jessica1207yi : 個人主頁 - 相簿 - 訂閱  [ QOOZA - 論壇 - 登入 ]
人氣：34204 
一切從蝴蝶酥開始
不知不覺愛上你……
我 的 資 料

暱稱： 低能仔♡低能妹
MORE...
«‹ July 2026 ›»
SMTWTFS
1234
567891011
12131415161718
19202122232425
262728293031
最 新 日 誌
•一切從蝴蝶酥開始
•半年後
•分開。。。
•放假喇
•安全感
日 誌 分 類
•全部 (1919)
•我的生日之旅@台北2018 (2)
•我們的一週年甜蜜之旅2014♡台北 (5)
•我們的三週年甜蜜之旅2016♡Osaka (6)
•我們的五週年甜蜜之旅2018♡OsAkA (4)
•我們的五週年甜蜜之旅2018♡台北 (4)
•我們的生活點滴 (1883)
•我們的四週年甜蜜之旅2017♡東京 (7)
•我們的兩週年甜蜜之旅2015♡台北 (5)
•我們的甜蜜之旅2018"♡澳門 (2)
•未分類 (1)
訪 客 留 言
最近三個月尚無任何留言
最 近 訪 客
最近沒有訪客
每 月 文 章
日 誌 訂 閱
尚未訂閱任何日誌
我 的 好 友
我 的 連 結
•差半步
日 誌 統 計
文章總數： 1919
留言總數： 87
今日人氣： 75
累積人氣： 34204
RSS Feed
2013 年 9 月 19 日  星期四   晴天
離開
聽日就係中秋節，係我其中一個最鍾意嘅節日！人哋話中秋節係人月兩團圓嘅日子，今年我算唔算人月兩團圓呢？定還是呢個團圓只係幻覺。。。
 
尋晚有種衝動想訂機票出去抖吓氣，唔知係咪最近壓力太大個人覺得好攰，所以好想好想離開香港抖吓！不過最後都冇做到。。。大概係因為你，我先唔捨得離開！
 
 
第一次獨自一個離開香港，就係去咗台北，一個人嘅旅程好 free，鍾意去邊就去邊，兼且可以好好俾自己靜一靜！仲記得當我去到淡水同九份時，我真係感覺到完全放鬆！九份另一個名叫“悲情城市”嗰到真係好靚仲好舒服！我好記得嗰日我心情真係好差，我見到一間嘢個名寫住“悲情小築”，個店長不停推介我試“話梅凍烏龍”，當我一路飲，我啲眼淚就一路滴。。。因為當時仲播咗首“別問我是誰（國）” o個一刻我真係覺得個天好似知我諗咩咁, 由原本喊唔出, 直到黎到呢個“悲情城市”之後, 就將我嘅眼淚一一叫晒出黎!
 
至於淡水, 係我一見鍾情嘅地方, 我第一次感覺到台北嘅靚,  我第一次自己睇日落.... 原來感覺真係好唔同! 我好希望將來可以再一次黎呢到....  
我一直都相信幸福摩天輪係可以帶比人幸福, 上次黎到呢到, 我一直希望下次再黎呢到時, 我可以同我鍾意嘅人一齊黎呢到先玩, 好幼稚!!
 
 
 
從沒說過愛著誰　為誰而憔悴　從來沒有想過對不對
我的眼中裝滿疲憊　面對自己　總覺得好累

我也需要人來陪　不讓我心碎　讓我愛到深處不後悔
其實我並不像他們說的　那樣多刺　難以安慰

愛人的心應該沒有罪　為何在夜裡卻一再流淚
每天抱著寂寞入睡　生活過得沒有滋味

別問我是誰　請與我相戀　我的真心沒人能夠體會
像我這樣的人不多　為何還要讓我難過

別問我是誰　請和我面對　看看我的眼角留下的淚
我和你並沒有不同　但我的心更容易破碎

分類: 我們的生活點滴
 [ 訪客留言(0) ] [ 編輯日誌 ]

2013 年 9 月 17 日  星期二   晴天
我們的第一次...

今日十一點幾就醒咗，起身見到低能仔 whatsapp……不經不覺低能仔已經成為咗我生命中嘅一部份喇！我嘅生活裡每一樣嘢都會諗起佢，都會諗咗佢先，呢種感覺好實在！
 
今日係我哋嘅第一次∼睇戲！雖然張飛唔使俾錢，不過其實我唔鍾意響戲院睇戲，我唔鍾意坐響到個幾鐘望住個熒幕唔郁，種感覺好似坐監咁，哈哈！但我又好想可以同佢做啲唔同嘅嘢，我好想同佢有多啲回憶，所以我想同佢去睇。。。
 
睇完戲我哋都分別撞到唔同嘅人，一個係Fung，另一個係佢阿姨，但大家都不約而同咁行開咗！佢行開係因為佢覺得尴尬，而我行開係因為我覺得自己襯佢唔起，又或者應該話我同佢根本就唔襯！最後當佢同我講佢阿姨所講嘅嘢後。。。。其實係咪真係好想好想、好愛好愛就得呢？！我好怕佢有一日會嫌棄我......


分類: 我們的生活點滴
 [ 訪客留言(0) ] [ 編輯日誌 ]

2013 年 9 月 16 日  星期一   晴天
簡簡單單
今朝7點幾就收到低能仔 whatsapp，好開心↖(^▽^)↗到咗十點幾佢再話我知，原來今日佢唔使返學。。。不過我約咗 Fung今晚食飯！晏晝佢返咗嚟揾我，我換好衫化埋妝就去陪佢食嘢！但佢唔多鍾意我今日咁著，佢覺得著得。。。聽到佢咁講，其實我好開心！

晏晝響佢屋企陪咗佢一陣先出去，當大家都講緊Fung時，佢突然講咗一句嘢令我好深刻“我又唔係你邊個，呷醋都要睇身份！”聽到呢句說話我好猶豫，我冇諗過會出自佢口中！或者因為我一直有個問題都搞唔清。。。我有好幾次都想開口問，但最終都冇問過！聽完佢呢句說話，見到佢唔出聲個樣，我就 wechat Cherry今晚唔出去食飯 & 飲嘢！  

直到我搭車出去揾Cherry拎嘢時，我終於都問咗低能仔我想問好耐嘅嘢“你幾時要出去陪她？”原來佢哋已經分開咗，只係我一直冇為意，仲以為低能仔同佢仍然。。。聽到之後，我好自私迫佢做咗啲嘢，就係要佢 delete咗她嘅相！我唔係小器到容納唔到她所有相留響佢個 instagram裡面，我只係容納唔到響佢屋企影嗰兩張相。。。每一次見到我個心都會好唔舒服，我有諗過佢唔肯 delete，不過最後佢乜都冇講就 delete咗！低能仔，對唔住呀！我知道我今次真係好自私，但我好想話你知，我唔鍾意見到佢錫你~T_T~Anyway多謝你容許我今次咁自私，咁任性！

尋晚Cherry whatsapp我，留咗兩張“超級經理人”嘅戲飛俾我，佢叫我同低能仔去睇，今晚拎完之後，我同 Cherry 行咗一陣就去咗皇室堡換完飛，就返咗去同低能仔食飯！簡簡單單咁。。。係我最鍾意同最嚮往嘅生活！
 

分類: 我們的生活點滴
 [ 訪客留言(0) ] [ 編輯日誌 ]

2013 年 9 月 15 日  星期日   晴天
體會
終於都完成咗尋日嘅 Examination同工作，真係可以鬆一口氣！嚟緊要好好 plan吓下一個課程同考試↖(^▽^)↗ 

尋日響逸東軒化妝，由原本嘅5妝5頭，改為7妝8頭，時間比較緊迫。。。幸好可以響6：20完成4妝5頭，趕得切去靚仔醫生到睇醫生！

尋晚乜都冇食過，只係飲咗一杯橙汁就繼續做！8點幾響我最攰嘅時候，低能仔就打電話俾我，佢係我一個好好嘅推動力，每次當我遇到啲唔如意又或者攰嘅時候，只要有佢就乜都唔記晒，當然有時佢都會有失靈嘅時候，就係我遇到唔如意嘅嘢係由佢帶俾我。。。

尋晚佢響老地方等我返，但我拖住個化妝箱攰到冇乜反應，個腦一直諗佢其實緊唔緊張我同 Fung嘅關係？其實佢想唔想我去日本呢？？不過諗咁多都冇意思，一切順其自然吧！

今日足足瞓咗一日，真係好攰好攰。。。瞓醒見唔到低能仔揾過我，但就見到 Fung 嘅Msg，我覺得有啲失望！起身之後執番好尋日用嘅嘢，我發現我對化妝師都有一點體會！

響讀書嘅時候，老師成日要我哋寫“我的志願”，當時我嘅志願係一個幼稚園老師，因為我真係好鍾意小朋友，但我發現我真係唔係讀書嘅材料，所以唯有放棄我呢個自小嘅志願！漸漸我發現自己好鍾意幫人化妝，以前學校搞 fashion show 啲同學都係揾我化妝，每一次幫身邊嘅人化完妝，我都會覺得好滿足，可惜屋企人唔支持我做化妝師，覺得化妝師係冇前途嘅工作！或者日子耐咗，我終於有少少成績，今日佢哋終於會響親戚朋友面前好大聲咁講“我個女係化妝師”，同時我亦漸漸變咗我啲親朋好友嘅御用化妝師！

雖然今日我唔係一個好成功嘅化妝師，但總算係有一點成就！我選擇新娘化妝，而唔選擇舞台化妝，係因為我覺得每個女人最靚、最幸福甚至最童話嘅時候係結婚嗰一日！婚禮你可以參加好多，但真正參與當中重要嘅一環，除咗攝影師外，就只有化妝師！一對新人將自己最重要嘅一日，好放心咁交晒俾你，嗰種成功感同肯定，任何一份工都俾唔到我！每一次新娘化妝，最開心唔係收到人工&利是，而係見到個新娘好滿意個化妝 & 髮型，好幸福嘅表情，兼且仲好自信咁進場，嗰種感覺真係好正，我好 enjoy 呢種感覺， enjoy 呢份自信！只係因為呢個世界冇醜嘅女人，只有懶嘅女人！呢句說話我相信係每一個化妝師都認同嘅說話！

今晚我出咗去等低能仔收工，我好鍾意等佢放工，雖然每次只係食餐飯、行一陣就返去！但嗰種感覺同平時響老地方好唔同！老地方可以俾我哋二人世界，聽到對方心裡面嗰句！而出街係令我可以了解佢多啲，可以俾我響佢嘅世界睇佢睇到嘅嘢，俾我響佢嘅世界，行佢想行嘅地方！
 

分類: 我們的生活點滴
 [ 訪客留言(0) ] [ 編輯日誌 ]

2013 年 9 月 14 日  星期六   晴天
歲月如歌？！
尋晚同低能仔出完去，差唔多十點收到 Fung嘅電話，佢返咗嚟接咗我去香港仔食糖水，食完嘢我地去咗以前放學時成日去嘅地方∼海賓公園。尋晚佢同我講番好多我哋讀書時拍拖嘅嘢，令我諗番起好多好多。。。我響F.2時同佢拍過一個月拖，當年可以話因為一個誤會而分開，但係咩誤會我已經唔記得喇！我冇諗過咁多年之後，佢會再一次追番我，佢仲話佢改咗月尾去日本，問我可唔可以帶埋我去？如果係佢去訂機票。。。

尋晚其實我出去時，我有 whatsapp低能仔同佢講，除咗佢覆我問我係咪同 Fung出去之外，佢就再冇揾我喇！我成晚響到諗，點解佢唔會揾我呢？佢係咪唔會緊張架呢？定還是有啲嘢已經改變咗呢？even返到嚟我whstsapp佢，同佢講我已經返咗都好，佢都唔見得會緊張我同 Fung會點。。。或者因為由始至終都係我愛佢多過佢愛我！！

今日考試前收到個 email，Fung sent咗一首佢自己唱嘅歌俾我……歲月如歌！呢首係我好鍾意嘅歌，我冇諗過會有人送俾我，仲要自己一路唱一路錄！佢話呢首歌原本唔係諗住咁送俾我，而係應該尋晚係我面前唱俾我聽！！點解送呢首歌俾我嗰個會係佢？！

尋晚又冇瞓，温書温到今朝。。。今日要考試兼且下晝要化妝，3：30開始灣仔化5妝5頭，如無意外9點左右換埋套敬酒衫，化埋最後一個妝&頭就可以收工！過埋今日就可以好好休息吓。。。或者呢幾晚都冇瞓，所以由尋晚開始，個頭已經熱熱哋，到咗今日個頭更熱！我諗陣間化完頭三妝，就可以去睇靚仔醫生！Fung知道後，佢話下晝響灣仔等我接我去睇。。。但我其實希望嗰個唔係佢而係你∼

 

分類: 我們的生活點滴
 [ 訪客留言(0) ] [ 編輯日誌 ]


« | 370 | 371 | 372 | 373 | 374 | 375 | 376 | 377 | 378 | 379 | ... | 384 | »