今日過咗一個非常充實嘅星期六。。。
今朝5點就起身過田灣化妝，呢個客對我嚟講，係好特別嘅一個客，因為佢三姊弟結婚，分別都係揾我做化妝師，所以感覺特別大！
今朝化到830就搞掂上半場，其實我化新娘化妝都一個特別嘅習慣，我唔鍾意接跟全日嘅化妝，因為我每逢化完朝早個妝後，我通常連早餐都唔食，然後會返屋企瞓一陣，跟住夜晚先再出去。。。不過今日有少少唔同，我返到嚟放低啲嘢之後，就落大快活買定早餐等低能仔，其實嗰一刻我已經攰到不得了，但我依然好想同佢食個早餐先。。。食完返去，我已經頂唔順瞓著咗！
今晚臨去酒樓化妝前，我去咗揾靚仔醫生，除咗左耳未好外，就連左邊面都痛到食唔到嘢。。。佢話上呼吸道感染，啲菌走咗去耳、鼻、喉，所以一直燒同痛。。。原本要打針，但我怕影響今晚嘅狀態，所以唯有撐落去！
今日雖然好攰，但我覺得同響 fresh mart嗰種攰好唔同，響鋪頭無論我做成點、Boss 佢哋會認同我，甚至讚我都好，我都冇好似今晚咁開心！今晚每化一個妝、set一個頭，見到佢哋嗰種滿意同認同，甚至啲親戚走嚟同我講化得好靚、set得好好，不停咁同我講多謝，我終於明白，呢種成功感我係響 FM又或者 LUNA都係得唔。。。我知道我以後嘅路應該點行喇！
今晚化完妝後，就同低能仔去食嘢，但我眼瞓到癲，個傻佬見我咁攰，就幫我拎嘢。。。我知佢都好攰，加上我啲化妝、set頭用品，其實真係好多又好重！佢一句怨言都冇，一直幫我到返屋企。。。見佢咁攰，我就幫佢鍊咗一陣先走，低能仔，我就算有幾攰都冇所謂，只要你舒服就得喇！因為你已經為我做咗好多好多了！
分類: 我們的生活點滴 |
