要考試喎，
不過點都好過籃球要考試∼
ｍｉｓｓ話我玩手球接波果陣都冇咩問題，
但係就唔知點解玩籃球果陣唔係咁∼
其實我對籃球有一種好矛盾嘅感覺，
因為睇到籃球，
我就會諗起小學果陣睇ｄ人打籃球嘅時候嘅開心同無憂無慮，
自然對籃球就有一種親切感，
但係偏偏我又試過小學果陣係同一日入面俾籃球打中３次咁多，
雖然唔係傷得好重，
但係對籃球就開始有左恐懼．．．

２種截然不同嘅感覺都一齊出現，
你話我混唔混亂吖．．．．
對籃球，
我諗我係比較「愛」佢嘅，
始終係小學果陣，
快樂同開心嘅感覺、回憶係比痛苦同唔開心嘅感覺、回憶多∼

最近真係好忙，
有好多電視劇追緊．．．
星期一就《放羊的星星》、《熱情仲夏》，
另外就追緊２套舊嘅台劇，
《戀愛女王》同《天國的嫁衣》；
日劇方面，
星期二就有山下智久嘅《求婚大作戰》同星期四松本潤嘅《料理新鮮人》，
係咪星期一至星期日都好唔得閒呢？
不過以上提及嘅電視劇都好好睇嫁，
忙就係忙左ｄ嫁啦，
最緊要都係做到ｄ自己鍾意做嘅野，
咁先開心嫁嘛∼
如果做唔到自己鍾意做、想做嘅野嘅話，
就算有好多時間都冇用啦∼

今日上通識堂果陣終於都落雨啦，
落得勁大，
ｄ雨好似一條珠簾咁，
好靚∼
小息果陣出左走廊睇雨景，
ｄ風吹哂ｄ雨入黎，
好正呀！！！
好爽呀！！！

希望星期四都可以好似今日咁落大雨就好啦，
咁我就可以唔洗上體育堂啦．．．
拜託哂啦！！！

星期五放假，
因為ｄ課室借左出黎做會考試場，
下個星期五都係呀！！！
正∼

我覺得教我地通識嘅果２個實習老師教得唔係幾好，
講書超悶，
又成日阻住個黑板搞到我抄唔切ｄ　ｎｏｔｅｓ．．．
ｅ＋上通識堂變左做課外活動囉－－－釣魚．．．
上中文果陣，
佢又叫我地出去訓練，
仲叫我地要做齊哂佢琴日講嘅要求，
但係我地都冇事先練定、夾定，
所以就俾佢話我地ｄ朗誦係爛喎，
勁無奈囉．．．=,="

今日１點就返左學校做中史模型，
所以今日陪唔到ｂｅｔｔｙ去圖書館啦，
ｓｏｒｒｙ呀．．．

我地係小食部其中一張枱度做，
搞到張枱超污糟∼
唔知點解今日有好多人返左黎學校，
有ｄ同學又有ｄ街外人．．．
我地做到４點左右就走啦，
之後我地去左富康買野食，
我同糖姐就去左「大小通吃」買∼
我買左１包＄５．５炸薯條同１「兜」＄６雜果涼粉，
本來「兜」糖水係＄１３，
但係買一送一，
糖姐買左１包＄５．５炸薯條同１「兜」＄６楊枝甘露，
但就唔知點解我地ｄ糖水會變左做＄７一「兜」∼（楊枝甘露＄８）

跟住就成班人一齊去左大眾，
因為佢地陪我去攞新嘅會員卡∼
之後就各散東西啦∼

我今日終於都決定左唔去補考啦，
終於都下定決心唔去，
ｅ＋覺得好輕鬆呀！！！
原來唔迫自己做ｄ唔想做嘅事真係可以好ｆｒｅｅ同ｈａｐｐｙ嫁∼
既然都決定左唔去，
就唔會再幫自己諗藉口，
唔想去咪唔去囉，
有咩理由啫？

終於都到左我最期待嘅星期五啦，
雖然係開心，
但係始終覺得個人好混亂，
唔知自己諗緊咩．．．

星期日就係中級章補考嘅日子，
我仲未決定好究竟去定唔去∼
我根本冇能力應承自己、應承其他人一定會去，
我好驚到時我會逃避，
唔去沙田補考∼
我知道我一定要做決定，
但係去同唔去嘅理由都係我腦入面盤旋，
我個心不斷咁係度掙扎，
成個腦入面都好似俾呢個問題封閉左∼
一方面又驚考唔到，會再一次令自己同馮ｓｉｒ或者其他人失望；另一方面又覺得自己一ｄ都唔想考中級章，考唔考到都冇所謂，反正遲ｄ都會退出交安∼
但係如果我到時唔去嘅話，
我可以用咩藉口黎呃自己同其他人？

講真，
我唔認為自己可以順利考到中級章，
我咁講唔係因為睇低自己，
而係因為我實在太了解我嘅步操水平去到邊啦，
所以我可以肯定即使我去到補考，
都唔一定會考到∼
或者我咁講係有ｄ唔啱，
但係呢個的確係事實，
我冇辦法改變佢∼

雖然唔去補考係逃避，
但係ｅ＋我仲可以做ｄ咩？
自己嘅功力去到邊，
冇人比我更清楚，
然而同時又有好多理由令我覺得我一定要去，
究竟我去嘅原因係因為責任定係自願？
我不停咁問自己去定唔去，
唔單止對解決問題冇幫助，
反而仲令我覺得更加煩同對補考失哂信心∼

逃避雖然唔可以解決問題，
但唔通強迫自己面對ｄ唔想做嘅事又係一個好嘅解決辦法？
始終「勉強冇幸福」，
我的確唔係為左想逃避問題而唔去補考，
而係為左唔想令自己失望同唔開心∼
咁做究竟好定唔好、應唔應該呢？
冇人知道，
亦都冇人可以左右到結局嘅發生∼
唔通去補考但係又要令自己再一次接受失敗係應該？
我一早就覺得自己考唔到，
咁去黎仲有咩意思？
有陣時面對同接受現實咪仲好，
係咪？

我冇辦法回答到以上問自己嘅問題，
或者，
我心入面其實一早就已經做好左決定．．．

今日有超多功課，
本來放左學之後要去交安，
呀ｓｉｒ話同我地練返好ｄ步操，
不過我因為要去圖書館還書，
所以就冇去到∼

我３點４５就離開左王華湘，
４點０６就去到圖書館，
簡直快到破哂紀錄．．．
但係就係因為我唔記得上網續借ｄ書所以今日先要去還書，
仲要罰錢，
＄１５，
都好心痛．．．

返黎尚德就搭巴士，
＄４．２，
１０分鐘就返到黎，
算係值得．．．
借左６本書，
拎到我隻手超痛，
不過我只係用左１５分鐘左右嘅時間就搞掂哂借還書呢２個步驟，
厲害厲害．．．

希望聽日一定要落大雨，
因為我唔想上體育堂呀！！！　

今日就係返學嘅日子，
又要一早起身啦，
真係好唔想呀．．．
換左夏季嘅我，
都係覺得好熱∼
我完全可以體會到到今日都係著住冬季嘅人嘅感受．．．

今日返學嘅野都冇咩特別，
係我眼中，
一樣都係上堂等落堂、返學等放學嘅苦悶生活∼
聽日放學之後希望唔好有任何活動要去，
因為我要即刻趕去圖書館∼
諗起都覺得可悲．．．

都ｅ＋都仲未決定到究竟２２號果日去唔去沙田補考中級章好∼
琴日話俾馮ｓｉｒ知我同珊珊考唔到中級章果陣，
佢雖然好似冇咩所謂、唔介意咁，
但係我知道佢心入面一定好唔開心同失望∼
我都唔想到我退出交安果陣都只係得１個初級章，
但係，
我唔想咁早起身；唔想見到ｄ我唔想見到嘅人同事；想係星期日做功課；想係星期日可以輕鬆下，
所以，
我都唔知點算好∼
我ｅ＋覺得好矛盾，
如果我去考嘅話，
算係為左邊個去考呢個中級章呢？
只係為左唔想令馮ｓｉｒ失望吖定係真心想為自己考一個榮譽返黎呢？

我真係唔知自己想點∼
煩，煩，煩；
忙，忙，忙∼

今日返左去考中級章，
上午練左２次之後，
１１點就放我地食飯，
１２點就返去∼
之後１點就正式開始考試∼

我考試果陣雙腳又係唔夠９０度；
ｍａｒｋ　ｔｉｍｅ果陣又做得唔好；
ｄ制服分又俾佢扣左超多，
所以，
就唔合格．．．
今日嘅表現我覺得都好滿意嫁啦喎，
「雖敗猶榮」啦∼
起碼我覺得自己有進步啦，
就算人地睇唔起自己都好都一定要睇得起自己∼
理得ｄ人點睇你啫，
最重要嘅係你點睇自己∼
佢話５３個人入面只有３個人考唔到，
一個就係珊珊，
另一個就唔識嘅∼

佢話２２號可以去沙田補考，
珊珊話一定去，
不過我就唔知去唔去∼
星期日喎，
又要早起身又要操，
再加上我對呢個考試同交安冇咩熱誠，
所以通常都係唔去嫁啦．．．
但我驚會俾ｄ人鬧．．．

４點３０左右就走得，
之後同珊珊去搵馮ｓｉｒ睇下佢２２號果日可唔可以帶我地去補考，
點知佢話果日要去拜山，
之後就同馮ｓｉｒ講下今日考試嘅野同埋ｄ功課嘅野，
傾下傾下珍姐同葉麗思過左黎，
跟住馮ｓｉｒ就走左∼
冇幾珊珊就開始喊．．．
佢話佢地果組仲未做過中史模型，
２３號要交，
佢之前打俾其中一個組員，
諗住同佢傾中史模型ｄ野，
點知佢唔肯傾仲鬧左珊珊一餐，
佢驚如果同呀ｓｉｒ講嘅就會俾佢地排斥，
但唔傾唔做就會俾呀ｓｉｒ扣分，
本來佢諗住趁今日有時間就做定作文先，
但係佢地連做咩題目都未傾∼
所以就係度喊．．．

幾經辛苦先勸到佢離開學校，
但佢又唔肯走，
就咁企係條街度喊．．．
拉佢又唔走，
又幫佢唔到，
珍姐同葉麗思跟住就行先，
我企中間，
珊珊就繼續喊，
喊到我覺得好煩好想發脾氣∼
之後ｄ人係咁望住珊珊，
之後就望住我，
我覺得超無奈囉，
又唔係我整喊佢，
我又幫佢唔到，
你地既然咁「熱心」嘅不如勸下佢唔好喊仲好啦∼

講真，
我唔覺得以上嘅問題有咩值得喊囉，
仲要當街當巷咁喊，
搞到ｄ人望住哂．．．
佢地唔做野咪同呀ｓｉｒ講囉，
理得佢地做唔做野、排唔排斥你啫∼
最緊要自己做定ｄ先，
起碼自己有分先吖嘛∼
都唔知有咩值得喊囉，
為左ｄ咁小嘅事就喊我覺得好無謂囉，
如果當你面對ｄ大事嘅時候咪要走去跳樓！？

我地仲有好多野要做、要諗、要煩嫁，
你估我地真係好得閒企係條街度陪你、安慰你咩？
你唔好話我不近人情啦，
人係咁嫁啦，
面對ｄ咁小嘅事就已經唔識處理，
咁將來仲點面對ｄ更加困難嘅任務呀？
凡事都一定有解決方法，
最緊要唔好自亂陣腳、驚，
咁得閒驚嘅不如諗下點解決呢件事仲好啦∼
我知人係需要發洩情緒，
但你都唔好企係條街度喊啦，
好似俾人當戲咁睇．．．
要喊嘅就返屋企慢慢喊，
冇人會阻你嘅∼

我覺得佢嘅情緒好大起大落囉，
一時就笑笑口，
一時就喊到收唔到聲∼
我都唔理佢啦，
都唔知點幫佢，
唔通真係嫌自己嘅事仲未夠多、仲未夠煩咩．．．

最近睇緊林志穎（小志）嘅《放羊的星星》；聽住孫耀威（Eric）嘅《思前戀後》；睇住陳浩民嘅《天機變》廣告，
我忽然有一種「似是故人來」嘅感覺∼

我小學果陣已經有睇小志嘅《絕代雙驕》同《天龍八部》；Eric嘅《懷玉公主》同《美麗傳說２之星願》；陳浩民嘅電視劇，
最近，
我好開心見到小志拍佢第一套時裝偶像劇《放羊的星星》；Eric有新歌推出；陳浩民拍新劇∼
佢地３個都出左道１０幾年（小志同Eric都出左道１５年，陳浩民就唔知），
果樣都冇咩點變，
都係咁靚仔同有可愛嘅ｂａｂｙ　ｆａｃｅ∼（除左陳浩民之外）

講真，
小志同Eric都３０幾歲，
人氣好似都係咁勁∼
尤其係小志，
台灣都有新聞話《放羊的星星》播出之後，
收視一集比一集上升；小志嘅人氣都一直上升緊∼
我就覺得佢同Eric都好靚仔，
笑起上黎２個都好「陽光」，
特別係佢地好似有「防腐劑」咁，
一直都係咁後生同青春∼
唔講都唔知佢地已經３０幾歲．．．

雖然我越黎越鍾意小志同Eric，
不過我就一年比一年唔ｌｉｋｅ陳浩民，
因為我覺得佢個樣越黎越衰，
越黎越唔ｌｉｋｅ佢∼
我對佢冇咩好感∼

小志同Eric就唔同啦，
又「陽光」又靚仔，
唱歌好聽；拍劇又好睇∼
最緊要嘅係人心地好，
唔會輕易放棄，
會努力做好自己嘅本分∼
我小學果陣就已經有留意佢地嘅演出，
ｅ＋升上左ｆｏｒｍ２再睇到佢地嘅新歌；新劇，
感覺好親切，
好熟悉∼
雖然佢地係香港嘅人氣唔算高，
但係我知道小志同Eric係會好俾心機做好佢地嘅工作，
即使有人唔認同佢地嘅努力、付出都好，
我知道我都一定會支持佢地，
總有１日人地都會接受佢地、認同佢地∼

加油！唔好放棄呀，我會一直支持你地嫁∼

今日１點就返左學校做中史模型，
返到去坐左一陣，
等齊人同傾埋要用ｄ咩材料就出發去商場∼

首先就去左明儀，
我同糖姐就去左千年店睇下，
買齊野就去左街市，
佢地話肚餓要買野食喎．．．
我同糖姐就淨係買左１枝野飲∼
佢地就勁囉，
買左雞蛋仔、格仔餅、燒八爪魚丸，
仲有冰凍嘅「豆腐花」！？

返到去就開「大食會」，
一路食就一路傾計，
超開心∼
食哂ｄ野就開工，
俞俊傑出左去２次，
加埋都差唔多出左去成個幾鐘．．．
做到無聊就去左盪鞦韆，
ｄ風係咁吹過黎，
又暖又有風，
舒服到想訓著，
簡直唔捨得走．．．
我越黎越鍾意呢個韆鞦∼

之後就返去繼續做模型，
做做下，
（ｓｉｒ）魯榮家就走左過黎，
問我地做咩著體育衫返黎、邊個老師睇住我地，
我地俾佢問到口啞啞，
有３個ｆｏｒｍ１仲俾佢嚇到即刻執野走，
都唔知有咩咁好驚．．．！？

跟住佢就走左過去看更亭度抄低我地ｄ名，
我諗可能會罰我地留堂，
之後ｍｉｓｓ蘇（滿儀）就走左落黎同我地講話下次唔好再著體育衫返黎，
之後就走左∼

其實有好多人都係大搖大擺咁著體育衫返黎嫁啦，
點解淨係捉我地又唔捉佢地？
實在太唔公平啦！！！
做到４點幾就開始執野走啦，
因為５點前要走囉∼

ｅ＋都仲有好多功課未做呀，
仲有４日就返學啦，
１５號仲要返去考中級章∼
對於考中級章，
我已經差唔多想放棄啦，
雖然話放棄係好唔負責任，
但係ｅ＋嘅我仲可以做ｄ咩啫？
唯有聽天由命啦∼
個模型做到一半左右咋，
我地諗住返學先再做，
反正都唔係咁趕∼

點解ｆｏｒｍ２會有咁多令我心煩嘅事嫁？？？

琴日就係中級章訓練嘅ｌａｓｔ　ｄａｙ，
唔經唔覺就已經到左最後一日，
係呢３日入面，
我覺得自己ｄ步操好似比以前進步左ｄ∼

琴日食飯果陣激死我！！！
同左珊珊１２點２０左右去到一粥麵度買雲吞麵外賣，
諗住攞返學校食∼
點知我地等到１２點４５都仲未有任何嘅廣播同通知叫我地去攞外賣，
咁我地就走去睇下，
點知俾我地發現我地ｄ外賣一早已經整好，
但冇人黎話俾我地知去攞，
個經理就話佢廣播又有顯示，
又講左好多次叫我地去攞，
但係都冇人去拎．．．

我地就覺得佢係度砌詞狡辯囉，
因為我地不斷咁睇住個顯示屏，
睇下我地ｄ野得未；
又有留心聽住廣播，
但係我地等左咁耐都冇任何嘅跡象話俾我地知我地ｄ外賣可以攞，
佢仲要話係我地唔去攞咋喎，
激死我囉！！！

返到學校都１２點５０，
好快咁食完就要開始下午嘅步操，
操到３點左右就同我地訓練步操考試嘅程序，
試左３次就去影合照，
之後就再訓話，
跟住就走得∼

琴日係３日訓練以黎最辛苦同最累嘅一日呀，
返到屋企超眼訓，
夜晚１２點訓到今日２點，
勁！！！

步操黎到第二日，
我覺得我ｅ＋操得比之前好好多．．．
之前搞唔清楚嘅野，
經過２日黎嘅訓練已經搞清楚哂∼
或者人經過逆境之後係會識得成長．．．

雖然我講唔上係熱愛校園，
但係見到咁多外人黎到王華湘，
真係覺得好唔舒服．．．
究竟呢種係咩嘅感覺呢？

今日訓練嘅野唔算難，
不過同ｄ勁人比較之下，
我真係發覺自己嘅步操比人地差好多∼
唔係我有心要同人去比較，
只係當同一ｄ其他學校嘅人一齊訓練嘅時候，
係會睇到自己嘅水平去到邊∼

我已經對１５號嘅中級章考試失哂信心．．．
一個對自己冇信心嘅人，
應該點去面對自己同黎緊嘅挑戰呢？

恐怖嘅中級章步操訓練第一日終於都黎啦，
第１日嘅訓練，
我覺得唔算好辛苦，
都算係比較輕鬆∼
如果講辛苦同恐怖，
上個禮拜嘅步操先最攞命∼

今朝６點５０左右就起左身，
８點５５就返到學校∼
諗住仲會有時間俾我戴帽，
但原來，
呢個只係我嘅一廂情願．．．

分好組就開始步操，
操左冇幾耐就要輪流出去講指令，
我講到口窒窒．．．
又講錯哂ｄ野，
勁樣衰．．．
１２點１０就分批上３樓擺野，
之後操多一陣就放食飯∼
同珊珊去左食ｍ記，
１點１５左右就返到學校∼
之後等到１點４０分先開始繼續步操∼

操到４點幾就上返去攞野，
之後再練左一陣就最後訓話，
跟住就討論左一陣就走得∼

其實今日嘅訓練都唔係太辛苦，
只不過見到其他學校ｄ交安黎王華湘步操，
就好似自己嘅領土俾人侵犯左咁，
好唔舒服．．．
同埋見到佢地操得咁掂，
真係覺得自愧不如：
腳又唔夠９０度；
隻腳又成日屈左入去，
仲有好多好多嘅地方係做得唔好．．．
唉，
咁嘅狀況點出去考中級章呀？