呢兩日都冇乜胃口食野，我諗呢兩日嘅食量，都冇平時一日嘅份量呀！今日成日個胃都痛得好緊要……明明好肚餓，但都唔想食！

今日5點幾返左屋企拎埋野之後，就落街等埋家姐一齊返阿麻到，因為胃痛嘅關係，所以家姐幫我入7仔買左包奶！而我就響門口同二伯爺傾計……當家姐入左去嘅時候，低能仔突然走左出門口，我知佢係揾緊我！嗰一刻我真係好愕然，或者因為我冇見過佢咁，除左愕然，仲 feel 到好sweet(^3^)

搞掂晒啲野之後，我就返左屋企，食完藥就瞓著左！瞓到咁上下，佢打俾我……佢話佢返緊黎！但我唔夠膽同佢講我個胃唔舒服-_-///

今晚見到佢嘅時候，我問佢去左邊時，佢好似唔多願意答佢去左邊，只係話佢今日陣係返工！我嘅直覺話俾我知，佢今晚應該去左揾“她”！

我知道自己俾“她”更幸福，因為我可以成日都見到佢，但唔知點解我都會唔開心！我亦明白有啲野我係必需要面對，兼且亦要有心理準備。 其實依家佢每逢收到“她”whatsapp，又或者有關“她”嘅一切，佢都唔會再響我面前提起，我知道佢咁做係唔想我唔開心，相比起以前，依家嘅佢的確顧及我感受多好多！但其實我依然覺得唔開心……

或者要愛呢個人，你首要條件就係接受佢嘅一切！

今日成日都響屋企瞓，因為呢排一到半夜都係咁咳，根本冇得瞓……好辛苦！！

今朝瞓到咁上下，收到佢whatsapp，即時成個醒晒(^3^)隔左一陣我再瞓返，點知今次電話響，好開心……因為係佢打俾我！我好鍾意收到佢嘅電話同whatsapp, 每次收到嘅時候，我都會響到傻笑！

唔知係咪因為以前佢每晚whatsapp 同打俾我都會講好耐，依家佢媽咪返左，我地傾嘅時間少左嘅關係，所以每次佢揾我，我都會好開心，好珍惜！加上我知道我呢一刻嘅幸福，並唔係理所當然，所以我要更加珍惜我呢一刻所擁有嘅野！

今日我地冇見過面，“其實唔算冇見過，我落街經過7仔時，見到佢背影-_-///”好掛住佢！！佢收工嘅時候打俾我，我地約左聽晚見！原本聽晚我約左 Kinki去街，但我諗都冇諗就推左，咁多年以黎，我冇試過為左另一個而推佢，除左真係有job又或者有啲咩緊要事，否則都唔會咁做！估唔到低能仔可以改變我咁多！

因為佢我會嘗試戒煙，雖然未成功，但真係食少好多，依家可以幾日先食半支……究竟幾時先可以完全唔食呢？我好想為佢做啲野，我真係好想！！！
 

今日佢休息，晏晝我同媽咪食完野，我就去左銅鑼灣拎野，然後就join佢！

今日陪佢食完野後，我地響銅鑼灣行左一陣，佢就話搭車去西環探佢爸爸，我冇估過佢會帶我去睇佢爸爸，嗰一刻我真係好愕然同感動，雖然到最後都見唔到佢爸爸，因為佢爸爸入左醫院！但我依然覺得好 Sweet....

跟住我地再響付近食飯，今晚係我地第一次一齊食飯，種感覺好 warm，而且呢餐飯特別好食！或者呢餐飯之所以咁好食，係因為佢今晚嘅一句說話……

“女朋友”

一直以黎我都唔知我地嘅關係到底係乜，縱使佢會拖住我、攬住我甚至陪住我都好，我都唔夠膽諗到底我係佢邊個！我好怕我越諗得多，就越會失望！我好怕我越諗得多，就越容易失去佢！佢對我真係好重要……比我自己更加重要！

同佢過左平淡嘅一日，呢種日子我未試過！原來平淡嘅日子係咁開心，原來同自己鍾意嘅人響條街行，又或者坐樓梯口都一樣咁幸福！

今晚佢問我有冇諗過自己會幾時結婚？我答佢我冇諗過……其實我好想答佢，“我希望同佢一生一世！”但我知道根本冇可能！

因為我嘅希望，永遠只會係奢望！

好唔容易先儲番啲我同佢嘅日記，但因為又換電話，所以啲野又全部冇晒……

其實一直以黎我都知佢部電話有問題，只係我唔知可以點換俾佢！諗左好耐，我決定將我部sony 俾佢，而我就換部s4！我知道如果買部全新俾佢，佢實唔會要！今晚見到佢嘅時候，我問佢拎左$20然後將部電話俾左佢，個低能仔起初死都唔肯要，但到最後都屈服左，哈哈！

其實我真係冇試過送咁貴嘅野俾人，但對住佢我好想將最好嘅野都俾佢，我唔係要用物質留住呢個人，而係心甘情願為佢咁做！一直以黎，我都覺得只要佢開心，我就覺得值得！曾經我以為冇人可以代替肥僑，但原來唔係架！雖然肥僑對我好好，我同佢分開嘅時候，我完全唔夠膽行返我地去過嘅地方，我更響嗰段時間晚晚都飲醉！我以為我冇能力再去愛人，點知到左今日我竟然會……我唔知我同佢仲有幾耐，我只知道響我仲擁有佢嘅時候，我一定要對佢好好，將最好嘅都俾佢！