今日訓訓下聽到手機響，【讓你踐踏我 受了教訓 我領會麼 這感情如果不錯】。原來個時已經八點了，自己校左鬧鐘要起身去自修室。拿拿臨落床刷牙洗臉，諗住去整早餐，點知媽媽已經整好了包比我了。明明尋晚叫佢叫我起身，點知今日係自己俾鬧鐘叫醒。之後整下lei 樣整下個樣，最後去到自修室已經遲左，好多人入晒去了！(平時我去到仲要排一陣隊架麻)入到自修室，都冇咩單人位了！只好坐埋角落。跟住就去圖書館睇下有冇射雕借，因為而家等阿良本射雕等左好耐了，而家只好上網睇，但係網上睇好慢，好傷眼！之後搵搵下比我搵到大字版的射雕英雄傳，正好係我要找的那幾回。跟住就去借，拎圖書證出黎個時我好驚，因為張野成六七年未用過，而家唔知仲用唔用到，用唔到好瘀架麻！最後都用到，忽然覺得張圖書證幾有用！^^返番去自修室就開始溫書了，唔知係戴住Con的關係還是尋晚夜訓的關係，隻眼好累！睇住d英文報紙更加悶，睇左一陣就轉溫Chem了！溫溫下仲眼訓起黎添！最後都敵不過睡魔，訓左一陣。
起身之後就無再溫Chem了，實在太悶了！又轉溫第二科了，今次溫Bio。唔知點解，一拎起Bio，就好精神。次次對住Bio都唔會覺得悶，仲越溫越起勁添！好似上左身咁，最後溫左一課多DD就到一點了！好多人都去Lunch，而我都係回家了，因為借左射雕好想睇，同埋又未食Lunch，返屋企食又慳又飽，加上我諗住遲D出荃灣整整副Con。
返到屋企第一時間除Con，之後就整野食，點知見到D包仲係度。-_-只好食左佢之後再整野食再一邊睇射雕，這餐厲害囉！食左三個包、一個公仔麵、一包通心粉、一個涼粉、一支利賓納…真係飽到我訓係度。之後繼續睇射雕，睇到三點幾個天仲係好曬，唔願出，繼續睇。過左陣，好眼訓添！好想訓，但一訓就唔知幾時醒，冇得出荃灣。等到第日可能好大雨呢…只好捱眼訓繼續睇住射雕等個天陰返D。等到四點幾五點度，就換衫出去囉，仲拎埋傘、眼鏡同埋射雕出街！^^
落到樓下剛剛好有架905，唔駛等，就可以即刻上車囉！上到車，計埋我都係得兩個人，我就好舒服好享受地睇射雕了，不過睇得唔係好舒服，可能係車度睇加上又戴Con……落車的時候，見到住係麗湖居的那個TVB 演員！*_*之後就行左去南豐直接去整Con喇。去到都係驗下眼咁，之後佢話試多陣先，真係唔得就轉個副比我。之後我就走左喇！Then，老母又話唔好成日又出又入，而家一次過整埋佢，咁我只好上返去話換過副。即係驗眼同埋Check 其他野已經用左成差唔多一個鐘的時間！-_-"最後決定換一隻，要加$150。本黎想換晒，但老闆話唔需要的，太浪費金錢喎！-_-"咁都得？ 有錢唔搵？ 可能今次係有人介紹黎，佢當我係熟人唔想我sin錢。
離開之後，我就去周圍行。我唔係諗住行街的，係要買電腦火牛同埋想買香水。之後行左好耐，都搵唔到電腦舖，只係去左萬寧同埋SaSa個D地方睇香水。唔敢入去呢，因為個個都係女人黎，同埋好似係女仔先會去的地方。不敢~~只好睇下有冇想要的款！睇完就搭車返屋企囉！個時已經六點了，正係繁忙時間，本黎想搭905，咁樣冇咁迫。但係因為要買火牛，就去左搭69M，上到車都係得個企字，有D更加上唔到車添！之後去到大欖先有位坐。睇左陣射雕，就係天水圍警署落車，本黎想去新北江買的，但係又近天盛商場。就咁去左天盛買囉，用左$156。唉~之後去搭專單返歸。剛剛走左一架車，但係好快就又黎一架了！真好運~
返到屋企就整火牛了，張個火牛整低我部機度，拆左原本果個比返我細妹。我裝返後開機，先發覺自己部機得個192MB Ram，因為應該有320MB才對，個時都冇理會，只係想入到Windows 用到就OK，但係個Keyboard 又神神地。整左好耐都係整唔到，又拆電，又整個插頭。一時時先OK，最後發睥氣了！頂~爆晒粗對部電腦，係咁用武力對佢。之後激鬼氣去左食飯，個時好嬲呢，一口氣食左半碗飯。之後係咁食係咁食，足足食左三碗飯。真係飽晒，個時已經冇咩火了，加上又睇電視，都冇咩理部電腦住了。
睇完電視就返房繼續黎，整整下個Ram已經可以去返320MB了，而Keyboard 可能係電池位鬆，所以先用唔到。最後都整得返，用到無線Keyboard同埋Mouse~ 我部機就咩都攪掂晒。好正常用得返~仲順左添！(因為Ram多左呢~)之後就整細妹個部，佢部就難囉，夠夠大半年冇郁過，內面咩都比我拆晒黎用，我都唔知裝唔裝得返，但我都記得咩位打咩位，最後都可以裝得返一部電腦出黎，但係就入唔到Windows 囉，之後拎佢個Harddisk黎整野，唔知係唔係整亂晒佢的Data~ 而家佢部機只係開到，但係用唔到。不過我都完成我的責任了，我只係要裝得返好部機就行了！
整好晒，就去沖涼，打日記。打日記的時候真係好眼訓呢~太早起身喇今日！唉~聽日要大教訓呀！聽日應該去唱K同埋拎射雕的二、三、四期。而29、30號可能會玩通頂，31號可能會去食自助餐。嘩嘩嘩嘩~~~~我冇錢架！唉也~~大穫！賣埋底褲都唔夠用。>_<
|
