今日係我上MYOB嘅第一堂，係關於EXCEL架，雖然我係完全唔識MYOB呢個程式，但係我唔知點解上到去嘅時候，我好快就學識今日嘅嘢，個感覺仲好似係學過咁，真係奇怪呀。

我搭車返屋企嘅時候係到諗會唔會係我有心想學呢個程式，所以我好快就學識咗一個課程，到咗課程完咗嘅時候，仲有一張關於今日課程嘅證書添，咁樣對我第時搵工都好啲呀，因為宜家好多公司都係用MYOB呢個程式做會計架，如果我學晒入面嘅嘢，我一定會好好架。

今次真係好多謝老細比呢個機會我，等我有多一個學嘢嘅機會，咁樣除咗可以幫到公司外，仲可以比個機會我自我增值添。由我18歲出嚟做嘢到宜家，相信最好嘅老細都係呢個啦，真係好好人架。呢個老細如果你有咩事嘅話，只要你開心見成講，同佢商量，佢多數都會應承架，宜家真係冇咩老細肯架啦，所以我一定會好比心機係呢間公司到做，當係報答佢肯出錢比我讀書嘅人情啦。

今日終於可以抖一抖啦！

今日我終於執完寫字樓啦，可以抖吓啦！雖然寫字樓執完，但係仲有舖面未執，老細今日叫如果得閒就幫手落舖面幫手，因為要執好個位嚟放新年啲貨，所以要幫手將舖面大執位喎。

我都好想幫手呀，但係寫字樓跟本仲有好多手尾未跟，好似要找貨款啦，因為宜家先只找緊10月份嘅數，幾時先找到12月呢，啲貨主就日日係咁打嚟問幾時找，我聽都聽到頭痛呀，開咗票老細又唔簽，咁叫我可以點。除咗找數問題之外，另一個問題就係入電腦啦，因為有好多單未入電腦，我要係今個禮拜入晒佢先得，如果唔係越積越多嘅時候就做唔掂架啦。

總之就跟人手尾係一樣好辛苦嘅事嚟架，上一手做得好嘅就執少啲，做得唔好就...，唉！當然我上一手就梗係做得唔好啦，如果唔係我都唔洗用成個禮拜先執完個寫字樓啦。唉！今次真係比上一手玩死呀！

好忙呀！呢排真係好忙呀！

公司又忙，屋企又忙！公司忙係因為老細話啱啱過咗07年，公司要大番身，所以要幫手執寫字樓，等新一年有個新開始喎，所以我由上個星期五開始執寫字樓執到今日，終於都執完啦，不過好累呀！老細仲話想係過年前找清晒所有數，唔想爭人錢嚟過年喎，其實邊到得呀，宜家先找緊10月份嘅貨款，仲有11月同12月未找，而且1月又嚟啦，你話有咩可能找得到呀，仲要公司係收一條找一條數，跟本唔夠錢週轉，咁樣就冇可能係過年前清數。

之於，屋企忙就係因為啱啱出咗糧，要交呢樣交嗰樣，但係每一樣都要係唔同地方交，所以我就要用食飯時間嚟交，所以我呢兩日嘅食飯時間係好充實架，不停咁排隊交錢排隊交錢，就係咁樣我呢兩日嘅食飯時間就冇嘢食過落肚啦，但係我又唔覺得肚餓先奇怪喎，唔通師傅啲水真係幫我減肥，如果係就好啦，咁樣距離我個目標就越嚟越近啦！

今日我有樣好嬲呀，就係我部手機居然唔可以上GPRS呀，問 3 ,佢哋話3G咭入落2G機入面好有可能係上唔到GPRS架，我當時聽到就好嬲啦，點解3G唔可以入落2G機到上GPRS呢，唔通要我用佢哋嘅3G機先可以上到GPRS咩，真係激死人啦！

好神奇呀！

尋晚我咗師傅度，原本諗住係搞我老公嘅，點知到最後就變咗搞我。

尋晚師傅幫我做多咗啲嘢之後(係咩就唔方便係度講啦)，仲之係好嘢啦，當做完嘅時候，我都唔覺得有咩唔同，但係到咗今朝著衫嘅時候就發覺啲由入面到出面都鬆晒，唔啱著，咁我先知原來尋晚師傅嘅試驗成功咗，真係好神奇呀！

但係當我開心緊時候就出現另一樣令我煩嘅事啦，就係我連底衫都唔啱著咪要買過啲新囉，咁又要洗一筆錢啦，雖然話係少數目咋，都係叫要攞出嚟呀，如果唔係著番宜家呢啲就好核突架啦，所以我9號一過咗數就要買番啲啱著嘅底先得啦！

宜家我覺得個人成個輕晒，冇之前咁重身啦，希望可以再輕啲，因為我嘅目標係100-110磅左右，宜家我距離個目標仲有好遠呀，我希望可以係暑假個時可以達到我嘅目標啦！

今日係我呢間公司自己一個人做嘢嘅第一日呀，估唔到比我預期之中辛苦呀，因為上一手嘅女仔好多嘢都未入番落電腦度呀，所以我要幫佢入番晒呀，啲數又亂，好多單都未找架，成日只係收到啲問幾時可以找數嘅電話，好煩呀！都唔明個女仔係公司做咩嘢架，咁多嘢都未做，佢又話好舒服，每個月都唔係好多嘢做，其實我覺得係佢唔做咋，等埋一大疊嘅時候先做，點知做唔掂囉咪走囉，跟住交晒比我去做囉，唉！今次真係頭痛呀！我唔知要幾耐先可以執好晒呀，希望可以用今個月嘅時間幫公司執番好晒啲嘢佢啦，咁樣先可以繼續做到嘢架，如果唔係，就.....唉！

我又病咗啦，重感冒呀，又冇錢睇醫生，真係好辛苦呀，有冇人可以救我，教我點樣可以冇咁辛苦都好呀，我真係好病呀。

今晚仲要上師傅度，比師傅見到我呢個病樣一定會鬧呀，就算師傅唔鬧家姐都會鬧啦，點算，真係唔係好想出呀，想快啲番屋企瞓吓，休息吓，等自己快啲好番，努力返工呀，但係應承咗師傅上去就冇計啦，為咗第時嘅日子，再辛苦都要撐住，因為我相信師傅一定可以幫到我，所以我就算幾辛苦都好，我都要上師傅度，最多上車瞓一陣囉！