尋晚成晚都冇瞓過，今朝十一點幾就俾個電話嘈醒咗~T_T~婆婆打嚟要我去陪佢飲茶！
臨出去嘅時候，我原本想同低能仔講我出咗去，但最後都冇！我好怕佢以為我約咗“那些年”，我好怕又引起不必要嘅誤會！因為呢啲不必要嘅誤會已經令到我哋大家都好攰，好唔開心喇！我只係想同佢簡簡單單咁生活落去>3<點知出到香港仔我就收到佢whatsapp，望住個 msg 我呆咗呀！因為佢打咗6個字俾我，呢6個字令我開心到呆咗！“低能仔，多謝你呀！”
而我亦同佢講我出咗去，不過我就冇講明同邊個出去，因為我真係想知佢諗咩！結果我冇估錯，佢真係以為我同那些年出咗去-_-#雖然我唔知呢啲係咪叫做緊張，但我竟然覺得開心！我真係好開心好開心好開心……
夜晚食完飯返咗去睇阿麻，之後就帶咗阿妹去買嘢食，當然係去咗嗰到買啦！其實同佢識咗咁耐，每一次我入去買嘢都仲係心跳得好快，特別係見到佢嗰一刻-_-///嗰種感覺同平時見佢又或者係同佢去街時好唔同，好似特別緊張咁！唔知係咪因為我始終係響嗰到識佢，所以先有呢種感覺呢？？
原本今晚我好想等佢收工架！但我唔想佢會覺得煩，所以就…… 點知差唔多十一點佢whatsapp我，問我係咪響屋企？嗰一刻我幾想自己響條街到呀~T_T~只可惜時間冇得返轉頭！其實到咗今日，我依然好想日日都可以見到佢！
今晚我收到一份禮物，係一個寫住“快樂”嘅金吊咀！可能呢份禮物對於好多人嚟講都會覺得“娘”，但我就覺得好窩心，因為係一個對我好重要嘅人送俾我，佢同低能仔一樣，比起我自己佢更重要，佢係我最愛最愛嘅人，呢個就係我阿麻！我知道佢真係好想我“快樂”，好錫我！
其實阿麻一直都係一個重男輕女嘅人，由細到大佢都唔錫我、唔鍾意我架！佢成日都覺得男孫先有用，所以佢一直都好重視我啲堂哥，堂細佬！直到我剛出嚟做嘢嘅時候，呢個命運就開始改寫！
嗰段日子阿麻突然得到肺病，住醫院多過返屋企，就算出咗院都一定要日日定時定候返醫院食藥！嗰段日子我每日返工前都會去睇佢，收工後又會買埋宵夜上去陪佢！直到佢出咗院後，我每朝都依舊同佢搭的士去醫院食藥、覆診！呢種生活足足維持咗2年，而我同阿麻嘅關係亦因為咁開始唔同咗！
起初我好怕佢好返之後，我地嘅關係會打回原形，但阿麻越嚟越緊張我，好多嘢都會依賴我！直到發現我生咗個瘤之後，睇到阿麻喊得好緊要，每日都為我四圍去拜神，煲湯俾我飲，我真係好感動！我知道我地嘅關係真係得來不易，我好珍惜我擁有嘅嘢，所以咁耐以嚟，我都會堅持成日陪佢、照顧佢，只要佢鍾意嘅，響我能力範圍內，我一定會俾佢，因為我好愛好愛佢！
阿麻，我知道你真係好錫我，而我亦都係一樣！你送俾我嘅禮物，同我上次送俾你隻介子嘅意思一樣，都係要你“快樂”！所以你要乖乖哋，一定要健健康康，我仲要同你過以後嘅每一日！
待我好不會保留
不休假暖夏到深秋
飛走的歲月心酸牽掛感受
閱覽自你這一對手
未改變一臉溫柔
感激你我願說出口
溫馨的鏡頭笑面神情都像透
多相親更有時像摯友
陪我去走自昨日蕩韆鞦
到那積雪漸厚到我有點成就
全也是你兩手無聲卻在背後
能贏盡多少豐收
遍踏地球難及在你身邊更富有
是昨天相裏飄浮
花園裏笑著砌沙丘
當思憶倒流
縱是平庸得像我
小小天使你懷內佔有
陪我去走自昨日蕩韆鞦
到那積雪漸厚到
我有點成就 全也是你兩手
無聲卻在背後 能贏盡多少豐收
遍踏地球難及這份愛直到永久
從前伴著蕩韆鞦
到那積雪漸厚
到我有點成就 全也是你雙手
默默在我身後 能贏盡多少豐收
遍踏地球難及在你身邊更富有
