|
到左平安夜啦，
12月24日。
今日首先同左家姐去睇傷城既早場，
我家姐昨日就買定飛啦，
如果唔係都唔知有冇得睇。
暫時唔寫部電影住，
等到我某日唔知寫咩先再寫。
睇完戲同家姐暢遊哂成個旺角，
行到就累死，始終到係乜都買唔到，
到底我發生左咩事呀。
之後由於約左阿胭8點係旺角，
時間嘗早既關係，
我同家姐決定先返屋企。
返到去4點幾度啦，
就同家姐執左一陣屋，
同熙少玩左一陣，
就洗面化妝，執返d眼耳口鼻出黎，
預備出去同佢地食飯啦。
8點出到旺角，
先去行左一個新商場，
再上去等位食野。
上到去，真係勁爆多人，
好慶幸我地有訂位，
唔係就真係唔知等到幾時先有得食。
坐低左，都係照舊，
一路吹水搞笑，一路食野啦。
其間聽左阿胭講一件事，
覺得有少少感慨，
其實人與人之間既關係真係好脆弱。
多年既友情，可能只係因為一件事，
甚至係一句說話就會破裂。
其實諗深一層，真係好唔值得。
我地食到開始減慢速度既時候，
發覺個爐好黑好燶，
於是諗住叫個伙記幫我地換一換佢啦，
點知，佢拎左張單出黎，叫我地埋單。-_-
當場4個人馬上o咀，
個伙記好快咁講，我地出面寫明架啦，
今日4位1小時，5位以上先個半小時。
我地心諗真係吹漲，訂位果時佢又冇講，
出面咁死多人塞住哂，鬼睇到你地d 牌咩。
不過好在其實我地都食飽，
咁就埋單走人啦。
之後就去左行街，
本身係我想買聖誕禮物，
結果我買唔到，反而熙少買到。
我買左一件冷衫俾佢，
都幾好睇架，幾襯佢。
行行下，阿胭話刁妹出黎join我地，
問我地有冇問題。
我當然冇問題啦，刁妹又唔係未見過，
同埋我都好耐冇見過佢了。XD
我地行住等刁妹，行到好累，
於是就話不如坐低飲d野or食d野等啦。
搞左一大論，最後都係去左許記，
坐低左冇幾耐刁妹就打黎話到旺角lu，
我地就食左糖水等佢啦。
其實我覺得我地食糖水果時真係好開心，
傾到好多野，又可以係度玩。
好耐冇試過有哩種感覺lu，
希望我地下年都可以咁過啦。
其實靜係咁樣幾個人就可以好開心，
唔需要係節日搞到自己咁忙既。 | 
