琴日見返個舊朋友, 數數下, 我地最少5年冇見, 但間中都有icq or電話既... 我係o係97年7月1日識佢架...識左都7年8個月喇!! 佢見到我話第一句就話我瘦左好多, 又話髮型唔同左! 之後行街時又好多次話我瘦, 又話我高左... 高就應該冇高, 可能瘦覺得高d啦...

近呢兩個星期夜返屋企, 9點幾10點求其爬兩啖飯就呢埋o係房! 呢幾日放假仲食得少野, 前日星期五中午飲完茶之後第二餐就係琴日下晝5點幾麥記既芝士蛋糕, 大大話話都隔左28個鐘...再之後o個餐就係今日下晝5點幾, 食左幾塊薯片, 一條蕉, 半罐可樂, 同上一餐隔左24個鐘, 再跟住o個餐係o岩o岩食既一餐正常住家飯! 埋位食飯, 有個細姨摸住我塊面話我好瘦, 兩邊面又"lup"左... 心諗...有冇咁誇呀?? 返屋企o個陣都有諗下自己係咪瘦左, 自己又唔係好覺喎, 但條牛仔褲又好似鬆左少少咁啦! 返到屋企上磅... 嘩....唔係丫... 得返93磅??? 有冇搞錯??? 3年前做pine link時最輕既體重!!!

ummmm... 都好丫, 夏天就到...瘦d好丫~

========================================

回想起...以前唔滿意既都講過, 點解我講時你唔聽, 要第三者同你講同一番話你先聽? 先知自己做得唔好, 先知自己要改?? 要改既, 一早就改左啦... 呢d係你既性格, 我相信係冇得改... 話會改...只不過是空頭支票... 除非真係實實在在看到, 感受到有改變! anyway... 改唔改, 其實與我再沒有關係... 我都唔會再感受到~

講咩都冇用... 信心...怎樣才可尋回? 沒有信心, 講什麼都沒有用!

========================================

6年黎...自己過既一個easter holiday...

6點幾扎醒...好嬲!! 即刻send左個二百幾個字既sms去鬧佢! 話佢開房同白金頸鏈既事!

9點幾佢打黎.....好激動!! 佢發誓冇開過房...我咁話佢係毀佢清譽, 佢會告我....其實當時冇心聽佢講野...只係應左幾聲, 佢講完就收線喇!

再過多一陣, 佢又打黎...今次打黎都激動! 但講既野係環繞佢冇第三者, 講返佢同個女仔既關係, 仲話個女仔點醒佢好多野, 佢自己一直都有野做得唔o岩! 佢明白我去戲院係因為我唔信佢, 我唔信佢係因為佢有野做得唔好! 又明白同原諒我打佢o個一巴, 係因為我仲緊佢, 仲愛佢! 唔想再聽喇!! 夠喇! 我求佢唔好理我...唔好搵我! 但佢要我應承佢當我冷靜落黎打俾佢! 其實我真係覺得唔須要... 唔會再o係埋一齊, 又做唔到朋友, 點解又要打俾佢?? 佢話真係好想同我傾, 就算冷靜傾完唔可以一齊都想將件事搞清楚... 佢仲話個主動權o係我到...佢會等我電話...仲叫我唔好諗以前同埋唔好拖以前d人落水, 咁樣即係自己傷害自己...

下晝同朋友出左尖沙咀買鞋...之後去左旺角...我仲買左一set kitty扭蛋機俾自己...好靚好得意!! 之後7點就返到屋企, 因為上唔到diaryxp, 個朋友remote我個電腦整...整左好多野都唔得! 最後我打上isp問, 佢都唔知咩事, 話會叫師傅睇睇, 兩日後覆... oh....

嘩...終於開到喇~~

===========================

March 25,05

做左一件蠢事...又login左佢百老匯個acc, 知道佢訂左飛同人睇"見鬼10", 即刻打俾佢問佢係咪約左人睇, 佢唔認... 所以即刻搭的士飛去奧海城買飛入場!

入到去果然見到佢同個女仔一齊, 我知佢叫咩名, 係邊個! 今次好叻, 睇晒成場戲先走... 散場時佢發現左我... 佢話我唔o岩!! 又係我唔o岩!! 之後我入次所搵個女仔! 講左d野佢知! 佢叫我唔好誤會, 佢唔係第三者, 只係朋友! 其實就算佢係第三者, 我都唔會憎佢...

之後出到去, 見到佢好嬲, 捉住女仔就走! 我叫佢講清楚, 冇野既咪講清楚囉.. 拖拉左好一段時間, 我狠狠地打左佢一大巴! 隻手好痛....但...個心仲痛! 點解要呃我??

返到屋企第一時間攬住媽咪喊! 之後叫4哥車我去執野! 夜晚9點半上到去...得亞麻o係到!

思思: "亞麻....(此時亞麻用好奇怪眼光望住我!) 我執緊野呀...亞麻!"

亞麻: "做咩執野呀?"

思思: "分手咪執野囉...我返黎探你丫"

亞麻: "哎呀...個哀仔....幫唔落架...(下刪幾百字~)"

思思: "亞麻, 條鎖匙幫我俾返佢丫..."

亞麻: "唔好...你袋住啦...你上黎探我架嘛..."

思思: "我打電話, 你開門俾我咪得囉..."

亞麻: "我唔聽電話, 唔開門架!"

咁我就將條鎖匙放o係台面...

當晚, 我打左俾kathy... 我明知會俾佢串...不過都想佢知... 仲話俾我知佢之前返大陸dup骨有開房...仲有...佢送左自己條白金頸鏈俾佢, 不過佢掉左喇! 好嬲...佢話我知條鏈打波唔見左...我仲朦盛盛用3千幾蚊買一條俾佢!! 最後同kathy傾到3點幾就訓喇!!

差唔多lunch time你send左個email黎問我睇唔睇見鬼10, 當時其實唔想reply, 但我reply, 因為我驚你打俾我問我有冇返工, 所以就叫你睇我日記先~ 你話開唔到我日記, 所以就copy左俾你睇。

lunch返黎你reply... o個刻, 覺得你終於都認, 但再睇多次...我知你係講緊悔氣說話! 我唔係想聽悔氣說話, 要講既, 只係想你講真話! 打電話俾你, o係後樓梯講左半個鐘... 講完後其實都冇解決過!

諗通左...其實你同邊個一齊都唔關我事啦...你覺得開心就得喇!

"真正愛著一個人, 你會願意放開手。 如果一直抱緊不放的話,你最愛的不過是自己。" 一諗到呢句說話, 個心就好過好多...

========================================

共你一再糾纏　那麼欲斷不斷
眼淚和纏綿的片段　話過再不留戀
跌在愛與痛的邊緣　我的氣力在耗損
只怕我　只怪我　舊賬不懂再算

曾經好天真地覺得大家走大家既路總會有匯合點, 當大家同時到達匯合點時, 就會彼此珍惜對方, 一齊行餘下既路... 但原來就算有匯合點, 大家之後都有可能要走唔同既路, 就好似一個"X"! 兩個人由唔同起點出發, 到了匯合點相遇, 大家都以為大家之後行既路會一樣...但唔係架! 匯合點後都會各行各路, 以後都唔會再有匯合點!

曾經好相信一個人, 佢講既任何大話都信以為真, 唔會懷疑! 但...信人都要附出代價...會失去尊嚴, 失去自己! 曾經都相信過可以再信任曾經呃過自己既人...放低過! 但...再一次俾人用同一個方法對自己, 真係唔好受! 知道以前信人自己會好痛...要用好長時間先可以起返身...唔可以再俾自己有跌倒既機會...夠喇...跌倒過, 一次就已經足夠喇! 你怕我會忘記, 還需要案件重演嗎? 請放過我吧! 那一幕, 人生出現一次已經好多喇! 足夠讓我一輩子的痛!

請不要再做任何事...請不要再施捨你的關心...不需要了! 一切都夠了, 一切都完了! 不要再找我...沒有這個必要!