自從俾志媽趕走之後 一路都好唔開心 日日喊 日日發老公脾氣 日日搵人掃苦!! 可能時間耐左/知道老公明白我心入面諗咩 個人放鬆左好多 但仲未習慣同老公分開住!! 而家真係各有各忙 我不嬲都要返工~老公而家又要掛住做數 搞到出下街既時間都冇 我又唔敢叫老公出街 因為怕志媽會屌老公 又怕老公做得慢要做多幾個月><"我唔想咁呀!! 但我努力忍 一個星期大約可以見到一次面既^^"老公就我先得囉~ 到左上星期六 1月10號 因為我返半日 所以可以陪下老公(個幾日志媽去左大陸 星期五開始係老公屋企訓 直至星期二1月9至1月13) 放工先去老公屋企 之後就去土瓜灣幫老公手做野 入下數 計下野咁 好似係公司做野咁!!! 做做下7點幾 志舅父突然入左黎 睇下我地做野 之後問我地上唔上去食飯? 老公話好 問我好唔好?講真 面對面你都話好 我都唔可以唔好啦?(但其實我唔想) 冇啦 志舅父叫左志舅母住飯啦 我地就做住野先 9點幾志舅父就黎叫我地上去食飯啦!! 成個畫面好唔知點咁 我又好怕志舅父會屌我 唉..仲知心情復雜!! 好快坐多陣就走啦 志舅父送我地落去 我地做多陣 因為我做完 所以上網睇下電視等老公做完就走~ 點知呢個時候志舅父就黎啦 冇啦啦同我地講入黎搵我地傾下計 我已經知道仆街了~~~~~~~~ 志舅父開始望住我講:拿 我而家係一家人咁傾下計 我有個句講個句 你唔好介意~ 我:嗯(點頭) 志舅父:而家你同佢媽咪(指住老公)搞成咁 都真係幾麻煩 其實佢做中間係最辛苦個個!!! 咁但係個個係媽咪 冇可能會分開 你要改變就更加冇可能~所以如果你地真係咁鐘意對方 只有係你去改!! 我有幫你地諗過嫁!!我家姐(姐係志媽)最大既生意就係地產 我都只係幫佢地打份工 我明嫁!! 所以我都唔會一世幫佢地 咁你呢就要係呢個時候好好考個牌返黎 我地全個家族 只有我家姐係E牌 其他所有人只有S牌~ 所以你可以試下去考個牌 如果你真係考到個E牌 我相信你地既關係 一定好有用!!!我都知你都好辛苦!!我睇得出嫁!!! 不過為左呢個屋企 為左阿志 努力D 而家考牌 讀書D錢你唔好諗 唔好去計~如果你做到 將來D錢都係你地嫁啦!!! (志舅父開始諗住走)加油啦!!唔好介意呀 我都係想你地好!!將來你都要幫阿志手嫁 考個牌對你都有用!!走啦~~~~~ 我:知道啦 多謝你!!拜拜!! 志:嗯 唔會介意 你點醒左佢!!!唔該 拜拜~~~~~ 但當志舅父一走左個一下 我眼淚立刻流到唔停!!!老公問我咩事 做咩聽完咁唔開心? 我喊 我自己不停諗 事實上當時真係咩都諗唔到 老公問我做咩事喊?我先開始諗 我喊係因為 點解要我去改去就佢?如果我考牌 我先要讀返中五學歷先可以去考牌 我做到嗎?仲要要用幾耐時間? 係唔係而家咩都我錯 要我去改去就佢?我只想好似平常人咁 同自己心愛既一齊結婚 生bb 公一份婆一份 慢慢一齊交租住屋 咁都唔得? 而家連志舅父都咁講 姐係問題都係我到?最後點解老公要講多謝你點醒佢 連老公都覺得問題係我到? 我諗左好多好多好多問題 我知道我係壓力太大 眼淚先忍唔住流出!! 有幾個問題我有同老公講 當時佢都唔係好明 但有好努力咁氹我!! 老公同我解釋:姐係而家我係過山車 排隊條路得一條 但你要無入場卷 所以而家你要去考張入場卷~~ 我不停喊 老公又話:唔好喊啦 呢張卷既期限係無限期 我永遠會等你嫁 唔好俾壓力自己 試下考 考到咪好囉 考唔到我都唔會放棄你嫁!! 你知我本身有筆錢 如果真係冇辦法 我都會同你一齊行最後一步 用呢筆錢 唔理佢地反對都要一齊 但以後既路就辛苦D啦~ 其實我知道呢段說話入面有好多問題 問題在於我地既角色唔同 諗野既角度都唔同!!!!但老公會講到咁甜 我都唔想掃佢興!! 當時我好想自己一個冷靜下 但老公怕我~所以迫我上巴車 老公踩單車 一齊係深屋樓下等~ 睇得出老公真係好愛我 老公一直都怕我唔開心 樣樣野都陪住我 又拖又攬又不停問我想買咩食咩 仲要想點都得!!! 慢慢我冷靜落黎 我唔在同老公對抗 唔想傾~等下次心情過左先在傾 老公攬住我氹我訓 呢件事其實都係幾日前發生既事 心情一直驚 我不停問二家姐,爸,Wing既意見~ 大多數都係解釋 讀書對自己增值 冇咩唔好~但考牌就有唔同意見!!! Wing:點解要為左佢屋企人去考牌 唔洗錢呀? 點解唔係阿志解決問題? 二家姐:唉...我都係咁 為左男朋友要做自己唔鐘意做個行 係咁嫁啦~~ 爸:讀書對你好 同阿志一齊考牌 多個牌對你以後既路都好!!! 好多謝你地俾既意見 我明白你地大概既心情~ 我第二日有同老公傾過 我發現老公同前日諗既野好唔同!!! 我唔知佢真係改變左諗法定唔想我唔開心所以咁講丫?我只知道老公一直都支持我 保護我~ 我第一句問老公:如果我做左咩事 你會唔要我呀? 老公答:你背叛我囉 做咩? 跟住就打開左個話題啦 我開始問:如果我而家咩都唔做 唔做佢地想要既要求 你會點呀? 老公攬住我答:其實我明白嫁 你考左個牌 媽咪可能會對你改觀 因為你可以用E牌幫佢掛名 但過多一兩年 佢又會覺得你只係可以掛個牌 都幫唔到佢搵客/搵錢!!!佢性格就係咁 得一想二!! 我知佢呀 我好明白佢份人呀!!!所以其實你唔好諗個牌 我地既目標係草到錢買樓!!! 而家我地分開住 自己食自己屋企 可以努力草錢!!!係就係辛苦D 住左幾年好難唔習慣分開!! 但只要我地有樓係手 媽咪就會收聲 佢就會覺得我地有努力過 有草到錢 可以買到樓~ 我聽完在問老公:你都知你媽係咁 我而家我地要做咩?咩都唔理 努力返工草錢? 老公話:你一直係呢間野做 努力草錢 但牌就要考 因為將來好大機會我地都要接手 都要有個牌呀!! 我好擔心咁問:但我要讀幾年書先可以去考wo 老公好甜咁答:唔緊要 我已經當左你係我老婆嫁啦 而家只係差張紙姐!! 慢慢黎 我陪你讀書 陪你考牌!!! 我好開心咁問:真係 你真係陪我?陪到考地產牌wo?真係? 老公好似唔想既語氣:係囉 為有係咁啦~ 係呢個對話入面 其實我好知道老公都唔想變!! 我地兩個都係俾人迫 一直都要做自己唔鐘意做既野 我都開始放擔咁同老公傾計先知道原來老公都唔鐘意做地產!! 我同老公講:講真 我只係想同你開開心心咁結婚 生BB 一人打一份工咁搵錢照顧BB 我唔一定要有錢人既生活 我更加唔想做地產 我好憎好似你媽咁 要到有錢人就要"哈哈 陳生李生你好 食食食 哈哈哈哈!!"一個真正既朋友都冇 每一個人都會係你背後講你壞話 冇一個人係真心!!!個個都係人前人後兩個樣 好可怕!! 意外老公既回應:我都好憎做地產!!好唔鐘意講大話 明明流水又要講到冇流水 間屋幾好幾好!! 我最唔鐘意 我鐘意人人都可以住到自己鐘意既屋 將自己間房設計到最想要既間隔!! 大家講完之後先知原來大家既諗法真係好相似 可以目標一致了~~~~~ 而家我心情開始慢慢好好多了~其實發生左呢件事 當然好多野都唔好 壓力大左好多!! 但都有好事既 起碼老公因為我一齊去考左個牌(雖然第一步都未做) 最最最最最大既好處就係老公更加更加愛我 好明顯睇得出 老公好就我 以前會成日話我食咩貴 買咩貴!! 但而家既老公就成日都話 帶你去食好野 想食咩(講完真係會去) 去到超市就會不停問我想要咩 買啦買啦 呢個?呢個? 就算係橙都會幫我整靚靚 叫我食~我想老公放假 老公怕志媽屌都陪我!!!所以事都忍住 唔會發我脾氣!! 希望以後既路永遠有你陪伴 永遠都對我咁好 相愛到老死!! 更加希望你講過既野會做得到 唔好而家氹完我就算!! 2015年目標五萬!!
做咩?