連續兩日都講左「愛情」，

今日都係時候轉下話題啦，

如果唔係就會俾人話我悶架啦∼！！

尋晚放左工之後同個朋友仔出左街，

傾傾下計，咁啱講到大家既屋企，

佢仲笑自己由細到大都似個『裙腳女』咁話喎∼！！

佢仲講左件事俾我知，

令我覺得佢真係好愛佢既屋企人∼！！

佢話：

人越大覺得好似會越來越少時間陪到父母∼！！

好怕佢地會有一日唔係度∼！

的確，我都好同意呢句說話，

坦白講，自從爸爸有事之後，

我自己亦有好深既體會∼！！

其實我有時都會覺得自己似『裙腳女』，

因為每當我有唔開心既時候，

我第一個必定會想起爸爸！

每當我有唔開心，唔知點解決既問題，

我都會問爸爸，爸爸亦都會盡佢所能幫我解決問題∼！

曾經係爸爸病情最差既時候，

佢試過一個月入左３次醫院，

甚至連生曰都差ｄ要係醫院渡過！

我記好記得個個月所發生既事，

個日一早返到公司，

仲一心諗住準備好一陣同ｄ　ＢＢ上堂用既野，

（差唔多兩歲度既小朋友）

點知其他人都未返到，

我就收到電話話爸爸入左醫院，

個下個心都離一離∼！

真係好驚∼！！

我不停咁打電話俾另外一個同事，

希望佢可以返早ｄ，如果唔係個兩個外籍教師又會無門口入！

另一方面又要打電話同老細請假，

真係好焦急，急到想喊咁滯，

當所有野都ｏｋ既時候，

我就即刻搭的士過醫院∼！！！

都唔知好彩定唔好彩，

一個月入醫３次，

次次都會超過一個星期，

剛剛係醫院返到屋企都未夠２４小時，

爸爸又要再入醫∼！

個個月大家都好辛苦好擔心！

真係好驚好驚∼！

我直情係打從心底驚出來，

但係我又唔可以亂，

因為媽咪都已經好驚同擔心，

再者如果連我都頂唔住咁仲有邊個可以俾媽咪倚賴下呢？！

細佬都仲細，不過佢都知咩事，佢都算叫生性左∼！

一心以為最艱難既時刻已經過左，

點知到佢生日個日，

佢又入左醫院∼！！

其實醫生建議佢要留院觀察下，

但係佢知道我同細佬一早預備左蛋糕之類同佢慶祝，

所以佢都堅持出院∼！！

個刻，

大家都既感動又擔心∼！！

來緊下個月，

爸爸要入院做一個手術啦，

我好希望做完手術之後佢會比之前好！

快ｄ好返呀，

你仲有好多野未教我架！

其實我自己打緊呢篇日記既時候，

自己都覺得好亂，唔知應該點寫，

我只係諗：

如果真係有呢一刻既來臨既話，

我究竟會點去接受呢？

我諗我會選擇逃避！

太難以接受啦∼！！

所以，

由個一刻開始，

每當我同屋企人一齊既時候，

我都會顕得特別開心，

唔想佢地擔心自己既同時，

我亦希望帶俾佢地快樂，

希望往後既所有日子都會充滿住歡笑聲！

而家，

我只想 enjoy 同家人一齊既每一分每一秒！

你地呢？

又有無諗過呢個問題？！