尋日係我表哥結婚既大日子，我真係好耐無去飲婚宴囉^^"

3點幾，我扮完靚靚之後，姨媽就嚟車我同佢地一齊去咗先，去到個陣都只係4點幾咋，人地重話要5點入席，都唔明做咩要咁早去到=.=去到睇佢地打牌喎，又悶又嘈>.<最後我都表姐終於頂唔住，表姐就帶咗我一齊落下面商場行下喇~

落到去，我地就行下睇下野咁喇，去到一間買零食既店入面，我同佢就係入面睇野食，最後我地就買咗d零食，邊行邊食。行下行下，我突然...........想去洗手間喎^^"於是，表姐就即刻帶我去揾洗手間喇，點知.........去到發現係入唔到既，之後我地又要去揾人開喇，之後我同表姐就係到諗:點會關咗d洗手間門架，叫人地點去呀>.<終於，我都有得入洗手間。入到去，我自己又攪到有d唔知點咁，表姐又擔心我忍唔到喎，最後就決定幫我喇。好彩我無忍唔到姐^^"唔係就失禮死。

去完洗手間，我地又繼續行喇，行行下話咁快又到6點幾喇，就係咁我地就行咗2個幾鐘喇~買咗好多零食返去食喇~=]

不過，返到去我地實在太悶喇，於是就攞麻雀嚟整骨牌喇^^"，開頊少少地都得既，但後來真係整極都唔得。雖然唔得，但我地都幾開心既~

無幾耐，終於見到個新娘喇，今次係我第2次見佢，相信將來間唔中都會見佢既~但唔知點解我同表姐都覺得依個新娘唔係太靚，唔靚都算喇，又唔nice喎。攪到我地都唔係太鍾意佢。8點幾喇，婚宴終於開始喇，開頭我諗住係同表姐坐既，但後來發現唔係喎>.<唔係都算喇，做咩要安排我同我最唔鍾意既表哥一齊坐喎，佢地一個就好似女仔，一個就好似d唔正經既男仔咁，見到佢我都好唔鍾意佢。唉~無計喇。

坐好哂人之後，就開始喇。首先，我地就歡迎新人入場喇~之後就簽結婚證書喇，可能今次係我第1次睇喇，所以完全唔知要關電話架喎^^"律師話要保持嚴肅，所以唔可以有其他聲阻住喎，真係第1次聽囉^^"

做完依d儀式之後，就開始開餐喇，第1碟就梗係燒豬喇，之後個d真係嚟嚟去去都係個d，不過最唔同就係最後個碟糖水喇，唔係紅豆沙咁簡單，而係紅豆沙芝麻湯圓喎，ok咁喇~

到咗11點幾，婚宴完喇，我地都開始走喇。

唔知點解我覺得今次依個婚宴無前幾次咁好開心，咁好玩同熱鬧喇，可能佢地唔識攪氣氛喇。不過點都好喇，祝佢地新婚愉快!!