尋日玩得好累喇…成點兩點先訓教！今日阿婷要補習，仲要補九點…最遲要八點半起身，點知七點幾我見未夠鐘就唔嘈佢喇，到左九點度，我醒左一醒先覺得點解咁耐都未響o既，睇睇個電話…08:58！之後先知隻傻豬較錯鬧鐘…結果要遲一個鐘先去。今日仲係落雨，仲好鬼死大添！送埋阿婷去補習…之後行返去搭車返屋企！

返到屋企好多野做，整野食、食野、汁野、拆Scanner…之後就等埋阿婷放工就同佢一齊上去Install。Install 完後，食左隻粽添！之後Auntie問我今日食唔食飯…本身係要去麻麻度食架，不過星期三做節，所以今日可以唔駛入。之後就答應左了…^^跟著同阿婷返屋企換過隻衫先去。有點緊張…^^"

一齊搭車去沙田…同埋佢細佬同佢女朋友！五個人首先去左宜家度行…係個咩中央廣場的東東。去到真係好大，好多野睇呀…Good！第一次睇咁大型的傢私舖，平時行實惠都覺得多野睇架喇，而家睇過先知小毛見大毛…哈哈！去到真係咩都睇得一餐…好興奮！最好睇都係個D 好似示範單位個D裝修…^^ 正！

行左好耐都係行得個少少…本黎阿婷一心買杯都係最後先去買！真係睇到唔捨得…好好睇。一定要黎過睇晒佢…之後同阿婷搵杯，其實一入門口已經睇中，不過想揀耐D，所以先行多陣先再揀真D…行到最後睇杯個度，搵極都搵唔返之前個隻！激氣…一心諗住行快D，行出去出口再行返入去個入口拎隻杯，因為隻杯係門口…點知行去差唔多最尾個時先見到，個隻仲要唔係杯，係D 咩座黎…不過做杯就一流！又平又靚…^^

之後睇返之前一直好想買的衫架袋…終於睇中了！好野…之後就搭的士去明星海鮮坊度食，第一次去。個度好似之前食神拍個景咁…入到去仲見到好多阿婷的長輩…姨媽、舅父等！第一次見都幾緊張…不過之後無咩野了。仲食得好開心添！個度D 野食真係幾好味…好多餸都好正。唔怪得咁多人喇…^^ 食完仲影左幾張相先走…哈！

之後同埋姨媽搭的士去行新城市…行左都係一陣！不過去左睇旅行社…又係第一次。^^" 睇完真係好想去日本！要搵錢搵錢…之後就搭巴宜返囉，搭車係度睇下DCatalog…好正！睇都咁開心喇…^^ 一定要搵多D錢呀。之後就返屋企了…真係好累喇！兩日放假都係咁玩…不過累都無所謂，開心就得喇！