早幾日係e-mail度收到一封BK寄黎話觀塘BK store開倉既電郵, 打算今日出去睇一睇有咩平野買。
今日一早起身已經係度等等等... 等咩? 咪等我老公放工一齊出去囉。好死唔死佢今個星期又勁多野做, 搞到今日都要返工又早唔到收... 我都有個準備諗住自己一個出去睇架勒。
等到大約2點幾左右, 好彩老公都收工了, 咁我都放心哂, 起碼有人陪我出去嘛... 畢竟我識既路唔係太多 等到佢返黎. 佢沖埋個涼, 我就落左媽媽屋企食返個lunch.. 食完就一齊出發了。
搭74X出去, 係車度比個地址我老公睇既時候發現原來我一直都記錯關門時間... 原來星期六係5點關門... 我仲記錯做7點... 係車上面既時間已經係4點10分... 真係唔知趕唔趕到。
落到車仲要行一段路先去到, 好彩都好快搵到座大廈, 宜家既時間係4點45.. 都仲有3個字行。上到去先發現BK store其實好細, 雖然價錢真係好平, 但係真係冇乜野買..又好多都冇貨, 可能係年尾清貨既關係啦,就算想買野都買唔落手果隻。最後行黎行去.. 都係揀唔落手, 咁就走左lu~
好彩之前都有上網搵下資料, 搵下觀塘附近d樓上舖邊度有bb用品買, 就係為左今日。如果唔係特登出黎淨係睇一間野咪好唔抵~ 之後係巧明街樓上舖買左好多產前用品(即係走佬袋要用既野) 雖然唔係話最平, 但係呢d野都難搵, 所以我都買左先, 買左：
棉花球1包、紗巾5片裝2包、產婦衛生巾連扣1包、網褲6條包、床墊10塊1包、沖洗生理瓶1個
都唔覺唔覺買左成2百幾蚊架 究竟走佬袋要既野仲有咩未買呢... 好似又買齊哂, 但係又好似未買齊咁... 新手真係新手...
其後, 我地再去成業街一間樓上舖, 發覺呢間舖既恰奶器套裝係我地睇過幾間中最平既, 所以都決定買左佢先, 下次買bb野就少一樣野拎呀嘛。
最後再睇多陣鞋舖就搭車返大埔, 因為約左一班朋友仔提早食餐團年飯嘛。去左太和間旺記嗌餸食飯。一行7人(我、老公、魚、嘉賢、longa、maymay、陳), 我地叫左都幾多餸, 可惜我都唔可以食得太多>"<，埋單都係5百零蚊都唔算好貴。
最後知道年宵花市開左, 咁我地都去行一圈先走(雖然明知大埔花市係冇野行都去行下), 點知今年我地係大埔花市有消費喎.. 其實都係離唔開食 - 就係冰糖葫蘆,佢地買左1串山渣, 1串士多啤梨。個個都有試下食, 連我唔食得都忍唔住要試一粒士多啤梨, 的確唔錯! 我老公都心思思再去買黎食... 最後真係買多串士多啤梨黎食呀佢地= = 好彩我忍到口.... 冇食到勒.... 之後我地就搭車返去, 佢地就例牌去坐傾計, 老公本身諗住係樓下食支煙就返去, 但係可能太耐冇見佢地勒, 其實佢一早食完支煙架勒, 但係我地成班傾傾下, 傾傾下都傾左好耐... 最後點知一支煙呢... 都傾到成12點幾先走人呀。總括黎講今日又充實又好開心 |
