低能仔， 唔經唔覺已經嚟到8月喇！諗番我地剛剛識嘅時候，就好似尋日發生咁，呢段日子我真係好開心！仲記唔記得2013520呢個日子呀？我呢一世都唔會忘記響嗰日有人第一次錫我，其實響嗰日之前，我已經鍾意咗你！

你又記唔記得你第一次主動攬住我係響邊呀？係響我屋企樓下個男廁門口！嗰一刻我真係呆咗，你嗰晚攬得我好實好實，仲同我講你好掛住我！我冇諗過你會咁，我冇諗過自己會咁幸福，呢一切咁美好嘅回憶，全部都係你俾我，我會珍而重之咁收埋響個心到！

能夠擁有你，係我人生最大嘅bonus，縱使我地相處嘅日子只係得兩個幾月，我都已經好感恩！呢段日子我地有開心、唔開心、歡笑與及眼淚，好似所有喜、怒、哀、樂，都響呢兩個多月全部感受晒咁！其實我唔鍾意見到你喊架！因為每一次見到你流眼淚我個心都會好痛，兼且好嬲自己點解要響你生命中出現，如果我冇出現，你就唔會咁唔開心，我帶左好多眼淚俾你，我情願你嘅眼淚全部留番俾我，我幫你流，都唔願意見你再流一滴眼淚！因為我真係好愛好愛你！你要記住，千其唔好再咁易流眼淚喇！你喊個樣真係唔靚仔，我鍾意見到你笑住咁chok，同埋響7仔好認真咁做嘢嗰個樣，因為呢兩個樣係最charming (^3^)

其實我知你為我付出左好多，好多一直你唔願意做嘅，你都為我一一去改、去做！好似啲人要執屋啦！但唔知點解啲人執屋，竟然要捉埋我上去睇住佢執囉-_-///又要話如果妳唔嚟我就唔執%>_<%

仲有揾工，響電話陪住你揾工真係好開心，乜嘢工都會俾你笑一餐！你知唔知呀，雖然響電話陪住 你揾工時係好眼瞓，但我仍然覺得好sweet架！

之後就到速成！呢樣係我最感動最感動嘅一樣嘢！亦係你第一次同我講“我愛妳”嘅時候！從來冇人試過為咗我而去學一樣嘢，你係第一個，所以我真係好感動！亦因為咁，我會為咗你而去戒煙！其實我係嗰啲唔會為任何人改變自己嘅人，但對住你我真係冇晒辨法……不過今晚我食多左煙呀！對唔住……

最後就係photoshop，其實我真係一個攝影白痴！但唔知點解見到你影嗰啲相，我會有一種好特別嘅感覺！呢種感覺我未試過，我唔知點講俾你知，我只可以講嗰種感覺好舒服！我知道你響攝影呢行一定會青出於藍架！所以你一定要好好學識photoshop，知嘛？！仲有呀，你黎緊讀嘅創意媒體都要俾心機，其實你一開始話要讀工商管理，我真係唔鍾意架！我一直想你讀創意媒體，因為我知道你嘅長處除咗唱歌之外，就係呢樣！我希望你可以選擇你有興趣嘅嘢去讀！因為咁樣對你會係最好，我希望你將來嘅路行得舒服，行得開心，最重要嘅係行得有價值，所以你務必要俾心機去讀，知嘛？！

講兩個秘密你知吖！你仲記唔記得我地剛相識時，我曾經叫你送一首歌俾我呀？其實當時我係希望你會成日諗起我，同埋當時我好想知我對你嚟講係一首咩歌！但啲人嗰時好蠢仲好敷衍我囉！如果依家要你認真咁諗一首關於我嘅歌，唔知又係咩呢？而我就會送首“祝君好”俾你！

另一個秘密就係曲奇喇！當日嘅情景我仲記得好清楚！曲奇係專登為你而學，就連個盒我都揀左好耐，仲有我地嘅第一封信，我都寫咗好多封先寫成！原本你應該早一日收到啲曲奇，但因為你放假見你唔到，我以為係天意嚟架，我以為連個天都唔想我送俾你！點知第二日我整蝴蝶酥都成功埋，就放埋落個盒到俾你！原來個天係想我整埋蝴蝶酥先俾你，因為一直我最想送俾你嘅唔係曲奇而係蝴蝶酥，你知唔知點解呀？係因為蝴蝶酥整左出黎個樣似一個心形，所以我好想送俾你，係咪好低能呀？

呢幾日我地好似發生左太多嘢，帶咗好多眼淚俾大家！我未試過個人咁亂、咁驚！或者因為我知道，我同你相處嘅日子只係得好短時間，仲要唔知應唔應該用男朋友黎形容你，邊一日叫做紀念日都唔知！但佢同你已經有半年，加上佢對你有幾重要我好清楚！我亦知道我同你之間最終嘅結局會係點，到最後我都會係離開嗰個！我冇資格去羡慕、冇資格去挽留，就連我希望可以同你一生一世都冇資格，我只不過係 nothing！我唔知我可以做啲咩，我唔知我點樣先可以令到佢同你都開心，我諗唯一嘅方法就係我離開，只有咁對你先係最好！多謝你俾咗咁多回憶我！

我從來都冇後悔過認識你、愛上你，一切都只因為“時不與我”！

你應承我你一定要繼續幸福，繼續俾心機讀書同影相，知道嘛？

低能仔，我真係好愛好愛你！但你可唔可以還番我個心俾我呀？

今朝十點就醒咗喇！隔咗一陣就收到佢whatsapp，因為我地約左今朝食早餐！

或者因為尋日嘅事我仲未消化得切，今朝見到佢嘅時候，我依然都係唔想講野！我諗佢應該 feel到，因為佢問我係咪真係冇事？！我當然冇講真話俾佢知，我繼續扮到若無其事咁響到笑！

食完之後，我返左屋企換好衫就同媽咪落左香港仔！唔知點解，我覺得自己今日好似一條死屍咁！媽咪同我講嘢，我都好似俾唔到反應佢，個腦只係不停諗住呢幾日嘅嘢！ 其實唔止同媽咪出去嗰陣係咁，就連今日個job都係咁！

我從來都冇試過集中唔到精神做嘢，今日我竟然…… 一路做嘢，我一路諗起佢！我完全唔知自己做緊啲乜，雖然化妝、set 頭就算做錯咗少少嘢，都唔會好明顯，個客亦未必會知！但我真係冇諗過自己竟然會咁……

或者因為聽完“傷了三個心”，“歲月如歌”之後，我感受得到“她”對佢有幾重要，感受得到佢有幾愛“她”！而我呢？我只是佢地之間多咗出黎嗰個！ 夜晚同佢whatsapp，我同佢講“假如有一日佢真係叫你唔好再揾我，你一定要同我講，我會選擇離開”呢段說話真係我心底嗰句，我唔想佢唔開心，我唔想佢選擇，我寧願受傷害嘅只有我一個，我唔想佢地唔開心，特別係嗰個女仔！加上我好清楚知道自己個位置響邊，幸福根本唔會響我身邊出現，永遠都唔會……

今日下晝嘅時候，佢揾過我！只係send左句miss u 之後，就再冇揾過我喇！星期六嗰晚，佢同我講佢想我今日陪佢去動漫節，但之後佢都再冇提起過！我知道佢一定約咗“她”！只要“她”肯出黎陪佢，佢就會將我忘記得一乾二淨

其實我地約咗今晚見面，到咗夜晚8點幾，佢打左個電話俾我！佢第一句就講 Sorry，然後好緊張咁問我今日有冇出過去？聽到嗰一刻，我嘅直覺話俾我知，佢驚我見到佢地！嗰一刻我個心好痛……兼且我預咗佢唔會返嚟揾我！點知佢叫我抖吓先，佢晏啲先返嚟揾我！

到咗10點，佢whatsapp我佢返緊嚟！我睇完之後冇覆過佢！換轉之前，我一定好開心咁覆佢，但今日……

隔咗一陣佢打俾我，問我落唔落街？我好冷淡咁答佢“是但”！落到去見到佢，佢問我今日做乜？係咪唔舒服？我依然好冷淡咁對佢，我唔係專登咁對佢，只係我真係覺得好攰“唔係体力上嘅攰，而係個心好攰”我笑唔出，真係笑唔出！

坐左一陣佢就同我講“她”已經知道有我嘅存在，因為部電話！聽完佢講之後，我突然覺得自己嘅直覺真係好準，因為星期六晚佢真係約左“她”！“她”亦都係星期六晚知道呢件事！而我亦係由星期六開始感覺到我地之間有啲嘢唔同咗！ 嗰一刻我真係唔知可以點，我只可以繼續強顏歡笑，繼續好落力咁扮冇嘢！直到我攬住佢嗰一刻，我啲眼淚終於忍唔住不停流出黎！我一直攬住佢，我唔想俾佢知我喊緊，但佢最後都feel到！佢越問我發生咩事？佢越攬得我實，我嘅眼淚越失控咁流出嚟！好辛苦……真係好辛苦！

原本我真係冇諗住俾佢知我做乜，但最後我俾左尋日篇日記佢睇，佢睇到呆咗！佢同我講只要我仲係低能妹，佢就依然係低能仔！我真係唔知應該點，我好怕失去佢，我好怕呢段日子佢對我嘅好，全部都係假！我好怕……但我又可以點？

返到去佢whatsapp我，今晚佢陪左我好耐，好耐都冇試過咁！對上一次係幾時我都已經唔記得！係咪因為今晚我突然咁，所以佢先陪住我，想俾返啲安全感我？但呢種感覺又可以維持幾多日呢？佢幾時又會變返好似之前咁？我真係唔夠膽諗……

今晚我問左佢一個問題，“她”有冇要你同我分開？佢答我冇！其實我之所以咁問，係因為如果“她”有呢個要求，而佢又應承咗嘅話，我會知道自己應該點做！但依家佢話冇，兼且佢話就算有，都唔會同我分開！我真係唔捨得離開佢，因為我真係好愛佢！

但我知道其實佢地先係一對，而我只係多餘嗰個……

回想番同肥僑分開嗰日，我響肥僑面前流嘅眼淚都唔夠今晚多！

呢幾日不安嘅感覺越嚟越多，突然感覺同佢嘅距離遠咗好多！真真正正嘅“這麼近，那麼遠”

今朝十一點幾俾個電話嘈醒咗，一聽到個鈴聲，我知道係佢，起初我以為係whatsapp，望一望個電話原來係來電，即時成個人醒晒！佢第一句就同我講“好掛住妳”！嗰一刻我竟然響到諗，其實佢係咪真係咁掛住我呢？點解我嘅感覺會唔同咗？點解我會感覺到我將會好快失去呢個人？點解我個心會痛？點解……？

今日同那些年出咗去，但我今日成日都心不在嫣，個腦一直諗緊佢，諗緊我地之間……那些年所講嘅野，我一句都聽唔入耳！就連佢送花俾我，我都冇反應……cctv 今晚響wechat留言俾我，約我聽晚食飯，我覆cctv我聽晚約左男朋友！

點知低能仔whatsapp我打左句“男友”，嗰一刻我其實想問佢，我有冇會錯意？我係咪唔應該用“男朋友”嚟形容佢？但我唔夠膽開口，因為我好怕個答案唔係我想要嘅答案！

曾經有人話過，如果當一段感情裡，其中一方開始猶豫另一方對自己嘅感情，又或者響到諗對方係咪鍾意自己嘅話，咁就代表嗰個人未必係自己想像中咁愛自己！因為感情係雙方面，嗰個人愛唔愛自己，其實係感覺得到！有時我地一直以為自己諗多咗，根本就係自欺欺人！

呢一刻我感覺到我地之間有啲嘢，係咪意味住由始至終都係我一廂情願咁諗多咗？係咪所有嘢都係假架？點解自從星期六開始，所有嘢都好似唔同晒？點解會有患得患失嘅感覺？點解幸福可以嚟得快又走得咁快？“失樂園”呢首歌又代表住啲乜？

低能仔，你可唔可以俾返啲安全感我呀？我真係好攰，好辛苦喇！

尋晚同佢見完之後，返到嚟whatsapp咗兩句就再冇揾大家！我竟然有啲唔慣……

今日佢都係收6點，尋晚佢同我講過佢今晚收工會落香港仔，然後會返嚟揾我，但今晚我冇見過佢，甚至連佢響邊我其實都唔知！我地又只係whatsapp咗幾句-_-#

其實我地之間係咪有啲野已經唔同咗喇？你係咪已經唔再需要我？定還是你終於發現自己愛“她”多過我呢？？