今日放假一天，不過依然是番工既時間起身，因為要去探傻一...

係架101巴士竟然見到甘大滋小姐，好在佢見唔到我，如果唔係佢番到公司又好多野講架喇...落車之後買左麥記早餐(熱香餅+薯餅5個<--你話要5個既...哈哈，不過結果我食咗3個)，就去傻一度，哈哈...一陣之後我地就去咗旺角唱lunch k，間房好大，不過個位置又唔錯喎.....

唱完之後去shopping，佢買咗一件t shirt同一條牛仔褲，兩件都真係唔錯架.....之後就去咗朗豪坊food court食dinner，我食咗個印度咖哩套餐，佢就食泰式魚旦河...食完就去睇「零晨3點3」，都唔錯喎，冇悶場，都有一幕嚇咗我一跳!!不過你鍾意睇就好喇!!睇完之後佢就同我返官塘，飲涼茶，不過勁難飲，我飲桔梗，佢飲羅漢果，我諗我都係鍾意雪梨茶多d喇!!飲完之後行咗一個圈就返屋企喇!今日真係過得好relax同輕鬆!!

我突然有個諗法，我呢個日記其實除咗幫我記底我既事，等我可以隨時回憶過去之外，我諗都可以幫你回憶我同你之間既事，一物二用，真係有建設性喇!!

今日瞓到9點幾...跟住阿媽鏟醒我去飲茶，飲完茶就去搵傻一..

去到西環接佢..跟住一齊搭巴士去太古，係巴士上面個感覺好好...感覺同你好close，好溫馨...所以點解你成日問我點解要送你番屋企，其實我就係好鍾意呢種感覺喇...

之後去咗太古做gym，做完之後去咗「健康點點」食小食，食咗好多野呀..有腸粉，燒賣，魚旦，糯米雞，菜肉飽，涼粉，涼茶，好豐富呀.....你叫我唔使咁就你.....傻喇，我唔係個個都就架....你知架...

之後傻一同我搭巴士去官塘，行咗一陣apm就番屋企喇.....你要好好保護你對眼喇!!見你好攰呀 ...傻一...都要同我番屋企...多謝!

夜晚溫咗一陣日文就瞓喇!!

幸福摩天輪 - 陳奕迅
追追趕趕　高高低低  深呼吸然後與你執手相隨
甜蜜中不再畏高  可這樣跟你蕩來蕩去　無畏無懼

天荒地老流連在摩天輪
在高處凝望世界流動
失落之處仍然會笑著哭
人間的跌盪　默默迎送

當生命似流連在摩天輪
幸福處隨時吻到星空
驚慄之處仍能與你互擁
仿彿遊戲之中　忘掉輕重＊

追追趕趕　高高低低  驚險的程度叫畏高者昏迷
憑甚麼不怕跌低  多僥倖跟你共同面對　時間流逝

東歪西倒　忽高忽低  心驚與膽戰去建立這親厚關係
沿途就算意外脫軌  多得你　陪我搖曳

一個月喇!!

今日要番工，朝早食咗一個好豐富既早餐....不過番工時我基本上冇做過野.....反而執咗我既書枱，掉咗好多冇用又唔知係咩既紙...其餘時間我都係溫日文.....12:30當我熄咗電腦準備閃既時候....Ms. Chan就係呢個時候打電話叫我做野........咩人黎架....等我又要開番電腦做完先走....

之後去咗北角「三德」食齋，同玉蘭fairwell，佢真係好知自己做緊咩，同好有抱負。佢話係CUHK做咗10年，做咗好多研究，但係結果佢覺得冇滿足感，佢覺得做咗咁多野，但睇唔到對社會有咩作為喎，其實佢覺得之前幾個轉咗工既舊事當中，我依家份工係最有意義，因為可以見到即時受惠者既反應，應該最有滿足感，我聽完先開始諗吓呢個問題，嗯，都係喎，我覺得我真係有滿足感，不過係d人衰d o者，我都要再俾多d熱誠先得。

另外，玉蘭話佢如果係台灣修行適應到佢就唔再番香港....如果係真..今次可能係我最後一次見到佢，又或者我去開台灣先可以探佢，因為佢入咗去就唔可以自由出入!!!真係有d唔捨得!我o係CUHK做咗3年，我同佢最好傾，雖然我有時覺得佢好老土，人又有d古肅，不過佢成日好似大姐姐咁教咗我好多人生哲理同佛學知識...同佢傾計成日都可以令我反思好多自己既野...我真係好多謝佢...嗯....其實我走咗1年半都冇搵過佢，真衰!!(我同佢重要住得好近...行去佢屋企都唔使5分鐘)，反而依家佢要走喇，我先唔捨得....我地今日分別既時候..我見到佢都有d依依不捨..望咗我幾眼....唉....心酸!!人就係咁架喇....係呢d時候先珍惜!祝佢係台灣真係搵到適合自己既生活同開心快樂!!

之後去咗搵傻一，哈哈. ...我地去咗堅尼地城既「綠野仙蹤」食晚飯...唉..由於我地原先既計劃告吹咗，我地就去咗奧海城睇戲..但結果又睇唔成囉.....噢....唯有周圍行吓喇....由於熱到我地溶咗咁滯...我地行咗一陣，o係Espirit買咗bodywear 就返咗西環同食我最喜歡既桑寄生蓮子蛋茶...之後送佢番屋企我都番屋企喇!

今日終於收到designer既稿..第一時間就梗係拎俾ms. chan睇喇..好在佢今次都好滿意....咁我都冇咁驚..

今日成日都係預備下晝開既會...朝早好忙..

不過唔知點解由11點開始就勁頭痛.......到下晝終於忍唔住要食panadol..好在食咗之後好咗好多!!

下晝阿姐同我同judy嘻嘻哈哈....又激到「燈籠眼小姐」眼坦坦....冇辦法..我地3個都係顛顛地....「燈籠眼小姐」要保持佢高貴形象....同我地就一定格格不入架喇.....

今日我真係覺得樓上d同事開始瞭我多咗講野.....好咯!!

開會開到差不多6點.....之後去咗太古曬燈同做gym...又收到你既SMS..你真係好喇!!我會架喇!

聽日又見到你喇...YEAH!!!

好想你 - 蔡依林

好想你　不停止
好想你　我愛你　寫在手心
你笑容　你觸碰　還是讓我心動

好想你　不停止
好想你　我愛你　給我勇氣
那包容　那悸動　都是我
珍藏的內容

今日如常番工..不過lunch時間發生咗一件不可思議既事..我竟然會係office做d咁既野???如果成日都有呢d事發生都唔錯喎!!

傻一今日放早..去睇醫生...醫生話佢紅眼症，重寫咗幾日假俾佢...真好..不如快d傳染我喇!!佢係lunch時間竟然黎咗探我..我真係估唔到囉...我重幫佢做健康測試添....嘻嘻....不過你真係要休息多d喇........知冇?

下晝我又俾Ms.Chan話我喇...個designer真係玩死我喇.....攪到我下晝都冇咩mood添...

放工收到另一個消息，就係同事阿熹唔做喇...佢9月開始讀full time degree...真係好喇....祝福佢喇...

夜晚食完飯開始溫日文，因為下星期三考試喇.....溫咗3課...都幾好成績呀..

之後傾咗一陣電話就 瞓喇!!

今日本來以為MS. CHAN會唔番..點知佢2:45pm就話番緊黎...唉...好在佢冇搵我..

今朝「燈籠眼小姐」捉住阿姐哦咗成粒鐘，佢say sorry但之後就死都要講到阿姐既工作態度差..佢重要屈話所有人都覺得佢做野唔得...佢都得架啦...可以將件事由佢自己發顛化到咁大........重要擺哂所有人上枱..不過公道自在人心，所有人都撐阿姐......佢以為自己贏咗...但其實佢係大輸家....!!

放工去左接傻一，送咗個牛奶仔公仔俾佢，希望佢鍾意喇!之後去左灣仔..竟然見到Mr. Nicky Chan...你夢寐以求既情境發生咗喇!!!

之後去左一間我食完都未知叫咩名既上海菜館食野....不過我覺得麻麻..我地幾時去食正版「素食一家」好呢?

食完就去睇「楊千嬅x林一峰 拉闊音樂會」，我覺得唔得囉，冇咩氣氛.....有d悶..最驚喜都係林一峰唱「我係小忌廉」同千嬅唱「對不起我愛你」....第一次同你睇concert...感覺好好....期待同你睇憶蓮同關淑怡.......我好鍾意同你早一個站落車!!!

今朝我6點突然急醒左，去完廁所竟然重可以瞓番...真係奇蹟，重要阿媽7:10叫我我都完全唔知添...到佢7:25入黎再鏟我我先真係醒左...嘩.....咩事呀!!!

今日番工開始多野做喇...我都開始回覆狀態..

下晝當我傾緊電話既時候...聽到出面partner同阿姐好大聲講野...我重以為佢地咁開心唔知講咩....到收左線既時候..先知原來岩岩發生左d火爆場面....阿姐話partner瞪起對「死人燈籠眼」話佢講野做咩阿姐唔睬佢喎..當然阿姐有睬喇..不過係partner小姐掛住同阿丁social聽唔到..阿姐心有不甘鬧番燈籠眼小姐轉頭..嘩..勁呀...鋤佢銳氣....唉..燈籠眼小姐..凡事留一線..他朝好相見呀..大家斬係打工架咋..成日以為自己巴巴閉閉..公司冇一個人鍾意佢囉..不過佢都係唔明架喇.....呢件事最慶幸既就係阿姐激氣到不斷同樓上d人呻..跟住個個都問燈籠眼小姐同我既友誼程度...而阿姐終於講出事實既真相..同佢地講左我同燈籠眼小姐都係面和心不和...之前都炒過...好咯...真相大白...劃清界線... 大家終於知道我既苦況喇!!每日8小時同燈籠眼小姐困獸鬥....

放工去左做gym...好多人囉....睇黎我都要轉變陣地喇.....好耐冇收過你既SMS..今日再收到真係好..好期待聽日既拉闊音樂會呀!!

今日又係一個星期既開始.....我要俾d心機做野先...

今日黎咗一個新義工...佢好似好想學好多野..我都要準備多一d有意義既野俾佢做先...唔好等佢失望!!

下晝我俾Ms. Chan話我...佢話我個Roving exhibition 完全behind schedule, 重話我要學吓evaluate我既project...唉...無奈又無奈....個designer唔交貨我都冇辦法架...我已經催左佢地...佢地耍我都冇計..最後我咪做三文治裡面既火腿囉...其實我都跟足MS.Chan既意思做..不過佢成日都係好心急..結果因快得慢....最後就係搵人做箭靶......係我心目中...佢係一個冇質數既老細，成日要出風頭同擺同事上枱..我就黎可以做專業舞男架喇!!!我依家一心都係跟出面d人學野.....跟佢...死硬喇!!

夜晚聽左憶蓮第一隻cd(2005先第一次以CD出版)，d歌太少女喇...我有d頂唔住...開始期待星期三個concert添...

我心目中既傻一今日終於番咗黎喇......

I Love You So - 郭富城
I love you so I need you so
事實沒法可解釋愛念
愛妳也許無知但情真摯

I love you so I need you so
寂寞夜裡加倍掛念
愛妳每點純真自然
率真的心是不變
愛妳每點純真自然
率真的心是不變

今朝一早起身都係做指定動作..同阿爸阿媽家姐飲茶..

飲完之後我陪阿媽周家姐行宜家.....唉.....佢兩個真係得架喇...係園藝部足足擾攘咗半粒鐘有多...先講我家姐...佢想買一個玻璃物體種花....不過佢唔係嫌大就嫌細...唔係嫌貴又嫌樣唔靚.......好喇...搵到一個岩心水又岩價錢...但係又冇佢要既顏色.....問sales都話冇哂...佢見到display(佢地種咗野)個個...摸吓摸吓又唔知想點...我都知佢想要display個..問佢係咪想要呢個..佢又扮野問得唔得架....結果我唔理佢...攞起個黃色既玻璃物體就換咗比佢...換完之後佢竟然問我藍色會唔會好d....我都冇理佢喇.之後呀..再行到買杯既地方...又話其實要呢個都得..o個個又得...唔使一定要依家o個個...啤~~~~~~~~好喇..我阿媽見到有好多什麼「發財樹」，又想買喇..我同家姐咪話買囉...開始揀喇...佢唔係嫌高..又嫌矮..唔係嫌粗又嫌幼....差唔多揀咗10分鐘之後...佢終於話唔買...因為佢話冇位擺喎......啤啤~~~~~~女人就是這樣的嗎?

俾佢地兩個精神折磨之後我一返到屋企就瞓咗一陣..之後就去搵傻一....去之前試吓去搵林一峰本書..不過冇喎...結果買咗「楊采妮 梁詠琪 交換日記成長錄」俾佢..希望佢都鍾意喇!

真係好喇..又見到傻一...我地之後去咗唱K...唱完之後就送佢返屋企....我地早咗一個站落車，原來早一個站落車咁好架...!不如以後都早一個站落喇!!

今日放假，生理時鐘又冇叫醒我..所以今日我都好精神!!

朝早同阿爸阿媽飲茶，之後就去左接傻一，途中你打黎話好大雨，叫我係地鐵站等，你真係好架喇!!!見到佢我好開心，之後我地去左太古城買做gym手套，跟住去左food court食葡國嘢，食完野行左一陣就去左做gym，好耐冇同你一齊做gym喇!!

之後傻一隻眼好唔舒服，我陪佢去睇醫生，醫生話佢係結膜炎，傻一唔使擔心呀，小事黎架咋，都係例行檢查架咋，我係度架!你要好好保護你對眼呀!!

之後就去左集成同188，你買左林一峰隻CD，跟住你話去觀塘食飯，本來諗住帶你去食真既「素食一家」喇，點知行到去執鬼左!!真係激死，咁個招牌就咪鬼著住喇，欺騙觀眾!!!我一定要帶你去試吓正版貨囉!!

結果我地就去左食明記牛腩河，之後你話行一陣就番屋企，本來我都有諗過你買定飛，但8點幾喇..諗住就算你買定飛都唔會睇咁夜!!都係諗住行吓就算架啦...點知你真係買左呀，係9:45pm!!!我估唔到囉，我都知你係要俾驚喜我同我都知你唔係太鍾意呢類戲架啦，多謝呀傻一，我知你係為我架啦!!!! 不過套「謊島叛變」都幾好睇呀!!之後你重要陪我番去，我真係有d唔好意思不過我又好開心....我收到哂架啦..... 下次我要同你睇你鍾意個套戲!!

我今日好開心!!