成個星期冇寫日記喇，今晚突然想寫番!

呢期我個生理時鐘好似壞咗，成日瞓極都唔夠，朝早又唔願起身，唔通我俾你傳染咗?可能屋企個環境好差，我成日半夜醒一醒，覺得好凍，係咁搵番張被，不過蓋左一論又好似好熱....作病乎? 

呢個星期番工都幾悠閒，攪到我都幾PEI，不過遲d又開始忙...要開始培養番我既工作狀態先!!

今日公司阿姐沖左d茉莉花茶，我飲咗一杯，之後就開始勁胃痛，痛左半日，我對d濃茶都係冇腹消受架喇!! 

今日同同事玩部新買既DC，佢都好有興趣買一部，我都係買左一個星期先正式「玩」吓d function，真係唔錯喎!

放工去咗做GYM，都未見過咁多人，樣樣都要排隊!!都冇耐性等，做咗一陣就走咗喇!走時見到「優XX品」廣告個郭力行，都好高幾靚仔，真人好過上鏡!!

做完GYM收到你個電話，好驚喜!我唔想再諗d冇答案既野喇，我只係想開開心心同簡簡單單同我鍾意既人係一齊....我只想向前看...你呢?

重有兩日就番工，放假既時間過得特別快，放左好似冇放咁...本來plan左想去大陸買老番同按摩，不過又係懶囉!!

由於尋日曬完燈，今日塊面勁紅，重有d灼傷feel添，有輕微紅腫，唯有勁搽CREAM喇!

今日去左剪髮，我叫佢唔好剪得太短，結果....又係好短，重好碎，我自己都唔知點gel，唉......佢問我平時有冇用泥，我話用gel，佢好似好不屑咁，喂...今時今日咁既服務態度唔得架啦!!不過我之前就未剪過呢款髮型!都係新嘗試黎既!

之後遊蕩左一陣APM同觀塘廣場，見到ipsa開幕，森美做司儀，陳鍵鋒同吳日言做剪綵嘉賓，比起上次我見到陳鍵鋒，今次就勁厚妝，我就覺得森美型d!!係觀廣買左d野送俾你，希望你會開心D喇!

成個下晝都係icq同d friend傾吓計，又搵番d好耐冇聽既歌出黎聽，重溫中學時代既歌，我成日都係咁，突然會勁煲某個人既歌，今日就煲周慧敏，王馨平同湯寶如，不過唔係佢地合唱既美少女戰士喎!!!!!!!!   

睇左你篇日記，覺得你好傻，你真係諗得太多，你係我心目中已經做得好好，你話你依家成日同人比較，我可以話俾你知，如果真係要比，比起我個ex，你真係好好多，起碼我feel到你有用心去關心我，好多野我都知道你係為左我開心而做，我真係感覺到，我都好感動同多謝你!到呢一刻為止，我都覺得你已經做得好好架!!傻人!不過我唔想你再同我個ex比較，因為人比人，比死人，你就係你，依家同我一齊既係你，我鍾意既都係你，佢已經係過去式，依家係我心目中只有你既存在，佢只係我回憶既一部份，你只要憑住自己個心去做已經好足夠!你有自己既性格思想，唔好因為別人一兩句說話就冇左自己。

你覺得你以前對人差，睇得簡單d，從今以後對人好d咪得囉，人係應該活在當下，唔係活在回憶之中，係咪?人生幾十年，邊個冇做錯野喎?最緊要知道自己有咩問題，係之後既日子做番應該做既野咪得囉，傻瓜!你唔可以係今日追番之前未做既野，10日之後又追番今日未做既野，不如由今日開始做你可以做到既野喇!唔好成日逼自己埋牆角，俾咁大壓力自己，有時d野唔係想像中咁複雜，亦唔係所有野都係你問題。

你想知係咪因為你令到我有好多野要擔憂，係咪因為你既情緒而影響到我，當然有架啦，因為我係你男朋友，當然會擔憂架啦，唔通見你憂憂愁愁我都冇反應咩，不過你唔好因為咁樣而唔同我講，咁樣我重驚，因為要估一個人諗緊咩係好辛苦，我有責任同你分憂架，我唔係淨係陪你飲飲食食架!!!知冇!?同埋我唔會因為咁而覺得麻煩!!

你係一個有血有肉既人，唔係鐵人，攰同唔開心係人之常情，唔使隱藏自己喇!你依家要做既就係唔好再諗一d冇得再解決既事，放底佢，我下次買d波俾你吹爆哂佢，發洩一下。當你開心d，就自然可以令身邊既人都開心d架喇!!

今日好早又醒左，好眼瞓，因為尋晚半夜行雷閃電，嘈醒左我，起左身去左飲茶。

之後中午我番左去舊公司搵舊同事Wilson同Ruby食飯，好耐冇見佢地喇，同佢地雖然唔係好多話題，但係依然有好熟悉既感覺，短短一餐飯，就令我諗番起好多以前成大班一齊嘻嘻哈哈既片段，不過熟o個d已經一個一個走哂，剩番佢兩個喇!!之後再上左office搵Shelly同高陽，佢地兩個見到我真係好驚喜，同佢地傾左半個鐘左右，真係好好feel，佢地既半鹹淡廣東話依然令我津津樂道，笑話百出!!最遺憾就係見唔到玉蘭，佢就黎過去台灣修行一年，佢係我心目中真係一個好脫俗既人，看破凡塵俗世，我諗依家真係好少見到一個人可以辭工，不顧一切走去另一個地方修行!!好犀利!!今日重見到eric，簡直係我既一個驚喜，我同佢都好有緣，唔係成日見但依然可以好friend咩都講!!雖然唔可以同佢詳談，不過見到都好喇!

之後去左搵傻一，~~哈哈~~我地去左打機，晚飯就係花園餐廳食，唔知做咩佢今晚要請我食飯喎，奇怪!!之後去左HMV同宜家，唔知有冇機會可以為我地既屋佈置得好似宜家個度d咁正呢?再之後去左飲涼茶，就番屋企喇!

今日唔知點解心情都幾百感交集!?

今日開始放一個星期大假，都冇咩planning,尋晚睇完你既日記之後，個心有d不安，不過今朝同你講完電話之後，個心先舒服d!

整個朝早都係聽歌，下晝自己走左去apm買數碼相機Casio Exlim Z57，都冇咩比較，因為我唔識，我買野通常都係咁，一認定左某種型號就只會格價，唔會比較其他型號......可能我唔係一個精明消費者喇....不過我都未試過後悔，畢竟呢個係我既選擇!!                              

今日晏晝你同我講左好多你既諗法，亦令我諗起我同ex剛剛散o個時既野，都有d似，我覺得你有呢d諗法都好正常，無疑你都係散左3個月左右，之前重發生左咁多事，依家你先至真係平靜番落黎。

之前我都有諗過點解我同佢既結局會係「完結」呢!?係咪真係只係佢唔再鍾意我?點解佢又會唔再鍾意我?再諗多d，其實之前大家都做左d野互相相害，佢做左A，我就做B，之後佢又做C，我又做D，一步步推住大家走到結尾，當時只係我一個唔想夢醒，不斷俾籍口自己，我亦都試過覺得自己係衰人同內疚過，諗過如果我o個時唔做o個d行為，會唔會我重可以同佢一齊?

我同阿姐講過，佢話人係犯賤既，有既時候你只會記住佢既衰野，冇左既時候就只會記番佢既好野，佢亦同我講:「你依家好冷靜諗番，梗係可以好理想化，好似將成個故事解釋番出黎，但你有冇諗過，你同佢跟本就係唔夾，所以先會有咁多問題，先會令大家做咁多傷害大家既行為而有一個咁既結果!?」

旁觀者就係旁觀者!佢好似點醒左我，一段關係係咪一個人可以完全控制到個結局呢?係咪一方面做多d野就代表問題可以解決呢?單手又點能夠拍掌，一定係雙方面都有問題先會令一段關係完結。到依家，我再冇呢個諗法，反而覺得係一個釋放，我依家甚至多謝佢，如果唔係佢提出，可能我重係度呃緊自己，雙方重係度糾纏同唔開心緊，依家我更加知道自己想要d咩，可能呢d就叫做經驗，人畢竟都係要有d風雨先會長大!希望我既故事都可以俾到一d啟示你，感情永遠都唔會有對與錯既.....亦要向前走!我好希望你同我一齊既時候唔係淨係諗番以前既野，而係會諗我同你依家同之後既野。 

人間 - 王菲
風雨過後不一定有美好的天空
不是天晴就會有彩虹
所以你一臉無辜　不代表你懵懂

不是所有感情都會有始有終
孤獨盡頭不一定惶恐
可生命總免不了　最初的一陣痛

但願你的眼睛　只看得到笑容
但願你留下每一滴淚　都讓人感動
但願你以後每一個夢　不會一場空

天上人間　如果真值得歌頌
也是因為有你　才會變得鬧哄哄
天大地大　世界比你想像中朦朧
我不忍心在欺哄　但願你聽得懂

但願你會懂　該何去何從 

呢兩日過得勁開心喇，尋日一早起身同阿爸阿媽飲茶，之後就去左搵傻一一齊去左唱lunch k，唉跟住幫我家姐攞個冷風機由旺角搬去九龍灣，雖然唔係重，不過都幾大件，重點就係好鬼死熱囉!!!不過好在我係第一個享用!!                                

一個飯盒+電視+你=浪漫滿屋=好開心(好深既公式)，你話我好正?其實從來都冇人用呢個字眼形容過我，我聽到真係好愕然，真係有d以為自己發緊夢添!不過到依家都唔知個答案，唔知有冇人話俾我知呢?其實你問我點解會鍾意你..我都唔係好識用言語表達，係一鍾感覺囉..我覺得同你一齊好舒服，你好真好純，我真係好想保護，關心同愛錫你。我都知你好關心我，從你既眼神我感受得到，我唔會俾自己有事既，你放心啦.... 你都要保重喇!  

~~哈哈~~我都唔知點解今朝我會突然失控，我半年都冇試過缺堤喇，最衰都係你呀!!~~哈哈~~不過我真係唔想見到你唔開心同煩惱，你有咩事都要同我相量呀.知冇?

今晚係心粥館食飯，個粥真係好好食.....好得....呢間可以再同你去食過!! 

你快樂所以我快樂 - 王菲
你眉頭開了　所以我笑了
你眼睛紅了　我的天灰了

呵　天曉得　既然說
你快樂　於是我快樂
玫瑰都開了　我還想怎麼呢

求之不得　求不得
天造地設一樣的難得
喜怒和哀樂　有我來重蹈你覆轍

今日竟然要阿媽鏟我先起身，真係少有，番工都好平淡，不過好忙，可能我下個星期放一個星期假，所以好多野都要做好，個MS. CHAN CHAN重有d無理既要求，我既反應只係望住佢，唔通我唔放假呀，NO WAY!!!唉...冇質數就係冇質數..

放工重要開會....唉....悶到抽筋，開到6點...不過之後重要俾Professor同Ms. CHAN折磨一輪... . .好攰架!!好在阿姐夠義氣..等埋我走...

番屋企冇飯食....結果order左PIZZA，我竟然可以食4件大PIZZA，再加大半碗飯加4件小食....我既食糧唔通越來越大???要控制..唔可以走回頭路!

今晚同你傾左一輪電話，知道多左你既野....其實我睇你既日記好開心，我就覺得寫日記係俾自己一個回憶，寫自己真係想寫既野囉...唔係就失左日記既意思喇!!唔好諗得太多啦!傻瓜!

對不起我愛你 - 梁靜茹
想給你聽我的心跳　想你知道我睡的不好
喝水想著你　搭車想著你
閤眼閉眼間　出現的全是你

今日我放假，熟我既人都知我一定好早醒架啦，係..我今日又係6:30醒左，唉..冇福氣囉...可能我今日要打電話換飛喇，所以咁早醒，我細個時都係咁架，如果有功課未做或者旅行之類既事我都會特別早醒架!!

今日換既就係楊千嬅x林一峰05拉闊音樂會既飛，我8:55開始打電話，打到10:20先打得通，好在.....不過計吓計吓，我平均1分鐘打10個電話，打左100分鐘，咪即係打左成1000個電話?!?!?! 勁呀!!好在最後都換到!!你唔使同我咁客氣架啦，我都有份睇架!!

下晝去左做gym，之後搵傻一，我今日送左安室新CD俾佢，好在佢估唔到係佢既CD，都總算有d驚喜呀...呵?

~~~哈哈~~~之後去左奧海城魚米之家食野...唉..唔得囉，我以後唔會再帶傻一去個度食野架啦，之後睇左「神奇4俠」，冇我預期咁好睇囉，個結局都好神奇咁咁簡單囉!!辛苦哂啦傻一!!之後去左食我呢期至愛既桑寄生蓮子雞蛋茶，係o個度同埋同你食先咁好食架咋!!

今日係一星期紀念，又意想不到既日子!!

今日ms.CHANCHAN終於回歸，本以為佢一早就會好緊張咁追問我d野做成點，但竟然佢成朝都冇搵過我....跟據探子阿姐回報，佢成朝都心花怒放，係上面bilibala..講佢d高興野...完全忘我囉，攪到我下畫反而要主動搵佢....好似煩住佢添!!

放工同阿姐食野吹水，之後去上日文堂，等我俾多d背景資料大家先，我點解學日文?1)因為係一個舊同事叫我一齊學，2)我都鍾意日文，3)之後有第二個舊同事一齊學，所以半年前一口應承佢地，3人行去學，半年後既今日，佢地兩個已經放棄，剩底我一個人學囉!!冇義氣，我要開始習慣一個人上堂..我唔可以放棄，!!因為我申請左持續進修基金，5個月後我可以攞番$3744...我就係朝住呢個目標進發!!!!加油!  好在係我上既堂好悶既時候，收到個好冧既SMS，真係好!

今日又有holiday mood,因為聽日我放假，好野!我係時候要plan吓下星期放假做d咩好喇!希望聽日會風平浪靜啦!!

今日番工都係一貫既平淡..不過聽日開始又要俾Ms. Chan Chan精神折磨啦...好期待下星期放假呀!!

今日晏晝出左去食lunch...去左東方小祇園食齋...本以為間舖頭咁出名，d野食一定掂啦...但係希望越大，失望越大囉...!!油到呀!!我唔會再想食第二次架啦!!

放工去左接傻一，佢今日interview，第一次見到佢咁formal囉，型呀!呢期我同船都幾有緣，我都係今日先知有o個條北角<->官塘線，d海風吹得我好舒服呀!!見到你今日精神奕奕..開開心心..真係好喇!!

原來只要共你活一天 - 張學友
我相信 和你的相識不會是偶遇　就像上天施與
造就兩心相遇　我說你是我公主!
時光每處 每夜每清早我也記住　望夜星的相遇
望日出多歡愉　送上我　永遠的關注!

原來只要共你活一天　凡塵裡一切可以別掛念
原來海角天際亦會變　原來生過死過深愛亦無變!
原來只要共你活一天　完全去把你所有都發現
原來只要相信便看見　原來給你真愛的我是無悔　是每一天!