今日一早起左身, 其實都唔算一早了, 11點, 不過比尋日下午一點先起身早左好多了, 今日的計劃就係筍崗買野之後去食早餐, 去到筍崗已經好肚餓了, 不過等瑜行下有無佢既野想買, 我就無咩野想買了, 因為價錢都唔係差好多, 所以我個心都無放係行街上面, 已經飛左去想去邊間食好野, 次次我地都會經過的帝豪酒店, 佢自己封自己都4星, 不過今日我地試左之後, 真係一星都無呀….

 

食自助lunch buffet, 本來以為有大魚大肉食, 點知, 入到去有點似香港明將咁, 一分錢一分貨, d野比想像中難食, 呢個就梗架啦…..仲要好多人無自助餐禮儀, 用自己食過的碟出去拎野食, 隻碟的跡同埋佢夾野食相遇的一刻真係有點想嘔, 即係好似人人都要食佢口水尾, 大陸想講衛生都好難…

 

今日要去換番尋日check左的藍芽, 有幾隻要換完又換, 好在我地有check, 唔係真係攪完又攪…攪完手頭上的工作, 我地就返香港, 過左海關瑜先發現自己唔見左香港張sim卡, 唉, 次次都唔見野, 都唔知咩構造, 不過都係算了, 仲有好多野要做, 叫煒出黎影相, 我就去補領瑜張卡, 瑜就同煒講下生意經, 哈哈, 我就咩都唔使做…好難了…我就去左買餸, 買左蜆仔, 蝦, 仲有雞, 平時係屋企都係咁吃…家常便飯…..番到去剛好約定的時間7點, 煒個d問題就真係唔知好笑定好嬲, 講講下我地成八點先番去瑜屋企, 本來話八點番到…又變左遲大到, 最衰都係煒啦…..

 

番到去, 瑜就pat貨, 我就煮飯, 本來調轉的, 不過瑜的煮飯技巧都係算吧啦….都係我煮好了, 煮煮下有人按鐘, 我以為係傳銷, 不過細佬走左去開門, 我估一定係瑜的親戚, 唔係都唔會開門啦, 原來係瑜個爸爸, 我有幾次同佢都係擦身而過, 今日見到…..其實佢都幾忍得, 俾自己個女咁話, 唔知佢地之前發生咩事, 不過瑜咁對自己的爸爸, 講心個句, 我唔係好認同, 就算個個人做得幾錯, 都係父母, 有句話天下無不是之父母….希望將來佢地父女可以開心……

 

今日仲發現左瑜的一個秘密就係佢原來係唔識打中文字的, 要靠微軟的新注音手寫功能, 真係名附其實的笨瑜……