十月廿八日，仍然係凍過前一日，話咁快就跌到18度啦。

呢日既科學堂可以話係最精彩，最深刻既一次。

進行左個隆重而具意義既Oral Quiz之後，

Mr. Li就攞左個豬肺（連住條氣管）出黎，血淋淋咁樣。

佢仲好似做SHOW咁樣整黎整去，又放把較剪落條氣管道，

又將隻豬條氣管個RINGS剪開比我地睇，哇哈哈！

之後Mr. Li就將對豬肺分成十件比我地去玩下咁啦，

我就冇JACKY咁變態，佢就不停用隻手去渣舊豬肺，結果變晒形。

跟住佢仲要攞個鉗去整穿個肺，而我只不過係好普通咁搓圓禁平姐，哈哈！

午膳之後既最尾兩堂都係I.H.，又完左個Oral Quiz就繼續抗日戰爭。

落堂之後，我地STAY左係課室讀左次個英文話劇既劇本，

原本要用18分鐘既我地，改進到13分鐘，分到宜家11分鐘，好耶！

最後去到運動場練波，再一次NON-STOP咁打左兩個鐘頭，

當然就同左盧諾希夾左好多場啦，打多六局贏四局，走位都純熟左。

十月廿九日，終於去到今個禮拜最尾一個工作天。

Visual Arts`好高興咁樣前一日已經畫好晒啲OUTLINE，

而尋日只要加番啲LINE MARKER既線就冇問題啦！

D.T.`先用左少少時間去整左個底板，做埋旱接啲野，

跟住就有個Practical Test，就係用個program去畫圖，

都係冇咩特別，只不過較個長度果陣時有啲confused。

臨落堂之前，終於傾好左個model用乜野design，萬歲！

返左學之後就跟大隊搭的士去到柴灣打學界，

奈何我地換好晒衫，熱身都做埋，連出賽名單都編完，

我地既對手：某學校仍然冇出現，理所當然就自動棄權。

原本打第一場單打同第四場雙打既我又冇左個出賽既機會，

都唔知可喜定可悲，喜既當然係不戰而勝啦；

悲既就莫過於對住呢隊唔勁既隊伍都冇辦法挫下佢地既銳氣……

最諷刺既係我到目前為止都仲未打過一場FORMAL既比賽-V-

唯有祈求下個禮拜三可以成功咁對聖馬可中學；

至於星期五就要以取勝既姿態贏果間某官立中學，加油！

返到屋企都係做功課啦，當然係時候開始溫書啦。

話說我11月15日就係個朗誦節比賽既大日子，

奈何我去到宜家呢個MOMENT都係未背好首詩-.-

另外呢，早排見到有塊運動會各項比賽結果名單啦，我就非常好奇咁望下啦！

呵呵，原來我100米係攞第三架，第四既張廸琛用左13秒86，

而我就好幸運咁樣以13秒73贏左佢，一次比一次快，太好啦。

十月廿二日，星期五永遠都係我最開心既一日。

呢一晚就幫媽咪打左三鋪，奈何兩鋪都係去到「叫糊」狀態。

同樣地都係一到聽歌、食住野同埋睇住佢地打麻雀，搞到四點半先訓。

話說呢日食既野都好豐富，好好味，正喔！

十月廿三日，前一晚由於太夜訓，個頭始終有少少痛。

晏咒就要番去學校做義工計劃，去協助人地用面書。

我見呢日個天氣都好涼爽，就好無聊咁係柴灣行番學校，呵呵！

好健康既我結果全程用左廿五分鐘，終於見到一班「公公婆婆」啦。

坦白講，個活動冇咩特別，唯一既變化就係我個面書多左幾位朋友-.-

十月廿四日夜晚就係屋企打邊爐，實在太開心啦，哈哈！

十月廿五日一朝早起身，發現個天氣轉到好極端。

唔知係咪天氣凍左好多既原因，我懶床既問題嚴重左，

起碼比起平時遲左成十分鐘先捨得死落床，唉！

除左至愛中史堂之外，其餘堂堂都係播住同一首歌──催眠曲。

翌日，綜合人民堂`終於開始講抗日戰爭期間既野，

Miss Law仲播左段片我地睇，其實果班人真係好慘囉，

有個婆婆既八位親人相繼餓死，

見到果啲軍票真係覺得好過分，發行果陣兌換率鬼死咁高，

日軍宣佈投降之後隻軍票全部變成廢紙，好多人因為咁樣而破產……

之後果兩堂P.E.因為有人換衫慢，搞到我地要跑多三個圈，

跟住再做左半分鐘burpees，一分鐘Sit-up同埋掌上壓。

做完Fitness Test後都係玩籃球啦，今日就學走籃。

個感覺當然比Crossover好好多啦，嘻嘻！

臨落堂之前仲要跑多十個圈，前後加埋十六個…痴線！

十月廿七日，室外溫度一日凍過一日，都幾恐怖。

或者係啲風太強勁既關係，我無時無刻都好精神。

音樂堂果陣時，Miss Tsui比時間我地傾Music Concert啲野，

但其實我地果組早係N年前已經搞店晒啦，所以就決定練唱歌！

跟住Miss Tsui又問我地啲Powerpoint slides同埋MC稿，

最搞笑既就係佢聽到我地話 “Done” 之後，露出一個愕然既樣。

放左學之後我地成級係禮堂道睇戲，當係寫影評既預備工作。

呢套Edward’s Scissor Hands個情節都OK啦，有啲搞笑位，

但係睇黎睇去都唔知係乜野類型，講到寫film review真係好困難！