今次揀咗幾款質地嘅粉底試用比大家比較下，
分別有粉底液、creamy foundation同粉餅，
其中大部份仲係新出嘅產品添，
唔知大家有冇去專櫃試過呢？
我本身屬乾性皮膚，有雀斑、暗瘡印、膚色不勻等問題，
對粉底嘅要求一定要夠潤，要有光澤感，
遮到紅印同部分雀斑就夠（因為冇晒雀斑感覺好奇怪），
效果自然最緊要，
以下嘅試後感比大家作為一個參考啦。
而之前我地都有教過大家揀粉底，
粉底都分為好多種，
唔同質地會適合唔同既人架，
可以參考以下條link ,

http://www.girlstalk.hk/blogs/?p=21340

底妝最好又薄又有一定遮瑕度，
睇上去自然，皮膚又靚咗，
咁先唔會比人感覺好厚粉。
以下幾款粉底質感較輕盈，
睇下符唔符合你嘅需要喇∼

之前收到full set嘅NARS foundation同碎粉，
今次就試試佢新出嘅All Day Luminous Weightless Foundation啦。
全新12種色調，淺至深膚色都照顧到，
獨特無重技術令質感輕盈，妝容能持久達16小時，
配方不含油分、香料、酒精，確保唔會形成粉刺。

NARS All Day Luminous Weightless Foundation $460/30ml

一見佢樽身寫住Luminous 、Weightless呢啲字眼
就知佢質地透薄輕盈啦∼
質感好水好薄，一滴已經可以搽晒全面，
而且好易推開，感覺好透薄，
均勻到膚色之外亦能修飾紅印，
以咁薄身嘅粉底液嚟講，遮瑕度算適中，
我雀斑比較多，不過我都唔需要遮到一粒都無既，
對我黎講已經好OK啦。

GUCCI Lustrous Glow Foundation SPF25

GUCCI上年推出埋化妝品，包裝都係切合番品牌一貫高貴經典形象，
用上黑色金色條紋及GG 標誌圖案，
真係一睇就認到係GUCCI呀。

又係見到Lustrous 、Glow呢啲字眼，
唔洗試都知係令身同薄既粉底，
如果你比教乾，有乾紋同無咩光澤感就可以用佢啦。
質地水液狀，效果好透薄，好易推，
好水潤但唔會笠架。
膚色均勻咗，亦改善咗微絲血管位置，
但如果要遮暗瘡印就要再加遮瑕膏，
增加咗光澤感，有修飾毛孔效果，令皮膚更細緻。
本身皮膚冇乜瑕疵，只係有少少微絲血管就好岩用啦，
完全做到裸妝效果。

D&G Perfect Reveal Lift Foundation SPF25

配方含有Gold-Flavo-Silk Tricomplex™,
Gold Silk Sericin萃取, 意大利橄欖油同Vitamin B3，
恢復肌膚天然水分，有助減少細紋皺紋，令肌膚更細滑。

呢款寫有Lift字眼就知佢好潤身啦，
質感好滑，推開有啲似face oil嘅質地，
但唔係油淋淋果種感覺，
透薄有光澤感，可均勻膚色，
有第二層肌膚咁既效果，
遮瑕度屬一般。
如果你化妝技巧一般，只係想均勻下膚色，
又無咩瑕疵既人就岩用啦。

日本品牌一到春夏天就會出美白成份既產品，
一般有美白成份既粉底都會偏乾，
不過以下ALBLANC呢個粉底就無呢個問題啦。

ALBLANC Moist White Liquid Foundation SPF25 PA++ $400/30ml

含ALBLANC潤白美肌精華，修飾同時修護，
採用透明感提升技術及「薄片透亮粉體」，
令妝容透出自然光澤，增加立體感。
含洋甘菊精華、藥蜀葵精華、尤加利精華，有效保濕，
成份亦不含香料。

原本以為美白粉底會好乾，
不過連我咁乾既皮膚用都唔算好乾，
質感幾水，好薄身易推，遮瑕度唔錯，
紅印、膚色唔均勻嘅位置都改善到。
如果比較多瑕疵既朋友就好岩啦。

Maybelline Satin Skin Liquid Foundation SPF24 PA++ $139/30ml

泡沫氣墊技術加上「氣墊彈力粒子」令粉底質感形成空氣咁嘅透薄氣墊，
8小時長效保濕，不堵塞毛孔，敏感性肌膚亦適用。

「氣墊彈力粒子」究竟係咩黎？
唔識唔緊要， 最緊要睇個妝效，
質感幾滑，唧出嚟有啲似啫喱嘅質地，
我乾皮膚都覺得好容易推開推薄，
感覺好水潤，
有少少令身，可以增加皮膚光澤感，
但令得黎又唔會好跨張，
亦唔會覺得太厚，
鼻翼位置紅印同膚色不勻都改善咗， 效果自然，
睇起嚟皮膚滑咗。
真係幾有驚喜，可以話係平價之中既好物呀！

以上兩款都係比較水劑嘅粉底液，
如果連春夏天都覺得乾既朋友就可以揀潤身啲既粉底，
可以睇下下面幾款。

SHISEIDO Future Solution LX Total Radiance Foundation

含專利成分Skingenecell 1P，有助預防衰老，
幫助重整膚質，緊緻肌膚，提升輪廓，改善暗啞膚色。

SHISEIDO 旗下既粉底，如IPSA，cle de peau等，
JANICE同同學仔都好鐘意用架。
質感好滑，好似cream咁，
質地rich啲，但係好易推，
唔好以為佢會好厚，
除咗紅印之外，暗瘡印同雀斑遮到8，9成，
遮瑕度的確幾好，
粉底有啲令身，令面部睇起嚟更滑更細緻。
呢款市面上大約賣緊七百幾蚊，
一般creamy粉底都會貴少少，
不過每次只需用好少份量就可以搽曬成塊面，
其實計落都幾抵用架。
而且效果咁好，可以話係物超所值架！

續下篇。。。

八款粉底試用(二）
 

我自己平時就鍾意tea time先去食野，
一來無lunch time咁多人，
二來free好多，休閒好多，
之前見到朋友去左呢間餐廳食野，
我第一樣留意既唔係佢啲野食，而係佢既裝修，
所以前排我約左朋友去high tea喇！

一入到黎見到門口既裝修，都已經非常吸引我，
鮮花、花樽、地氈、座椅、透光格仔大門玻璃窗等等，
全部都係我鍾意既style！
大家都知我好鍾意睇家居或者餐廳既decoration
for怖置自己屋企或者event setup，
呢度既裝修真係好靚，好似我屋企既style。
牆身灰色、湖水綠、淺藍色，classic得黎又唔老套。

就好似呢個手畫牆紙，我屋企都有架，
不過就唔係呢隻色，
呢隻湖水綠色都好靚！

牆上仲有舊時既掛畫，比人感覺好vintage。

矮櫃上擺左一座非常舊式既咖啡機，
呢隻銅金色又係好靚∼

食完環境之後就食主菜啦。
呢度比人感覺好舒服，而且tea time好少人，
可以靜靜地去享受成個tea set 。

平時成日聽人講邊個邊個tea set好食，
但好多都名過於實，
好似我之前去英國食果個咁，真係太甜，
唔係好岩香港人口味。

今次呢個high tea set令我喜出望外，
味道好價錢平，
個價錢真係比其他地方平一半有多，
只係＄26x 一set + 野飲，即係每個人百幾蚊！
而且份量亦都唔少，左右各一人份量，
兩個女仔慢慢食都食到好飽。

上排部分係咸點，每件都好好味，
唔會太濃味或者太鹹，
如果太濃味就好快食到好飽、好膩。

另外不得不讚既右邊既果醬，
一食落口感覺好新鮮，
味道好清甜，係柚子或者橙既酸酸甜甜味道，
係好天然，唔係人工香料咁，
如果佢係小樽裝上，我諗我會拎走添∼

如果大家行過中環都不妨去試下，
雖然中環都有好多high tea既地方，
不過呢度就勝在平，又舒服，係一個同朋友傾計既好地方。
佢既地點都好就腳，只係喺石板街附近。
想食呢個high tea set 要下晝3點後walk in，無得book位架。
我未去high tea之前都有諗住book dinner time食意大利菜，
因為佢地lunch / dinner都有得book既，
不過我早兩星期前打去都已經full左！
所以想試佢地既lunch / dinner就要早少少打電話去啦！

Gradini Ristorante Italiano
地址：中環石板街酒店皇后道中74號地下
營業時間：星期一至日06:30-10:30; 12:00-23:30

如欲取得更多第一手美容及扮靚資訊
可瀏覽Girls Talk Main Blog： Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)

上次提到做左化妝師無耐之後，
因為fashion show而認識左一位日本化妝品牌既高層，
佢推介左我去佢公司其中一個品牌度做makeup demo。到宜家我都仍然同果位高層有聯絡架，
而我亦都好感激佢比機會我去台上做試範，
因為當時我仲係一個完全無經驗既化妝師，
我亦都間接或親耳聽到好多同行話，
「佢好彩啫，咁好運，可以做到呢個成績。」
咁係咪只係因為我好彩呢？
以我做左咁耐化妝師，我就真係唔覺得自己好彩，
如果成日都咁好彩，六合彩又唔見我中？
其實我認為只係我識得點去把握機會，
每一次做野之前都會做好準備。

第一次做makeup demo，
個人真係好緊張，壓力好大，
當中一路要化妝，又要一路講野，介紹產品，
時間又要掌握得好好，講野又唔可以太悶。
宜家諗返果時可能都未必做到咁好，
但起碼盡左全力先。

其實每一次做demo都有MC script，
我自己初時講野唔係太好，又怕講野，
但係都要硬著頭皮講，
所以出show前我會喺屋企不斷練習。
通常每次demo都會個零月前知道，
一收到資料我就練習，一路一扮做demo一路講script，
第一次真係唔係誇張，起碼練左一千次，
點樣講野、啲steps點樣、認真咁做成個rundown。
去到正式做makeup demo果日，我都係好緊張，
因為台下好多傳媒朋友睇住，
其實當中我都有失誤，化化下跌左枝掃，
不過就算驚同緊張都唔可以比人知，
我覺得自己當時表現都尚算淡定，
即刻用過枝新掃繼續幫model上妝。

坦白講，當時我都係一個好新既化妝師，唔係太多人認識，
見到台下都有記者講「呢個邊個黎架！？」，
雖然隔好遠聽唔到，不過都見到口形，
我自己其實就無唔開心，但呢件事無形中比左推動力我，
令我更加努力，等多啲人認識。
到宜家，呢位朋友應該已經忘記自己講過呢句說話，
我地之後都認識左，亦都合作左好多年。

另外我亦都有聽過人講過，
「佢好彩之嘛，佢識化既野我都識化啦，有幾難化丫。」
但係我自己又唔會話好嬲，
每一次聽到唔好既野、有唔好既經歷，
聽到有人講自己，都係一種存在價值，
如果人地提都唔提，可能自己喺呢行就已經變得唔再重要喇∼

初出黎做化妝，亦有試過比人玩過，
個job係去一個studio做野，但原來個地址係錯既，
我去到個錯既地方，咁岩又係影相地方，
接待我個人就叫我坐低等，又無話我去錯地方，
我等左差唔多15-20mins，但又好似無咩動靜咁，
之後我就搵返聯絡人，先知係去錯地方，
好在我就早左到，可以趕返去岩既地方。

出job都會遇到好心地同唔好心地既人，
如果問我遇到唔好心地既人會唔會唔開心，
我又唔會太唔開心，
起碼知道咁樣做係會令人難受，
自己就唔會做返同樣既事。

做化妝師除左手藝好，仲要好勤力，
識我既人都知，我真係好勤力既人，
可以話係化妝界中既劉德華，
指既當然唔係外貌啦，係做野方面好似佢個種毅力。
未開化妝學校前，大約做左化妝師兩、三年左右，
touch wood好好彩好多朋友比機會我嘗試，
當中有個半月係每一日都要做野，
由朝到晚，由一至日都有工作，
除左雜誌化妝，仲有品牌化妝，又有新娘化妝，
總之係化妝有關既工作都差唔多接晒。
工作除左化妝，仲要記野、背野、要熟悉產品詳情、
去開會、到出job，果段時間真係好忙好辛苦。

宜家我既身體真係差左好多喇∼
以前我都會盡量堅持唔會搭的士去做野，
會搭返公共交通工具，
因為搵錢艱難，成日搭的士個開支好大，
我以前都係盡量揀搭巴士出去做野。
但都試過好尷尬既事，
就係比啲化妝品牌既朋友仔見到我拖住個篋就訓著左，
好彩無流口水咋！真係無辦法，實在太攰！

亦有一次經歷好難忘－果一日朝早好早就出job，
但之前已經連續出左三十幾日full day job，個人又攰又殘，
朝早8點就開始化，不斷化不斷化，
連續5個job，差唔多化左廿幾三十幾個妝，
而啲妝都要諗，係creative妝，其實都幾傷神，
最後化到夜晚12點幾，已經好攰好攰，拖住個篋行去搭巴士。
行下行下，踩到啲野，又反應唔切，
行動快過思緒，個篋又碌過，我就即刻停低，
唉，竟然係踩到狗屎，仲要著住人字拖涼鞋。
我個人又好攰，自己都忍唔住流眼淚，
但我第一時間係抹左個篋先，都唔理自己隻鞋，
抹完都要堅時去搭巴士，
不過無奈自己可能抹得唔乾淨，就凝住個篋好大陣味，
我自己平時都有帶定一枝香水版出街以備不時之需，
跟住就不斷噴落個篋度，當然係無助減低果陣味，
但好彩夜晚巴士唔係太多人，唔係就神憎風厭啦∼

其實每次唔開心、好攰、好辛苦，
到第二朝起身就無事，呢點真係要好堅持先做到，
每一個成功既人當中都有佢自身既經歷，
只要努力先有成功機會，所以唔需要羨慕其他人，
倒不如用羨慕人既時間專注返自己既工作上更加好。

（以下呢張相就係踩狗屎當日所化既其中兩個妝喇！）

有時同行見到我都會問「你做咩做到咁辛苦呀？」
「成日job接job做唔停，搞到自己咁忙」
「我就寧願比自己休息下，一日接一單，兩單已經係maximum」
「你接成5單job，實在太誇張喇」等等，
其實我覺得每次都係一個機會，而呢啲個機會都得來不易，
所以連搵我做job既朋友都就晒我。
我都好多謝記者朋友比左好多機會，我自己亦都會盡力去做，
每一次做野都可以汲收到唔同既經驗，
所以一有job，自己又應付到，都會盡量接左先。

生活上除左訓覺，我有80﹪都比左工作，
就算喺屋企我都會練習，
因為做左化妝師後，到宜家有啲成績，
其實都要不斷進步、去update、留意時下流行既野，
我十幾年前學既野，可能同宜家已經完全唔同，
所以要keep住與時並進。

因為自己有以上既經驗，所以想同同學仔分享返，
每個唔好既經歷其實都係成長必經階段，
學識從中學習，無論對自己對其他人都係一個好好既鍛鍊，
如果唔細個去經歷，唔通到大個先經歷咩。
所以，學緊化妝既同學仔、未學過化妝既同學仔、
又或者已經現職化妝師既你地，
就算宜家行緊既路唔順暢都唔好自怨自艾，
最緊要係做得好、化得好、肯努力，
咁已經係成功左，只不過係爭一個機會。
咁當然機會黎到，都要努力去掌握返，
唔好miss任何一個機會，
因為每一次都係令事業邁進一步既主要因素黎。

今次就分享到呢度，下次有機會再同大家分享啦！

眼線可以令眼睛看起來更精神，亦可修飾眼形，改善眼部輪廓。
但不如何畫好眼線呢？應該用眼線液還是眼線筆呢？
其實要畫好一條完美眼線，的確需要不少技巧，
這次我會教大家幾個必學的畫眼線步驟，先筆後液，
跟足steps就可以畫到完美眼線。
 

大家可先看VIDEO：

STEP 1: 鏡面應與面部呈45度


 

這個角度向下望時，可令眼皮不會摺起，減少畫出火車軌的情況；
並輕輕向後拉開眼皮，感覺到有拉緊即可。
畫任何眼線筆都是由這個步驟開始。

STEP 2: 先畫內眼線

畫內眼線時應用眼線筆，不會將液體注入眼晴或隱形眼鏡。
輕按住眼皮，用眼線筆由白色眼框的中間位置開始畫起，
動作不宜太快，減少出現痕癢或敏感等情況出現。

STEP 3: 望前畫眼頭

畫眼頭位置時，應向前望鏡子。

DON’T :

如畫了外眼線後出現眼白，應畫內眼線，否則影響妝容效果。

Check Point:


 

若畫得不好，出現火車軌，可用細號眼影掃掃鬆。

STEP 4: 後畫外眼線

畫外眼線則可用眼線液或膏，令眼妝更持久。
按住眼尾的眼皮往後拉，用眼線液由睫毛上方的中間位置開始畫起。

STEP 5: 眼線液填空位

按住眉山對下的眼皮往後拉，由眼珠後眼白位置開始畫向眼頭，
填補睫毛間的空白位置。

STEP 6: 眼尾三角技巧 

畫眼尾時，先拉出一條打平的直線，
然後於眼角位由下而上’TICK’起，與直線連接，並塗滿空白位置。

STEP 7: 最後修正

用棉花棒修正畫出界的地方

如欲取得更多第一手美容及扮靚資訊
可瀏覽Girls Talk Main Blog： Girlstalk Blog
或 Like我們的Facebook專頁：
Janice Lam Makeup Workshop Facebook

（版權所有，未經同意不得轉載。)