今日晨咁早就俾阿媽叫左起身，話要落去飲茶喎。咁我好無奈之下惟有落去囉，鬼咩，琴晚三點半先訓呀大佬。但你總好過留起屋企冇早餐食呀係咪？食完之後又返左屋企做功課，冇計啦，阿媽迫我起今日之前要搞掂哂Ｄ功課佢，咪惟有死死氣咁做囉。你知架啦，剩係做功課好鬼悶架嘛，咪上左八度吹水囉。點知又樣衰左，吹吹下俾阿媽捉到正，俾佢鬧左餐之後繼績做功課。

        做做做做做，一路做到食lunch之前都係咁起度做功課，真係悲哀。食完lunch之後又係番黎屋企做功課，我又係咁做做做做做，做到睇港姐為止。今年Ｄ港姐真係除左果幾個大熱門之外，差唔多個個都不外如是。講衰Ｄ果句，俾你上黎舞台出下鏡咁都真係算你三生有幸。本應一路上我都只顧做功課唔睇佢架啦，點知一聽到有呢個「泳裝問答環節」之後，我即刻放低手頭上既工作走去睇電視。睇睇下，心諗：「死野丫，個樣衰衰地但又幾有身材喎！」，真係個樣唔好都有身材搭救，算佢好在。

        最後結果我諗唔駛講大家都知啦，咪又係果個乜鬼野大熱門葉翠翠贏左冠軍囉。其實我覺得佢又唔係真係咁靚炸嘛，反而亞軍果個仲靚過佢啦，身材都掂過佢啦。我諗如果唔係果個葉翠翠係大熱門既話，亞軍果個一定變贏冠軍啦。

        睇完之後又係咁起度做功課，但求起今日之內可以搞得掂，但點知功虧一簣，十二點之前都仲未搞得掂。好在阿媽格外開恩，將限期延遲到聽日，如果唔係我禮拜二實冇得去網聚~~

        呢牌八度唔知乜野事呢，突然間軒起左一股「自貼潮」同埋「文學潮」呢。「自貼潮」我都可以話跟足啦，但「文學潮」既話雖然都有興趣寫下，真係冇乜興趣打咁長既野，認真係「心有餘但力不足」呢~~。其實我想問一樣野，唔知繼呢個「自貼潮」同埋「文學潮」之後會係乜野潮呢？莫非會係由鬼版版主某兔主理既「奇幻潮」？！如果係既話就真係唔好搞我啦，小弟基本上都唔係幾好呢味野的~~

        今日又完左囉，但鑑於近日小弟發現本版留言過少既關係，希望各位睇完後都留過言啦，我諗唔會阻你好多時間炸呱？

-----------------------------------------------------------------------------------------------

        要問我借暑期功課答案就要快啦，我阿媽就黎要收起我本作業架啦~~(私人推介：數學功課。點解？因為我有大部分都係補習老師教既~~)