又到每月好物雷品分享喇！
唔知今次同事們又有咩好嘢同雷嘢介紹呢？
唔講咁多，睇吓今個月有咩介紹先！

好物

Jellia:

Majolica Majorca Glass Drop Gel Coat $

一開始見到呢支指甲油就係比佢嘅顏色吸引咗我，
淡淡嘅顏色但搽出嚟嘅效果好靚，
令到隻手更加乾淨嘅感覺，
加上佢搽咗上手都好乾，
（對於心急嘅我嚟講，呢點真係好重要呀！）

圖中個張我只係輕輕搽咗兩層，
已經有好似做gel甲感覺，
如果大家想極速有修甲效果，
我非常推薦呢支俾大家！

Christy:

too cool for school virgin gloss stick $140

韓風強勢襲港，好多韓國化妝品牌子都成為大熱，
too cool for school 呢個品牌相信大家都唔陌生，
佢包裝好靚好得意，品質都唔差架。
圖中呢支唇膏係我近期大愛，
我個嘴都比較乾同易甩皮，
所以我好怕搽唇膏 (試過有唇膏搽到我個嘴好似龜裂咁）
不過呢支唇膏就比到驚喜我啦!

我預先無搽定潤唇膏打底，
但搽上去就已經好水潤好上色，
感覺就似有色既潤唇膏咁。
佢既質地好透薄，
會有種好亮澤既效果 ，
仲唔會覺得笠架。

Irene:

Elta MD UV Shield Broad-Spectrum SPF 45 ＄260 （購自水貨店）

大家就算每日唔化妝，都唔可以唔搽防曬，
但我認識好多朋友，都無搽防曬嘅習慣，
皆因怕防曬笠痴痴！
我自己都好怕油淋淋同笠痴痴嘅感覺，
而最新就透過朋友介紹就買咗呢款防曬。

首先佢有 9%高含量微粒氧化鋅，
可以有效防護UVB 、UVA紫外線傷害同預防曬黑。
重點係質地非常清爽同透薄，好容易推開，
而且佢係無油配方，所以一啲都油笠，
就算油性皮膚都啱用㗎！仲唔會阻塞毛孔！
裡面又不含防腐劑，不含香料成分，仲made in USA，
容易敏感嘅人都可以試吓呀！

Yuki:

Msh Love Liner Liquid (Rich Black) 1680yen

有次去大阪旅行，帶過去果枝eyeliner竟然用晒！
不過唔緊要啦，日本周圍都係藥妝店，真係好方便，
順便又可以試下新野∼
去到藥妝店一見到個lace包裝就忍唔住買左，好靚！

呢枝eyeliner一打開竟然有香味，即刻加左唔少分。
而佢既筆尖係好幼，好易畫，尤其係收尾果時都好畫到尖尖既線條。
同埋日本真係好乾燥既地方，加上我眼皮位比較易出油，
最驚就係條眼線甩到周圍黑晒，
但係我由朝早畫完到夜晚玩完成日返酒店都完全無甩過，
真係好驚喜！
所以我已經回購左幾次，
不過香港就得水貨店先得有賣，大家可以去搵下。

雷品

Irene:

Maxigrade eyeliner $75 (購自SASA)

呢支eyeliner本身賣點係速乾同waterproof，
而且仲得到日本cosme選為第三位最好賣嘅liuqid eyeliner，
見到包裝咁勁，無理由唔買嚟試吓。
講咗個筆頭先，筆頭設計係棉頭而且都算幾幼細，
雖然係棉頭設計但都算幾柔軟，畫起上嚟都幾順畫。

不過，我用咗佢嚟填滿眼睫毛之間空隙，
畫一支好幼好幼嘅眼線，
過咗5、6個鐘後，照一照鏡，
真係俾自己嚇親，突然變咗熊貓眼！

本身自己只係搽咗睫毛液同眼線，
平時用開嘅睫毛液都好防水防油，未試過溶過，
所以溶嘅原因，就一定係支眼線筆！
本身自己唔算好油眼，又上哂碎粉，
都溶到咁，真係好唔掂呀！

Una:

BEYOND 河馬瘦身貼

本身自己都好注重keep靚個身型,
平時自己用運動為主, 今次就試下懶人會走去買嘅瘦身貼,
以前為咗肌肉線條靚d, 都有用過消脂之類嘅瘦身膏。
但瘦身’貼’真係第一次試!

包裝入面除咗有包面膜包裝嘅瘦身貼之外,
仲有一塊類似紗布質地嘅’貼’

而塊瘦身貼本身係凝膠狀嘅膜嚟,無痴力,

所以要靠另一張紗布質地嘅貼貼佢上皮膚上。
要貼住佢八個鐘,
貼上皮膚後感覺好似敷咗張面膜落條腰度咁。

用完之後覺得真係好無用, 都幾無謂。
用前用效果一樣,
貼住佢只feel到有塊東西貼住自己, 無任何清涼又或者燃燒嘅感覺。
平時有d瘦身膏用完都會有種緊緻感覺, 但佢完全無。
所以完全覺得佢係無用。

Christy：

Banila co. Classic matte primer $170

Banila co.都係其中一個我好有興趣既韓妝品牌，
聽聞佢有好多products都好好用，
有朋友去韓國旅行我就托佢幫我買左支primer,
佢分別出左有保濕，控油，同光澤型既primer,
由於佢評價太高，所以我對佢期望好高，
點知就令我太失望啦！

呢支係屬於控油遮毛孔型既primer，
質地屬於gel狀，
推開會有種膠膠地既感覺，
不過佢就一啲都唔控油又唔保濕，
搽完過多兩個鐘t-tone係超油！
亦都幫唔到我遮毛孔，
如果以呢支＄170蚊既peimer黎講真係唔算抵，
最重要係我完全feel唔到佢有咩功能。

Yuki:

KOSE 高絲光映透 乾燥肌革命 深層保濕面膜(50枚入) 1105yen

我每次去日本旅行都會行DONKI、
或者藥妝店睇下有咩好物入手。
上次去既時候就買左呢個50塊一pack既mask，
見佢寫住cosme第1位又係KOSE出品，
價錢又非常非常抵，就買黎試下喇，
點知…中伏！

塊mask係橙橙地色，好薄，撕開既時候好易撕爛。
而且打開包裝就聞到酒精味，已經唔係好想放落塊面度。
敷上面既精華唔算好少，但敷左5分鐘左右已經乾晒咁滯，
真係好誇張！
5分鐘完全起唔到任何作用…
仲有幾十塊，掉左佢又好浪費，
所以宜家都係用黎敷下手手腳腳。
如果去日本旅行想買pack裝mask，LuLuLun好過佢好多，
又或者可以試下PureSmile，都好OK。

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或Like我們的Facebook專頁：
www.facebook.com/janicelammakeup

上星期我哋就同大家分享咗「清新氣質韓式新娘妝容」，
當然我哋都知道一班準新娘通常會係大日子，
準備唔同款式嘅婚紗晚裝等，
為咗想以自己最靚嘅一面示人，
其實唔同款式嘅婚紗晚裝都可以配襯唔同風格嘅造型㗎！
所以今次就由Irene同Jellia為大家示範兩個復古嘅妝容同髮型啦！

我哋就揀大家big day裡面，兩個重要造型做咗個demo，
分別有裙掛同埋March-in 時嘅妝容，
而今次呢位model都係我哋嘅同學仔，
平時佢自己都無咩點化妝，所以就搵佢大變身喇！

首先

裙掛造型

化妝方面:

為咗營造古典美嘅效果，感覺似四五十年代上海女性嘅風格，
髮型會襯返個Finger Wave髮型，
妝容就選擇粗眼線同紅咀喇！

今次我地畫嘅眼線比較粗，所以眼影顏色唔適宜選擇太深色或者太濃。
而眼窩就加返d淺金色嘅eyeshadow, 可以突出眼新輪廓。
再襯返套裙褂look，簡單得嚟又復古。

順帶一提,
化紅唇妝時要小心選擇色系,
因為紅色有好多色系，如果選擇咗錯咗，
出嚟效果就會好 ‘娘’ 㗎喇!

其實紅唇呢類顏色好多新娘都接受唔到,覺得顏色太誇張。
但如果配搭鮮色嘅裙褂, 旗袍時,
唇色太淡就會令人感覺氣色好差架喇!

而唇型方面都要留意，上唇唇線線邊唔好畫得太圓,
因為出嚟感覺會好'娘'。

至於髮型方面:

今次整嘅Finger Wave髮型，
感覺比較女性化，好適合配搭旗袍, 褂呢類型嘅衫，
配上Finger wave 可以增添高貴嘅氣質。
而 Finger Wave 都係種好長青嘅髮型嚟，
好多 fashion show嘅 model ,
同埋 artist 出席重要嘅場合時都會整Finger Wave㗎!

Step 1: 將後面頭髮由左至右編成2手辮，用U型夾固定
Step 2: 將後面頭髮由左至右編成2手辮，用U型夾固定
Step 3: 將餘下頭髮用U型夾固定成髮髻
Step 4: 最後用手把瀏海推出波浪型

前面我地用咗 Finger wave, 後面我地都可以做一個復古風格嘅髮型配合。
後面D頭髮唔需要整得太大舊, 因為太大舊嘅話感覺就會好老土架喇!
髮髻可以盤係近頸位, 咁就更有古典味!

順便講d Tips 比大家聽,
呢類Finger Wave 髮型切忌頭頂頭髮削得太勁, 因為效果會好大舊, 好'娘'架!

Set好頭之後，配上中國古典味道嘅頭飾就可以喇！

婚紗March-in造型

化妝方面:

大家March-in時都會變成全場焦點，
而且好多燈光打落自己到，
所以眼妝上就化咗一個有少少閃嘅啡銅色smokey eyes，
可以加強眼部輪廓同令對眼更精靈。
眼底眼線位加少少帶閃嘅眼影可以增添水汪汪嘅感覺 ，
而胭脂同唇就用自然珊瑚色，
令整個妝容都唔會太重。

平時 March-in 要小心做Highlight ，
因為閃光會令面部變得好’令’，
如果highlight太誇張, 影相出嚟塊面就會好油好 '令'架!
所以我地只需要係適當嘅位置加上highlight就可以喇!

髮型方面

為咗配合之前嘅Finger wave 髮型, 今次髮型都係復古風格，
感覺會 soft d, 鬆d同自然d嘅!
就好似外國嘅新娘咁，佢地就好鐘意呢類有田園感覺同復古嘅風格嘅髮型喇！

今次我地整嘅髮型係中間分界，
其實好多新娘都好抗拒中間分界，但中間分界可以令人望落感覺好清新。
如果新娘嘅額頭好寬，中間分界仲可以改善到呢個問題添！
不過就要留意前蔭頭髮需要長至下巴,腮骨位置，
如果頭髮太短效果就無咁靚。
頭飾方面都揀咗個有紗網嘅嚟襯返婚紗造型！

Step 1: 將後面頭髮由左至右編成3手辮，用U型夾固定
Step 2: 將後面頭髮由右至左編成3手辮 ，用U型夾固定
Step 3: 用U型夾將2條3手辮固定
Step 4: 用電熱捧電熱瀏海部份

最後, 其實上面兩個造型髮型方面都唔需要整個頭都用栗米夾,
因為整個頭都用栗米夾嘅話, 頭髮睇落就會好旱好乾,
會破壞整個效果架!

如欲取得更多第一手美容及扮靚資訊
可瀏覽Girls Talk Main Blog：

www.girlstalk.hk/blogs
或 Like我們的Facebook專頁：
www.facebook.com/janicelammakeup

（版權所有，未經同意不得轉載。)

除左護膚之外，打理頭髮都一樣要落足心機。
絕對唔可以睇小燙染對頭皮或髮絲帶黎嘅損傷，
好多時就係忽略左而導致掉髮問題，
尤其係女仔，好唔容易留得一把長長秀髮，
所以要好好護理頭髮。
首先要了解自己係咩髮質，
之後就揀適合自己嘅洗髮護髮產品，
今次我地就有幾套產品介紹同試用，
唔知有無一款岩你呢？

SHISEIDO PROFESSIONAL - THE HAIR CARE FUENTE FORTE
1. 洗護按摩刷
2. 舒緩護髮素 (任何頭皮層)
3. 淨化洗髮水 (油性頭皮層)

之前都有朋友介紹過SHISEIDO既洗髮產品，
可惜之前香港都仲未有，係日本獨家發售，
要試就要去水貨店買，或者托朋友去日本買返黎。
不過宜家SHESEIDO PROFESSIONAL終於黎到香港啦！

呢個頭皮層護理系列，係針對兩種唔同頭皮層所帶黎嘅問題，
如解決阻塞毛孔皮脂同其他雜質、頭皮異味、皮屑等等。

新產品「淨化洗髮水」仲加入左「油脂偵測潔淨物」，
係一種可以有效包圍皮脂、去除頭皮層殘留雜質嘅技術，
令頭髮唔使再油油黏黏，回復清爽潔淨。

雖然我嘅髮質係屬於乾性，但係係油性頭皮層，
所以我今次就試左適合油性頭皮層嘅淨化洗髮水，
亦都有用埋洗護按摩刷，幫頭皮按摩，
呢枝洗髮水搽上頭有少少涼涼地，洗完好清爽。
之後用埋舒緩護髮素，
一沖水就摸到啲頭髮即刻柔順左好多！
平時好怕護髮素滑潺潺嘅感覺，
呢隻完全無，仲好滑！
相信我之後都會回購呢套套裝。

L’OCCITANE – REVITALIZING FRESH
1. 淨化洗髮水 (中性/油性髮質)
2. 淨化護髮素 (中性/油性髮質)

呢個已經喺上年已經推出左嘅清爽淨化護髮系列，
係專爲中性、污染及油性髮質而設。
因蘊含五種活化清爽精華油同具深層潔淨效果嘅香草醋，
可以徹底淨化、清除積聚喺頭髮嘅油脂、化學物同污垢，
令水份同營養滲透到頭皮層。

而且佢嘅護髮素蘊含維他命原B5，
有保濕、柔順頭髮作用，可以效解開打晒kick嘅髮絲，
呢個就好岩髮尾受損嘅人，
因為有時趕時間夾硬去梳打kick嘅頭髮，
反而會令頭髮被扯斷，咁樣會令頭髮或頭皮更加傷架！

呢個系列揉合左5種精華油－薄荷、百里香、薰衣草、西柚、香柏木。
一打開就有好fresh嘅薄荷味，一啲都唔刺鼻，好岩有頭氣嘅人用。

anumi – Gentle
1. 柔絲保濕洗髮露 (敏感頭皮/乾性髮質)
2. 柔絲保濕護髮精華 (敏感頭皮/乾性髮質)

anumi專研究用天然有機草本植物去製造頭髮護理產品，
加入藥用成份，解決頭皮、頭髮問題，
而且不含化學香料、人造色素、防腐劑等化學物質，
亦有ACO澳洲方面有機認證，品質方面有一定嘅保證。

呢個gentle系列用左比較溫和嘅配方，
如洋甘菊、金盞花如菩提花，
特別適合有敏感頭皮嘅人使用。
而佢嘅最大賣點係舒緩、滋潤同亮澤，
同時好岩乾性及有頭皮屑問題嘅人去用。

另外，佢嘅護髮精華加入左牛蒡，
牛蒡係可以幫助頭皮疾病，如頭皮屑同掉髮，
所以發現有掉髮問題嘅朋友可以試試呢隻喇！

介紹左三套洗髮產品之後，
跟住就介紹L’OREAL新推出嘅美髮油比大家，
我亦都會親身試用。

護髮呢個step都好重要架，
因為有好多人髮尾都比較乾旱，
而護髮產品就等同護膚精華素或者營養液，
修護髮絲，令頭髮可以更柔順亮澤！

L’OREAL PARiS – ELSEVE
1. Extraordinary Oil (乾旱髮質)
2. Extraordinary Oil Mist (細軟髮質)

L’OREAL PARiS上月岩岩新出嘅美髮油，
有四款唔同配方，為唔同髮質嘅人都有適合自己嘅美髮用品。
啡色係for乾旱、金色係for中性至乾性、
紅色係for中性至油性，同埋染後髮質，
另外唯一一枝噴霧包裝，係紫色嘅細軟髮質。

而佢地亦都建議左幾種唔同修護功能，幫大家喺唔同時候修護頭髮，
就好似搽上美髮油後鬢辮，可以抵擋紫外光傷害；
去游水前搽，可以保護頭髮免受池水中氯化物侵害；
染髮前用，減低染後乾燥受損等等。

我自己平時就會喺洗髮後吹頭前用，
今次都唔例外，洗完頭試用左適合乾旱髮質嘅美髮油，
佢嘅質地唔係太杰，比較水，係透明嘅，
搽緊嘅時候，有淡淡嘅雲尼拿味，好香，
搽完用毛巾再吸一吸髮絲上嘅多餘水分之後吹頭。

大家都可以清楚見到用左美髮油之後真係差好遠，
就算係吹完頭，都唔會有啲毛燥髮絲飛晒出黎，
我自己都不停咁摸自己嘅頭髮，好滑，仲有返光澤！
呢枝產品真係唔錯，對髮尾乾旱好有用。

如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup

（版權所有，未經同意不得轉載。)

上次就分享左Janice化妝箱入面既底妝法寶，
大家見我地底妝部份都準備得咁齊全，
彩妝部份當然一樣好豐富啦！
加加埋埋真係唔少products，
所以話個化妝箱咁重絕對唔係講笑架,
究竟點樣可以用最慳位既方法帶曬啲化妝品出街呢?
今次等我同大家分享埋精彩既彩妝部份啦!

**eyebrow**

眉妝部份係好重要架，
眉粉，眉筆，眉GEL一定要準備定啦!
最基本深,中,淺都要有齊啦~
圖中canmake既眉筆就係平靚正既選擇啦!

眼影一定係大家好有興趣既部份,
平時買買埋埋咁多一盒二盒既眼影,
如果出job既時候要逐盒打開佢地睇顏色既話,
真係好麻煩又嘥時間,
我地會有咩方法解決呢?

**eyeshadow**

大家見到呢張相應該就會估到啦,
其實呢種鐵盒亦係我地workshop熱賣既產品之一，
將啲眼影全部整起曬再痴落去個盒，
要搵起顏色上黎就好方便啦！

大家係咪覺得好壯觀呢？
見到咁繽紛既顏色真係個人都開心啲呀!
雖然有鐵盒幫手，
不過呢度閒閒地有二，三百隻色，
起碼都要7,8個盒先裝得曬架！

大家估唔估到入面有咩牌子係度呢？
入面分別收集左Anna Sui，RMK，Lunasol，Cle de peau，
Shiseido，IPSA，Shu uemura既眼影,
顏色真係好靚呀! 全部都係JANICE既愛用眼影黎架,
咁多隻顏色真係想化咩妝都無問題啦!
入面仲會分好唔同牌子,質地,色tone搵起上黎就好方便啦。

除左粉狀既眼影,我地亦會帶定其他質地既眼影架，
用唔同質地既眼影化出黎，效果都會有唔同,
眼皮本身好乾就可以揀用膏狀啦!
顏色會好靚好飽和架。

liquid質地會比膏狀薄身，
出黎既效果會好貼皮膚，
如果想眼影較持久同出色啲，
就可以先用佢打底再上眼影粉啦。

而呢種一樽樽既閃粉都係好常用到,
可以做到好bling bling既效果,
用黎化party妝就岩曬啦!

呢幾盒個樣係咪好少見到呢?
平時我地自己化妝出街就唔會用到佢啦,
其實佢係化妝師好常用到既painting黎架,
做出黎既效果係非常實色,
係化creative妝既必備之一黎架!

**eyeliner**

眼線既質地大致上分為gel狀,筆狀,liquid狀
唔同質地會有唔同效果,
想實色就可以用liquid,
想自然啲就可以揀筆狀,
而gel狀就實色同soft既效果都會做到,
我地全部都要準備曬架!

眼線筆最基本就要有黑,啡,白三隻色,
而圖中VINA眼線筆有好多fans架,
出色得黎又易畫,
亦都好防水防油添。

除左黑白啡色之外,
而家亦好流行彩色眼線妝
所以其他顏色既眼線筆都要準備定。

Etude house呢幾支閃狀眼線液畫出黎唔會太閃太跨張,
用黎畫眼頭或者卧蠶位都好good!
而家最流行既韓妝都好常用到,
可以增加眼部立體感,
再一次證明平野係有好架。

Clinique既gel liner無論上堂定出job我地都好鍾意用,
有啲眼線gel好快就會乾左唔用得,
而呢隻就無咁易乾又易畫,
次次都可以用到落底,
畫內外眼線都無問題,
或者用佢黎blend鬆做smokey eyes效果都好好。

**MASCARA**

Mascara就會帶定幾種唔同既刷頭,
包括螺旋形,梳形,刷出黎都有唔同效果架。
想要濃密效果可以揀HR或者INGA C;
想要纖長效果就可以揀MJ;
如果想游水都唔甩就可以試下Power style啦！

想對眼又大又靚又點少得痴雙眼皮膠紙呢？
圖中呢款係AK網紋膠紙，
我地而家出job定上堂都會用到佢架，
出黎既效果好隱型又自然，
我地亦一定會配合埋圖中個支黃色膠水用，
痴力會好好唔會易甩,
聽過有啲朋友話出面買到既膠水會敏感,
而呢隻so far咁耐就未聽過有朋友會敏感。

假眼睫毛就會用個透明膠盒裝起，
可以將唔同款式分類放好，
分別有濃密，跨張，纖長，自然款式，
一個膠盒就已經放到好多對架啦。

呢種一束束既睫毛自己化妝時就較少用到，
不過客人有機會想用架，貪佢效果夠自然，
所以專業化妝師就一定要準備定啦。

呢支QQ睫毛膠水絕對係出job必備，
佢可以痴得好實，唔洗驚眼頭眼尾會彈出黎,
佢都好防水架,
就算遇到好感動既新娘子都唔洗擔心條眼睫毛會甩咁尷尬啦!

想再睇落去嘅話就請大家瀏覽下篇＜＜化妝箱工具大揭秘(二) 下＞＞

（版權所有，未經同意不得轉載。)
如欲取得更多第一手美容及扮靚資訊
可瀏覽Girls Talk Main Blog：www.girlstalk.hk/blogs
或 Like我們的Facebook專頁：www.facebook.com/janicelammakeup

相隔差唔多一個月,
我地又係時候試用一下價錢比較平民化d嘅護膚品喇!

今次我地試用嘅係三款面膜，
當中嘅面膜質地有棉質同啫喱質地,
而價錢都係比較經濟嘅，
究竟呢幾款面膜值唔值得買嚟用?
又岩唔岩自己嘅皮膚性質呢？

想知就要睇下以下幾位試用嘅同事用完有咩感受喇！

innisfree rice mask

innisfree rice mask含阿薩伊漿果萃取物，
大米亦含豐富美白成份，
改善暗沉粗糙肌膚，
令皮膚更有光澤。

Karen: 乾性皮膚

之前一直都有用開innisfree嘅mask，
bamboo同青瓜都係我嘅最愛，
因為我主要都係保濕滋潤為主，
所以都未試過呢款rice mask.
比較特別啲就係呢個mask嘅精華係白色嘅，
有種甜甜地米糕嘅味道，
敷咗15分鐘都塊mask都仲有好多精華，
面上嘅精華亦要再慢慢按摩吸收，
最初以為有美白成份會清爽啲，
但係原來都幾滋潤，有少少黏笠感，
但係夜晚瞓覺前用都OK，
Mask嘅貼面度一般，
至於美白效果就未見明顯。

Christy: 混合性皮膚

之前就有試過Innisfree既奇異果mask,
覺得好保濕好好用，
今次試呢款rice mask質地比較rich,
不過都幾貼面，
好多paper mask敷得耐就好易乾，
而呢塊我敷左半個鐘先洗都唔乾，
開冷氣時用都好good，
敷完仲有好多精華係面，但會有少少笠既感覺，
所以我會去過完水先去化妝啦。
過完水之後都feel到皮膚柔軟左同埋幾保濕。

Irene: 混合性偏乾

我平時同karen一樣都有買開
innisfree bamboo嘅mask，因為保濕能力非常好，
而且感覺好天然，價錢又抵！
而rice mask就第一次試喇！
首先佢啲精華係奶白色，好杰身好似啲米漿咁，
敷咗15分鐘後，塊面都仲帶好多精華，
而且都幾笠身，不過我習慣用紙巾印走多餘精華，
之後感覺都幾滋潤，乾皮膚用都非常OK！
而佢嘅功能主要係改善暗沉粗糙皮膚，
我就覺得敷完膚色有少少明亮咗，
不過效果就唔長久，過一陣就無咗！

holika holika Wine Therapy Sleeping Mask

主要成份有迷迭香葉萃取物、薰衣草萃取物、
百里香萃取物、冬季海棠萃取物、紫羅蘭萃取物等，
含有10﹪法國赤霞珠紅酒萃取精華，
高效抗氧，令肌膚回復彈性。
獨特記憶型面膜，沾取面膜嘅痕跡喺30秒內可回復原狀，
搽上面膜就可以好似面膜質地咁恢復彈性，
提升面部輪廓線條。

Jellia: 混合性皮膚鼻翼位易甩皮

一打開就已經聞到好香嘅提子味，
摸上手個質地好得意，好似Jelly咁，
每次只需要攞小小分量敷上面就得，
（因為一開始我攞咗好多分量，
點知佢質地實在太似jelly，
一個唔小心都未放到上面就益咗個地下啦！）
同埋呢個mask敷上面感覺涼涼地，好舒服！
敷住呢個mask訓覺，
第二朝訓醒啲皮膚仲滑咗添！

Karen: 乾性皮膚

質地係好似食得果啲啫喱狀，
有好香嘅提子味，
好似真係搽啲啫喱上面咁，好得意，
仲有涼涼地嘅感覺幾舒服，
搽完都會有啲黏黏地，
敷咗一晚第二朝洗完面覺得塊面幾滑，好柔軟。

Yuki: 混合性皮膚

第一次試啫喱狀既sleeping mask，
呢隻有甜甜地好香既提子味，好岩訓覺時用呀！
搽上去唔推開都係固體啫喱狀，
推開後亦都唔似其他水狀精華咁一下就吸收，
而係喺表面形成一層薄膜咁， 有啲痴笠笠。
敷到第二朝洗完面有驚喜，
感覺皮膚有潤左同滑左。

Fueki – Facial Mask (Rose)

成份有玫瑰萃取物、馬油、甘油、透明質酸、
維他命原B5、蘆薈萃取物等等，
佢地嘅功效除咗可以為肌膚補充水分之外，
入面嘅玫瑰萃取物仲有緊緻、舒緩、鎖水保濕同埋美白嘅特性。

Christy: 混合性皮膚

呢款面膜一睇就比佢可愛既包裝吸引左，
敷上去都覺得幾貼面，
仲可以合埋眼敷埋眼皮位添。
精華既質地就較為稀身，
敷過左15分鐘後塊面膜就feel到開始乾，
精華好快就吸收曬，唔會覺得太笠。
不過我就覺得佢未算好保濕，
我亦唔太鐘意佢有種好濃既人工玫瑰香味，
加上最近皮膚比較敏感，
敷緊個時會覺得有少少刺痛感，
敏感皮膚就未必岩用啦。

Irene: 混合性偏乾

塊Mask係棉質地，不過如果可以再薄身就好，
同埋個mask設計對於我嚟講略嫌大咗少少，
而精華都算幾水，唔會好身杰身，
但一打開有陣玫瑰味道，我個人都接受到，
不過對比另一個純馬油無味版本，
我就會揀無味，感覺無甘人工。
敷咗10分鐘，之後就同紙巾印走多餘精華，
敷完效果都幾水潤，應覺都唔會好笠身，
因為最怕敷完會笠痴痴，再上skincare就出擦字膠碎，
呢一款就唔會喇！

Yuki: 混合性皮膚

本身自己都有呢個BB系列既馬油hand cream，
點知呢個一打開就聞到好俗既香料味！
呢塊mask比一般厚，設計亦都比較大塊，但貼面度OK。
佢既精華都好多，敷左15分鐘之後仍然係好濕 ，
塊面都吸收唔晒，有啲啲痴笠，
之後要按左幾分鐘先完全吸收晒，塊面亦都變返爽身。
對我黎講補水效果都幾好，第二日起身都唔覺乾 。
唯一唔好真係好大陣香料味。

（版權所有，未經同意不得轉載。）
如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：