尋晚終於玩番笨瑜, 邊個叫佢俾氣我受, 我份人就係咁, 你對我好, 我會對你更好, 仆心仆命為你, 貼錢幫你做野都無問題, 不過你得罪我, 我唔會當面同你嘈, 因為咁無意思, 依家一係唔好玩, 一玩就要玩大佢, 所以尋晚笨瑜一定俾我嚇鬼死佢, 以為我想同佢分手...等佢呢幾日俾說話我聽, 知死未....
 

今日見到笨瑜成個樣落哂型, 我就知我的計劃非常成功, 等佢食唔安, 坐唔落, 訓唔著, 呢個係我的計劃....哈哈, 等佢驚下都好~~
 

今晚我地本來打算打邊爐, 不過無得吃, 找來找去, 都成九點半, 最後去左美心, 以為有得吃啦, 點知都係無得吃, 我就食左個rock in撈, 瑜就食左個火雞+牛扒, 講真, 火雞都唔知幾多年無吃過了, 之前係恩師的補習社之後都好少會吃, 因為味道真係唔係太好, 只不過係應下節,不過估唔到瑜除左未吃過冰糖葫蘆, 仲未吃過火雞, 我都係隨便估下, 佢真係未吃過....唉,都唔明佢, 點解可以咁多野未食過, 唔通真係對食無要求...不過佢平時咁為食, 話對食無要求....真係講唔通....
 

講番我個飯先, 自己整, 無咩特別, 得一個字, 就係熱, 食哂個石頭窩仲好熱, 不過最攪笑就係個湯, 瑜個個就配中湯, 我個個就配奶茶, 其實食石頭飯唔係應該配柚子茶或者清茶, 唔係會好好多咩....都唔明美心有意做改革, 做應該做好點啦...真係觀音頭, 掃把腳.....