| «‹ June 2026 ›» | | S | M | T | W | T | F | S | | 1 | 2 | 3 | 4 | 5 | 6 | | 7 | 8 | 9 | 10 | 11 | 12 | 13 | | 14 | 15 | 16 | 17 | 18 | 19 | 20 | | 21 | 22 | 23 | 24 | 25 | 26 | 27 | | 28 | 29 | 30 | |
|
|
最新秋冬眼影系列 (二）
2013 年 9 月 12 日 星期四 |
上次介紹咗其中一部分嘅最新秋冬眼影啦！
今日就講埋淨餘其他眼影喇，
包括有Dior、PUPA、TOM FORD同ZA，
啲顏色真係好岩秋冬用架！
Dior 神秘金屬五色眼影組合 ＄530 共兩種顏色
今季Dior用幸運之星做主題，
眼影都壓咗星星嘅圖案，好靚呀！
而且佢係限量產品嚟架！
試咗＃384色係用綠色做主色，
用右上角嘅淡粉色掃係眼頭或者下面淡軍綠色都得。
之後用左下湖水綠放係眼尾，
左上橄欖綠做眼線位。
呢款眼影五隻色互配任何一隻色都得，可以做到好多配搭，
非常好玩！
而閃粉粒子都幼細架，閃得嚟帶點shimmer
而且都又易掃開，
都好岩鍾意閃閃眼妝嘅朋友。
 
有好多人都覺得綠色好娘，好難襯，
但呢款眼影組合就唔會有呢個感覺喇！
就好似我今次試嘅配搭咁，
佢裡面嘅綠色都比較少有，例如湖水綠同橄欖綠色咁，
襯出嚟都非常特別！
而且軍綠色仲係嚟緊嘅trend，
大家要留意下喇！
Tom Ford Eye Color Quad （ORCHID HAZE）亞洲限量色＄550
呢款別注版眼影組合，
裡面顏色特別為亞洲人而設！
而且一盒四色都有兩種質感，
matte同shimmer都有，
質地好滑好creamy，而且都好易上色！
佢閃得嚟好自然，閃粉粒子好幼，一啲都唔誇張！
顏色真係好岩亞洲人，不過影相出嚟就偏咗色，
最好大家就去counter睇下啦！
 
首先用左上角淡白色打亮眉骨，
右上角淡啡放係眼頭位置，左下角粉紅色掃係眼尾。
最後再加右下角深莓紅色做眼線，
淡淡地效果返工、出街都好適合。
雖然大家會覺得500幾蚊，好似好貴咁，
但係個質素同價錢係正成比架！
真係值得大家去試下！
Za 耀目多采眼影 ＄95 共四色
呢款眼影個特點就係有維他命E係裡面架！
而且經過過敏測試添！
咁就唔驚敏感喇！
今次就試咗BL371色（左邊），
用白色放係眉骨位
之後用粉色搽係眼頭位，
再加淡綠色係眼尾，
我就用咗深藍色做眼線，
如果想濃少少就可以用深藍色代替淡綠色。
 
大家都可以睇到呢隻眼影閃粉粒子比較大，
如果眼位係比較乾嘅朋友，就要用eyebase打底，
啲粉就唔會咁易跌落嚟。
鍾意效果出嚟好閃，
而且大家返工要化淡妝，想對眼精神啲，唔太濃
你就可以考慮下呢款眼影喇！
PUPA eye palette ＄196,
一盒palette有9種色調，
而且裡面有shimmer同matte兩種質地俾大家揀，
咁就配搭唔同style，淡濃妝都得。
palette仲包括埋一支眼影掃，
價錢都相宜，的確幾抵玩架！
呢款paltte係偏冷色系，
大家可能會覺得搽出嚟會唔會好深色呢？
其實都唔會架，出嚟效果都好soft，
我就用左二嘅銀灰色做主色，
再用右三嘅深灰色掃係眼線位再慢慢blend開，
加返條黑色眼線，感覺夠哂秋冬feel！
 
而眼影質感都算柔滑，
不過大家用較深色眼影時候，
小心眼影粉跌咗落眼肚到呀，印實啲顏色，
唔係就搞到個妝污穢哂架喇！
唔知大家睇完咁多款最新秋冬眼影，
有無睇岩嚟緊自己心水呢？
我就有唔少喇！
大家趕緊去各大counter試下啦！
| |
發表時間：2013-09-12 12:47 PM [ 訪客留言(0) ] [ 編輯日誌 ] [ 分享至FACEBOOK ] |
|
最新秋冬眼影系列 (一)
2013 年 9 月 11 日 星期三 |
上一回就為大家介紹咗秋冬粉底啦！
我哋又點少得秋冬眼影呢∼
今次分別收到RMK，LUNASOL同PAUL ﹠ JOE嘅眼影
睇下幾靚∼
首先就係RMK Ingenious Cream & Powder Eyes
今次RMK用咗兩種唔同質感分別係cream及powder
佢上面就係cream狀eyeshadow，下面就係粉狀眼影
仲會連埋個迷你掃，一邊係for powder，一邊就for cream
 
佢個cream狀eyeshadow真係好實色
而且係耐水耐油添
佢仲有個好處架！
就係可以鎖實之後上嘅粉狀eyeshadow
咁就無咁容易溶妝喇！
我就用左cream狀眼影搽係眼尾位置
呢隻cream狀眼影搽上去都幾清爽，唔會好痴lup lup
都好適合油眼人士用架
而且好易就blend得開
之後要加粉狀眼影係眼頭位
咁就有淺至深效果
PAUL ﹠ JOE 童話眼影彩妝冊 ＄380
今次個包裝都係非常靚
呢個系列有三款色俾大家揀
而且每款套裝裡面， 都有眼影霜、眼影粉、同閃粉去組合而成
當大家用完啲眼影仲可以拆開佢
變成盒攞嚟裝嘢
首先用左個眼影霜打底，再掃上玫瑰粉色眼影
呢隻粉色眼影係幻彩架
係有燈光折射下會變左金色
其他人睇落去就好似搽左兩隻顏色咁
無燈底下就變返玫瑰粉色
加埋個閃粉，對眼即刻精靈哂！
閃粉個粒子唔算好大粒
所以平時化晚妝都唔會好誇張
而且佢非常易上，就咁用手指就得架喇！
LUNASOL Velvet Purification
今次Lunasol眼影用咗絲絨質感去做
同之前以往系列有啲唔同
可以睇下個swatches，
上面就一如以往係shimmer眼影，
但下面較深色嘅眼影就會比較matte
而我就試左係Lunasol產品中少見嘅酒紅色，
亦都係今季主打色！
本身自己都係lunasol嘅fans
以往四隻眼影都係shimmer同埋比較閃
見到佢今季眼影個texture同之前買開好唔同
首先用左左上角銀白色做眉骨highlight，
之後用右上角粉紫色做主色
再左下角啡色掃係眼線位慢慢blend開，
咁就做左一個好簡單嘅日妝！
如果大家想化濃少少
就可以用埋右下深紫色做眼線位
再掃少少係下眼尾就得喇！
個人覺得呢隻色真係好靚
而且非常適合化新娘妝
自然得嚟又有氣質
做日妝晚妝都得！
| |
發表時間：2013-09-11 04:33 PM [ 訪客留言(0) ] [ 編輯日誌 ] [ 分享至FACEBOOK ] |
|
學生分享天地-Jan, Outjob及新娘頭花製作分享
2013 年 9 月 9 日 星期一 | 
另一次出JOB 亦讓我了解很多化一個Creative 妝容是怎樣的。
這一次有幸親眼目睹Billy Sir 同 Janice老師
如何合作做出一個又一個極漂亮我妝容，
睇下這些相片，其實做一個真係唔係識化妝就得，
而係整體形象既設計，特別是Creative makeup
| |
發表時間：2013-09-09 02:34 PM [ 訪客留言(0) ] [ 編輯日誌 ] [ 分享至FACEBOOK ] |
|
準新娘作戰秘笈之(4) - 四季新娘妝容
2013 年 9 月 8 日 星期日 |
上個禮拜教完各位準新娘做運動Keep Fit，
今個禮拜就想教下大家扮靚靚。
好多準新娘喺試妝嘅時候，
一般都只會考慮到個新娘妝襯唔襯自己嘅輪廓，
又或者同自己件婚紗或者晚裝匹唔匹配，
但就好少會考慮埋唔同季節嘅彩妝潮流。
其實，新娘妝都有分季節咖，
唔同季節嘅新娘妝，用色同化妝手法都各有不同，
咁樣，化出嚟個妝先可以突顥返嗰個季節嘅氣氛，
令新娘子散發一種獨一無二嘅韻味咖！
以下就同大家介紹下一年四季嘅新娘妝特色啦。
春天新娘妝 ﹣可愛風
春天往往俾人一種明媚、溫暖、青春嘅感覺，
所以春天嘅新娘妝都應該保持可愛、浪漫、活潑嘅氣質，
成個妝容應該要以粉色系做主調，一方面營造少女嘅感覺，
另一方面粉色系亦都好有Bridal味道，好容易襯婚紗。
眼妝
眼影可採用粉紅、粉橙、粉紫等淺粉系色調，
眼窩中間位置不妨落多少少顏色，以塑造圓大嘅雙眼；
眼線毋須畫得太粗或太長，盡量保持自然；
假眼睫毛亦應選用比較低調嘅款式，
令成個眼妝望落去係比較自然、清純、脫俗。
胭脂
胭脂同樣應該選用粉系顏色，例如淺粉紅、淺橙等，
化嘅時候應選用較大嘅胭脂掃，
喺蘋果肌位置用打圈手勢，大範圍咁上色，
咁樣可以營造一種通透、白裡透紅嘅感覺，
令成個妝容散發可愛嘅少女味道。
唇妝
可以先塗一層粉色系唇膏，
再喺上面添一層通透嘅唇彩，
製造水嫩欲滴嘅嬌唇感覺。
夏天新娘妝 – 熱情風
夏日，係 一個充滿活力嘅季節，呢個季節嘅新娘妝，
都應該俾人一種熱情、開心、活力四射嘅感覺。
所以，化一個夏日新娘妝嘅時候，用色不妨大膽少少，
尤其喺唇妝之上，不妨選用一啲Sharp少少嘅色澤。
眼妝
可選用橙、綠、藍等等感覺比較活潑嘅色澤，
不過顏色切忌化得太實色，要盡量保持通透，
因為喺悶熱天氣化太濃嘅妝會令人有窒息嘅感覺。
眼線可以喺眼尾位置稍為拉長少少，
去製造一種風情萬種、熱情奔放嘅感覺。
胭脂
為咗令成個妝容感覺更加Balance，
胭脂喺呢度毋須要太強勁，
好自然嘅粉橙系胭脂就已經足夠。
唇妝
不妨選用一啲Sharp啲嘅唇色，
例如玫瑰紅、珊瑚橙等，都係好好嘅選擇，
既有夏日色彩，又可以保持返高貴嘅氣質。
秋天新娘妝 – 復古風
踏入秋天呢個多愁善感嘅季節，新娘妝亦應加以配合，
務求散發含蓄、高雅、古典、嫵媚嘅韻味。
秋季新娘妝嘅色調應該以Earth Tone為主，
因為棕色系永遠係同秋天最匹配嘅色澤！
而化妝手法亦應該以描繪立體輪廓為重，
務求以自然嘅陰影同顏色塑造出一個層次分明嘅妝容，
自然咁流露出典雅、高貴、古色古香嘅氣質。
眼妝
可選用深橙、淺棕、深棕等Earth Tone顏色，
不妨喺顏色嘅深淺漸變上落多幾錢功夫，
以打造更加強烈嘅層次感。
眉妝亦可以稍為化得強一點，
粗眉妝不僅是Earth Tone眼影的最佳拍檔，
亦都係最襯得起復古婚紗嘅妝效。
胭脂
可以喺顴骨對外位置打斜咁掃上Bronzer，
令面型輪廓更顯分明。
唇妝
可以試下豆沙紅、梅紅、啡紅等
一啲比較有懷舊Feel嘅唇色。
冬天新娘妝 – 華麗風
冬天係一個充滿節日氣氛嘅季節，
選擇喺這個季節結婚嘅新娘子，
當然亦唔可以俾呢股喜慶愉悅嘅氣氛停落嚟，
冬季新娘妝一定要釋放出華麗、冶艷、性感嘅味道！
所以，呢個季節嘅新娘妝，用色都會比較強烈，
而化妝手法亦會偏向大膽，甚至會出現Smoky Eyes，
以營造出帶點皇室貴族氣度嘅主人家嘅風範。
眼妝
可選用深藍、深紫、深灰、亮銀等冷色系，
由眼頭漸變至眼尾，以營造強烈嘅鳳眼感覺，
閃粉嘅運用亦非常重要，可以令成個妝容更顯華麗。
眼線亦都可以畫得更粗更長，喺眼尾位置輕輕暈開，
再加一對勁一啲嘅假眼睫毛，就成為咗一對好型嘅貓眼。
胭脂
當眼妝咁強烈，胭脂建議保持返低調，
令成個妝容嘅用色更加平衡，焦點亦更清晰。
唇妝
由於個眼妝已經化得好勁，
所以應避免搽鮮紅或者Shocking Pink呢啲咁搶眼嘅唇色，
可以試下杏色、肉色等一啲比較低調嘅顏色，
唔會太過搶眼，咁成個妝先至順眼咖！
下個禮拜，我地會為大家送上
《準新娘籌備婚禮時間表》，
各位正積極籌劃婚禮嘅準新娘萬勿錯過！
By Brides Talk
| |
發表時間：2013-09-08 03:58 PM [ 訪客留言(0) ] [ 編輯日誌 ] [ 分享至FACEBOOK ] |
« | 123 | 124 | 125 | 126 | 127 | 128 | 129 | 130 | 131 | 132 | ... | 137 | »
|
