星期二由大陸返黎時, 台海地震, 震斷咗幾條海底電纜, 令我直到今日先可以上到網。

由大陸返來後, 便是補課, 第一日的 UE 補課, 我很認真地做每一份卷, 不過我發覺 Section E 我表現有每況愈下之勢。

第二日 Chem. 補課, 冇溫書的情況下做咗 06 past paper, 應該唔會拿二分咁少。

星期四 Ms. Yeung 生日, 出咗去荃灣 Pizza Hut 食野, 之後去悅來打機。

尋日元旦同家人出咗去 Time Square, 原本是要看倒數, 不過太多人, 去唔到 Time Square, 結果去到一間 M 記食野, 而當我同妹妹叫緊野食的時侯, 2006年已無聲無息地溜走了。

原來2005年元旦, 爸媽及妹妹也是在尖沙咀一間 M 記迎接 2006 年的到來, 但我當時不想出街, 結果在功課堆中渡過了2005年。

其實, 今年我也不太想出街, 我寧願獨個兒在銅鑼灣的石屎森林中漫步, 也不願和家人一起, 而爸爸在 M 記指著鄰枱的一羣年輕人, 對我講此時此刻, 我應同他們般一樣才是, 對他的說話有點意外。

今年的聖誕假在荒廢中渡過, 我的學業毫無寸進, 至於新年願望, 我仲未諗。也許有, 不過我卻是一個不會為我的願望作出爭取的人, 許了願也沒意思。

星期日至星期二都冇做過野。

星期日起身時喉嚨痛, feel 到自己會發燒, 結果下午真係發燒, 望住 Chem. 既 passpaper, 份筆記就係隔離, 我心知拿起它們來看便會得到答案, 但我就是連這份氣力都冇, 結果全日都做唔到野。

星期一及星期二被父母以 「阿婆有事入咗醫院」為理由叫咗返大陸, 仲話功課可以帶上去做, 雖然婆婆人在醫院, 但卻像個沒事人一樣, 令我懷疑是否有必要上大陸探佢, 而且我根本冇時間清功課, 因為去完地點 A, 就即刻坐親戚既車去地點B, 之後再去地點 C , 由於未完全 recover, 已經有些不適, 加上舟車勞動, 令我係坐車回親戚家的時候在車上嘔, 以為嘔咗就冇事, 點知先係開始, 回到親戚家後又腹瀉, 又嘔吐, 之後, 一點, 五點, 以及九點起身後, 我都要去 toilet 一轉, 都係腹瀉。

第二日腹痛持續, 「旅程」仍然頻密, 有少少虛脫, 好辛苦, 又係做唔到野。

返到香港, 由火車上的電視得知自己可能是諾沃克病毒的受害者, 因為我係星期六同屋企人同埋親戚出尖沙咀食晚飯, 期間仲食咗不少海產。

今日起身先好返, 不過似乎好多 Bio. Group 既同學都冇乜點做功課。

自從陸運會完咗之後, 我都冇乜機會去打日記。

陸運會完咗之後既四日假期, 我都冇乜點做過野, 我只用兩日時間去清每日兩題, 以及做咗一些中化。而清 Bio. notes 既目標卻失敗了。

之後返回學校, 也許是受到即將到來的 Chrismas party and Chrismas holiday 所影響, 冇心機上堂。

星期三幫手搬搬枱枱到八點幾先走。

聖誕禮物方面, 除了朱古力, 我想不到有甚麼東西可以送, 最後我買了一盒貝殼朱古力, 雖賣相吸引, 但我卻未食過。

星期四既 Chrismas party  先有個  Chrismas English song competition, 拍片。既然部機既性能及個人技術都冇 lucy 及 大乳牛咁好, 我惟有專心拍片, 返回課室時, 兩張 1GB 卡已經爆咗。

個 Party 攪得唔錯, 主要活動分別有食野, 影相, 玩遊戲及將某些人搬出搬入及拋起。 我食咗勁多隻雞翼, 不過玩遊戲時我仲係投入唔到。之後一行人係 party 完咗後出咗去 hea, 先去睇傷城, 唔錯。再去食野及打機, 八點幾歸家。

假期第一日仲係冇心機溫書, 惟有收拾書枱, 結果執咗出來既垃圾可塞滿兩個垃圾袋。

Check  過張功課表, Chem. 既功課實在是太多了, 恐怕係28號之後我先可以溫其他科目及清其他科既功課。

尋日係陸運會第二日, 同尋日一樣, 同 M.Y. 和 trissie 坐佢地爸爸的車到城門谷運動場。

不過可能由於我們看自昨天的情況並沒有我們想像中的惡劣, 所以意識上鬆懈了, 而且係 checkpoint 既人亦冇前日咁好, 所以都幾亂, 其實我都唔係好明點解今日咁多低 form 既人想出 checkpoint , 特別係 green house, 而 trissie 更因為一個小孩而大動肝火。

下午食 lunch 時段竟然下雨, 仲愈落愈大, 之後校方決定分班在看台上集隊, 再分社坐, 而 4x400接力賽則腰斬。於是, 我們便要作出一連串的部署, 之後學生會及四社在莫 sir 既要求下冒雨係跑道上上演了一場 gag show, 而各 checkpoint 既 prefects 可能將專注力放晒係跑道上, 故此經常犯錯。

而綠社再次成為全場總冠軍。

而 trissie 亦係 lunch 之後愈做愈有 「火」

臨近頒獎禮, 以何古為首的另一個串燒三人組由黃社看台衝落地下, 造成了一片混亂, 最後連累我不能在看台上觀看頒獎禮。

件事雖然解決了, 不過我覺得仍有不足之處, 若有下次的情況, 不應好似今日咁, 一大班人跟住佢地三個走落黎, 係下面追逐, 應該搵幾個人係遠處監視, 由得佢地四圍走, 頒獎處附近勁多人, 佢地唔會走去搗亂, 佢地即使要跨出陸運會會場, 都由得佢地走, 因為佢地除咗訓導之外, 任何人都阻止唔到佢地, 跟住要搵另一個人 call 冼 sir 黎, 等佢出面解決佢地, 咁先啱。

不過總括來說, 此次陸運會, Prefects team 無論係事前準備, 開頭, lunch, 以陸運會進行期間都比去年好得多, 錯誤, 一定有, 不過今年的錯誤不如去年般嚴重, 雖然今年既運作係我眼中並不是十全十美, 但都十分難得。

trissie 竟然出乎我意料之外, 對下屬作出訓話之後再鼓勵返佢地, 我自問不如。

希望 prefect team 係跨過此難關後, 未來數月的 task 都能輕鬆面對。

之後同 7B 同學影咗一大堆相, 之後去酒樓打邊爐, 再到機鋪打機, 十二時才歸家。

老實講, 係機鋪玩 scream 終能令我找回失去兩年的 sence of achievement.

今朝六點起身, 六點十一個字同 trissie 及 M.Y. 搭佢阿爸部七人車直去城門谷運動場。

其實幫 Prefects team 手, 某程度上是彌補去年的遺憾。

一開始仍有些混亂, 但之後各人順利 stand by, 好。

之後既開幕儀式係我係裘記讀七年書以來最差的, 國歌 jam 咗, 而校歌的歌聲只是偽造出來的。

雖然 trissie 順我意, 將我放係我最喜歡的 checkpoint , 仲要係全個二樓既 checkpoint, 不過都好累, 係兩個社的 checkpoint 之間企咗一陣, 就要穿過長長的走廊, 到達另一邊的 checkpoints , 未跑三千時已經有點累, 而三千米在練習不足及鬥志不足的情況下, 跑出個甲組第六出來。

換衫後繼續在各 checkpoints 之間徘徊, 直到放學, 累, 但心情不錯。因我最害怕的兩樣事 ( 三千米及 Prefects team 的開頭不好) 均克服了。

之後處理完 Prefects 既一些事, 便即刻以最怏的速度走到優皮士食野, 再去交補習費, 其實我心中都唔肯定一定有用。

之後再同謝錦聰在荃灣的街道上暴走, 去搜索各茶樓搜索, 不過我們最後得出一個結論, 就是只有青衣的酒樓才行。

全日的可惜之處便是不能像 lucy 及大乳牛般四處遊蕩, 四處影相, 我只影咗幾段片, 幾張相, 全是 prefects team 的。

爸爸話我練跑咁耐依然毫無突破的原因是個 「心」唔得, 而唔係體力上應付不來。

自從發現了學校圖書館內放了一本叫「英皇八十」的攝影集, 我便很想拿來看看。

不過, 我總是覺得在自己學校看別校的東西有點兒那個, 而且我亦很好奇為什麼圖書館方面會決定會放這本書在這裡。

攝影者為水禾田, 草草地翻了幾頁, 已感到是他的作品, 相片沒有用上什麼特別的攝影技巧拍得, 而且相片中亦沒有人, 但我仍在相片中感到一點東西, 也許是人情味吧, 我覺得是水禾田的相的特色。

有人認為人們覺得水禾田的相拍得好, 是因為名氣, 所以他隨便拍一張照片也會使人覺得好, 但我相信, 一個人要建立自己的名氣, 必會有一番驚天地, 泣鬼神的作為, 而那些作為, 必可證明那人本身有一定的實力。

今日係班際籃球比賽, 我特登帶部機返去影相及拍片。

我發覺其實睇一個人影相可以看出他是一個怎樣的人, 例如我不懂多角度思考, 我影相時便忘記了要從多個角度影相。

「 有些朋友問我那裡來這麼多靈感, 這麼多創建? 為什麼同一條街裡, 你看到的東西並不和我一樣? 這其實跟經驗和學識有關。 除此之外, 還有是學不到的性格, 只有性格才令一個人偏重於某一角度, 而這一角度可能是取勝先決, 但亦可能是失敗的盲點!」- 龍君兒。

我覺得這段文字很有意思。

尋日上午的堂完左後同同學去咗五樓打藍球, 不過我總是鼓不起勇氣帶波向前衝, 個波一到我手, 我便會在十秒之內將個波傳俾人, 其實我到唔知我係個 team 入面有乜野可以做, 冗咗。

下午出咗去參觀美術館, 繼小學六年級後第二次進入美術館, 不過卻是第一次認真的看畫, 看由巴黎龐比度中心運來香港展出的畫。

望著那些畫, 我會想那些畫點解會成為名畫, 也許除了畫功外, 畫也表達了畫家對某事物的看法, 所以才成為名畫。

在全場的眾多作品中, 我最喜歡吉拉爾.加魯斯特的《古典的獵戶座、印第安的獵戶座》

之後去睇中國山水畫, 我不得不坦承我比較愛看中國山水畫, 也許西方的名畫過份抽象, 看著它們, 經常要猜想畫家想表達的是什麼, 相反, 中國的山水畫則比較簡單, 欣賞的角度比較接近技術層面, 即使要表達 「感興」, 也比西方的來得簡單。

跟住就同同學去咗參觀 哥德堡號, 可惜不能山船觀看。之後同同學食飯, 八點幾先返到屋企。

全日影咗十幾張相, 拍咗幾段片。

不過我覺得用 M mode 影相真係要花大量時間係 set 快門, 光圈, ISO, White balance , 色彩及測光模式等上, 搞到我影相時好論盡, 以後同人一齊出街都係用返 情景模式先得。

而且我亦仲係不太懂得構圖, 而且我亦不太喜歡開閃光燈, 因部機既閃光燈太 「硬」。

而且部機係 ISO 200 時已出現雜訊, 難怪影夜景唔多得。

今日放學後出咗去荃灣楊屋道睇裘記對全完中學既籃球比賽, 結果全完比裘記徹底地屈咗肌。

也許是級數的分野, 全完球員每入一分, 全完的學生便歡呼一次, 好似成世冇入波咁, 反而我都唔係好明點解趙勁入咗波之後都仲要比教練鬧。

不過 luby 狀態不佳。

也許教練想裘記嬴得完美, 嬴, 只是必然的事。

返到屋企換衫去運動場練跑, 不過我發覺自己的進步十分少, 有些擔心自己不能在比賽中發揮真正實力。

尋日返到屋企 double check jupas guide, 先發覺原來我擺係 3 rd choice 既3478「醫療化驗科學」中的 Special Requirement 中列明 ' Applicants should have normal colour vision ' , 無奈下再改一次 choice, 原全打亂咗陣腳。

不過講開又講, 其實我所選的科目, 大都是齋睇名, 其實我對於該科的畢業生出來社會後有什麼工作可選擇, 前景如何等, 我都一概不知。

其實我都只知自己暫時對攝影有興趣, 係個二十多個 choice 中, 有很多都冇乜興趣, 有興趣的也許只有那些視光, 藥劑, 心理學, 中大的心理同藥劑都要幾條 A 先入到, 黑仔知道我將佢地放入我的 choice 中之後話我發夢, 視光, 大乳牛話個樣要潮 D 先得,不明白。

原來我選科正如我的為人一樣, 只對最好的有興趣, 其他的都不屑一顧, 也許我不懂甚麼叫 「看開些」及「放下」。