網上充斥古靈精怪的化妝小技巧，感到十分新奇，
但不親自嘗試過不會知道其成效，
所以這次我會親自示範，跟大家拆解其中一些化妝謬誤。

1. 用湯匙輔助畫出完美眼線尾部？

(網上相片:http://www.viralcham.com/)

實驗結果：

使用湯匙畫的眼線雖然不易出界，但線條會十分粗，容易變成誇張眼線，
又會把湯匙弄髒，在量度位置時需花些時間，
而且令眼睛感覺不舒服，出來效果沒有自己徒手畫的好，
建議大家多練習徒手畫，只要步驟正確就能畫出完美眼線。

2. 將透明的指甲油和眼影混合自製新色？

(網上相片:http://www.viralcham.com/)

實驗結果：

加上眼影粉除了會令透明甲油的掃頭變色，被污染難洗掉，
混合的份量也難以拿掐，而且眼影粉與甲油混合後會容易出現顏色不勻。
其實市面上的指甲油價錢相宜，所以不用自製也可。

3. 加入眼藥水或生理鹽水到睫毛膏，以防結塊？

(網上相片:http://www.viralcham.com/)

實驗結果：

其實一般mascara壽命只有半年，
而因為用於眼周，若用得太久，可能會有細菌、引致發炎。
同樣，眼藥水開封後都只可用一個月，
所以基於衛生問題，不建議這樣做。
另外，眼睫毛液被稀釋後容易變得一粒粒、易溶，
只用卸妝水也能抹走9成mascara。
若價錢相差不多，應該買一枝新的代替。

4. 將唇色由閃亮變啞色，用胭脂或眼影印上顏色？

(網上相片:http://www.viralcham.com/)

實驗結果：

其實我自己都會使用這個方法，
但只限於fashion shooting或outjob的誇張妝，感覺會較突出，
但絕對不適用於替客人化妝或教人日常化妝，
因為這樣會使唇部乾燥、出現乾紋，
而且難找到相似的顏色，不建議日常妝使用。

如欲取得更多第一手美容及扮靚資訊
可瀏覽Girls Talk Main Blog： Girlstalk Blog
或 Like我們的Facebook專頁：
Janice Lam Makeup Workshop Facebook

市面上既mask真係好多種類，又多款色，
一時之間想買又唔知點揀好，
如果你地都有呢個煩惱，唔緊要，
今次我地搵左６款paper mask分享試後感，
每款paper mask都有唔同剪栽、質地、功效，
最重要都係睇返自己喜好同需要，
以下既試用希望幫到大家啦！

聖蘭兒/ 天絲擁吻系列蠶絲面膜 (玻尿酸．美白水潤面膜) $18@1塊

主打美白及補充水分，可有效收細毛孔。
主要成分含蠶絲蛋白、玻尿酸、白蜂草精華、去離子水，
兩層設計，更能將精華帶到肌膚底層。

呢個mask真係 超•級•多•精華！！
袋內、mask都係多到滴水，精華係透明、稀水狀。

(註：紅印位置本身已有，唔係敏感所致。)

第一次試用蠶絲面膜，質地好滑好薄，但唔易整爛，
試上面好貼，不過比較大塊，
而且太多精華，好易整到髮鬢位都濕埋，
又會流落頸度，要用紙巾抹抹先得。
佢個packing寫住要敷15-20mins，但我就敷左30mins，
因為敷完30mins拎開都仲係好濕，塊面仲有好多精華，
要按摩面部或者輕輕用紙巾印走過多精華。
多到既程度係身邊同事仲問我係咪係咪跌左落水…
用後皮膚感覺好水潤，柔軟，如果係for補水真係唔錯！
不過咁多精華，如果唔想浪費既話，
建議可以買啲腰果形眼膜沾濕再敷上眼。

Holika Holika/ Pig-Collagen Jelly Gel Mask Sheet $58@1塊

嚴選淨潔豬皮精華萃取水解膠原，可以填充失去彈力的深層肌膚，
修護肌膚彈力並改善肌膚暗沉。
相近人體皮膚的豬膠原成份，含維他命B3、腺苷、
水解膠原蛋白、馬齒莧萃取、石花菜萃取、綠藻萃取、昆布萃取等。

今次試呢個豬皮gel mask係holika既皇牌產品，
打開後見到佢既精華唔算太多，mask濕濕地，個袋無剩餘精華，
帶有少許甜甜既jelly味道。

因為佢分左上下兩張mask，所以可以更加貼面，
我自己本身都鍾意gel mask果種貼面同涼涼地既感覺，
呢個亦唔例外，質地好薄，有彈性，就算講野或者笑都唔會移位。
佢個說明話要敷30mins，咁我都有敷足30mins，
感覺個mask已經乾乾地，可能20mins左右已經足夠。
敷後皮膚有輕微提亮同感覺有返彈性，不過水潤度就唔太高，
適合中性至油性皮膚，或曬後皮膚可以敷gel mask降溫降紅。

D+Solution/ Skin Weather is Bright $18@1塊

含玻尿酸鈉、激白複合物、角鯊烯、針葉櫻桃及百合花等萃取，
可改善暗啞肌膚，回復光采明亮！

呢款精華都多，不過就無聖蘭兒咁誇張，
精華係呈奶白色，主打亮白功效。

呢一款面膜質地都係普通既棉mask，但又唔會好厚，
size剪裁係最適合我呢個面型，
鼻位、咀邊、側面都係岩岩好，亦都算好貼。
我敷左20mins，拎開mask後上面仲有精華，
而面上既精華就吸收得七七八八，
一開始會感覺有啲黏笠，不過按摩面部幫助吸收之後就會變得潤澤，
比較暗啞既鼻翼位、眼肚位都有稍微明亮返，
但效果唔會持續好耐，
水潤度亦都好足夠，
如果keep住用應該會有更明顯既效果。

Holika Holika/ Intensive Moisturizing & Nourishing Treatment (Ceramide + Honey)

呢款係主打加入保濕精華&蜂蜜（神經酰胺、蜂蜜萃取）既安瓶面膜，
蜂蜜可加強保濕及養分、舒緩肌膚。
適用於肌膚缺乏營養、過敏型肌膚、敏感型肌膚。

呢款mask敷上去就聞到淡淡蜜糖味，
味道都算幾討好，
面膜紙屬於較厚身既棉質地，
係敷完上去見唔到本身自己膚質果種，
敷上去好貼面，都幾適合我面型，
精華係奶白色，都算幾多，
敷左約20mins開始乾我就撕落黎，
吸收得都好快，塊面覺得好水潤但唔算好笠，
所以我就即刻上埋粉底，
不過就有少少膠子擦碎出現，
我建議敷完呢個mask就算唔係好笠都係過下水先好上底妝，
避免有擦子膠碎問題。

DR.WU/ Microinject Renewal Mask with Mandelic Acid

創新微導棉，能緊密貼合臉部曲線，幫助活性成份滲入肌膚。
一次解決暗沉、膚色不均，毛孔粗大、皺紋等問題，
另添加複方保濕亮白及緊緻成分，加強肌膚保濕鎖水及緊緻效果，
成份有杏仁酸、乳酸茵發酵精華、亮白修護精萃、小核菌膠、
猴麵包樹果實萃取，適合術後肌膚及敏弱肌膚使用。

之前都有大家分享過我好鐘意用支Dr Wu杏仁酸精華，
所以今次我都好有興趣試埋佢呢款面膜，
佢個袋入面唔算好多精華，
敷上去唔會水滴滴，無咩味，
紙質好薄，薄到可以透出自己本身既膚質，
佢既面膜剪裁鼻翼位偏細，唔係好敷到，
敷左約10mins就開始乾，撕完落黎塊面唔太濕，
過一陣就變爽，
保濕效果未算好超卓，不過乾紋都即時無咁現，
咁當然皺紋位置敷一次唔會有太大效果啦，
另外，我覺得彈性有提升亦有少許明亮感，
但果種明亮感覺唔會last到好耐，
由於敷完都幾爽身，怕笠既朋友敷完都可以唔洗過水。

D+Solution/ Skin Weather is Calm $18@1塊

含山金車花、紫紅龍膽花、苦艾草、瑞士阿爾卑斯山香草、薰衣草等萃取成份，
給肌膚鎮靜滋養，撫平粗糙肌膚。

呢款mask都係屬於普通棉質地，
唔太厚又唔太薄，
佢既奶白色精華都算幾杰身，
但意外地都吸收得幾好，
貼面度都幾好，
我敷左約15mins都覺得好保濕，
皮膚潤得黎唔算好笠，
亦feel到塊面會變得好柔軟，
乾紋都即刻有改善
不過敷呢種屬於較杰身既精華，
唔想之後搽skin care有擦子膠碎情況都係先去過水比較好。

如欲取得更多第一手美容及扮靚資訊
可瀏覽Girls Talk Main Blog： Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)

每逄轉季除左要轉護膚品之外，
其實化妝品都要轉季架！
咁熱既天氣肌膚會變得較容易出油，
之前用既秋冬粉底就可以暫時放係櫃桶底先啦！
夏天都比較適合透薄既底妝，
如果有埋防曬功能就更加方便啦∼
今日我地會精選幾款夏天岩用既粉底比大家！
我自己屬於混合性偏乾皮膚，
最近實在太夜訓，皮膚狀態都麻麻地，
爆左幾粒暗瘡留左暗瘡印同紅印，
我揀粉底既要求就想唔好太乾，
有少少滋潤感但唔好太笠身，
遮瑕度方面能夠均勻膚色便可，
始終粉底液都係用黎均勻全面膚色，
太深既印就要留番比遮瑕膏幫手啦。

潤澤之選：

Bobbi Brown Intensive skin serum foundation
SPF 40 $540/30ml

近來呢支Bobbi Brown新出既粉底液成為左一時佳話，
因為呢支Serum foundation具備左卓越既護膚功能，
入面蘊含珍貴既冬蟲夏草成份，
利用創新既「高壓冷凍」技術破天荒將佢融入係粉底當中，
可以保留到珍貴既藥效成份架！
除左冬蟲夏草之外，仲加入左荔枝、西瓜、蘋果複合物同竹葉精華等，
聽到去真係好似成支飲得咁呀！
呢啲成份可以幫肌膚補水，增加柔軟度及令肌膚緊緻提升。

大約滴一滴份量再推開就可以搽勻全面，
質地無我想像中咁稀身，都幾creamy，
但推開就唔厚身，
有少少草本味道。

唔需要太多份量就可以推勻全面，
遮瑕度未算超高，不過鼻翼偏紅位置都修飾到，
滋潤度好好，
有微微既光澤感覺，皮膚望落去會滑啲，
適合乾性皮膚使用。
輕盈透薄之選：

平時我自己都好鐘意用IPSA既粉底液，
覺得佢好貼，遮瑕度又好好，
所以每次佢出粉底我都好期待，
今個春夏佢地都推出左兩支新粉底for唔同既肌膚使用。

IPSA 原透光水漾粉底液
SPF 25 PA ++＄340/25ml

IPSA利用最新既原透光科技同自動光感調節技術，
令肌膚可以從肌底反射出自然既光澤感覺，
另外亦加入左皇牌海洋活化精華，
可以預防缺水紋同粗糙肌膚添。
適合外乾內油既肌膚使用。

呢個系列既粉底質地都比較薄，
一泵份量足夠搽全面，
出黎既效果好透薄自然，
岩曬夏天使用，
滋潤感剛好，潤得黎唔算好笠，
coverage唔算太高，適合瑕疵唔多既朋友使用。

控油之選：

IPSA原透光輕柔粉底液
SPF 20 PA++＄340/25ml

呢支一樣係用左最新既原透光科技同自動光感調節技術，
令肌膚有自然既光澤感，
而不同之處就係佢加入左智慧型控油粉末，
可以平衝油脂分泌同抑制油光。
防止因為汗水同油脂而溶妝，
將肌膚調整成semi-matt狀態。
特別適合油性肌膚使用。

呢款質地比較稀身，屬於水液狀，
不過瑕遮度都算足夠，
眼圈位置都遮到一大半，
亦有少少光澤感覺，
搽上去既感覺都比較清爽，但又唔覺得好乾，
同上面果支既感覺好唔同，
好岩油性既皮膚使用。

長效持久之選：

Lancome blanc expert fresh brightening foundation
SPF 50 PA++ $390/30ml

蘊含豐富既植物精油，令肌膚增加亮白光澤感覺，
而入面既全新色素粒子可以令肌膚有更高既遮瑕度
有美白效果既粉底質地通常都會比較清爽無咁笠身，
冬天用就可能唔太適合，
夏天用就會比較好，
可以話係油性肌膚既恩物。

之前我都唔太敢試美白既粉底液，
驚會好乾，因為我自己鼻翼位置易甩皮！
不過佢就唔算好乾，
如果驚乾既朋友就記得妝前要做好保濕打底，
遮瑕度都幾好，
大部份瑕疵都可以遮到，
當然好深既紅印都要靠遮瑕膏幫手啦∼
而佢出黎既效果比較matte ，
唔鐘意塊面太令既朋友就可以試下呢款。
遮瑕貼膚之選：

Les Merveilleuse Ladurée Fluid foundation
SPF 20 PA+ $550/30ml

Laduree 以靚到絕既外表俘虜左萬千女仔既歡心，
佢既花瓣胭脂非常出名，
好多朋友都話買左唔捨得用呀！
不過除左胭脂之外，
原來佢既底妝產品都唔錯∼

質地都係乳液狀，好滑好易推，
仲有淡淡既花香味。

佢既遮瑕度都令我幾驚喜，
唔鐘意全部瑕疵都遮曬既朋友上完呢款粉底就可以直接落碎粉。
遮到之餘唔會覺得粉感好重，
保濕度都恰到好處，唔會太乾或太笠，
有自然光澤感，但又唔會覺得太油令，
用黎打造自然裸妝就一流啦！

其實講到粉底就無話邊款係最好，
始終每個人既膚質同對粉底要求都唔同，
大家可以根據自己既喜好去專櫃試下啦∼

如欲取得更多第一手美容及扮靚資訊
可瀏覽Girls Talk Main Blog： Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)

相信好多朋友之前趁復活節假都去左外遊，
而我就趁放假前無咁多人去左東京睇櫻花，
好好彩撞岩櫻花開花期，去既果個星期天氣好和暖，
所以都睇到唔少靚靚盛開櫻花架！
除左櫻花，去得東京當然唔少得美食相伴，
今次都會同大家分享一下幾間餐廳小店，
如果黎緊去開東京就不妨參考下啦∼

今次係我第一次搭Vanilla香草航空，
佢個logo真係幾靚，黃色好sharp！

今次呢個行程其實係大半年前已經買定，
因為有特價既關係，一個人來回連稅加埋20kg行李，大概$1600，
以budget airline黎講算係好平，仲要係旺季！
所以鍾意去旅行既話真係要隨時mark實平機票！

budget airline無飛機餐，所以上機前要醫飽肚先得，
上機後見到佢個menu都有幾款野食賣相唔錯，
價錢都係2000YEN內，唔會太貴。
我本身想order個牛乳布甸，可惜無晒，
轉左order櫻花味戚風蛋糕，期間限定架，
估唔到又幾好食，個cream好香好滑∼

平時我搭凌晨機都好難訓得著，坐極都唔岩位咁，
今次雖然揀左個好闊落既位，但都一樣無訓到，
因為窗外既風景太吸引喇，可以清楚睇到星空到日出，
呢度有無朋友都同我一樣要指定坐窗口位望風景呢?

今次搭完Vanilla，覺得佢比其他budget airline舒適，
時間好好，凌晨機去夜機返，
最重要係又夠準時，唔會係咁delay，好值得下次都再搭。

到步後，即刻返酒店放低行李就開始行程∼
今次去左好多地方，所以以下會以地點同食店咁同大家分享既，
跟我一齊用眼睛去旅行啦∼XD

－賞櫻篇－

新宿御苑

好多人都會黎呢度，一來就腳，二來呢度有幾千棵樹，
除左櫻花仲有好多其他花種、溫室植物等等。
我3月尾去到好多都係コニノ（花蕾）狀態，
只係有大慨十多棵櫻花樹開左，
不過就算係當行下公園或者黎野餐都非常舒服，
由於呢度品種眾多，建議可以4月第一至第二個星期左右先黎，
應該就可以睇到盛開狀態既櫻花。

路程：由新宿站南口行路過去只係15-20分鐘左右，好近又易去！

上野恩賜公園

黎到上野，真係可以以人頭湧湧黎形容，
中、港、台、韓、當地人、外國人都齊齊黎賞花！
黎到親眼見到真係會不自覺發出讚嘆聲，
行人路左右兩排櫻花樹好靚好壯觀，
多得太陽超猛，好多櫻花樹都盛開左，
亦有好多當地人好早黎到坐喺櫻花樹下食野暢飲，
睇見佢地玩得好開心，搞到我都好想join埋一份∼
而行到入面鳥居，會有好多小食檔，
超超超香∼有好多地道小食，我都買左燒栗米同章魚丸。

路程：由JR新宿站搭山手線到上野站，只需20mins，
到上野站就會見到指示牌到上野公園，徒步5mins就會到入口架喇！

靖国神社・千鳥⑩淵

喺九段下呢個站一落車出去就已經見到好靚既櫻花樹，
左邊過條馬路就已經係好出名既名所－千鳥⑩淵，
直行既話就會去到靖国神社，
無諗過靖国神社入面既櫻花都好多同好靚！
而且呢度可以消磨大半日時間，
建議可以早少少黎到靖国神社賞櫻先，
再行去千鳥⑩淵撐艇仔，（到7點就會close架喇）
到夜少少再行返去靖国神社掃街食地道小食醫肚。
呢度成個地方都好好好正，睇返啲相都好想再去啊∼

路程：由都營新宿站搭都營新宿線到九段下站，只係10mins，
見到靖国神社・千鳥⑩淵出口，一出站就會見到架喇∼

浅草寺

雖然都去過好多次浅草雷門，但今次係第1次去睇到櫻花，
呢度感覺有啲去左京都既感覺。
如果平時都去開，櫻花期都不妨再去睇下，
係兩種唔同風景黎架！
由浅草行去SKYTREE既路上都會有唔少櫻花，
而且一路上兩旁都係平房，無咩旅客，慢慢行好舒服。

路程：由JR新宿站出發，搭中央線中央特快到神田站，
然後轉東京metro銀座線到浅草，全程大約30mins，
向雷門方面出口，行5mins就到。

－美食篇－

沼津港

如果同我一樣咁鍾意食海膽既朋友，
又住喺新宿附近，就可以去下呢間店。
雖然呢間壽司店無築地食材咁新鮮，但都唔差架，
特別係佢既大盛海膽、大盛甜蝦，睇到都流口水∼
其他魚類都好鮮味，價錢唔係太貴，可以一試。

地址：東京都新宿区西新宿1-10-1 MY新宿жюB2

LADUREE

女仔一去到就必定瘋狂既小店－LADUREE！！
雖然香港都有，不過就無得食雪糕，
今次我去到當然要試下啦，仲點左個季節限定櫻花味。
先唔講味道，賣相真係靚得不得了∼
粉紫粉紅加啲白朱古力粒加啲練奶加幾粒花占餅，
真係見到都唔捨得食呀…
而呢杯單球只係賣454YEN（約港紙$30），好抵食！
個雪糕既質感好綿好綿，唔似平時食開既雪糕咁，
而味道唔會過甜，岩岩好，淡淡櫻花味，
極度推薦！一定一定要試呀！
另外我都有買佢地既macaron，每個售價係270YEN（約港紙$18），
宜家日本紙水低，都平過香港幾蚊架！
當店仲有其他cake同macaron，可以order完坐低食都得，
唔趕時間既話可以建議可以坐低慢慢食。

地址：東京都新宿区新宿3-38-2 ютб新宿店 ютб2 1F

若狭家

基本上我每次黎到都會食呢間喺歌舞伎町既魚生飯店，
今次黎到又食左兩次，
左下既係春天限定先有既海鮮丼，
每樣都好新鮮，尤其係蟹腳！！
海膽、甜蝦同蔥吞拿魚都係必點既∼
每碗大慨1000-3000YEN不等，就算係女仔都食得晒一碗架。

地址：東京都新宿区歌舞伎町1-15-7 栄喜堂 1F

清江苑

行原宿行到攰，可以考慮下去呢間燒肉店補充體力！
揀左70品類既plan，4000YEN左右120分鐘放題，
所有肉類都好好食！！！
仲岩晒好鍾意食牛舌既朋友，
呢度既牛舌有手掌咁大塊，燒完又香又爽口，正！
食完仲有甜品，推介黑糖紅豆雪糕！

地址：東京都渋谷区神宮前6-4-1 原宿八角館жю 5F

鰻 前川

呢間老店已經有2百幾年歷史，好多日本人都會黎食，
榻榻米怖置房間，加上望到窗外風景，別有一番風味。
（不過我自己真係好唔慣要屈膝，野食未到對腳已經痺左…）
野食以鰻魚為主，叫左一set鰻魚飯同燒鰻魚，
鰻魚有三個等級可以揀，我自己就揀左中等，
雖然價錢方面比較貴，大約6000YEN一set，但係都會覺得物有所值。
燒汁好香，鰻魚肥瘦適中，飯粒沾左燒汁+魚汁好好味，
另外點既鰻卷都係必點！！
本來以為附送既生果甜品係蜜瓜，但上碟後原來係柚子，
食落口清甜到不得了∼好驚喜∼

地址：東京都台東区駒形2-1-29

ウヒヅウヒヅ温野菜

食左燒肉又點可以無shabushabu，
去到日本唔知點解一定要去食宵夜，
可能係太多美食，一日要食幾餐先覺得滿足∼
而呢間店係要推介比一眾想搵宵夜既朋友。
雖然佢係以蔬菜為主，但係都有肉類放題plan，
我就叫左黑毛和牛+蔬菜+飲料放題，約5000YEN，
只要叫左plan，其他前菜、飯、麵都係附送既。
湯底可以揀兩款，推薦豆乳湯+麻辣，兩種口感，
呢度既蔬菜真係好新鮮，食唔停！！
而肉類都一樣好鮮嫩，每款肉上碟都會註明個名，
咁就可以知道自己食緊邊款喇，
而且唔使點任何sauce都已經好好味∼
呢間店係5pm開到5am，岩晒夜鬼架。

地址：東京都新宿区新宿3-20-8 TOPS HOUSE 6F

如欲取得更多第一手美容及扮靚資訊
可瀏覽Girls Talk Main Blog： Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)

近年新娘妝容崇尚簡約、自然，給人感覺清新、耐看，
即使化妝後仍是自己原本的樣子！
最近我找了3位同學拍攝新娘妝，以下會分享一下當中所用到的小技巧。

第一個進行「大變身」的同學是Karen Lam，
已婚的她之前Pre-wedding和big day都試過不同的化妝師，
這次變身後問及她的一些感受，她說：

「我本身比較鐘意自然接近自己個樣嘅化妝同髮型，
最緊要睇落亁淨精神，因為唔會outdate，十年後睇返都唔會覺得好娘，
好怕坊間千遍一律嘅大眼妝，大陽花花眼睫毛，同啲好誇張大舊嘅髮型。

自己之前搵big day化妝師遇過好多騎尼嘢，
有試過化咗仲衰過未化，有啲就太過俗套，太過一式一樣，
仲試過影pre-wedding時個妝重度自己都接受唔到，要求即刻減淡啲…
今次大變身真係好開心，當日化嘅妝仲靚過晒自己結婚影prewedding 嘅妝，
望落好有立體感但又唔會過份誇張，走果陣真係唔捨得落妝！」

所以一個好的新娘妝容對新娘子很重要，
如果化得不好，隨時令客人老了十歲！

這次的「大變身」除了Janice外，
還有大師姐Jan、Frances和Sugar的幫忙，
加上攝影師，才得以順利完成整個拍攝計劃，
感謝大家都十分認真去完成這次的計劃。

其實要化好一個新娘妝，需要運用多個小技巧，
以提升面部輪廓、光感、立體感等，同時改善及修飾瑕疵，
令新娘子變得漂亮之餘，還可保留自己的原本的樣子，
秘訣在於以下的小技巧：

1. 拜拜厚粉底妝

如在big day當日塗上厚厚粉底，不但不能遮蓋到瑕疵，
反而會造成浮粉、龜裂的情況。
應選用質感自然的粉底液，加上遮瑕膏，才可成功遮住瑕疵。

Lancôme Teint Miracle Bare Skin Foundation $390

2. 淺粉色系彩妝

有時大地色眼影給人感覺較老成及沉色，所以清新系的妝容應以淡色為主，
眼影可選粉橙、粉紅色系，加重光感，
最重要是於眼尾掃上淺啡色，就能減少浮腫情況。
下眼頭位則可加上珠光色眼影，令眼睛看起來更精神。
而胭脂和唇部同樣可選用同色系粉色，令整個妝容更柔和、自然。

AUBE couture Designing Impression Eyes #571 $240

ettusais heart cheek color $150

SHISEIDO Veiled Rouge #PK304 $210

LUNASOL Full Glamour Gloss A #EX06 $230

3. 新娘必備highlight & shading

如不想給人感覺大面餅，就要利用光陰影突出面部輪廓，增加輪廓感，
可用liquid狀highlight & shading，重點是於上粉底前塗上，效果會更加自然。

GUCCI FACE Golden Glow Bronzer #030 $510

JILL STUART secret control concealer $230

4. 黏走無神垂眉

如新娘的眉毛較長及下垂，可沾上少少睫毛膠水於要修整的眉毛上，
並用掃柄將其黏貼整齊，這樣就可以快速修正眉形，令眉毛看起來更整齊。

5. 掃出自然眼線

很多人都覺得化新娘妝一定要加上誇張眼線或假眼睫毛以突出輪廓，
但若祟尚自然，自身眼型又不算細，
只需用筆狀眼線畫一條貼近眼型的眼線再掃鬆，
就能做出精神又自然的效果。

6. 瞬間踢走浮腫垂眼

適當加上雙眼皮膠紙，有效減少浮腫、平衡眼雙眼大小，
令雙眼看起來更圓大、精靈。
而貼法方面亦跟平時略有不同－可以集中貼於眼珠中間位置，
效果會更圓，改善垂眼，令整個感覺較甜美可愛。

AK Pro網紋膠紙(連膠水) $135

7. 假睫毛加內眼線

如想改善垂眼眼型，可用前短後長的假眼睫毛和將假眼睫毛尾端微微調升，
貼高(距離睫毛根部)1mm，有效減少眼部浮腫情況和改善眼型。
如想妝容更加自然更加好看，
一定要用眼線筆補回白邊內眼線，這樣就不易被察覺！

AK eyelash #609 $75

Vina Eyeliner $95

如欲取得更多第一手美容及扮靚資訊
可瀏覽Girls Talk Main Blog： Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)