真係撞鬼，晨咁早(早上七點十)起左身搭車出去美孚搞個乜鬼野義工活動，出到去仲有成三個字剩，咪去左七仔買早餐囉。九點四，都仲未見人齊，有Ｄ人已經開始咒罵。突然，我地聽到一個令人震驚既消息，原來未到個三條友，係就係出左Ａ出口啦，點知唔係地鐵個Ａ出口，而係「西鐵」個Ａ出口，真係吹脹~~

        咁好啦，阿海叫我地班男仔同某幾個女仔搭小巴上去先，而佢自己就留守小巴站，真係偉大。而當我地上哂車個陣，又咁唔好彩剩番阿海一個o係小巴站度，我諗佢肯定激死。而當我地架車行行下途中，竟然見到出錯閘個三丁友，我地發現佢地孤獨咁行緊上山，咪同佢地三個揮手以示鼓勵囉~~

        入去之前仲發生左個小插曲，話說係咁既，搭小巴個陣都有Ｄ雨架啦，落車之後就一滴都冇，咁我地「長天七傑」咪行埋一邊吹水囉，點知吹吹下個陣無啦啦落起大雨，個個女仔都拎哂把遮出黎，我地班男仔都有Ｄ一齊拎埋，我初頭見咁細雨都無謂拎把遮出黎，咪同佳一齊淋雨囉。點知個天就係都要同我玩野，搞到Ｄ雨愈落就愈大，我迫於無奈咪拎把遮出黎遮埋佳囉。點知我o岩o岩上網睇番佳個日記個陣，仲要俾佳話我陪佢痴線，真慘~~

        上到去入埋去之後，我地成班上左個hall度開會，開會之前由於要等人既關係，我地成班人去左後面俯視貨櫃碼頭既景色，可惜個陣落緊雨，能見度又低，如果唔係實好靚。我地仲不斷討論呢塊地皮拎黎起呢棟野其實好o徒，如果將佢變做高級住宅區唔知會點點點點點……

        吹完水之後正式開波，認識完呢棟野既背景之後，開始逐層逐層參觀。但唔知去到第幾層個時，個社工話：「由於時間既關係，我地參觀埋下底個層之後就會上番去。」，咁我地即時啞哂，但係又可以做Ｄ乜呢，唔通自己一個走左去咩。上到去填埋分問卷之後就走左囉，走個陣發覺好似太耐冇做過運動，所以當佳問我地有冇人同佢一齊行落山個陣，我第一個答應呢。我仲叫埋其他長天人落去，可惜有兩個懶過頭，唔肯同我地一齊。我地落山個陣，仲討論埋呢個國家大事呢。

        (事後番到屋企諗番，發覺今日成個朝早真係過得好唔抵，事前諗住上去會做Ｄ有意義既野架嘛，點知後來先發覺今朝做過既野原來都係冇意義既……)       

        之後出左去銅鑼灣行街，其實銅鑼灣都冇乜街好行，所以我去左「宜家」坐左o係張梳化度睇書，睇左我成三個幾鐘，好在又冇乜人理我~~。另外，特別推介「宜家美食部」既$5一隻熱狗，都幾好味架，自己任落醬料，想加幾多就加幾多，正！

        同阿媽食完lunch之後，轉移地點去左中央圖書館睇書，繼金庸既武俠小說之後而家要睇既係黃易既尋秦記。睇到成七點幾先走呢。番到屋企食完飯之後，又係咁上網(八度網上論壇)吹吹吹水，真爽~~。最意想不到既係我竟然拎左第三千個post走呢，係繼佳哥拎左第二千個之後又一創舉呢！之後差唔多個個都淆哂，上次第二千個post之後又係咁，真係啞哂……

        今日又咁就過左啦，歡迎各位讀者看後留言~~