今日一早起身...想打俾傻一，不過突然我阿媽又叫我..所以我冇意識地收咗線..原來傻一當時落大雨又擔緊傘，所以之後再打俾佢佢好忟呀...我都唔想架...唔好意思..見你咁忟我都冇哂心機...

之後番工，竟然今日8:15已經番到去.....太早喇...

今日都唔係好忙...不過成日落雨....天又陰......所以心情都幾受影響...我都係鍾意陽光普照既日子多d..

今日係7月14，我地office都發生咗件不可思議既事....佢地成日都話有怪事發生架喎...我聽完都有d唔舒服!!

唉...可能我太敏感...講電話時語氣重咗，對唔住....有冇事都好，我只係唔想見到你唔開心同煩惱...其實我好怕去估一個人諗緊咩...希望你真係冇野...點都好...我會Stand by you!

食完LUNCH真係好眼瞓....1:10一瞓就瞓到2:10要方哥叫醒我...佢重話食完飯瞓覺因住會肥.....我都想肥番少少...應該係多肉少少...

下晝依然好眼瞓.....睡眠缺乏症又發作...或者可能今日冇咩熱誠做野...之後christy, 熹先後落黎同我傾計....不過我都冇咩反應，因為太眼瞓...

放工就即刻番屋企....食完飯download歌聽...講咗一陣電話寫呢篇日記就瞓喇!!!

我的 彭羚
孩子般的笑容 誰都會被感動
就怕你太可親 別人都想間中來借用
旁觀者很眼紅 能跟你在抱擁
實在相當需要自信

明白有別人 在暗中煽動
儘管情感仍充滿著許多暗湧

你印在我唇邊的吻 誰都不可以帶走
你滲入我懷中的暖 誰可搶到手
世界就算淪陷了 這些都會是我的存在理由
滅絕我的玉身 鬆不開我手
你種在我眉梢的笑 誰都不可以抹走
你注入我人生的愛 誓死不放手
我有沒有留住你 這些都已是我的
沒法偷 完全是我獨有 誰也不可跟我鬥

今朝5點幾已經凍醒，之後瞓唔到，所以成日都好眼瞓...

由於老細同燈籠眼唔係度，超free，安心做野..不過其實都唔係好忙，我重執櫃添..

lunch真係好攰，食完飯一瞓底已經瞓著咗.....一瞓就瞓咗半粒鐘..

下晝又再一次證明燈籠眼唔係度既時候會多d人理我....甘大滋竟然叫我上去食雪條，平時一定唔會架..

放工同阿姐去咗食麥當當，之後去咗上日文..唉，日文考試我又敗比宿敵肥婆，淨咗1分...跟住我發現我有1.5分係大意失分.....唉..都冇計.....下次再俾d心機喇!今日日文好悶........真係好悶....我差d瞓著添!!不過今日又完咗一期喇!

今朝又好早醒咗，不過我典來典去點都要典到7:00先起身...由於早咗出門口，今朝8:25已經番到公司.....

朝早比較得閒，唔係太多野做，不過下晝就好多野煩...係煩..唔係多野做，XX醫院既老頂打電話同Ms. Chan開火，講關於LOGO大小既野....呢d就係辦公室政治，好多人都係關心自己個機構出唔出到名，野就唔做，重指指點點，到最後重想要自己個logo最大，都幾唔知醜架喎...叫佢comment d內容佢就只係交行貨，最關心既就係logo大同細，唉...乜做社福界唔係要好有熱誠架咩?唔覺囉.....好在佢係同Ms. Chan開火...當Ms. Chan同我講番件事佢不知幾火起呀.....之後我就有好多野跟喇...叫designer hold住個design，不過佢已經做咗，唯有又要厚顏地say sorry....又要問人攞過d logo，我既工作就係成日要做夾心人.....呢樣亦係我最憎做既野...!!!

放工去咗做gym，又係好多人，不過走既時候傻一竟然係門口等我...真係好意外架...佢明明話7:00食飯...好開心，之後我送佢去食飯，短短的一段路，但真係好開心..我唔係好識用其他字眼喇....

之後番屋企，係咁聽梁詠琪既「給最開心的人」，我好鍾意個旋律，嗯....我重突然好興起改咗呢首歌既歌詞，係呀...送呢首歌俾你......第一次填詞.....當然填得唔好架喇..不過希望你都會鍾意喇!!

給最關心的人

每當傷心之時　你身邊的是我聲音
見我悲哀之時　你亦像太陽為我暖心
記得每天　你都有心
縱使你肩膊背負沉重
亦要堅持時常為我　從沒怨人

每當開心之時　我最想共你分享
見你歡喜之時　我亦像小孩為你拍掌
對於傻一　我很有心
永不會終結永沒埋怨
為了使傻人幸福　時常覺窩心

＊感激你　我身邊的人
　陪伴著我亦時常著緊
　用你細心　粉飾我生命
　告別失望重獲信心

　身邊我　來為你認真
　讓你再不孤單再不苦困
　令你每天　開心的責任
　交給這傻人為你　每日操心＊

讓你每天　安心放心吧　我都會盡力
你可盡情在我肩膊安枕　幸福傻人

都唔知咩事....唔知係咪d麥米糖水作怪，我竟然尋晚寫完日記之後無耐就反胃.....重嘔添.....嘩.好耐未試過...

尋晚又瞓得好差...個冷氣明明好凍，但唔知點解，我瞓個位好熱.......竟然熱醒咗，重成身汗....好邪..!!

今朝6點又彈醒咗，熱到我要沖涼!!早餐又食咗個好難食，掟過對面海都唔爛既鬆餅!!

番工都冇咩特別，Ms. Chan又要準備過台灣，唔我閒理我...不過今日都有d野睇，就係我個度請accounting assistant,有幾個人黎見工，好好奇，不斷估吓邊個會成為新同事，都幾有趣．．

不過今日都幾禍不單行，又再次肚痛，都唔知食錯d咩..痾咗4次，攪到我要食「喇喇牌」正露丸，好難食，不過食完好似真係好咗好多!...

放工就去咗石水渠街睇吓d牙醫收費貴唔貴，因為我想洗牙!!d價錢好似都ok...可以考慮考慮..

番屋企食完飯就做日文功課同溫書...幾乖....之後就上網同懷緬過去..

睇番d ICQhistory同睇番d前文後理，原來傻一第一次同我面對面講野係係4月29日cwb physical，第一次出街係5月7日去睇戲同食飯...真係要記住先!

P.S. 今日係關淑怡既生日，係度祝佢事事順利，做到自己鍾意既音樂，同遠離是非喇!!

今朝6點幾就比屋企既電話嘈醒咗，之後就瞓吓醒吓，9點俾我阿媽鏟醒，原來個電話係我三家姐打黎，佢地今日走黎探我地......

之後去咗飲茶，之後去咗apm行咗一陣，買咗兩件半價衫，之後行過書局竟然發現林一峰本書，立即買俾傻一...yeah....揾到喇!!!

之後就番屋企，好悶呀......又嘈..又冇地方瞓......唉..好在後尾我都有地方瞓.....不過都係瞓咗4個字就俾人嘈醒咗喇!!!!!

跟住就成家出去食飯.....好飽....食咗兩碗麥米糖水....第一次食.....好鬼飽呀!!番屋企之前睇吓有冇另一本書「確認」...搵唔到.......聽日再去其他地方睇吓先!!

今日好平淡......又冇咩時間做自己想做既野......唉.......突然好想去沙灘浸水!

今日要番工，要做workshop，不過都幾順利，冇咩大問題.....而且得我同Ms. Yung拍，所以基本上係冇咩壓力!!

LUNCH同阿姐去咗食日本拉麵，嘩........難食到呀.......d湯底好似出前一丁豬骨湯，d湯又唔夠熱...完全唔得..唔會再去第二次囉。

之後去咗太古曬燈，不過好似d效果冇初初咁好喇!!!!!!!點算!!我想黑d呀!!

跟住去接傻一放工，一齊去「美食博覽」，傻一好好，見我攰，重幫我拎咗一陣袋!!不過今年「美食博覽」真係好似冇咩特別，我都冇以前買咁多野!!太多人喇.....迫到傻一傻咗!!.

之後去咗越棧食野......呢度既野食我覺得好正架......希望你都鍾意!!

跟住我地搭電車去皇室堡睇「朱古力獎門人」，呢套戲比我預期好睇咗好多，佢好有教育意義，岩大人同細路哥睇，而呢套戲都好正面，要大人同細路都要反思既電影，主要叫細路唔好太為食，貪心，唔好不可一世，唔好野蠻任性，唔好沉迷打機，亦借呢4個壞既細路諷刺依家d細路越來越冇童真，個個成個老人精咁，相比主角Charlie，Charlie就係一個典型乖乖，重感情，有骨氣既細路喇!其實個4個細路之所以變成咁，全部都係大人縱成，正所謂「有其父必有其子」，所以其實最要反思既都係d大人!!其實呢套戲亦帶出另一個主題，就係家人既重要性，冇咗家人，做咩都冇意思，做唔到好既成績出黎!而我覺得最搞笑就係個d小矮人，每當一個細路被教訓既時候，佢地就會出黎跳舞唱歌，得呀!!我好想download個d歌聽!!我睇完之後有一種好開心既感覺，好耐都未試過睇完戲有呢種感覺喇!

唔知你醒唔醒起我同你睇既第一套戲都係o係皇室堡睇既呢?

睇完戲之後落大雨，我又「冇帶遮」喎，好在傻一遮埋我咋，之後就搭巴士送傻一番屋企喇!

今朝一番工就向Ms. Chan匯報我已經成功搵咗Jenny幫手做analysis，再同佢講埋roving exhibition既事...佢相當滿意，重讚我:Good job.....其實著緊小小佢已經覺得我好......

Lunch食完飯傾咗一陣電話之後出咗去買鮮榨橙汁飲...好正呀.....佢用咗兩個半橙榨架....都唔錯呀!!!

下晝既上半part好得閒...得閒到我要同阿姐對聽日既食物份量....到下半part又要做影印..釘裝既工序...!!

放工就番屋企喇.......食完飯上咗一陣網同聽歌，呢期可能因為關淑怡有首新合唱歌，我又開始番煲佢既歌，尋晚聽咗「冬戀」大碟，今晚就聽「難得有情人」大碟..諗番好多10幾年前既野.......「難得有情人」係我第一盒買既cassette，都係我第一隻買既CD，而Shirley都係我由1989到依家都係最欣賞既歌手，我o個時真係一個super fans，成日都留意住佢既消息同留意佢既歌係流行榜既走勢...呢d可能就係中學生必經既階段喇!不過其實我依家都繼續成日留意佢既消息囉.....

之後同傻一傾咗一陣電話就瞓喇!!今日我好似精神番好多...YEAH!!好野.....聽日有得去「美食博覽」，食食食!!!

今日番工好忙，番去冇耐已經要brief今個星期六個workshop既野俾Ms. Yung，甘大滋同哥利亞知.....甘大滋竟然同我講唔該...世界變喇!!

LUNCH走咗去飲涼茶，因為我覺得好熱氣同開始喉嚨痛.....

下晝等咗Ms. Chan既決定好耐，之後又忙到PK，忙既都係workshop既野....呢期日日都掂好多紙，周手都界到損哂.............工傷!! 另外我可能不經不覺咁學咗MS. CHANd衰野.就係打蛇隨棍上.......話說我今日同Jenny傾份問卷，我竟然講講吓叫佢不如到時幫手做Analysis.....佢又一口應承咗........死喇.......變質......我以前一定唔咁面皮咁厚架...

放工去咗join傻一做gym，不過唔知點解好攰...冇咩力咁..傻一重話我隻眼好紅....我都覺得我今日口腫面腫..死喇..我可能真係就黎病!!唔得架!!

做完gym番到屋企重肚痛添.....唔知係咪食左阿姐既「老番」野食...........!!!!!!!!

好似開始百病纏身添......!!!!!!!!!!

尋晚發咗個好真既夢，我夢到我張被上面有隻曱甴，我立刻用手張張被蓋住佢再大力拍咗一吓...之後醒咗，但o個一下我真係唔知係發緊夢定還是係真..我重立即跳落床唔知點處置隻「曱甴」，但我定一定神之後，我估應該發緊夢，之後就瞓番喇.....呢個夢都係岩岩寫日記先記番起.....唔知有冇人可以幫我解夢呢?

今朝第一次試搭101番工，因為可以溫書呀....不過竟然又撞到JOAN，重要座我隔離，唔知講咩好，都幾尷尬，唯有繼續溫書喇....

番工都冇咩特別，都好忙...個MS. CHAN真係唔得，之前又巴巴閉閉又話個workshop要做research, 要寫報告，之後又要present，我同jenny諗咗d問卷問題，佢竟然係今日走番轉頭，又話會唔會太多..又話可唔可以簡單d淨係答有同冇...大姐....如果問咗=冇問既就不如唔好攪咁多野喇....又要威自己又唔識野...唉...

下晝公司係mandarin買咗一d蛋糕，我食咗件cheese cake，真係好正!!!!!!!!!!!!!!!!!!!

放工竟然意外地可以見到傻一，我陪佢去尖咀見工，短短15分鐘左右，但都好開心喇!

之後就去考日文試，都唔錯，基本上我係識答唒，應該可以攞95分以上.....YEAH!!溫書都冇咩白費!!

今晚download咗林一峰既「給最開心的人」聽，唔知點解我一聽呢首歌就好鍾意，聽完好似好有feel咁!!!

今日有一個驚喜，就係知道關淑怡有新歌!?!??!?!就係同alan合唱既「舊情復熾」，雖然唔係佢既solo，不過對於我呢d super fans黎講已經係望梅止渴喇!!!!!!!期待佢既全面復出!!

今日又開始番工，一早番去就作日文文章，因為考試要交，好在尋日諗好咗，15分鐘我已經KO佢...

做野方面成日都好忙，不過又唔係好大壓力，因為老細今日都冇迫我，一早番去個designer又冇交貨俾我，咁我當然又要死追喇......我已經開始練到面皮越來越厚喇...結果又俾我追到，好在係o係Ms. Chan問我之前追到...還得神落!!

LUNCH時間又溫咗一陣書.....

下晝Ms. Chan，我，燈籠眼，甘大滋同哥利亞去睇場，我都唔知我點解要去，成程我都唔使出聲，當知道多d野喇..

放工即刻番屋企喇.食飯有我好鍾意既炆牛腩....我諗我食咗10幾件......死囉.....好毒好燥.....其實我都係一個垃圾桶，咩都話好食，又為食....不過呢兩日好似有d食滯咗，成日都有好飽既感覺....

食完飯立即走去download shirley既歌，不過...唔....首歌好老土吓..可能要就番alan既style...不過好過冇喇!!

之後溫日文，不過我已經到咗一個唔想再溫既地步喇....

好野.....聽日傻一又有得interview，希望佢會成功喇，努力呀!!P.S.你真係唔好再摔眼喇!!乖喇!