Janice Lam (Makeup Artist)
janicelam
暱稱: Janice Lam
性別: 女
國家: 香港
« June 2019 »
SMTWTFS
1
2345678
9101112131415
16171819202122
23242526272829
30
最新文章
新手化妝師入行小tips
10個上妝Do’s & Don...
來∼看看今年流行過的...
[ Fashion Gossip ] 今...
熟齡護膚品試用
文章分類
全部 (681)
每月文章
訪客留言
最近三個月尚無任何留言
最近訪客
最近沒有訪客
日誌統計
文章總數: 681
留言總數: 35
今日人氣: 7
累積人氣: 164749
RSS 訂閱
RSS Feed
學生分享天地﹣Karen,富挑戰性嘅化妝師工作
2013 年 8 月 26 日  星期一

 

喺workshop工作都有一段日子, 

接觸咗化妝師好多唔同範疇嘅工作,

雜誌化妝、新娘化妝、

化妝品Demo、Video Shooting,
電視節目shooting, Staff training等,
見識咗好多,亦令我明白到化妝師除咗化妝技巧要好之外,
表達能力、溝通技巧都好重要~
講嘢要好得體、有說服力真係唔易~










之前睇過Janice做化妝品牌嘅Demo,
做Demo時間好有限,可能5-10分鐘就要化好成個妝,
又要好熟悉示範產品嘅特點,
台下又咁多對眼望住,
壓力應該唔少吧!
亦有機會有突發狀況出現,
比如工具、時間上嘅限制,
所以應變能力要好好~








好似錄影電視節目咁,
雖然係錄影,但係都唔可以隨便話NG再嚟過,
一來會阻礙拍攝進度,
二來可能會影響到其他一齊參與拍攝嘅人,
大家見到鏡頭前model已經化好底妝,
好精神,皮膚好好咁出現喺電視機前,
咪以為有好多時間預備,執靚個底妝
其實好多時鏡頭後要喺現場即刻幫model上粉底、遮瑕,
通常只有用幾分鐘,愈快愈好,
燈光、場地、時間全部都唔喺掌握之中,
只係見Janice摩打手咁好快完成,
真係好~犀~利!



近期有品牌嚟workshop做staff training,
一大班人圍住聽Janice講解




好佩服Janice可以神色自若,
好清楚咁一路幫model化妝示範一路講解


當日嘅training就係要教大家點樣按客人需要去用呢啲產品,
當然仲有化妝技巧同竅門啦~


到大家練習嘅時候,Janice會睇下大家化成點,指導一下~


我就幫手睇下大家有冇咩唔明,
同示範下正確嘅手勢方法~
可以參與其中幫手,
自己都好有滿足感~


要提升自己各方面嘅能力,
就要靠累積經驗同多啲實習,
最重要都係對自己有信心,
希望自己都可以不斷進步啦!
 
分類: 未分類
發表時間:2013-08-26 12:55 PM  [ 訪客留言(0) ] [ 編輯日誌 ] [ 分享至FACEBOOK ]


準新娘作戰秘笈之(2) - 婚前飲食手冊
2013 年 8 月 25 日  星期日

 


 

上個禮拜教咗大家婚前嘅護膚秘技,

今次就想同大家分享一啲飲食小貼士。

一講到飲食,大家可能只會諗到係同瘦身有關,

其實飲食除咗直接影響我地嘅體型之外,

亦都會間接影響我地嘅皮膚質素同埋心理健康咖。

所以,結婚前,各位準新娘唔好淨係掛住節食,

萬一搞到得個身瘦咗,但啲皮膚就差咗,

咁就前功盡廢啦!等我地逐樣嚟講啦。

 



飲食 X 皮膚

 

點樣可以從飲食調節皮膚質素?

其實上個禮拜我地都簡單講過下,

今次我就詳盡啲同大家分析啦。想皮膚又靚又滑,

大家就要留意以下五項Good Food / Drinks

 


1. 每日最少要飲八杯水!

可以補充皮膚細胞所需要嘅水分,

令皮膚保持一種水嫩飽滿嘅感覺。

 


2. 多食維他命C豐富嘅食品!

例如橙、蘋果、士多啤梨、奇異果、蕃茄等。

維他命C有阻截黑色素形成嘅效用,

想皮膚保持白滑,不妨食多啲呢類食品。

3. 多食含維他命E嘅健康食品!

維他命E有滋潤肌膚同抗氧化嘅功效,

不過要留意,含有豐富維他命E嘅食品有好多,

但就唔係樣樣都健康,好似花生、菜油等,雖然維他命E含量高,

但脂肪含量亦都偏高,所以都要避免食太多!

反而應該小心咁揀啲又含有維他命E又健康嘅食品,

例如無糖豆漿、薏米、魚類、菠菜等,

為肌膚帶嚟潤澤、滋養、抗氧化嘅效用。

4. 適量進食含骨膠原食品。

骨膠原可以幫助製造皮膚組織入面嘅膠原纖維,

從而防止老化,又可以促進肌膚細胞嘅新陳代謝,

好多天然食品,例如花膠、雲耳、海蔘等,

都含有豐富嘅骨膠原,適量進食都有美肌作用,

但記得唔好食過量呀,否則有機會令膽固醇升高咖。

 


5. 每日一杯綠茶。

綠茶入面嘅茶多酚,有高效嘅抗氣化功能,

而且綠茶亦有排毒、美白、寧神、減壓嘅作用,

臨訓前飲一杯,對調節肌膚素質都有正面幫助。

 


 

當然,除咗以上呢啲要多食同多飲嘅野,

仲要戒除以下五項Bad Food / Drinks

皮膚先可以保持靚靚咖:

 


1. 少食海鮮。

食海鮮好容易會令皮膚出現過敏反應,

如果唔想臨到結婚前面上先出現紅色粒粒,

婚前都係少食海鮮為妙。

2. 少食煎炸食品。

熱氣食物會令體質變得燥熱,

食得多好容會令面上油脂過盛,

因而出現爆瘡等現象。

3. 少食辛辣食品。

原因同上,食得多辣嘢,

好容易會出粒粒同爆瘡咖。

 


4. 少喝酒。

有人以為,酒精可令人瞓得更好,

但其實,酒後睡眠一般只維持喺淺睡狀態,

好難進入深睡期,簡單啲講,就係酒精會影響睡眠質素,

當我地缺乏良好休息,就會間接咁影響我地嘅皮膚質素,

所以,酒,都係少飲為妙!

5. 少飲咖啡。

同樣道理,咖啡因都對睡眠質素有負面影響,

亦都間接咁影響我地嘅皮膚質素,

唔可以多飲。

 

 

飲食 X 心理

講完飲食同皮膚質素嘅關係,

我仲好想同大家講吓飲食點樣影響我地嘅心情呢!

好多準新娘喺婚前都會好緊張自己個餐單,

驚死一個唔覺意食咗啲餐單以外嘅嘢,

就會令自己變醜變肥。

其實咁樣過分抑壓自己,好容易會影響情緒,

嚴重嘅甚至會搞到患上抑鬱、厭食等情緒病咖。

所以,我建議大家每個禮拜(可以選擇每個周末),

都揀一款會令自己開心嘅食物獎勵自己,

放心啦,一個禮拜食一次,係唔會令妳變肥咖。

以下呢啲Happy Food / Drinks

唔好話食,真係令人睇見都開心:


1. 一個禮拜一杯雪糕。

真係怕肥,可以用低脂Sorbet

或者Frozen Yoghurt嚟代替。


2. 一個禮拜一杯特濃朱古力特飲。

朱古力係有一種能夠令人開心嘅魔法,

偶爾飲一杯香噴噴嘅朱古力奶,

個人係會無咁易忟憎咖。


3. 一個禮拜一件蛋糕。

揀一款你最鍾意嘅蛋糕,

喺周末一邊食一邊嘆紅茶,幫助放鬆心情,

係妳籌備婚禮期間必要嘅Buffer Time

4. 一個禮拜一碗傳統糖水。

其實好多傳統糖水除咗好味之外,

仲有滋潤養生嘅功效,

好似杏仁露、薑茶、蛋白燕窩等等,

食完唔單止令胃口有滿足感,仲可以順便養顏添!

真係怕肥,不妨買材料自己煲,再落少啲冰糖咪得囉。

 

 


飲食 X 
身型

最後,當然點都要講下靠飲食修身嘅貼士啦。

想食得夠Fit,以下幾點係大家一定要注意嘅:

1. 每早一杯檸檬薏米水。

簡直是排毒良方!幫助清理腸胃,

排走腸道內的垃圾食物,

飲完之後便便都特別暢順,

同埋會有一種個肚輕咗嘅感覺,不妨試下。

不過預咗唔會太好飲,死都要忍住唔好加糖呀。

2. 少食多餐。

將一日三餐打散成一日五、六餐,

每餐食到半飽就夠,

咁樣會令身體嘅吸收速度減慢。

3. 正餐前先食一個水果。

可以係蘋果、雪梨、橙等等纖維較高嘅水果,

食一個水果打底,第一可以增加飽肚感,

第二,水果嘅果糖亦有效減慢腸度吸收,

第三,水果嘅纖維仲可以幫助排毒消化添。

4. 多飲蔬菜湯。

純以雜菜滾一煲齋湯(唔好加肉),

一個禮拜入面揀三日以呢啲蔬菜湯做午餐,

既飽肚,對腸道健康亦都有幫助,

令身體排毒得更快更有效。

記住要食埋啲湯渣呀。

5. 嘗試將肉類同澱粉質分開食。

一餐入面,肉類同澱粉質類只揀一樣嚟食,

再配合蔬果,會有意想不到嘅修身作用。

6. 戒食加工肉類。

午餐肉、手打牛丸、魚蛋、貢丸等。食落係好好味,

但咁好味都係因為入面其實撈咗好多脂肪,

食一粒肉丸其實就好似食咗一啖肥豬肉撈麵粉,

盡量少食啦!

7. 戒飲加工飲料。

汽水、維他奶、盒裝檸檬茶、益力多等等,

全部都係高糖分飲料,戒得就戒!飲水都唔係咁辛苦啫。

8. 選擇高鈣低脂奶類飲品。

係就係無全脂奶咁好飲咖喇,

但真係對減肥修身有幫助咖。

9. 點餐時養成「走油、走甜」嘅習慣。

無論平日喺屋企食得幾清淡,

都總會有需要出街食嘅時候。

喺呢啲場合,大家點菜時就記得加句「走油」或「走甜」,

盡量食得健康啲。

10. 正餐後40分鐘不能坐。

食完嘢之後嗰40分鐘係最關鍵嘅吸收時間,

如果喺呢段時間我地成日坐喺度或者瞓喺度唔郁,

呢啲吸收咗嘅能量就無從釋放,久而久之就會變成脂肪咖喇。

所以,食完飯之後,可以洗下碗,做下家務,或者落街散下步。

順便講埋,記住唔好一邊攤喺度睇電視一邊食零食呀,

除咗吸收得快之外,仲好容易越食越多咖。

同埋記得瞓覺前四個鐘頭唔好進食!

 

下個禮拜,我地會為大家送上《新娘運動手冊》,

教大家婚前可以做啲咩運動Keep返靚個身體線條,

大家千祈唔好錯過!

By Brides Talk

分類: 未分類
發表時間:2013-08-25 01:07 PM  [ 訪客留言(0) ] [ 編輯日誌 ] [ 分享至FACEBOOK ]


西式新娘頭飾班小分享
2013 年 8 月 24 日  星期六

 


前日做咗一樣自小學之後都冇做過嘅事,

就係做手作仔,學做頭飾喇!!

其實一直都好欣賞會花時間同心機去整小禮物嘅人,

覺得好有誠意好窩心,

但係自己就冇乜心思,

唔會自己落手落腳整啲手作仔,

今次難得有機會,而且係整頭飾,

年尾好朋友結婚就大派用場喇!

佢仲一定會好surprised添!(因為佢太了解我係唔會做呢啲嘢...)



今次教整頭飾嘅係Workshop舊生Frances~

Frances老師一早已經到workshop預備喇,

仲特登幫Irene set咗頭做頭飾示範添~


Frances老師嘅示範作~


好美啊~


估唔到原來整頭飾嘅配件都唔少!

唔同款嘅lace,珠珠,閃石,羽毛,網紗等等,

Frances老師話帶定多啲,

可以比同學仔多啲款式揀,

咁就可以設計獨一無二嘅作品喇~



每個同學都有一份材料,

作品完成後可以放番入袋,好好保存~



樣樣都準備好就開始喇!!


首先梗係要比大家睇下完成品先啦,

等我地有個目標,大概知道係點嘅樣,

再加以創作~


聽老師講解步驟嘅時候覺得好清晰好明白,

只係將啲材料排好位,痴痴貼貼,

應該唔係好難啫...心諗...

但係要開始嗰陣,

我攞住啲材料有啲不知所措,哈哈!



因為點樣舖排同貼嘅技巧都好緊要架,

要有立體感先至靚,

所以我都好比心機去慢慢整,

仲搞到成手都係膠水~




同學埋頭苦幹中~~~


Frances老師會比下意見,

教同學點樣擺位令頭飾設計更突出~


最後仲教埋點樣夾上頭髮,

放邊個位置比較適合,

咁完成拎番屋企自己都一定識用啦~

同學都好留心聽架~



以下幾款都係同學嘅作品嚟架,

佢地同我一樣,都係第一次整頭飾,

但個個都整得好靚喎!








每個款式都唔一樣架~

睇得出同學真係花咗好多心機去整~



呢個係我嘅傑作!

不錯吧?!



其實佢真係幾似一頂帽~

好elegant架~



第一次整都算幾好啦~
其實係好好玩,學完西式新娘頭飾班之後,
發覺自己都應該學多啲頭飾製作,
當增值下自己,做新娘化妝師就更加要識,
有自家製嘅頭飾比客人多個選擇,
感覺都pro啲,仲可以係其中一個賣點添!
好期待30/8(五)嘅中式新娘頭飾班呀~

by 同學仔Miss K

而家30/8(五)中式新娘頭飾班仲有少量名額,
有興趣嘅話仲可以報名架!
私人留言你嘅電話同email就可以喇~
分類: 未分類
發表時間:2013-08-24 12:58 PM  [ 訪客留言(0) ] [ 編輯日誌 ] [ 分享至FACEBOOK ]


8個Hollywood stars的漂亮廚房
2013 年 8 月 23 日  星期五

 有人說睡房能夠看到一個人的性格,我想廚房亦如。究竟屋主會是一個實求是的人,真的天天下廚炒幾個小菜,還是其實不設實際,只愛一個美而無當的設計師廚房?


今天和大家走訪八個荷里活巨星的完美廚房,看看你又能否憑這些廚房,猜得出究竟屋主是一個好客之士,還是純粹藝術美的追求?


 


Courteney Cox
美國肥皂劇 裡面其中一個最受歡迎角色,看椅子的數目,Monica應該不常有客人來一起晚飯吧。



 
  

Hilary Swank
Million Dollar Baby在戲中性格剛強,現實中她的家卻給我一種樸實而溫暖的感覺。



 

Keri Russell
Keri是我讀書時的偶像呢! 那時超愛看她做女主角的Felicity, 導演JJ Abrams十多年前還未大紅大紫啊。從這個廚房看,Keri應該是個愛下廚的人。



 

Ralph Lauren
一看就能夠猜到這是名設計師的家。怎麼好像所有設計師都鍾愛這種後現代的簡約設計?


 

Megan Mullally
Will and Grace女主角的廚房看來非常簡潔,是不是所有餐具都收入了廚櫃裡面?


 

Meg Ryan
這應該是眾多個廚房我最喜愛的一個。雖然沒有看到廚房外的風景,但總覺的這應該就座落在海灘旁。餐具看來也頗齊全的樣子。



 John+Mayer+mayer1_VSS 

John Mayer
頭著名歌手John的廚房設計感覺非常70年代呢。



 

Ellen Pompeo
在Grey's Anatomy中扮演醫生的Ellen的廚房也非常舒適,還帶有浪漫的意大利風情。

你又有否找到你心目中perfect kitchen的idea嗎?


by lalafa



圖片來源:Elle Decor
分類: 未分類
發表時間:2013-08-23 02:36 PM  [ 訪客留言(0) ] [ 編輯日誌 ] [ 分享至FACEBOOK ]


如何選擇眼線筆
2013 年 8 月 22 日  星期四

 

前兩天我們在facebook post了不同的Cat Eyeliner畫法,之後立即收到很多JM來電查詢我們的專業化妝課程, 可見大家都非常清楚眼妝對一個妝容的重要性! 

一個漂亮的眼妝絕對有畫龍點晴之效,甚至就算你沒有化一個全妝,一個完美的眼妝甚或只是一條簡單的眼線就足以令你看來精神飽滿。

而事實上Cat Eyeliner只是眾多眼線的其中一種畫法,當你學會基本的畫眼線技巧,大部份其他造型你就自然能駕輕就熟。

可是,一條你看來簡單的眼線,不是動筆畫上去就漂亮呢,當中最重要的秘訣就是能夠按著自己的眼形來修飾,究竟應該由哪裡下筆,哪裡收一個尖尾!

不久前,我們就有教大家如何畫一條眼線,詳細教學可到以下網址:

Vina眼線筆真人教學

而我們今天,則想和大家分享如何選擇不同顏色的顏線筆:

黑色:最常用而又豐滿實在的顏色。通常黑色會用於化smoky eyes,而畫黑色眼線用kohl成份的眼線筆會比較合適,因為kohl比較順滑,而且亦適於用畫內眼線或涙缐位。

啡色:是較黑色更自然的選擇。如果黑色是用於晚妝,那啡色就最適合日妝。啡色用於任何顏色的眼珠都漂亮。用來配畫同色系的眼影效果柔和,如配上不同色調的則更奪目。



藍色:喜歡大膽冷豔可選用海軍或深藍。深藍特別適合金色或者黃色的妝容,同時對淡化疲倦的紅眼非常有幫助。


紫色:特別適合綠眼睛,同時亦能夠令藍眼和榛色眼睛看來更深邃。不過要留意是如你眼底下有不均勻的膚色,那就應盡量避免使用紫色,否則可能會令眼底下的青筋、色班或者瘀紅的眼袋更明顯。


白色:通常只用於內眼線,尤其內眼角,能令眼睛看起來更圓大。

我們workshop的14堂基礎班,當中就有教授畫眼線技巧(眼線筆及液體眼線筆)、眼形分析及眼部化妝。而要掌握畫貓眼線,我們建議應先將基本的眼線技巧掌握,那畫貓眼就能得心應手。貓眼妝於我們專業班有教授。
分類: 未分類
發表時間:2013-08-22 02:11 PM  [ 訪客留言(0) ] [ 編輯日誌 ] [ 分享至FACEBOOK ]