又有新mascara推出喇∼
今次我地一次過嚟個大測試，
比較佢哋嘅防水、防油度，仲有試用報告，
等大家可以按自己需要揀番啱自己嘅Mascara！

左：Majolica Majorca Lash Bone Film $115

相中都見到有一條條黑色毛毛，
呢啲就係半透明基調配方中加入咗漆黑纖維，
可增長睫毛又唔會令睫毛變白，
亦可將睫毛定型令睫毛持久鬈翹，
含維他命E及夏威夷果仁油，修護睫毛及增加睫毛彈性。
底霜配方可以用溫水卸除。

右：Majolica Majorca Lash King Film BK999 $158

5mm增長基底配方加上輕盈無重粉末，
搽一層就好似兩層嘅濃密效果，
防汗水、皮脂、淚水，不易脫妝，
用溫水就可以卸走。

防水度一般，淋水後溶咗啲啲，
防油度就幾好，敷咗5秒鐘卸妝油都只係甩好少。

呢支mascara好多纖維，
有明顯有增長同濃密效果，亦好挺身，
色澤濃黑，輕輕掃一層已經有效果，效果自然。
如果本身睫毛軟，好易drop嘅話就啱晒喇。
掃頭size適中，所以都好易掃。

Maybelline Great Lash Lots of Lashes Washable Mascara $89

Great Lash系列係品牌經典皇牌睫毛液，
桃紅加螢光綠色包裝非常搶眼，
新出嘅Lots of Lashes含蛋白質成分修護滋潤睫毛，
特別嘅心形刷頭，打造不結塊嘅睫毛。

防水度OK，但防油度一般，
mascara甩咗少少。

可以做到根根分明，刷頭末端較短嘅掃毛掃眼頭眼尾都唔錯，
每次份量都控制得好好，唔會太多，
避免結塊情況，感覺輕身，
而且佢嘅掃頭size較細，對初學者嚟講都會比較易用，
唔會咁易粘到皮膚。

Maybelline Volum’Express BIG EYES Mascara $129

雙刷頭設計，一邊係螺旋濃密刷頭適用於上眼睫毛，
另一邊係細刷頭，適用於下眼睫毛及幼細睫毛，
眼頭、眼尾位置睫毛較短同幼，用細刷頭就可以更容易掃上睫毛液，
全方位打造大眼效果，亦可避免唔小心粘附到皮膚。
含Care Cocktail睫毛修護配方，有效強化睫毛及保持睫毛滋潤。
防暈染薄膜配方好似幫睫毛搽一層保護膜咁，令睫毛更鞏固持久。
溫水就能卸除，可以溫和卸除睫毛液，減少睫毛因卸妝而脫落情況。

防水度一般，淋水就化開，
敷5秒卸妝油都甩咗少少。

雙刷頭設計好方便，有細刷頭搽短小睫毛更容易，
但係大刷頭嘅size比較大，可能冇咁易handle，
搽完睫毛微微增長同濃密咗，捲翹度一般。
本身睫毛軟身可能會比較易drop。

左：Anna Sui鬈翹睫毛修護底霜 $200

透明配方可單獨使用，令睫毛保持鬈翹。
亦可用作打底、定妝。
打底用令睫毛液效果更突出，
用嚟定妝能Keep住睫毛鬈翹，持久度更高。

右：Anna Sui魔效纖長明眸睫毛液 $220

快乾特性加速定型、增長及捲曲睫毛，
防水、防油、防暈染，用溫水卸就可以，
仲有淡淡玫瑰花香，真係好少有呀！

防水度OK，防油度好唔錯，完全冇溶到。

明顯增長咗，掃頭好易掃，睫毛可以梳得好整齊，
唔會一舊舊痴埋，而且好挺身，
掃咗幾層都好自然。
睫毛又軟又幼嘅朋友可以試試。

中：Anna Sui魔幻雙效濃密睫毛液 $260

雙效刷頭有兩種平面，不同長度嘅刷毛能抓住不同位置嘅睫毛，
順滑性嘅聚合物防止結粒及黏感，
高度防水、防汗、防眼淚。

沖水後mascara位置好似有層保護咁，
有水珠喺表面，mascara都冇溶。
防油度好好，完全冇甩。

濃密度同捲翹度唔錯，唔會打“cake"，
刷頭易梳，上幾層都冇結塊，
可以keep到好挺身。

加入含有美容成分嘅新型薄膜，
防止睫毛水分蒸發，修護受損睫毛，
配方防皮脂、汗水及淚水，滴眼藥水都唔會暈染。

中至下（黑／啡）：dejavu Fiberwig Extra Long Mascara $118

全新曲線刷頭更能緊貼每根睫毛，
加強咗纖維附著力同粘接力，令睫毛愈刷愈長。

防水度一般，沖水好快化開，
防油度唔錯，只溶咗少少。

mascara質地較水劑好易搽，
掃頭好易掃到根根分明，
掃幾層都唔會結塊，
增長效果一般，效果自然。

上：dejavu Lash Knockout Volume $118

均勻嘅豐盈成分有效包住睫毛，
配合呈放射狀嘅刷頭，能令睫毛液充分附喺睫毛上，
半乾狀態下重複搽可增強濃密效果。

防水同防油度都一般，咁多款中溶得最多。

掃頭大小適中，每次攞嘅份量唔會太多，
唔夠可以一層一層再加，
掃幾層都不易結塊，濃密度唔錯。

如欲取得更多第一手美容及扮靚資訊
可瀏覽Girls Talk Main Blog： Girlstalk Blog
或 Like我們的Facebook專頁：
Janice Lam Makeup Workshop Facebook

好多唔鐘意化全妝既朋友都鐘意搽番個咀，
等自己望落去精精神神，
據非正式總計，全球女性擁有得最多既化妝品入面，
唇膏就係佔第一位，
證明唇膏對女性既重要性。
唇部化妝已經係呢幾季必備既化妝潮流之一，
無論你本身鐘唔鐘意sharp色既唇膏，
係韓流化妝既影響下唔多唔少都會對sharp色唇膏有改觀架！
近期我地都收到幾個唔同品牌春季新出既唇膏，
而佢地都有共同特點，就係顏色都好sharp，
當中都有分令身同啞緻質地既唇膏，
今日我地就會挑選左幾款唇膏試比大家睇啦。
唔知大家又會鐘意邊款呢？

LANCOME L‘ABSOLU ROUGE ＄250

今次呢支唇膏係用左玫瑰花做主題，
用左10種唔同既品種，推出左10種新色調，
佢地仲特別研發左比色提煉技術，
將玫瑰鮮明既色澤融入係唇膏當中，
令到唇膏可以呈現到真實色彩。

呢支唇膏搽第一層會比較透薄，
搽第二層就開始呈現唇膏既顏色，
都好像真，亦遮到唇紋，
有少少光澤既感覺。

滋潤度： ★★★☆☆
易卸度： ★★★★☆
顯色度：★★★☆☆
氣味：無味

Estee Lauder pure color envy sculpting lipstick $270

呢款新唇膏含有立體炫色粒子，
可以令咀唇望上去更加豐盈，
而且亦含有透明質酸，做到長效水潤保濕效果。

之前我自己都買過一支佢地既唇膏，
感覺都唔錯。
今次試左佢地新出16色唇膏，
效果都令我幾驚喜！
搽第一層已經好顯色，
質地亦好creamy，好滋潤，
唇紋即時無咁現，
感覺仲幾柔滑，
唇乾既朋友都好岩用。
佢算幾持久，相對落妝既時候就要花啲心機啦。
仲有16隻色任君選擇，
真係總有一款岩你心水呀！

滋潤度： ★★★★☆
易卸度： ★★☆☆☆
顯色度：★★★★☆
氣味：淡淡甜味

見到呢個咁靚既盒，
大家估唔估到係咩黎呢？

Shu Uemura laque supreme $230

有留意開我地Facebook既朋友
都知道Shu Uemura送左一系列漆繪水亮唇彩比我地呀！
一打開真係「嘩」左出聲，又係多色選澤！

今次Shu uemura同著名皇室御用既漆畫製造商山田平安堂合作
推出全新唇妝系列。
打造成為好似漆器工藝咁華麗亮澤既咀唇。
呢款新唇彩加入左全新植村秀紅染色料，
做到顏色鮮明既效果。
而今次仲會將水溶性染色料同油溶性顏料混合，
除左可以令色澤好艷麗突出之外，
更加令唇彩保持一定覆蓋度，
打造豐唇效果。

今次亦要讚一讚支唇捧，
好貼合唇型，可以好準確勾畫出咀唇輪廓。

呢支唇彩就好像係唇膏同唇彩二合一咁，
搽上去感覺好薄但就好出色，
色彩亦都好實，光澤感好強，
可以打造玻璃咀效果，
而且唔洗搽上潤唇膏打底已經好滋潤，
如果唇紋多，易甩皮既朋友用佢就岩啦！

滋潤度： ★★★★☆
易卸度： ★★★☆☆
顯色度：★★★★☆
氣味：果香味

如果無咁多budget既朋友就可以考慮下開架品牌，
好多都唔錯，
今日我都有兩個心水推介比大家。

L‘oreal collection star pure reds $98

L’oreal 今次新推出6款限量色調，
仲係以6位國際巨星代言人做調色靈感添。
包括有李冰冰、范冰冰、鞏俐、
BLAKE LIVELY、CHOMPOO同FREIDA。

唇乾既朋友就好驚用啞緻既唇膏，
驚現唇紋同甩皮。
而我試過呢款都覺得幾ok,
雖然滋潤度未算驚喜，
不過佢matte得黎唔會太乾，
亦都好出色，
搽完唇紋亦唔會太現。
呢個系列都係以紅tone為主，
鐘意搽紅咀既你就岩曬啦。

滋潤度： ★★☆☆☆
易卸度： ★★★★☆
顯色度：★★★★☆
氣味：無味

唔鐘意搽matte咀既你，
就可以考慮以下呢個牌子。

ZA Vibrant Moist Lipstick $95

ZA新出呢支唇膏採用左鎖水配方，
蘊含透明質酸同膠原蛋白複合物，
可以令咀唇提供12小時長效保濕，
一共有10種新色調比大家選擇。

平價唇膏黎講，呢支都算幾有驚喜！
唔洗用lip concealer一下搽上去已經遮到唇色，
顏色好像真，
仲好滋潤，亦帶有光澤感，
搽上去既感覺同大牌子有得揮 !
我特別鐘意＃RD555呢隻色，
暗紅色既唇膏搽出黎感覺都幾型格架！

滋潤度： ★★★★☆
易卸度： ★★★★☆
顯色度：★★★★☆
氣味：淡花香味

見到咁多sharp色唇膏唔知大家有無心動呢？
個咀紅潤啲番工都精神啲架！
不過亦有朋友番工唔想搽得太鮮色，
雖然屋企買買埋埋好多sharp色唇膏，
但始終未有勇氣搽出街，
咁就可以用之前我地教過既咬唇咀方法去搽啦！
會較易handle搽出黎亦無咁跨張架，

可以click以下條link重溫：
《韓式咬唇妝教學》http://www.girlstalk.hk/blogs/?p=11554

而我自己個唇都幾易乾，但就無乜甩皮情況，
我就好鐘意搽出黎有亮澤效果既唇膏，
望落去個咀會好潤澤，
不過每個人喜好都唔同，
市面上既唇膏可以話有如繁星咁多款比大家揀，
有分唔同質地、色tone、價錢，
大家可以因應自己既budget去選擇啦！

如欲取得更多第一手美容及扮靚資訊
可瀏覽Girls Talk Main Blog：
Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)

化一個靚妝除左顏色要襯得好，
亦需要立體嘅輪廓，
眼妝都唔需要化太濃，
雖然係咁，色tone亦未必只可以用earth tone嘅，
揀一啲珠光或者shimmer嘅眼影，
淡淡地嘅顏色就已經令眼睛夠bling bling架喇。
以下介紹嘅幾個品牌產品，都可以做到呢個效果，
大家會唔會試下呢？

想好似外國人嘅輪廓咁突出，
除咗整形之外， 可以試下運用光暗影去突出輪廓，
令輪廓在視覺上更加分明。
Clinique新推出嘅亮肌筆同塑顏筆就可以輕易做到呢個效果喇。

上：Clinique立體亮肌筆 $190

含反射光線珠光粒子，掃喺蘋果肌頂部、鼻樑位置、
額頭中央、下巴位置， 增加皮膚光澤感，
令打亮位置更飽滿， 改善亞洲人扁平嘅輪廓。

下：Clinique立體塑顏筆 $190

喺有需要修飾嘅位置，如掃在腮骨位、雙下巴，之後再推鬆，
令shading顏色有深至淺漸變效果，
造出自然陰影， 令面型睇上去瘦啲，令面型輪廓突出啲。
做完highlight, shading可以增加輪廓感，
再加埋有層次嘅胭脂就令面部立體感更加突出啦。

上圖見到面頰同腮骨位置有少少陰影，
過鏡後顏色會減淡咗，但真人就啱啱好。
如果影相出嚟太明顯嘅話，真人睇就會太誇張，唔夠自然架喇。
打陰影切忌太重手呀！

立體塑顏胭脂 $250

上：#Defining Pinks
左：#Defining Berries
右：#Defining Nectars
下：#Defining Sugars

光影同胭脂集於一身，三種色調混和使用，
效果自然柔和，仲好有光澤感添，
用於適當位置就可以加強面部立體感。
好似糖果顏色嘅Defining sugars，
可以提亮膚色，用於全面或highlight位置，
增加皮膚光澤感，令皮膚睇起嚟更滑架。

我試咗 #Defining Nectars，無論白淨同健康膚色都可以用嘅顏色∼

1. 混合3隻色(a,b,c)集中塗於蘋果肌位置，微微斜上掃開，
2. 左下嘅highlight(a)塗於蘋果肌胭脂頂部，
3. 右下最深色(c)可塗於面頰凹位修飾輪廓，
有深淺層次嘅胭脂，令面部更立體。

雙效塑形眉筆 $165

畫眉對於整個面部輪廓都好緊要架，
眉色、粗幼同眉形合適嘅話，可以令人更精神。
呢支眉筆係雙頭設計，一邊係深啡色自然眉色，
另一邊係用於眉骨嘅光影筆。
可以用深啡色填補眉形， 尤其適合填補眉毛稀疏、缺角位置，
粉紅香檳色嘅光影筆適合亞洲人膚色，
珠光色用於眉骨位，光線折射下就有提升效果，
令眼部輪廓更有立體感。

平時返工或者出街都鍾意淡妝嘅話，
以下Paul & Joe新出嘅Eye Gloss就啱晒你喇！

Paul & Joe Eye Gloss $200

呢類Liquid Eye shadow對新手嚟講都好易用，
只要在眼窩位置點幾點，用手指印開就可以，
呢幾隻eye gloss顏色都好靚呀，
單搽或用嚟做eye base on top再加eye shadow亦very good!
簡單地印上單色eye gloss，再加條眼線已經好精神，
作為日常返工妝一流，又快又容易！

#3 Angel's Wings 粉紅同淺紫色嘅結合，帶少少珠光同閃粉，
質地介乎水同gloss之間，
好易印開同好均勻，亦唔會有摺痕，效果自然。

先逐一介紹M.A.C.新品，之後再化一個柔和妝容比大家參考下∼

Lightness of Being系列嘅色調都以柔和為主，
唔係好sharp好誇張嘅感覺，
但係淡淡嘅顏色已經可以令妝容好突出。
另外，眼影、胭脂等嘅pattern好特別，
分別係織紋同格仔，FANS們會唔會收藏呢？

Mineralize Eye Shadow $215

左上：#Natural Vigor
右上：#Leap
左下：#Spiritual Life
右下：#Just Breathe

上半部係珠光效果眼影，
下半部顯色度更高，而且有閃粉，
分開用或者配搭一齊用都好靚好突出。

Mineralize Blush #Please Yourself $215

粉紅同莓紅色嘅混合體，帶少少閃，
如果覺得淨粉紅色太少女，或者淨莓紅色偏成熟嘅話，
呢隻就剛剛好喇！
睇上去仲好有光澤添！

Mineralize Skinfinish #Perfect Topping $275

夾雜淺粉紅、藍色、黃色調嘅powder，
可令面色睇落紅潤健康啲，
shimmer效果亦令面部膚色更有光澤。

Mineralize Rich Lipstick #Style Surge $230

百搭嘅珊瑚色效果自然，
搽上咀已經係自然好氣色，
質感滋潤，令令地可以改善唇紋。

Mineralize Glass $230

由左至右：
#Beautiful Moves
#On Cue
#Poetic

帶微閃粉嘅Pale color lip gloss，
凝造閃令效果，令咀部更水嫩飽滿。
質感唔會痴笠笠，而且唔快乾身，令身效果持久，
同時改善唇紋。

 持色煙燻眼線筆 $145

    由上至下：
#Snowed In
#Graphblack
#Metalhead

含獨有植物萃取蠟成份及持久配方，
Keep住8小時唔甩色。一畫上手就出色，唔會好難上色。
用嚟畫內眼線都唔會覺得太硬而敏感。

Shimmer嘅 eye shadow加上soft eyeline,
雖然唔係earth tone嘅眼影，但係感覺都好natural架，
化得多earth tone不妨試試其他色啦！

Step 1: 塗#Natural Vigor(下半部)於眉骨及整個眼窩
Step 2: #Leap(上半部)由雙眼皮摺位向上掃鬆
Step 3: #Leap(下半部)塗於眼尾，#Natural Vigor(下半部)highlight眼頭
Step 4: ##Snowed In畫下內眼線，#Metalhead畫外眼線再掃鬆

Total Look:

Body Shop Summer Cubes四色閃爍眼影磚(左#32，右#31) $199
話明係summer cubes，顏色都比較sharp同colorful，
cube形eye shadow嘅設計平時好少有，好的骰好得意，
可隨意配搭，獨立或者混合使用，亦可乾濕兩用。
蘊含購自公平社群貿易嘅漆樹果仁油。

今次用咗#31，簡單四個steps就完成一個立體眼妝∼

Step 1: 將highlight色(a)塗於眉骨及整個眼窩
Step 2: 靛藍色(b)塗於雙眼皮摺位及後眼窩位置
Step 3: 深灰色(c)塗於眼尾位置

今次就同大家介紹一下我鍾意食既，
近排我買左幾款唔同既零食，連workshop同事都覺得好食！
又試左款紅酒，唔識飲酒既女生都覺得好易入口，
同埋我都會自己喺屋企燉糖水，喺宜家咁乾燥既天氣滋潤一下。
鍾意食野既你地就一定要睇下我既心水推介啦！

水泡餅唔係好多地方都會有，
平時超市賣既都好硬，食完好乾，
不過無得揀之下我都會間唔中買黎吊下癮，
我自己本身好鍾意食呢類粉狀既零食，
好似係之前介紹過既糖，都係粉狀。

最近就比我喺荃灣南豐中心地下搵到一間賣呢類零食既店，
我見到有水泡餅就買左啦，不過初時未試過就唔敢買太多，
返到去試完之後真係好覺得好好食！
佢呢隻既水泡餅好鬆脆，唔硬，又唔乾，
係幾年來食過最好食！可以encore再去買！
而且呢度既懷舊小食價錢都好公道，
大家都可以去搵下，叫做「合興」，
入面仲有香蕉糕既糕類、龍鬚糖等等既小食。

我仲有買花生酥，竟然有同事話唔知係咩黎，
未食過真係人生一大損失！
花生酥好香，超好食，可惜唔係太多地方有得賣，
以前國貨公司專賣內地小食既counter就會有，
所以今次去到見到有就即刻拎左，
同埋要買返一條比同事睇下！
呢度既花生酥好濃花生味，仲好鬆軟，一啲都唔「漏喉」。

雖然我之前都有介紹過去葵涌買齋雞粒，
但係有間仲好食，都係喺南豐度搵到。
呢間齋雞粒個個同事都話好味，
唔大粒、唔硬、味道岩岩好，
如果大家都鍾意食既話就要去搵下啦！

宜家好多後生仔女買零食都要揀日本台灣外國，
但其實本地都好多本土零食好好食架，
如果大家都唔繼續支持，就會愈來愈少地方有，
識整呢啲小食既師傅唔撈就真係隨時失傳無得食。
本地既零食唔比外國差，而好多懷舊小食都別有一番風味。

利申一下先，我唔係品酒專家，
唔識分咩年份／產地先算係好酒。
不過最近試左呢枝紅酒，真係覺得好飲既！
開酒時，在場五位女性朋友都讚口不絕，
其中都有識飲酒既朋友，所以應該唔差。

我自己本身就好怕苦既酒，好似我初班人士就會覺得好難入口，
聞到味道有酸味我都覺得唔ok，
但呢枝紅酒聞落好清，好易入口，
開酒後抖左陣氣之後更加易入口，
如果係for女仔飲，又唔鍾意好哽既味，呢枝就真係岩晒。

初時我以為係品牌送既酒，因為我屋企都好多酒，
諗諗下先發現原來係自己上年去法國買既，
原本係買黎送比爸爸，但爸爸都有好多酒，叫我自己要返。
我其實就唔識買酒，都係當時問duty free同事，
講返自己既要求，佢就推介左兩款比我，其中就係呢枝，
我都已經唔記得左幾錢，不過買得比爸爸都應該唔平，
大約一千樓下，around 700蚊左右，屬中價。

我自己都去過唔同既酒鋪搵過但周圍都無，
不過老闆就話有同區份既酒，都要大約一千蚊。
如果去開法國既朋友都可以搵下、試下呢枝酒，
去duty free買會平好多，我自己覺得係值得買既。

前排屋企搬左屋，為廚房添置左一個焗爐同蒸爐，
比朋友笑我唔煮野食買咁多廚具爐具，
我又要利申，其實我係識整中式飯菜，因為細個要幫手煮飯，
不過宜家工作太忙少左煮係有啲生疏，
而西式我自己就反而唔識，
所以最近我打算征服屋企啲爐具，一有時間就會煮下野食。

蒸爐方面，我其實本身睇左兩個牌子－miele同bosch，
最後根據口碑、價錢各方面就揀左bosch，
我呢款係build-in既蒸爐，貪佢多function又唔貴，
而我廚房其他廚具都係呢隻牌子，襯返一set又唔使再搵。

有蒸爐真係好方便，用黎蒸／燉／解凍都得，
煮既時候廚房唔會變得熱，平時落鑊真係好熱，尤其係夏天！
同埋唔使睇火計時，蒸爐有得set timer同火力。
好似我呢啲宅女，返左屋企就唔想出街，街啲野又heavy，
最好就係自己煮野食。

最近天氣乾燥，我就燉左啲滋潤甜品黎食，
我自己就唔鍾意食太甜，自己整就可以調味，
好似上面張相既蘋果雪耳糖水，
只要將材料放晒落燉盅，再放入蒸爐就整到。

材料方面，蘋果我用左日本富士大蘋果，
鍾意佢爽身同帶少少酸味，
不過咁大個，只係用1/3至半個就夠，
我呢個雪耳又係勁大個，浸完水有手掌咁大，
所以都係用1/3至半個，
加適量杞子，南北杏(optional)，兩小粒冰糖，
水位到大半滿位置，燉30mins，100度。

呢個糖子可以清熱潤肺，最近流感咁勁食呢個就岩啦。
雪耳有好高營養價值，含豐富骨膠原，價錢又平，
網上多數人推介花膠／燕窩，但係咪可以成日都食呢？價錢又貴。
我自己就覺得其實唔使用貴海味先有成效。
另外杞子有明目功效，加適量就ok。
糖方面我自己唔係加好多，因為我有少少味就可以，
如果大家整既話，我建議一開始唔好落咁多先，之後先慢慢調較。
我一個人住，整左一大盅，通常都當dinner咁食。

另外我仲整左呢個，係紅棗雪耳燉奶，
鮮奶有益，紅棗補血氣，雪耳清潤，
又係一個好好既糖水，好岩女仔飲。

我就用左兩份牛奶，一份水，
紅棗去核，雪耳就係之前用剩既大半個，
呢個因為有牛奶都有甜味，就唔需要加太多糖，
加晒所有材料，放入蒸爐燉30-45mins，100度。

我自己本身對牛奶就麻麻地，
但係加左水同變左熱食，我又好ok，
咁樣我又可以當一餐dinner食架喇。

雖然我入廚唔叻，但呢兩個糖水快靚正，
大家趁星期六放假有時間都可以試試。
如果有計劃搬屋既朋友，我都建議為屋企添置返焗爐同蒸爐。

 如欲取得更多第一手美容及扮靚資訊
可瀏覽Girls Talk Main Blog： Girlstalk Blog
或 Like我們的Facebook專頁：
Janice Lam Makeup Workshop Facebook

12月至2月都有女生重視的節日，
節日約會令女生不得不好好整理自己的儀容，
但是女生總以為化濃妝就代表重視，
其實經非正式調查，男生普遍不喜歡女生濃妝艷抹，
而他們亦不太懂得分辨妝容，只有濃及素顏兩種類別，
在街上見到美女往往以為是零妝容，但其實化了一個自然妝。
所以，女生只要學懂化一個適合自己的妝容，
突出自己的優點，就已經足夠讓男生感覺加分。