那是一個試煉吧？

返唔返教會呢個議題，如果有充足嘅靈修，常與主同在之類，
返同唔返根本就有如虛設咁上近，但係問題當前提下係唔夠，
返教會可謂最後防線，至少我係咁諗。

從來返教會都唔會話為左邊個返同唔返，但呢期，
會為左避人而唔返。
係大圍下扮哂無嘢，私底下又有啲老尷，
避開任何一個我有機會鍾意嘅女仔lol

一般黎講若然係魔鬼攻擊我會感受到，都係以前嘅事，
而家啲預知夢無左一大半，
入儉房唔覺寒，係墳場唔覺膊頭重，
祈禱唔會話有極強震動，之類啦。
我知信仰唔可以只憑感覺，係之前有，而家無，
唔知係身體承受到，還是上帝收走，
再唔係，就係媽媽嗰邊族譜到我呢個年紀嗰種感覺會大減。
平時已經無危機感，天跌落黎當被冚，
無埋種感覺都唔知會唔會出事。至起碼入廟會話我知呢個廟有無嘢。

以前都無試過避人而唔返教會，
我唔知無裝備會點，以術語黎講，應該叫屬靈生命好薄弱，
我想我可以捱過，或是，由分開嗰刻起，屬靈方面已經跌入死寂。
係教會無帶任何人，或者係咁樣可以直腸直肚，唔駛理班小朋友會跟住學，
痴線，人影都唔見，點學啫。

雖然係好籠統咁玩個大包圍，
好明顯地，無左從前種衝動，內在亦無之前咁掂。

 其實呢，我好努力抽身，
對於上次觸電嗰個女仔，我想盡力抽身，
年紀唔細喇，就當我襯唔起，乜都好，
係唔想傷多次，係唔想無朋友做，
或是，情傷之後嘅白痴嘢，林林總總嘅後續。

係好間唔中地，見人病左會問候一句，
當係止痛又好，關心朋友又好。

正當想抽離之際，
又，不自覺地回帶當初拍拖啲情景，衣著，對白，之類。
好可悲，我好想走返出黎，我知道自己份人話左開始就好難結束，
睇下自己有幾多興趣又唔係話叻就知。

近來很想她，不，是每晚也在想。

好鬼變態，都知呢啲係露水情緣（但我dry到爆，有滴水我就好開心。），
常言道世上無最愛呢回事，由我口出已經唔係第一次，
上次好朋友，話放就放，啱啱開始第一個月可能仲有啲扭擰，
之後都無啦，呢啲關係，我諗由訓練所得，都分得幾清楚。

我唔敢話，試下去恨一個人，廣東人有句叫反轉豬肚就係屎，
如果要恨，會做試非常撤底，更何況興報仇，無一人做事一人當呢回事，
一定禍及家人或是身邊至親，聖經有教愛人如己，同樣地亦有教以牙還牙。
鬥賤格，根本唔需要道義，又何來談人性。

要恨，我完全諗唔到有咩理由去恨去唔愛人，咁樣去呃自己等時間過去療傷。
唔係刻意嘅，嗰陣返夜，又唔係晚晚有工開，日頭多數都同佢去左好多地方玩，
雖則係成日唔認得路，但係去過附近，啲記憶又會缺提咁湧現。
甚至間唔中就發夢，一個兩個都係長髮嘅男女相擁，
夢境好清晰，但唔係重點，比自己回味就夠。

就當我唔再細個，我都想搵返個女朋友係身邊，
唔知啲技藝會唔會好似嗰時因為時間壓縮而加速呢，哈。