平時大家應該都有用開精華既習慣，
精華都有分好多唔同功能，
有重點保濕、緊緻、去皺、回復彈性等等，
亦有唔少all in one逆轉肌齡精華，
要揀一隻岩自己既精華，首先要問自己既肌膚有咩問題，
針對問題重點修護先能夠事半功倍，
想美肌，未必要美圖秀秀既！
今次我地就揀左８款精華產品介紹，睇下有無一隻岩你啦∼

保濕之選

肌研/ 極潤α彈力肌保濕精華素 30ml $185
(每1ml $6.16) <<最平serum之選!!!

唔好以為serum淨係開始偏成熟皮膚既女士先用得，
其實宜家見到好多18、9歲既少女既皮膚都有偏乾情況，
如果唔了解自己皮膚性質同護膚程序，就有機會出現偏乾，
當搽完cream都覺得抆抆緊、上粉有kick粉，
咁樣已經代表皮膚底層唔夠水分同唔夠滋潤。
呢個年紀既後生女要揀serum既話，
只係需要揀返補水既serum，唔需要揀太多function，
太過滋潤反而有機會爆瘡架。

肌研採用與肌膚相似的弱酸性，無添加香料、色素、礦物油、酒精，
含豐富抗衰老滋潤成分紅藻素、色澤呈橙紅的天然類胡蘿蔔素、
及肌研首創超級透明質酸保濕成份，能深入肌膚底層，幫助重整細胞，

有效地帶氧修護肌膚的底層。

成日喺電視廣告見到全知賢賣佢地既化妝水，
相信大家對呢個品牌都唔會陌生，
佢地既serum主打價錢平，質地都ok，
所以係好多少輕少女喜愛既品牌之一。

佢既精華呈淡黃色，質地帶少許杰身，
推開時會有黏笠感，但精華吸收得好快，
輕拍數下後就會全部被吸收，
吸收後皮膚表面會變得爽身，
適合喺春夏天、或皮膚屬油性質的人使用。

修護之選

SUiSSE REBORN/ Advanced Caviar LUXE Lifting & Sculpturing Serum 50ml $1316
(每1ml $26.32)

其實有好多品牌都有出魚子精華既products，可想而知佢既功效有幾好，
而呢個升級版尊貴魚子緊緻塑形精華液，可以激活修護力同再生力，
強化肌底防禦力，由內而外強韌肌膚。
仲可以修復膚色不均，受損皮膚等問題，令肌膚回復緊緻飽滿。

佢既精華呈透明水gel狀，質地同toner無異，
推開時會有黏笠感，
因為水狀質地，精華喺輕拍數下之後就會全部被吸收，
吸收後皮膚表面仍有少許黏笠，
感覺有一層薄薄既保護膜，有水潤感覺。
適合任何時間或任何皮膚使用。

抗斑之選

COVERMARK/ PRECIOUS BRIGHT SERUM W 40ml $800
(每1ml $20)

含高濃度維C誘導體、熊果苷和金雞納樹皮精華，
多重禦防黑色素，對抗因增齡而導致的暗啞、色斑、

陰影及皺紋等多重問題，締造肌膚高度透明感和光澤感。

佢地精華呈奶白色，質地杰身，cream狀，
推開後有黏笠感，吸收速度較慢，
吸收後亦有黏笠感，滋潤度十分高，
而因為佢係針對暗啞、色斑、細紋等歲月問題，
適合秋冬天氣、乾性皮膚或肌齡較高女士使用。

緊緻之選

CAUDALIE/ VINEXPERT FIRMING SERUM 30ml $690
(每1ml $23)

蘊含高濃度的白藜蘆醇萃取，有效提高肌膚密度和緊緻度，
並即時飽滿面部最容易老化的位置：蘋果肌、臉部輪廓及肩頸肌膚；

用後肌膚會變得柔滑幼嫩、緊緻、提升輪廓。

佢既精華呈奶白色，質地係較水既cream狀，
一推開就已經好快吸收晒，皮膚表面亦都好爽身，
唔同其他精華，佢仲多左種好幼滑既感覺，
仲有一陣淡淡既類似檸檬既果香。
適合春夏天氣、或混合性皮膚至油性皮膚使用。

ALL IN ONE之選

CLARINS/ Double Serum Complete Age Control Concentrate 30ml $630
(每1ml $21)

CLARINS每年都會出呢個水+油質地既serum，身邊亦有好多朋友用緊，
因為佢入面蘊含20種珍稀植物精萃，幫助潤澤肌膚，保持肌膚柔軟；
成分有海岸松萃取、有機麝香玫瑰精油、有機青香蕉、檸檬百里香萃取等等，

仲可以為肌膚補充養份、增加光澤、減少皺紋、緊緻肌膚，全方位對抗歲月痕跡。

佢既質地特別在於唧出黎時係水＋油既精華，
用手指溝混打圈推開時唔會覺得好油，反而係好水狀，
吸收後皮膚面層多左一層油潤得黎帶爽身既質感，
可以平衡返肌膚既水油成分，又唔會油淋淋，
適合秋冬天氣、或各種皮膚使用。

美白之選

SHISEIDO/ VITAL-PERFECTION White Circulator Serum 40ml $1200
(每1ml $30)

一到春夏天，個個女仔都想美白，唔想有黑色素沈澱形成雀斑，
到時出晒斑先改善就更加困難啦，所以我地要預早防止色斑形成。
除左美白，貪心少少想要埋firming效果，
令皮膚望出黎更加靚，用呢枝就岩晒。
其實25歲後開始見到皮膚有鬆弛情況或者色斑，
呢枝就可以兩樣情況同時改善。

呢枝serum有獨家配方Shield Builder WT，集中改善頑固色斑；
高效美白成分4MSK抑制色斑成因黑色素形成，同時清除積聚於肌底黑色素；
隔絕外界刺激物，保護肌膚，24小時補濕。

佢既精華係呈乳白色，質地係偏水既cream，
推開之後好快就吸收晒，
感覺好水潤，唔會痴笠笠，
因為佢係可以重點美白、改善黑色素，
適合容易出雀斑，或者有日積月累色斑既人，
任何膚質都可以使用。

光澤之選

AHAVA/ DEAD SEA OSMOTER EYE CONCENTRATE 15ml $360
(每1ml $24)

含有小黃瓜精華，配合合歡樹皮萃取及咖啡因等等，
早晚使用，可減少黑眼圈、眼袋、浮腫等問題，同時提升眼周肌膚光澤感。

AHAVA/ DEAD SEA OSMOTER CONCENTRSTE 30ml $470
(每1ml $15.66)

創新性抗衰老精華，獨有三重 Osmoter™ 專利配方，
併合清新果酸、維他命C及獨特的褐藻，有助改善暗沉膚色、

修正不均膚色同時重點提升肌膚光澤度。

如果本身眼周肌膚好乾好多紋，唔係淨係採好潤既eye cream就得，
而且好多人怕太潤又會生油脂粒。
有時候太乾，搽cream未必可以吸收晒，令cream既功效發揮唔到，
咁呢個時候用eye serum就最好。
Eye serum既質地比eye cream薄，令皮膚可以快啲吸收到，
之後再搽eye cream，效果會更加好，
所以眼周肌膚有問題，可以試試呢個方法架！

呢個眼部精華係呈透白色，質地係偏水gel狀，
推開之後好快就吸收晒，唔會痴笠笠，
好適合用作eye serum，

呢個係任何膚質都可以使用。

AHAVA最出名係運用死海既天然礦物成分製成獨有的護膚品，
三重 Osmoter™ 專利配方包括鹽海水、泥同海藻植物精華，
而呢啲精華可以將水分同養分帶到最深層既皮膚底層至表層，
令肌膚24小時都飲飽水。

面部精華係透明水狀，同樣好快就吸收晒，
感覺好水潤，吸收後感覺有少少痴笠，

用作晚間修護就岩岩好，混合性皮膚同油性膚質都適合。

如欲取得更多第一手美容及扮靚資訊
可瀏覽Girls Talk Main Blog： Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)

唔知大家知唔知道我成為化妝師既心路歷程，
今次想整理一下我既作品，
同時同大家分享返我做化妝師既經歷。

以前要做化妝師真係唔容易，
我自己會考又唔夠分啦，
又做過自己唔鍾意既工作啦，
被睇唔起、失意、灰心等等既心情我都有試過，
但係我知道，幫到自己既只有自己！
初時自己都前路茫茫，唔知咩先岩自己，
自己又唔係太叻啦，
都有諗過將來既自己係點樣，
最worst有時諗到自己老左會唔會去左超市做收銀，
或者連搵工機會都冇。

由個時開始我就諗自己有無工作係適合自己，
文職文字方面我自己就麻麻，
而數學數字更加係由中一起未合格過，
關於學術上既野我就完全放棄。
不過初中時，英文台每星期一次fashion show，
我都會睇，覺得model好靚，D衫好靚，
但當然我唔係想做model啦，有自知知明。

我都有想過讀fashion design，都係得個想字，因為太貴，
而且要出名就要出國深造，
所以呢個夢想好快幻滅，返回現實！
從各方咁狹窄條件，
最後就得以下呢幾門手藝可以發展事業，
化妝、剪髮、美容

髮型其實第一樣已經BAN左，
以前覺得邊緣少年先會去學呢樣野，
當然宜家唔會咁覺得，整一個好既髮型都唔簡單，
每個行業都有佢值得尊重既地方；
而美容…要搞衛生方面既野真係麻麻，
尤其係我好怕唧人地暗瘡，所以就完全唔諗喇；
到最後揀無可揀，我就揀左化妝。

當我接觸左化妝，搵到自己既興趣之後，
我就一邊返part time，一邊學化妝，
儲錢買makeup products，
同埋努力上堂、練妝、睇reference。
如果你問我點解唔去外國學化妝，
我當然想，但唔係人人都有能力可以咁做，
其實有心學，肯努力，就算邊度學都可以成功。

宜家化妝師呢個行業已經受大眾接受，
我以前就算化妝學校第一名畢業，
出到黎都係要周圍搵野做，乜都做下，
又無人帶實習，唯有自己硬住頭皮做多啲，
但係我自己都有會有一個宗旨，
就係唔會做唔比錢人既commercial job。
因為係行規問題，加上commercial job通常會有預定既budget，
可能好多化妝師為左累積經驗而唔收錢，
但我自己只會幫慈善job先會做唔收錢既工作，
並唔係因為我揀job做，而係我唔想做壞行規，
我地都係一個專業行業，如果個個都話唔收錢
只會令出job價錢愈來愈低，
我認為最basic都要比人知道化妝師係professional，
其實攝影師、model都係一係，
呢個世界無免費午餐，如果唔係大家點樣生活呢？

宜家既同學仔其實好幸福，起碼有outjob可以睇下人地點樣去做，
我自己以前只係亂打亂撞咁搵機會。
workshop都開左４年，但不時都有致電查詢化妝班既同學仔問有無實習，
坦白講，你會唔會問馬會職員買六合彩係咪一定會中？
雖然我呢個比喻係好harsh咁樣，但呢個係事實。
我知道可能有同行會標明一定有outjob，
而我地亦都會有outjob，不過就只會挑選返平時成日黎練妝、
好比心機既同學仔出去。
大家問心：自己有無裝備好？有無珍惜機會？

化妝師既口碑好重要，如果做衰左自己名聲，
人地就唔會再比機會你，
如果自己技巧未夠，而呢啲機會又得來太易，
大家又會唔會珍惜呢？

好慶幸workshop學生都好勤力，
因為我知道大部分都係自己比錢黎學，所以好珍惜每個機會。
有時見到有人喺media渠道度有感而發，
話無機會發揮、好難入行、又話無人搵等等，好多怨言或者怨氣，
其實自己充滿怨言既時候，係咪應該自我反省一下，
自己有無邊個地方做得唔夠好呢？

我初出道既時候，
習慣出job前都會由頭到尾諗好晒所有steps，做多啲練習，
即使單job好少錢，對我黎講都係一個機會黎，
所以成功係留比努力既人；機會係留比有準備既人！
如果呢兩樣野大家都未ready好，
機會黎到，都未必可以捉得住。

入行兩年左右，有一個國際時裝品牌搵我去做品牌主化妝師，
有錢搵固然重要，但我最開心係受到尊貴品牌賞識。
咁當然初時做主化妝師要去安排所有野都會有難度，
要搵化妝師、安排當日化妝流程、model需唔需要rehearsal或者lunch、
所需要用既skincare、化妝品等等，
事前要編排好晒每個化妝師化邊位model、化邊個妝，
確保所有野都要on time完成。
而最難係所有化妝師化完出黎既效果都要一致，
如果有啲化唔到客人要求，又要諗應該點做。
除左化妝之外，仲都可以學到management，
而之後兩年呢個品牌有咩大小fashion show都有搵返我。
所以只要捉緊左機會，之後就可以慢慢拓展自己事業。

化妝師係咪好需要宣傳自己呢？
其實我都agree要有適當既宣傳，
但最重要都係口碑，
予期掟一大舊錢做宣傳，
倒不如做好啲，一個介紹一個，咁就更加好。
以前都冇宜家科技咁先進，
我都係靠呢樣野去建立自己既客群。

而之後我藉著做fashion show既機會，認識到一位日本化妝品既高層，
就開始左我做我既第一次喺台上既makeup demo示範。
第一次做其實係好緊張，不過呢度有啲長，有機會再同大家分享。

呢度既相都係我最近至舊時既作品，希望都比到啲靈感大家，
喺化妝路上變化萬千，而我自己最鍾意就係creative妝，
所以我一有時間就會睇下外國既reference，再諗下有咩主題可以創作，
其實做左化妝師，要睇更多，諗更多，等自己可以更加進步！

如欲取得更多第一手美容及扮靚資訊
可瀏覽Girls Talk Main Blog： Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)

平時好多人都問我地碎粉點揀，有無咩建議，
其實有唔少人係揀碎粉時都忽略咗碎粉嘅重要性。

碎粉有咩用！？

第一，就係「定妝」，減少面部出油，
佢嘅作用就好似平時「過膠」咁，令面上搽嘅粉底同遮瑕膏無咁易甩。

第二，修飾皮膚，令肌膚睇落滑D。

Loose Powder 歐美同亞洲品牌大不同 ！？

選擇 Loose Powder 時歐美品牌嘅顏色都會比較多，
不論係白種人，黃種人或者黑人都會較易揀到岩自己膚色嘅碎粉。

而亞洲品牌好似日本同韓國品牌咁，Loose Powder 嘅顏色就相對地少好多，
可能只有2﹣3種顏色選擇，而顏色大多數都比較淺。

所以膚色比較深嘅朋友係選擇Loose Powder 時可以先考慮歐美品牌。

另外，所有碎粉都有分粉紅Tone同黃Tone 兩種比大家選擇，
如果想皮膚效果白淨D可選擇粉紅Tone，想有自然效果就可以選擇黃Tone。

Pressed Powder 係咩嚟？

其實碎粉除咗Loose Powder 之外，仲有一種叫Pressed Powder，
Pressed Powder 係一種壓縮咗嘅碎粉，佢比起Loose Powder 更方便大家帶出街，
方便大家攜帶同係戶外補妝。

有D朋友會問到，Pressed Powder 同 2-way cake, Compact Foundation 睇落咁似樣，
兩者有咩分別？
其實分別就係 2-way cake, Compact Foundation 粒子比較大，
搽上面會比Pressed Powder 遮瑕度高，更可以遮到面上嘅毛孔。

Pressed Powder 質地比compact foundation 粒子比較幼細D，
效果較透薄同無咁乾，遮瑕能力比較低。

Translucent Powder 係咩嚟！？

Translucent Powder 嘅作用都係定妝，佢嘅顏色係未真係透明？係未任何膚色都岩用？
粉嘅質地好輕好幼，效果自然，掃上面會感覺粉好滑。
透明碎粉雖然講係透明，但唔係任何膚色都岩用，
如果皮膚深就唔建議用喇，因為透明碎粉搽出嚟都會有少少白嘅效果。

而佢相比其他類型嘅碎粉都會比較乾身同控油。所以如果大家出油好多嘅話可以選擇Translucent Powder, 
如果大家只係眼袋位同T位出油比較勁，
可以用Translucent Powder局部地搽係面上較易出油同容易溶妝嘅位置。

令身同唔令身嘅碎粉？

平時我地揀碎粉除咗可以從品牌嘅出處，種類方面考慮之外。
仲可以因應自己嘅皮膚需要選擇令唔令身嘅碎粉。

平時我地只需要仔細留意一下碎粉會留意到有D碎粉係加入咗一D珠光閃粉，
呢D就係「令身」嘅碎粉! 令身同唔令身嘅碎粉出嚟嘅效果都會有唔同。

如果皮膚比較乾嘅話，其實會比較岩用令身嘅碎粉。
因為令身嘅碎粉會令人望落肌膚更有光澤，仲有修飾肌膚問題嘅作用，
會令面上嘅細紋望落都少D！
如果面上肌膚本身問題唔大就可以選擇唔令身嘅碎粉，唔令身嘅碎粉會望落啞緻D。

Mineral Powder 比唔係 Mineral 嘅 Powder 好！？

好多人一聽 Mineral Powder 都會問咩皮膚嘅人先岩用？
又或者會問到Mineral Powder 同唔係嘅Mineral 嘅Powder有咩分別。

Mineral Powder 本身嘅特點就係大家唔需要先搽上濕粉，可以on-top 掃上面。
質感比較厚身，遮瑕度高。

因為佢嘅質地比較控油，所以適合中性至油性肌膚嘅人使用，
而且佢遮毛孔嘅效果都唔錯添！如果乾性皮膚但想用Mineral Powder，
建議先用潤少少嘅makeup base 打底再搽上Mineral Powder。

去到最後一個問題喇! 相信平時上碎粉大家嘅方法都會有D唔同，
不過離唔開兩種方法，一係用碎粉掃掃上面，二就係用乾粉樸印上面。

碎粉應該點樣上！？

用碎粉掃上碎粉呢個方法比較適合皮膚乾而皮膚本身不太多問題嘅朋友。
因為用碎粉掃上碎粉碎粉量會比起用粉樸為少，效果會比較透薄自然，
搽上面嘅粉量比較少，控油效果同定妝作用會不大，
整個妝容會比較有光澤，唔會咁「粉樣」。

至於用乾粉樸上碎粉啞緻效果會比較強，呢個方法比較適合油性皮膚嘅朋友。
如果面上比較多瑕疵同需要較多遮瑕產品嘅朋友都會比較適合用乾粉樸印上面。
因為面部需要較多碎粉保持乾爽，令面上嘅底妝產品唔會因為出油而溶妝。

題外話：點揀碎粉掃!？

碎粉掃最重要就係毛質，必須要動物毛，因為動物毛先夠柔軟，
一支好嘅碎粉掃入面需要有貂鼠毛同山羊毛。
貂鼠毛看質柔軟，輕身，搽上面會感覺毛質好滑好舒服。
不過一支碎粉掃單用貂鼠毛會太軟身唔夠彈性，
抓粉能力就會唔足夠，所以除咗貂鼠毛，
仲要加入山羊毛，山羊毛毛質挺身，增加碎粉掃嘅彈性。

如欲取得更多第一手美容及扮靚資訊
可瀏覽Girls Talk Main Blog：
Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)

雖然寒冬未過，
不過各大品牌已經紛紛推出春天妝物啦，
第一炮就有幾個出名包裝靚到嘩嘩聲既品牌，
好多女仔見到咁靚既包裝都會好開心，
甚至會儲起佢唔捨得用，
黎緊就到情人節啦，
如果未唸到送咩比另一半就可以參考下，
想知有咩品牌？就要睇落去啦！
第一個要出場既品牌就有Paul & Joe，
春天正正係動物結束冬眠既季節，
今次佢地出既春季彩妝以別緻可愛動物為主題，
包括紅鶴、長頸鹿同大象。

春日繽紛樂園多用途彩妝粉盒　$360

個粉盒印有紅鶴圖案真係好可愛！
而入面亦印左好靚既唔同動物既壓紋，
粉紅色果格可以做胭脂，
淺色可以做highlight，
其餘兩隻色就可以做eyeshadow，
一盒就有三個唔同既用途真係好方便，
不過見到咁靚都唔捨得掃落去啦。

而Paul & Joe既唇膏筒係可以自已揀架！
今次佢地亦出左三款限量版唇膏筒，
都係以可愛既動物做印花圖案。

Paul & Joe refill $200 / case $100

呢款唇膏筒#025就印有魔幻氣息既長頸鹿同鸚鵡，
成個感覺都好夢幻，
身為動物迷既你可以話係完全抗拒唔到呀！
而唇膏既顏色係#090 都係屬於偏自然既顏色，
平時用黎化日常妝就好襯啦，用曬支唇膏之後買番個refill就得,
就可以用番呢個靚靚既唇膏筒啦！

Paul & Joe limited edition nail polish $160

今次佢地亦推出左5款限量春日繽紛指甲油，
＃005係百搭粉色，
＃001就係好靚既藍綠色。
鐘意儲指甲油既你就唔可以錯過啦。
一向行可愛公主風既Jill Stuart亦出左Spring collection啦！

Jill Stuart ribbon couture eyes $380

今次最吸引到我既就有佢地新出既眼影，
眼影盒既包裝以蝴蝶結做主題，
眼影粉上面亦印有好精緻既蝴蝶結圖案，
而個眼影盒就做到好似公主既寶石鏡盒咁，
真係俘虜曬一眾追求公主風既女仔呀！
而顏色方面除左有實用大地色之外，
仲有pastel既顏色選擇，
配合番春天柔和既感覺。

 Jill Stuart lip blossom $240

一共5色，全部都係新色同限定色黎架!
顏色都係偏再珊瑚色，淡粉色為主，
用黎襯番好柔和既春妝就岩曬啦！
而佢唇膏蓋掀起仲有塊小鏡，
用黎補妝就岩曬啦，個設計真係好貼心呀！

Jill Stuart layer blush compact  #07 $340

而佢地既四色皇牌胭脂今次亦出左新色，
就係呢隻＃07 fringe flower啦!
顏色都好大路易用，
而最正既地方就係白色果格可以用黎做埋highlight，
仲跟埋個羊毛掃添，方便出街補妝。

Jill Stuart blooming blossom curl lash mascara $260

今次新推出既mascara 係深啡色，
想有自然既效果用啡色就岩曬啦。

Jill Stuart 除左出左新既spring collection之外，
亦將會推出Chiffon Ribbon collection ，
全部都係limited items黎架。

呢個collection個外型亦好特別，
外盒既設計係粉黃色既蝴蝶圖案，

而同系列就出左matte色唇膏同matte色指甲油，
唔鐘意太閃令既朋友就岩曬啦∼

呢個系列1月28日先有得賣，
鍾意儲限量版既朋友都唔好錯過啦。
LADUREE一進駐香港，就已經即刻俘虜左好多女仔既歡心，
高貴華麗既包裝,真係令人愛不釋手架。

Laduree petite eye color collection #103

外盒印有好可受既甲蟲圖案，
而入面既顏色都好出色好實用。
眼影仲有淡淡既香味添。

Laduree powder cheek color

佢地皇牌既花瓣脂胭，好多女仔都話靚到唔捨得用。
而今次佢地就出左碎粉狀胭脂，
個外型都係非常高貴華麗。

入面附送既sponge都好soft好舒服架，
粉紅色蝴蝶結仲好可愛添。

Laduree tinted lip balm (limited)

呢個lip balm細細粒方便拎出街,
仲有淡淡甜味,
#105係淡粉色, #106就係深粉紅色,
搽出黎既感覺潤得黎仲好sweet添。

另外,今次佢地亦出左多兩支沖涼液，
個樽身係有好靚既浮雕圖案，
擺係洗手間真係即刻成個洗手間都upgrade左呀!
咁靚既包裝無論自用定送比人都好得體呀，
 佢分別有出唔同味道，
而味道都比較sweet,
沖完就成身香噴噴啦。

大家見到咁多咁靚既化妝品係咪好心動呢?
好多都係限量品黎架，
如果有興趣就要快啲去睇啦，
黎緊會繼續同大家分享其他spring collection，
要繼續留意啦∼

如欲取得更多第一手美容及扮靚資訊
可瀏覽Girls Talk Main Blog： Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)

 眨下眼2015年春季又就快到啦，

已經睇厭冬天既沈色、冷色系？期待春夏會有新鮮顏色？
其實最近都開始見到唔少品牌推出新產品，
唔多唔少都估到今個春季既makeup trend，
大熱既當然有一眾女生鍾情既pastel color，
仲唔少得其他makeup details架！
事不宜遲，快啲睇定學定，春天黎個大改變啦∼

大熱粉色眼妝

今年各大品牌大玩Pastel color，唔只淨係用作eye shadow，
另一必hit眼妝就一定係用pastel color畫眼線！

除左會畫單一上眼線，
仲會整個眼框以漸變色去畫，
或者上下眼線喺眼尾拉出平行線，
甚至係以較誇張鮮色既color去畫粗眼線。

可以睇得到天藍色配白色係大熱顏色之一，
粉紫色都係必hit color！

 

呢類眼線無論係肌膚深淺都非常合適，
妝容以自然為主，主要突出眼部線條。

亦有唔少係會以pastel color搽滿整個眼窩位，
感覺非常春日，充滿少女感。

乾淨自然nude妝

可能大家睇完上面既pastel color妝都會留意到一點，
就係自然nude妝！

呢個乾淨妝容心得多個大品牌歡心，
就好似Marc Jacobs，Gucci，Chloé，Chanel等，都以呢個妝為重點，
就咁睇好似所有model都只係夾左mascara、加上少少眼線、自然眉毛，
但要化到一個化左好似無化既妝真係需要唔少技巧！

呢類乾淨無瑕既妝容，
通常都會配合比較整齊既髮型、
營造成個好精神既感覺，
而唔會過於蒼白或者好似無左靈魂咁。

同埋可以留意下佢地眼窩位會搽上近膚色既眼影，
或者打左少少陰影，去加強返面部輪廓。

豐潤無邊唇妝

上年秋冬大玩唇色、唇妝，
而今年春季都會延續呢個熱潮，
不過都有少少唔同架，
就係無邊唇妝喇！

無邊唇妝係搽唇膏時唔需要專登去畫一個靚唇形同唇線，
甚至可以畫到有少少出界，令整個咀唇睇起黎帶有豐盈感。

Missoni既妝容就最能夠充分表示出呢個新既無邊唇妝。

你地可以見到model既咀唇畫完出黎都好有豐潤感，
咀唇薄既女生不妒試試呢個新唇妝啊！

另外Moschino、Dolce & Gabbana等品牌都有示範最新唇色，
今季除左會繼續有莓紅色、大紅色，
仲有橙紅色同粉紅色都係必hit既色黎架！

回歸基本黑色

如果pastel color、鮮色都唔係你心水，
最basic既黑色又會唔會係你最愛呢？

無錯！經典黑色今季回歸makeup界，
雖然黑色就幾時都多人鍾意，
但係有些少變化就更加能夠緊貼個trend喇∼

 

 

 

今季用黑色畫眼線都有幾種唔同畫法，
其中最hit就一定係呢種arrow畫法！
佢同cat eyes都有異曲同功既效果，
就係加粗眼線同喺眼尾畫出一條誇張向上勾既線條，
而大部分都唔會再加一條下眼線，
只係一條實色線，令眼線都可以變得不簡單。
 

 

 

另外就係呢種上下黑眼線，眼尾畫成平行線既眼妝，
令眼睛睇落好似拉長左咁，
加上突出既面部輪廓，成個感覺好型架！
 

最後就係微煙燻妝，
實色黑眼線勾畫整個眼框，
再用黑色眼影輕輕掃造一個微煙燻效果，
加上黑色mascara，
突出到成個眼部輪廓就已經可以。

 

 

 

如欲取得更多第一手美容及扮靚資訊
可瀏覽Girls Talk Main Blog： Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)