頭三堂的UE 堂係測驗，又測Section B，又測Section E…開頭作文都好有心機，不過好多字都唔識，表達唔到，只好查字典。可惜的係字典無文法，我個篇同中交直譯無咩分別！測完就黎Section E，一收到就覺得好難喇，仲要係廿五分鐘內做晒成Part，頭個十分鐘睇極都唔識，之後睇後面，做左先…都係是但做，係咁抄係咁抄，之後返前面再抄，不過都係搵得好少，同埋係是但抄D野算…直至落堂！

小息時以為唔會收到中化短講張野，點知都有我份，仲要係去到最尾添。之後個小息都無玩，坐底慢慢諗點講，係度係咁寫。到左Chem 堂我都係繼續諗點講，係Chem 堂派左測驗卷，成績算唔錯！不過因為我要諗中化短講D 野，所以都冇睇返自己錯咩…之後Chem 講返上次的Notes，我都冇聽，我一味係度諗點講，連答問題都唔係好識。直至完堂，我都冇聽過書，時間愈黎愈緊迫，時間無多，我又知自己冇咩貸，同埋到時臨場可能驚到講錯，所以成份犒寫一次，寫完都覺得自己唔用用得晒D 時間…不過無法，貨只係得咁多！

去到中化堂，因為今次短講晒成班的人，所以我之前都有好多人講，而我就係中間！到左我講，少少怯場。自己盡量講時刻意望住Miss，因為一無膽望，就會成個短講好似讀書咁…一望又令到自己有點驚，不過我覺得自己比之前的自己好左，我指好左的是眼神，至起碼有少少時間會望下出面…但都會講錯野！-_-算喇，我覺得自己已經好好，平中六大膽左D…好事黎！而講的內容同埋技術就真係無咩喇…仲有點悶。唔知評語係點呢？

之後就Lunch，同阿Bee 踢左陣波就走去教員室比野Bio Miss…之後走左去新寶同佢地一齊食，好耐未試過出街食了！食完就返學校，上返三樓撞到阿昌同埋Maggie，佢地叫我幫手，我都唔知幫咩手，但我反正都係得閒算喇！去左課室度做野，只係設計Logo…我根本就無咩美術天份，都係隨口Up…無耐阿昌就走去做小組討論，我同Maggie 諗…但係一陣後就比阿Sir 趕…落返地下，就交返D 野比阿昌！

走左去睇凌進打乒乓波，佢仲叫我打，不過唔想打，只係想睇…睇左好多場。佢打得真係幾勁…有機會同佢打一定會進步不少，左手o既對手真係好少，同佢打會運用得好好…對上次打都係贏少少！真係同佢認真打我諗我都會輸…睇左十幾分鐘就無睇了！咁岩見到阿良，同佢講左補習時間地點…之後見得閒。陪左佢一陣，去到15:55先肯走！本黎要四點到千色，不過我同阿良去到，阿Sir 先黎…之後去左阿Sir 屋企…

佢屋企比我想像細，不過佢間屋係方便之前女友返工o既…去到我地幾個周圍參觀，就好似去左睇樓咁，攪下Lei 樣攪下個樣…阿Sir 仲話鍾意咩就拎，佢屋企都幾多公仔…之後四點幾先開始補習，但係補補下我地又參觀，哈…真係好好笑！個阿Sir 都冇我地符…但係過多陣就真係開始了，今堂佢教左能學的計算方法，學左佢個方法又真係幾正…覺得都唔係好難姐！之後落去一味係度做題目，開頭個D 好易，好快就做到…之後開始要做多返D o既時間，有時仲要問阿良點做添！今日都係做左五六題度…因為阿良同埋牛丸要補習，所以就好早就走了…本黎個阿Sir 話可以去到六點幾…但係算喇，再落去都係計數姐！而家識左，真係好開心…個心好想係咁做落去，走個時有點唔捨得添，真係好想繼續做…

個阿Sir 話之後都會幫我地咁補，佢有好多野仲未教，佢仲話可以約埋一齊上黎佢度溫書，我同阿良同埋阿Bee 諗過又真係幾好喎，去個度溫書又Free，可以聽下歌仔，又無人會嘈住我地，又唔駛驚無位，唔識又可以問，又有人會督促住…真係幾好！有時放學後真係可以諗諗去佢度溫…走個時去左陪阿Bee 拎Cake。之後就西鐵回家了…