今日28號,係我做主席既最後一日~咁就一年了~
回想呢一年,真係發生左好多事,首先同一班志同道合既朋友一齊上莊,由當日雄心莊志,到做到灰左,然後又因為大家既關懷而起返身,其間經歷唔少風風雨雨~呢一年最大既獲益,就係學識同其他人相處,同埋識到一班好朋友~我地以後都要係好朋友呀~^_________________________^
回想上莊之前,唔係好識同人相處,只係小小一件事,已經令自己好膽怯,朋友亦唔係好多~呢一年變化真係好大,呢一年,我由唔敢去表達自己,到而家處變不驚,雖然未至於大件事都唔驚,不過已經唔會好似以前咁拘謹了~自信心亦加強了~本來我最大既缺點係冇自信,經過一年訓練,而家真係好左好多,最少我對自己既理解多左,諗野理智左,清楚自己咩做到咩做唔到,跟據我室友既觀察,我已經唔再膽怯了~以前同朋友相處既膽怯,而家都唔見晒了~^^就算呢一年GPA俾佢拉低晒,我都唔會後悔,因為呢一年我得到既野俾失去既真係多好多~~~
感謝大門,劉sir,Yeah,Ricky,Chris,Aaron,Milky,聰,田少,Ken,波,JointU既各位(排名不分先後)~大家俾我既野實在太多了~感謝大家一直幫助我,如果冇左大家,我都唔知點好了~亦都好多謝大家肯同呢個又笨又唔醒目既我做朋友,以後請繼續多多指教~^^(90度鞠躬)
------------------------我是分隔線--------------------------
見到大門同阿Chris個xanga都打左上位回憶錄,諗諗自己冇理由唔打的~
當初讀副學士時識到一個朋友,佢當時係城大上左編輯委員會,從佢口中知道上莊係咩一回事~當時見到佢好忙好忙,忙到堂都冇時間上~本來冇諗住步佢後塵的,不過見佢同班莊員好好朋友,心諗如果我都有班咁既朋友就好了~當時我身邊一個睇動漫既朋友都冇,感覺好孤單~而我當時都知道有動漫畫同人誌存在,因為身為cosplayer都有去秋祭,點解變得咁想上漫soc支莊已經唔係好記得,只係當時本著一個想同一班好朋友一齊相處一年既心,心想'就算只係一年都好,就算班朋友一年之後會分開,我都好想捉住今次既機會~!!因為我真係好想好想有人可以同我一齊睇動漫,甚至一齊cosplay,一齊玩~!!我已經受夠一個人既日子了~!!'結果知道自己上到degree之後,就從朋友處得到reg day既資料,問埋要上莊既話應該點做,然後就帶埋錢直奔(雖然話直奔,不過都入左好多個會= =")動漫畫同人誌既攤位,報左漫soc既O Camp~
O Camp既時候識左Tony,阿民佢地,另外識左組爸阿Ken,佢當時俾左個好好既印象我,當時更加堅定左我上莊既決心~就係咁,O Night我都去埋~識左大頭,答應左同佢一齊組莊,正式踏上上莊之路~!!本來當時係唔夠人的,不過後來阿威那邊散左,我地就吸納左大門,阿Chris,Milky,聰等等既人才,組成一支莊~初次意識到當時既主席唔係好'行'係見到佢forum既一句話'EVP我打算俾一個JU既人去做,人選係大門'<--呀~由於影響甚遠,因此要講埋,多多得罪......打電話同Anna傾過,本來唔想上的了,不過Anna極力挽留,當時既諗法係兩個副主席一齊夾住個主席做野就萬無一失~
第一次定pose係去藝墟時,由於知道大門想爭EVP,老實講當時對佢印象平平,而家就當然唔同啦~^^當時有了初步定案,後來去左一間樓上cafe傾,各人既位置都定好了~
進入promotion period,覺得支莊既士氣唔係咁好,當時我都只係盡力而為,見到當時既主席同內副因為忙而唔得閒,我能做既就係幫佢地分擔工作,於是就不停叫人嗌莊,做左好多內務野,同莊員都混熟左好多~當時一齊cosplay鋼鍊~成班一齊都幾有型~^^經過驚險萬分既consultation後,我地就正式上莊了~
上莊之後莊既風氣依然係有問題,人事會都開過一兩次左右,唔知點解個個會都要開成日,初時唔係好明個問題係邊,後來從旁人口中發覺問題所在,開始注意事態發展,沒想到當時好拍檔請辭,由於我極力堅持,最後就移上IVP的位置~
做左內副之後,我主要既工作就係幫助主席處理日常大小事務,莊內既問題愈黎愈明顯,暑假時,回想自己仲積壓一大堆工作,深深感受到做一個咁樣既內副既辛勞,當時處事態度亦開始改變,慢慢由軟變硬,開始用強硬手段去處理莊內問題,立場也變得明顯~秋祭方面幸好後來有另一位PIC阿Ken既加入,我地處理左唔少問題~直到第三次人事會,我終於下定決心想將問題解決,可惜當時得不到支持,因此萌生去意~
O Camp時我既心已經灰左,心想呢幾日後我就退莊,唔再理莊務~誰知大家都察覺到我的心神彷彿,Milky與阿Yeah更受其他男莊員所託前來慰問,當時我感受到大家對我的關懷,因此把問題如實說出,而其他莊員於當晚亦同我一齊商量大計,就係個晚我先知道O Camp既問題,同埋大家心入面真正既想法~當時我決心留低同大家一齊共度難關~感覺上,當時大家真的已經是好朋友了~
我地好努力咁將個O Camp包裝得好好睇睇,旨在組仔組女玩得開心~然後,莊內就正式經歷一次大地震~而我就成為署理主席~當時既想法係大家同心合力,有福同享,有難同當~帶住呢份精神,我地就迎來了秋祭既考驗~當時感覺上下一心,大家都團結起來,當時感覺就好像大家都成為了主席,我地無分彼此,大家都為左秋祭努力,我只係稍加提點以及提出建議,其實好多野都係大家自發性諗的,而我亦盡力做好我崗位的工作~結果秋祭完滿結束,身為主席的我同副主席既Ken一齊請大家食左慶功宴~當時既感覺真係非常開心又非常滿足~覺得自己同大家一齊成就左大業,呢一年總算不枉過了~
秋祭之後迎來了招莊會,我地見到自己既仔女,而今日,他們大展拳腳既時候到了,我地亦正式落莊,回想呢一年,識到大家真係我既福氣,我打從心裡喜歡著大家~我地以後都要係好朋友唷~^^ |
