今朝晨咁早起左身陪阿媽同阿哥出去食早餐，但當我好似好鬼精神個陣，佢地可能唔知其實我都仲係好眼訓。唔知點解？話說我琴晚吹水拎到第三千個post之後，就繼績係咁吹吹吹，直踩到四點半先捨得訓。所以搞到訓得四個幾鐘又要起身應酬佢地，真慘~~

        食完早餐之後出左荃灣補習，要補到成下午六點，又係慘。食完飯之後買左本「Death Note」第七期睇，睇完之後不禁驚歎主角夜神月既智慧之高，簡直係能人所不能。故事完左第一部了，o岩o岩開始入第二部，冇睇開個Ｄ我建議應該睇睇，劇情都幾刺激架。之後繼績去補習，補呀補呀補，補到我癲咁滯。補完之後搭車番屋企，搭車個陣諗住睇埋金庸本「連城訣」佢，點知睇睇下已經覺得好鬼想訓，最後睇左幾版就訓左囉~~

        我訓訓訓訓訓，訓到差唔多到總站先捨得醒，差得唔知要落車，哈哈哈。返到屋企即刻有飯食，又俾阿哥話：「你次次都係o岩o岩我煮完飯就返架喎。」。大佬呀，你估我想既咩，話唔定你次次都較正時間撞我返炸呱。食完飯之後又上左八度吹水，愈黎愈鐘意呢個forum。點解？我鐘意呢度人少少囉，人太多既話反而仲唔好傾。我諗我應該今晚又係有牌吹架啦，預我兩點後先訓啦~~XDD*

        上去吹完水之後，o係明珠睇左舊版既「朱古力獎門人」呢。我諗佢應該都係同而家上緊個套一樣，只係Ｄ畫應該會靚番少少~~

        今日又係咁就完左啦，歡迎各讀者看後留言~~