| «‹ June 2026 ›» | | S | M | T | W | T | F | S | | 1 | 2 | 3 | 4 | 5 | 6 | | 7 | 8 | 9 | 10 | 11 | 12 | 13 | | 14 | 15 | 16 | 17 | 18 | 19 | 20 | | 21 | 22 | 23 | 24 | 25 | 26 | 27 | | 28 | 29 | 30 | |
|
2014 年 2 月 3 日 星期一  |
| 零碎片段。壹 |
分類: 章の生活日誌 |
我覺得自己真係打到2046都似@@ 積積埋埋有好多篇-3- 果份IES依然有好多說不出的問題-__- 話就話係綠色婚禮，但個方向唔清晰，完全唔想做:@ 以下呢段好多零碎既片段，字數逾二千，請大家慎閱@@
年初四。繼續訓到點幾兩點鐘，咁先至係放假嘛-3- 但背負住既代價就係不久既將來會變左做隻豬@@ 基本上今日都係COMPUTER WORK-__- MR.WONG件班TEE未訂、全方位學習啲內容未定、班手繩未整，仲有幾擔心黎緊四月果個PG CAMP...縱使遊蹤同集體遊戲安排得妥當，但係望住果兩日既流程，想像下當時既情況會點，就會發現時間分配同埋活動之間既細節位有機會出現混亂>_<
年初二。晏咒去左HANGOUT，其實就咁食野咩都傾餐飽幾開心丫:$ 夜啲去左婆婆屋企拜年，同舅父佢地打台灣牌，我真係好耐無打嚕，望住呢副金色既麻雀的而且確好興奮啊。媽咪仲不時煎馬蹄糕同蘿蔔糕黎食@@ 我仲好叻仔咁食左鋪45番`!!:D
年初三。話說尋日差唔多太陽曬到落腳指先至起身，諗番轉頭都唔知幾耐未試過兩點鐘仍然懶洋洋咁攤係張床到@@ 不過難怪既，前晚（準確黎講應該係尋日朝早）差唔多六點鐘先至返到屋企LOL只有新年先至有機會天光果時先訓教，真係日夜顛倒晒-V- 印象中呢十六年黎永遠年初三都係同姑媽團拜既，難得有幾個鐘時間比成班姑媽同老表開兩圍，食餐飯傾下計咁，場面的確好熱鬧，平時婚宴硬係好難成個家族齊人，但呢次終於可以比較完完整整咁影番張大合照haha.
***********
影相，放聖誕假前我地全校影左果啲團體照，特別既係今年學校轉用左間新加坡公司:O 但果班職員私底下係講日文的+__+ 究竟發生咩事，個攝影師無論係小動作、搶眼既平頭、同埋精通三國語言既技能都引人發笑XD. 期待收到果六款團體相，特別係果張每人攞住著公仔既班相<3 學校轉呢間公司應該都係貪張相會附有同學個名，最初我都覺得原因可以接受既-3- 直到我收到啲通告同樣本之後就360調轉......每張5R相既價錢高左七成，但係無得過膠；附有同學個名既功能錯漏百出，好多細節野都係事後我地人手改番比佢地；公司唔提供影小組相既服務；中六畢業相分兩批影完再合成，仲要用學校某四個角落做背景，怪雞兼核特，以往用禮堂做背景簡簡單單反而仲靚，強烈要求下年轉番T^T
***********
一月十一日。雖然依然係考試期間，但小學校慶開放日都想返去幫手，順便探下班老師。相比起好多同學，我已經返得好密喇，半年內點都會返去一次haha. 或者係同班老師個BONDING幾CLOSE啦，所以都會想同佢地傾計，談夢想、談返學、談生活:D 呢日固然要幫手係特定攤位當值啦，但其餘時候我都係成個校園周圍參觀，睇到啲師弟妹設計得靚靚既作品其實好開心，特別係啲親手繪製既英文故事書同埋果啲我都曾經做過既ART WORK-V- 老師以前都會將我果堆佳作收藏，留待展覽之用，但直到我畢業都無機會攞得番屋企...結果我就會好傻咁追問個老師「你有無見過我呢份作品呀？」類似既說話，結果果位老師呢日仲講笑咁話「見到你好大壓力，驚你又追問我你以前啲作品去左邊。」其實佢唔提我都唔記得-3- 臨走之前幾位老師都好慣性咁問到我黎緊想讀啲咩科，又問我中五有啲咩野忙haha. 坦白講我都唔知選科點算，宜家呢個成績不足以讓我走最想行果條路，不過當普通閒計咁樣傾下XD.
***********
十一月二十日。成班人唔洗上堂去左理工大學參加左個TEDxYOUTH既活動，請左社會唔同方面既代表人仕黎到圍繞「追夢」呢個主題作分享。三個幾月既時間有幾位依然深刻，DR.CHRISTOPHER SZE用跳舞去演繹最麻煩既CELL CYCLE，用律動鞏固自己既記憶；撕紙王敏叔雙手好似較剪一樣鋒利，即席教我地撕隻天鵝出黎；兩位小朋友花上個幾小時化妝，以小生花旦形式向觀眾表演粵劇，雖然我對呢種傳統中國文化無感興趣，但都佩服呢兩位既才華；劇場工作者賴恩慈阿MO講述細個點樣比屋企人扼殺夢想，辛辛苦苦寫落既劇本一下子就被沖進馬桶，但佢反而無因此而放棄，我幾中意聽佢講自己既經歷，佢果種語速、語調同埋用字完完全全吸引住我隻耳仔，感覺就是很爽-V- 傳媒人柳俊江講到傳媒導致偏見，啲例子好諷刺、好好笑同埋好有共嗚`!! 很充實的一個下午:D
***********
學校今年有三位同學榮獲東區十大傑生，恭喜之餘都有啲羨慕架@@ 諗番起自己今年同JENNA參加果個學友社香港傑出中學生領袖選舉......十一月初既啟動禮都無咩特別，請左葉兆康分享同問答環節咁，只係見到共有三百位參選人覺得幾震撼>_<
得一想二嘛，最初只係抱住「盡力而為，順其自然」既宗旨，但300人選150人得左、150人選80人又得左，就開始對自己有目標、有意求，希望能夠成為全港三十強。當然抱有希望既我得悉事實剛巧相反果刻心情真係有啲落差，不過宜家諗番儘管最後未能晉身第四輪評核，無緣一連串既訓練營、工作坊同華東交流團，但我覺得呢個比賽有別於上年既港島傑生，至少我係小組討論既環節都主動積極左好多，諗番上年決賽果時比另外四位對手食住上，發言既機會寥寥可數，相反今年我能夠好快諗到唔同觀點，慢慢闡述出黎已經標誌自己有進步，有突破。
每次面試都有討論環節，十二人討論三十分鐘毫無冷場，唔少對手都好積極發言，依稀記得首次面試係討論中港矛盾...有兩個男生最後果幾分鐘先第一次發言，其中一位仲講左好多有關「人生哲理」既東西，坦白講我聽到好無離頭囉-3- 果次解難環節仲要曚住雙眼，拼湊番幾個英文字母，再要用麻繩砌架手推車同埋生果出黎，呢部分幾有趣，解開眼罩見到我地砌既野真係得啖笑:P 第二輪面試討論完垃圾徵費之後就要係限時內用唔同物料整飛機同發射塔，射得愈遠就愈高分@@ 中間其實都幾多阻撓，好多準備好既東西都有破損跡象，個個組員都手忙腳亂，有個啲語氣仲呼呼喝喝咁，呢種咁唔客氣既態度聽起黎真係唔多舒服囉-3- 不過呢兩次既活動都好講求團體合作同埋分工，某程度上日後都幫到自己B-) 第三輪面試就係要我地就香港需要面對既社會問題作討論，再要係限時內擬定一份簡單計劃書再向其餘組別作簡報，匯報完對方仲會即時就我地寫既內容作提問，我地仲要好似辯論咁即時反駁...成個過程就好緊湊、好激烈！不過呢部分正正係我死穴，先係諗既社會問題唔夠宏觀，忽略土地供應，討論環節又做唔到主導既角色...不過慶幸宜家知道自己有咩做得不足:O
「點止選舉咁簡單」係比賽既宣傳口號，每次面試完都有DEBRIEFING，十二位同組既對手，加上幾位評審會就住剛才既表現作反思。雖然每次面試無三個鐘都走唔到，但評核既範圍好廣泛，涉及到領導才能同時事觸覺，「透過比賽累積經驗」呢幾個字絕對唔係安慰失敗者既說話:)
打住咁多先-V- 二千五百字-___- 夜啲繼續清啦haha.
|
| 2014 年 1 月 31 日 星期五 |
| 逗利是 |
分類: 章の生活日誌 |
先祝各位新年快樂、身體健康、事事順利、笑口常開，咁先至可以賣牙膏廣告XD. 明明就考完試但竟然忙到不可開交，相隔半個月先可以打幾個段落咁>_< 嗯，七科試卷既分數都檢閱過，除左中文寫作、綜合同英文作文三科分卷，其餘繼續維持原狀。呢次某啲科目認真好大意，比如做選擇題，明明揀左B果項，但油落張答題紙竟然填左C-V- 老老實實我係咪嫌自己唔夠低分-___- 呢啲唔應該失既分加加埋埋應該差幾個GRADE...
特別係CHEM呢科真係死得轟轟烈烈，合格但LONG QUESTION比MC仲要低分haha. 呢個結果其實唔易做到-3- 不過有樣野值得開心就係MS.NGAN讚我BIO有進步啊，佢話認得我既字跡，見到答既野有啲條理同邏輯，儘管分數同上次差唔多，但佢呢次評價對我既努力係一份肯定，下次溫書會有推動力。
考完試個假期難得可以自然十二點先係夢境被拉回現實，輕輕鬆鬆咁攤係張床到傾左成半個鐘先至落床寫REPORT:) 有時投入工作真係將令生活充實得多，成日就係寫左篇文章同一份REPORT，我的確以自己為榮:$ 唔知點解最近學校教員室好多病菌，唔少老師好似相約一齊病咁，我從來未試過聽到「空堂自修」呢四個字而擔憂@@ 生活真時真係好枯燥，開會補習學琴，每個星期總有幾日既行程係排到密密麻麻，難得有日我竟然可以放學唔需要急促周圍奔波，好寫意咁返屋企沖涼食茶點睇多啦A夢:P
尋晚係婆婆屋企食團年飯，檯上放得滿滿既菜式，感覺同九大簋無咩分別，豐富到個極點。夜晚仲同舅父舅母去左UA睇午夜場賀歲片《賭城風雲》。呢幾年唔知點解同屋企人多左個習慣，就係呢啲大時大節前夕永遠要睇番場戲先完美咁@@ 不過，呢套戲陣容都不錯，周潤發、謝霆峰、杜汶澤同許紹雄，成套戲都唔少笑點既，但無劇情可言，勉強之餘仲純粹堆砌-__- 我有刻覺得早知唔睇賀歲片啦，咁爛既haha. 或者大夢想家係個唔錯既選擇-W- 其實我想同爸爸媽咪夜媽媽去行維園年宵架，因為歷年來都未試過，但最後變左麥當勞宵夜...太安樓果間凌晨兩點既人流同晏咒兩點無分別...我地五個人食住雪糕有講有笑，眼水都漂埋出黎，太瘋狂+_+
返到屋企左搞右搞先至肯爬上張床到，摟住隻新成員青蛙暖手寶好開心@@ 唔知點解果刻完全無訓教既意欲，咁岩搵到有人上線，竟然由五點傾到七點haha. 望住天空漸漸咁光、傾到就連幫手年宵既同學都開始清理場地，傾到連身邊既朋友都起身LOL最初我以為自己可以支撐落去@@ 但最後都體力不支咁用兩個鐘補充體力，只係醒番既時候覺得好似發左個夢咁*O* 剛才通宵傾WHATSAPP變得好唔真實，好似係好耐之前發生既事咁......或者精神不太好-3-
年初一都係去左姑媽同朋友屋企拜年，好熱鬧，好鍾意聽番呢班大人講番細個任性，同埋調皮既事，笑到我就黎反艇hahaha. 岩岩仲食左碗椰汁紫米露加南瓜湯圓<3 嘿差唔多三點！聽日要繼續逗利是，各位晚安喇^0^ |
« | 10 | 11 | 12 | 13 | 14 | 15 | 16 | 17 | 18 | 19 | ... | 214 | »
|
