今日係一個我永遠唔會忘記嘅日子，我唔想寫其他嘢，只係好想好想寫一啲關於佢嘅嘢……
眨吓眼今日已經係妳離開咗我嘅第5年喇！雖然呢5年裡，婆婆都因為我健康問題，唔俾我探妳！但5年前嘅今日，我仍歷歷在目。每次一諗起，我個心都會好痛好痛！唔知妳響另一個世界生活得如何呢？有冇掛住我呢？我好想話妳知，我好掛住妳，我好想見妳，我好想好想再聽到妳把聲，我真係好想好想……
響我生命裡我一直都覺得自己有兩個媽咪! 一個當然係我親生媽咪啦! 而另一個就係妳, 因為我係妳由我兩個月開始帶大的! 我相信我鍾意痴住妳嘅程度, 絕對唔會比鍾意痴住媽咪嘅程度小! 我一直都覺得妳係全世界最靚嘅女人, 除左妳個樣靚之外, 妳嘅心地、對人嘅態度、包容與及愛, 都令妳變得更靚!
我好記得響殯儀館裡, 送比妳啲花牌多到擺唔晒, 響花牌當中有四個字係令我記憶好深刻的, 就係「風韻猶存」呢四個字! 唔知點解我覺用呢四個字形容妳形容得好貼切, 而且仲令我睇到呢四個字即時多咗一份哀傷，因為當日當我睇到嘅時候, 我嘅眼淚流得更多, 更有一種崩潰嘅感覺!
我記得當年，醫生證實咗我淋巴線生咗個瘤，出入醫院、食藥已經係家常便飯！只可惜多次手術、藥物都唔可以令我好返！我開始放棄……我冇再覆診、食藥，兼且我仲成日都唔返屋企，每晚唔係唱K就煲煙飲酒！我唔想返屋企面對屋企人，我唔想再醫呢個病！呢段日子係我同屋企人關係最差嘅時候，見到面就只係嘈！
我曾經以為冇人明白我，點知就響呢個時候，我就收到妳嘅電話！起初我以為妳同爸爸、媽咪一樣會鬧我，點知妳唔單止冇，而且仲知我個心所諗嘅一切！妳知道我已經想放棄，妳知道我覺得冇人明白我，呢啲妳一一都知！但妳又知唔知，係妳令我有番想繼續生存嘅希望！假如沒有妳，還會有今日嘅我咩？
係妳令我明白到每個人一生都會遇到高潮 & 低潮! 遇到高潮嘅時候, 我地要學識珍惜! 而遇到低潮嘅時候, 我地要學識感恩, 因為低潮可以令我地每一個人成長, 甚至變得更成熟! 響我人生最低潮嘅時候, 係妳陪我一齊捱過的!
好多野我都以為係理所當然的, 我理所當然的以為妳會睇住我手術成功、結婚、生BB, 我理所當然的以為我可以一直陪住妳到老! 但原來唔係嫁, 當我地以為係理所當然的事, 往往都會響我地唔為意時溜走.........
三姨媽，妳知嘛！呢段日子我都好努力咁生存落去，終於我上年十一月做嘅手術成功咗喇！雖然我身體仍未算健康，但醫生話只要我繼續乖乖哋定時食藥、抽血同打針，我就會好快變番健健康康……
曾經得你寵我 竟縱壞我
連哀傷都不可忍受太多
明白孤單一個 都要自強
苦楚試練 無論如何多
都不算多
（得到一些 領悟未怕多）
離開都要考我 怎麼去做我
誰都知分開 比相處更多
（遲早都會枯竭 誰都清楚）
明白戲夢人生苦短
也可得到最大 結果
何必這麼 教我
好靚嘅夜景 
