咁就過咗一日lu，今日的行程都係同噚日一樣，凌晨3點幾開始已經不停有腳步聲的交響樂係耳邊不停響起，真係想唔起身都幾難lu~~ 但每朝最最最麻煩的一件事，就係要叫隔離兩隻懶虫起身，佢哋真係好厲害的，夜晚幾夜都可以唔使瞓，但當佢哋一瞓你就唔使旨意咁容易叫佢哋起身啦    
 (= =''''''') 所以係祈禱山我都好似湊仔婆咁湊佢哋兩隻野起身~~唉﹗真慘呀.....

今日行程就如下啦:

6:00-7:30           晨更禱告
7:30-8:30           個人安靜
8:30-9:00           敬拜與讚美
9:00-10:20         研習會 3
10:20-10:40       休息
10:40-12:00       研習會 4
12:00-14:00       休息
14:00-16:30       特別講座 2
16:30 -19:00      個人禱告
19:00-19:30       敬拜與讚美
19:30-21:30       培靈會 2

其實都係同昨日一樣，今日有一樣特別就係去咗嘈死人 (\^0^/) 咩係嘈死人？ 嘻嘻，咪就係墳場囉，而我哋就係墳場到祈禱、敬拜神，音量之大呀真係可以將死人嘈返醒的 ，所以就名為嘈死人之地啦~~ 係嘈死人裡我哋都分開咗各自去敬拜神，開頭我都冇咩感覺的，咁就週圍走來走去欣賞下風景咁囉，果度D風景真係好靚的，藍藍的天、白白的雲，一眼望去除咗祈禱山的建築物之外，都望唔到其他高樓大廈，俾人一種好平靜、好舒服的感覺。望下望下，好自然就有一首詩歌彈出黎[無微不至]~

[無微不至]

鳥語和花香常靜靜告知
世間一切是神親手所賜
每次難關中神定讓你知
主必天天看顧無微不至

冷暖和春秋常靜靜告知
每刻分秒是神親手所賜
每次祈禱中神願讓你知
主聽心中禱告無微不至

係呀﹗神就係果位創造咗天地萬物，又造了你、我的一位神，祂就係果位你扣門佢就一定會給你開門的神，神用咗呢首歌話我知我要放下心中的一切了，唔好再俾擔憂、罪去追住自己。雖然我唔識得點樣大聲呼求主、唔識得點樣去求神俾恩賜我，但我深信主係無微不至的，祂必察看我的需要去加添給我的。

之後當然係洗白白時間啦，今次我哋又破記錄地用咗1個鐘頭15分鐘去享受冷、熱水外加乾蒸室啦~~真係要不斷大喊"KI MO CHI"呀~~之後就係COFFEE SHOP到嘆咗杯MOCHA CAPPUCCINO，1500WON好抵呀，味道俾星巴克、PACIFIC CAFE好味好多，真係嘆完一杯都唔想停呀，之後又試咗隻薄荷咖啡 味道係仲正，雖然阿AG同阿LEG都唔鐘意佢陣薄荷味，但我覺得真係一流呀~~ ^0^ 諗番都仲好想試呀~~ 咁我哋係COFFEE SHOP到傾計的時候，陸陸續續有不同的人加入係我哋中間，周生、周太、LINDA、SANDY、敬樂、邦、輝仔....哈哈，果晚真係好開心呀，係香港邊有機會我哋可以坐在一齊去傾計呀~~我哋三個仲要係一路傾一路傾，一直傾到通宵都唔去瞓，諗住可以去到晨更祈禱會添~~點知唔死去瞓的結果係好嚴重呀....

呢個就留番我下次先再講啦~~