唔經唔覺06年都已經差唔多過了10個喇!!

而我阿ming結左婚就啱啱好10個月~~~跟住好快就1年、2年、3年........

今年06年真係好多人結婚,

首先係我自己啦(其實都冇諗過自己會咁快嫁得出~!!)

跟住10月就有我三表姐、我堂姑姐...

到左10月尾(即係黎梗個星期日)就有我最細o既親姑姐...(雖然話親姑姐,但實際係一o的都唔親的,一年都冇見過1次~!)

下個月頭,就會有我一個新相識o既狗友結婚,

我稱呼佢叫妺妹媽,因為佢狗狗叫做妹妹.....

再到左12月,就輪到我個好朋友阿欣結婚喇,

雖然阿欣係因為有左而要結婚,

但我作為佢好朋友,我都會為她而高興、開心,下年要生個肥肥白白o既小可愛出黎~~~!!

******************************************************************************

o的喜事真係接2連3...

原本諗住今年應該都會只係得咁多朋友會有喜事,

但尋晚一個電話,哈~!原來好耐冇見o既一個朋友(阿易)打比我,

話我知佢要結婚喇~!

阿易係我第一份工所識o既朋友,

o個時我地一齊o係仙踪林到做野,

一大班人,個個差唔多年紀,玩得好開心架~~!

阿易入黎做冇耐已經比阿輝(佢依家老公)睇中左,

但阿易成日話唔想拍拖住,一直都冇比機會阿輝...

我見阿輝都算係好有誠意,所以我就幫左佢一把,經常約埋阿易阿輝一齊去玩...

過左大約一個月佢地就一齊左喇~~!!!(我o係仙踪林做野係2000年尾的)

直到尋日阿易話我知佢地結婚,呱~!原來佢地拍左都有6年拖架喇~~!!!

見佢地由相識、拍拖,依家仲去到結婚,

真係有o的講唔出o既開心呀~~~!!

06年12月頭,係阿易同阿輝擺酒o既好日子,

到時我就會係阿易姊妹團11個裡面o既其中一個呀~~~!