今日係聖誕節啦，祝大家聖誕節快樂！
原本聖誕節應該係開心咁過，但係當我諗到今年年頭衰到年尾，就咩心情都冇晒啦，所以我今年只會留係屋企，邊到都唔去，自閉吓啦，咁樣先可以唔駛用錢之餘又可以過聖誕，唯有係咁啦，雖然我啲契妹個個都叫我出去玩，尤其係最錫我嘅契妹“亞齡”，佢叫我去燒野食添，雖然我個心係想去，但係我冇錢，又唔想駛佢錢，唯有推咗佢啦，算數啦，聖誕節有節目又係咁過，冇節目又係咁過，都係一日咋，好過就會過咗今日架啦，唔好諗咁多。
27號我就返第二份工啦，唔再係做幼稚園書記啦，點解？其實係因為呢排學校放聖誕假期，園長話試唔到我工，所以叫我停一段時間，到時開學再叫我返去。但係佢又叫我交番套制服比佢，咁我諗佢其實係想炒我啦，咁我咪用呢段時間搵嘢做囉。點知，我搵咗兩日工咋，尋日就有份工叫我27號返工啦，係做零食店嘅會計文員，都係喺元朗返工，近近哋幾好，希望今次可以做得長少少啦，因為我要還債呀，我有好多債要還呀，我唔想連累人呀，因為借錢嗰個係我，負責任嘅應該係我，而唔係其他人，所以我一定要係出事之前還清啲債佢，唔好連累人啦。
希望大家可以支持吓我，等我可以順順利利咁過咗呢關佢啦，因為我越嚟越覺得個人好累，好想放棄呢段生命，一走了只，因為只有我死咗啲收數佬先至唔會煩到啲咨詢人，咁樣大家就會有好日子過啦。所以如果大家有朝一日見到報紙話天水圍有一個婦人為債務而死嘅，而嗰個又係我，大家千其唔好驚訝同傷心， 因為我係抵死架。
好慘呀！我呢排好似隻過街老鼠咁呀周圍避，因為啲財仔係咁打嚟我到，但係我因為開工唔聽得電話嘅原因，全部都冇聽到，到我打番比佢哋嘅時候，佢哋又唔聽，只係煩其他人。
最慘嘅係，點解個賤人啲數都要入埋我數呀，要我幫佢揹埋，真係唔明呀，我係佢老婆咋，唔係佢經理人呀，樣樣事我都要幫佢架，梗何況佢係男人嚟架，係咪應該係佢出嚟撐呀，但係佢就唔係囉，人哋打比佢，佢就唔聽人電話，叫佢覆番人，佢又唔理，比人追上門啦，就連屋企都唔返添，總之佢就永遠都係做咗太空人啦。
所以，我今晚決定趕佢出門口，一於唔比佢番嚟屋企，我唔想再同佢嘈啦，我受夠啦，我真係好累呀，我真係唔明呀，點解我啲數我自己揹，佢啲數都係我自己揹呀，我真係好想知囉，唔通做佢老婆嘅就要幫佢還債，但係你自己啲債呢就你自己還，咁樣好唔公平呀！今次我一定要下定決心，趕佢出門口，等佢早啲離開我，等我可以早啲同佢離婚，唯有咁樣我先可以鬆一啲，如果唔係就只有死路一條，我真係唔想死住呀，我仲想見到兩隻恐龍出人頭地呀，所以我要自保。
其實諗深一層，我冇去報破產管話佢係破產期間再借錢之餘仲爭人錢，我己經算係人至義盡架啦，總之以後就佢啲數還佢啲數，我啲數還我的數，總之我唔會幫佢之於更加唔駛佢幫呀，費事比人話我要佢啲錢比晒我，搞到佢冇得用呀，所以我還唔到錢呀，我聽咗好多啦。
總之，我決定同佢講，佢唔出嚟撐或者搞番掂啲數，佢就唔駛諗再番呢個屋企啦，我唔想我呢個屋企見到啲我唔想見到嘅人呀！
今晚，間亞洲匯業打電話比我，我咪同佢講我只係得幾佰蚊，叫佢收住先，我再有嘅時候就再還比佢，點知佢哋唔聽之餘，仲要打比我亞伯，我好嬲囉，有冇事就搵番我啦，仲咩要搞我啲屋企人呀，真係唔明呀。
今晚仲要搞到我亞伯，宜家亞伯要報警，我知我冇可能要伯伯原諒我，但係我只係想伯伯唔好告我盜用佢啲資料，因為我真係唔想兩年前為錢而坐監，兩年後又係為咗錢而坐監呀，坐監真係唔好受架，所以我只係想伯伯唔好告我盜用佢啲資料，我就心滿意足啦，我會自己諗辦法搞番掂，我一定唔可以比伯伯同亞爸亞媽有事架，因為佢哋都係我最錫嘅人嚟架。
亞爸,,,亞媽,,,伯伯,,,對唔住呀，係我連累你哋，比啲時間我呀，我一定會搞番掂佢，唔會再搞到你哋，請你哋信埋我最後呢次呀。
對唔住呀，真係好對唔住呀！
今日上午我去咗屯門見工，見文員，結果當然一樣要等電話啦，我都慣啦。
今晚，園長打比我，同我話學校今日好亂，發生咗好多嘢，叫我聽日同後日都唔好返工住，到星期六先再同傾吓跟住點，係繼續做定係走啦，希望可以繼續做啦，因為我真係好鍾意份工。
今晚，我上咗師傅度啦，起初我好抗拒，好想走，點知比師傅搞兩搞就冇咗種感覺啦，真係奇怪呀，師傅都冇做過啲咩，咁就令到我成個人舒服晒，真係好舒服呀，好耐冇試過咁舒服啦。我希望跟住師傅做嘢可以慢慢轉番好個運啦。
師傅，我之後落嚟嘅事就靠你啦，你一定要幫我啦。
今日我終於頂唔順間學校同園長提出辭職，我原本以為園長會答應架，點知唔係囉，園長話我做得到嘢，叫我諗吓只係幫佢手做嘢，唔好辭職，佢唔想我辭職，我聽到之後，我真係覺得好奇怪，點解我只係做咗一個禮拜咋，點解園長會咁鍾意我嘅。
聽日我約咗師傅啦，我好希望師傅佢幫到我啦，因為我越嚟越覺得自己好污濁呀，希望師傅可以幫我清晒我身體入面啲污濁嘢佢啦。我聽日仲要問師傅，我宜家應唔應該離婚啦？呢份啱唔啱我啦？我宜家爭人咁多錢，我應該點做啦？我宜家要點做？
希望聽日上完師傅度之後，我會好啲啦，因為我上嚟呢間屋咁耐就病足咁耐，啲工又做唔長，成日同個賤人嘈，詠琳又唔聽話，總之我終放都覺間屋好唔乾淨啦。
