七月廿一日，一個陰晴不定ge星期三。

話說尋晚因為未眼訓，所以就開始做本中文暑期作業，

結果去到一點半果陣時，已經做左三個單元啦，雖然啲聆聽練習未做……

點知最後係張床眼光光咁望左成個鐘，先至算叫做訓得著。

最慘就係第二朝八點半起身，又要去柴灣打波啦……

好彩今日冇咩好激ge操練，主要都係比我地「自由搏擊」，

如果唔係就會攰到即場暴斃。出完一身汗，倦意所剩無幾。

好幸運地，今日係冇整親啦，我終於暫時性唔做「玻璃人」……

返到屋企上Facebook果陣時，發現左兩樣好巧合ge野，就係：

一、原來有幾個人同我一樣，尋晚好難訓得著。

二、有班朋友尋日去左石澳燒野食，租爐果個地方同我地上次1A去果道一樣。

話說今日晏咒果陣時，落左好大雨，啲雨大到幾乎打爆我果啲玻璃窗，哈哈！

至於今年第二個颱風──燦都就好靠靠近香港，所以就掛左三號波啦。

夜晚就繼續披星戴月咁做本中文，嘻嘻，又做多左個單元練習lu…

但係做做下就好眼訓，同埋有少少頭痛，有時行起路都唔穩陣，飄下飄下咁……

最後，我希望大家今晚有覺好訓啦，包括我本人，嘻嘻！

七月二十日，好輕鬆ge一個星期二。

朝早就十點幾起左身啦，去康怡睇《反斗奇兵三》。

首先，我本人嚴重覺得呢套戲有冇3-D都冇所謂。

話說我三集都睇過，但係都已經係好幾年前架事黎啦！

最諷刺就係第一、二集分別係1995同1999年出映，

但奈可第三集要等11年先至係戲院道播。

我自己覺得呢一集係最好睇，個劇情都係最緊湊，

話雖集集都主要講胡迪同巴斯離開安仔；跟住有個歷險；最尾返番屋企，

但係呢一集個題材其實好新鮮，因為個奸角唔再係索克，而係一隻啤啤熊勞蘇。

除此之外，成套戲仲有幾個笑位添呀，尤其是係巴斯講西班牙話、跳西班牙舞；

同埋薯蛋頭先生個身，由薯仔變左做塊類似薄餅ge物體，行路姿態好得意喔！

其實仲有好多好睇ge場面啦，但係好難用文字去表達，哈哈！自己睇啦！

總括而言：一套我認為好好睇ge卡通片，值得推介推介。

返到屋企開電視先知道又有一號風球，話說聽日會掛高啲喎，是但啦。

夜晚就開始為中文暑期作業努力一下啦，結果用左大半個鐘，

先至做完第一課ge練習（可惜就係聆聽果部分仇仍然係未有野寫）。

聽朝又要去打波啦，真係要求主保佑條腰唔好出事啦……嘻嘻……哈哈！

選自：http://hk.myblog.yahoo.com/yatcheung_1997/article?mid=4410