今日返工雖然係好辛苦，好累，
但係諗起今日放工之後約左人睇戲，
當堂成個人都生猛返晒∼！

本應一心諗住睇戲會好開心啦，
點知，就係去緊戲院既中途就發生左一ｄ令我意想不到既事∼！
我覺得意想不到，
係因為我覺得唔會有呢ｄ事發生係我身上，
但係，就偏偏發生左∼！！

原本今日約左人去沙田睇《死亡筆記》，
咁我咪諗住早少少到囉，
於是我就去左搭火車∼！！

可能今日我早左少少出門口啦，
啱啱就撞正放工時間，
所以就有好多人係度等火車∼！
好啦，當等左４分鐘後，火車就到左啦，
咁我就上火車啦，點知就有個人不停咁跟住我後面，
講真，開頭我都唔為意係咩一回事架，
因為太多人啦，我只係以為佢都係等搭火車，
點知到上左火車之後，
佢都依然企係我後面，
佢仲不停咁伸佢隻手去自己既手袋度整野，
個陣我都唔係好知發生咩事架，
我諗可能佢都係搵野姐，
點知佢搵左好耐，咁我咪望左一望囉，
點知，就俾我見到佢原來整緊部手機，
佢想攞部手機來拍野呀，
我終於都知道點解佢要企起我後面囉∼！
事關我著左條短裙囉∼！
開頭我都無出聲，
抱住「我知你想點」既心態，
只係一味得個避字，
點知佢都似唔當係一回事，
照樣整拎過相機來影，
死得佢呀，但係我又無理由好似無端端鬧人架，
但係又唔知佢影左ｄ咩∼！
所以我就直情面對面望佢，望到佢實一實，
等佢唔敢亂來都好呀∼！！！
點知佢都係咁，扮晒唔覺意咁，
趁停車前既少少震盪就扮失平行，
想趁機影，我唔知就可能俾佢拍到，但係俾我知到既，
即使我唔出聲都唔代表我可以俾你拍囉，正白痴∼！
係呢個又驚又怕既情況之下，
我都只係識得避，
真係覺得自己好無用∼！！！

其實呢ｄ事都唔係第一次，
之前都試過，
不過就唔係影，
係直情趁人多攬腰，同摸你，
個次真係好驚囉，個個人出火車既時候佢仲要對住你笑∼！
我正係好難想像點解ｄ人要咁做囉？
點解要去摸一個你唔識既陌生人呢？？
點解要影埋ｄ咁既野呢？
點解要做呢ｄ行為呢？
究竟呢ｄ人知唔知衰架？？

我諗我會記住個個人個樣囉，
我望都望左佢成五分鐘啦，我唔信我認唔到∼！！

不過，我真係覺得好瘀，好無用囉∼！
唉∼！
今個月都係好黑仔架啦∼！
都好似無咩好事降臨過，唔知會唔會有呢？
幾時呢？

＊我想，我想個衰人早ｄ死∼！

我會唔會好衰呢咁？