尋晚係咁咳，咳到今朝先有得瞓，仲要咳到聲都變埋！其實自從手術後，每逢轉天氣都會特別敏感同埋個傷口位會特別痛，始終開刀個位係響喉嚨同氣管付近，醫生話呢個係手術後嘅後遺症。。。
今朝一瞓醒，就見到 Elmas嘅 msg，佢問我會唔會返去幫佢？睇到嗰一刻我真係開心，因為我響呢間公司真係好開心，佢哋3個真係好錫我，冇響嗰到做嘅日子，每逢經過鋪頭我都會諗番起以前！
Elmas 係一個好好嘅boss，同時亦係一個好 gentleman 嘅男人！我記得有一次開會，嗰日我病得好緊要，咁啱我坐嗰個位係對住風口，Mandy 怕我凍原本想熄咗個冷氣，但我堅持唔使！因為嗰日真係好熱，我唔想為咗我一個而令到佢哋陪我熱！結果 Elmas話自己凍，所以要熄咗個冷氣，但其實我見佢本身已經熱到出晒汗。。。兼且佢永遠都好似知我諗乜咁，個個都 feel唔到我有嘢，唯獨佢一個感覺得到，不論我嗰日我係開心定唔開心，佢都會感覺得到！我真係覺得佢係一個好厲害嘅人。。。
今晚低能仔返咗嚟陪我，佢一見到我就問我諗成點，其實佢會唔會諗唔計佢自己，A.B.C.D.我都唔鍾意，但呢個E我又會唔會鍾意番呢？所以先會咁緊張咁問我？佢仲話最多將來佢專登去TST等“有啲人”收工！佢真係好傻。。。(^3^)
尋晚我發咗個惡夢，我真係好驚！我夢見自己死咗，但低能仔唔知道，繼續響樓梯口等我！結果要女神去話佢知我已經死咗，響夢裡面低能仔喊得好緊要，而我只可以不停流眼淚，同望住佢乜都做唔到~T_T~到最後我嚇醒咗，我發現原來我唔係發夢嘅時候流眼淚，因為醒咗之後我啲眼淚依然係咁流，嗰一刻我好想攬實低能仔。。。
今日唔寫咁多住，因為“有人”要“有啲人”除咗唔可以再偷食雪糕外，仲要“有啲人”今晚乖乖哋早啲瞓…… 所以嗰啲人要聽話上床瞓喇! Goodnite♥
分類: 我們的生活點滴 |
