十月二十日，陸運會過後既補假。
話說前一晚睇人打麻雀，就一點半先訓喔，哈哈！
呢日就約左RAYMOND, RICKY, SARA, CRYSTAL同埋PHOEBE
去左尖沙咀既半島酒店同埋灣仔藍屋行下，為IH專題報告預備少少野。
話雖我講到好似好認真咁，但其實個氣氛都有啲HEA HEA地咁xD
大約十一點就去到尖沙咀啦，由於想做下訪問，
所以我地就搵左個地方坐低傾下，睇下有啲乜野問題可以問，
最後係STARBUCKS道坐左一個鐘，同食左少少野就向半島出發。
我地一開始都好緊張，不停推黎推去，睇下邊個出聲先。
結果身為組長既PHOEBE就問下啲旅客對酒店既感覺，呵呵！
佢好有禮貌咁GREET左個女仕之後，我就開始訪問佢啦。
奈何位女仕話I am afraid that I cannot tell you much about it.
最好笑同埋諷刺既事就出現左啦，哇哈哈！
原本我地都SET左四至五條問題既，但係問左第一題之後，
我地既角色調轉晒，個女仕不停反問我地好多問題，
又問我地讀緊幾多年級，最鍾意乜野科目，真係笑鬼死我地啦！
最後我地六個同佢影左張合照之後，就分成兩姐，周圍訪問旅客。
RAYMOND、RICKY同我就係酒店條ARCADE行黎行去，
突然我地見到一對年紀比較大既夫婦，就好大膽咁走過去問啦，
佢地兩個好樂意答晒我地啲問題之後，仲講左好多佢地啲孫既故事比我地聽。
雖然我仲未能夠聽到晒佢地所講既每一詞、每一句，
但係見到佢地咁NICE咁同我地傾計，其實真係覺得好開心架-V-
過左一陣，我地再次係酒店正門聚集，跟住再同心協力咁問多幾個人。
因為每題問題都已經問得多過三次啦，所以已經開始上手同埋背到啲問題！
跟住問左一對又係好友善既夫婦，佢地原來搭遊輪，暫時停係香港比行下。
我地其中一條問題係請佢地對於酒店既外觀同埋印象比個rank，
佢地兩個一開始就話未入到大堂睇，但係從外望落去，都比左滿分；
然而佢地係酒店行番出黎果陣時，又走過黎同我地講入面真係好令囉，嘻嘻！
雖然果班受訪者既答案都係冇咩特別同有啲行，
但今次係我地第一次企係街邊訪問人，個感覺係好特別同充滿成功感喔。
正當我地行去地鐵站過番灣仔果陣時，RICKY突然問起：係咪搭船呀？
就係因為佢呢一個既說話，重燃起我地貪玩既小宇宙；
奈何有機會暈船浪既SARA最後都係逼於無奈同我地上船。
坦白講，我上次搭渡海小輪都已經有一年幾啦，的確有少少興奮！
唔洗十五分鐘，架船已經係尖沙咀飄浮到灣仔啦，
我地落船之後行左一陣，終於搵到個地方坐低食晏。
去到藍屋果陣時，我地幾個打算上樓問下啲原居民既……
點知SARA同CRYSTAL怕黑唔上，RICKY就被人KEEP住，
所以最後得番PHOEBE、RAYMOND同埋我夠膽行上去。
正當我地係條樓梯道行左幾級之後，突然聽到一把女人既聲：
令仔令女，落番黎啦！係咪睇唔到果道寫住乜野字呀？
指既係一張字條，寫上「私人地方，閒人勿進，否則面斥不雅。」
我地最後冇理到個女人，等佢上左樓之後，就開始探險。
話說果棟藍屋既樓梯都幾黑下，一個人行既難免有啲恐怖，
我地放輕腳步，遂層樓咁樣上，去到每個地方都影下相「留念」！
隨後，永遠都唔會放棄既PHOEBE就求其搵間屋禁下個門鐘，
奈何無人黎開門。我再試下敲下第二道門，仍然係冇人應。
返到落地面之後，見到梯邊有盆葉，寫住類似「眼看手勿動」既字句-.-
行到去隔離果棟唐樓啦，又係我地三個踏上果條幾恐怖既樓梯。
同樣地，我地都係盡量以最細既力度行到去最高果層。
慶幸地，我地發現果層其中一個單位有兩個人住，於是就禁門鐘啦，
跟住有個阿叔（其實應該係阿伯）係個防盜窗道望出黎，
第一句就係「呢度唔入得！」我就問：「可唔可以問你一啲問題？」
最失望既就係一下子被人潑左一灘冷水，
個阿叔好冷漠咁樣講左一句「唔得」之後，我地就話唔好意思，唔該晒…
之後我地又見到一間跌打館，於是就再次問下有冇人啦！
點知後面又有把女人聲話：「點解你地咁好奇既？我地唔接受訪問喎。」
我聽到之後，真係嬲嬲地！ 唔受訪咪唔受訪囉，洗唔洗咁串呀？
抱住失望既心情離開藍屋之後，就行左去附近一家McDonald’s坐低休息一下。
成日又行又企，加上前一日隻腳做完咁劇烈既運動之後，真係好攰。
講真果句，今日呢一個OUTING真係好正喔！
其實我覺得今日好奇怪，個感覺好難以文字去形容出黎。
雖然呢日所做既野有啲辛苦，好似企係半島出面訪問左好耐，
同埋去到藍屋就訪問唔到任何居民，但係我地六個起碼有嘗試過嘛^^ |
