好煩呀！近排有好多嘢發生咗呀，大部份都係同錢有關架，唉！其實係我同老公兩個係出邊借咗錢，但係我有準時還架，只係佢就遲還，同埋到期，人哋打比佢，佢又唔聽人電話，搞到人哋係咁打比我，叫我搵佢，點知，同佢講，佢就話人哋冇打比佢。

最慘，就係同佢傾嘅時候，佢就將啲責任推晒係我身上，跟住就話會問人借錢還，但係都最後都係冇問到，仲要同佢亞爸亞媽姑姐講，啲錢唔係佢借嘅，變咗係佢親戚以為係我借，用佢做担保人，叫佢解釋番，佢就話解釋都冇用，佢哋唔會信，我當時真係好嬲囉。

更加嬲嘅係，點解佢爭人錢要我外家幫佢還呀，我外家冇義務幫佢還架，以前又係咁，宜家又係咁，有咩事都係我外家出頭，我都唔明點解佢唔搵佢啲屋企人呢？

我宜家先發覺，人與人之間，永遠都係當你有事搵你嘅時候，就你搵唔到人，或者搵到都唔理你，到冇事嘅時候，就你唔搵佢，佢都會搵你。我終放明咩嘢叫做“大難臨頭各自飛”啦！我放個心出嚟對待每個人，點解所有人都當我係棋，用完就算呀！我對呢個世界真係心死啦，我決定照顧好自己同兩隻恐龍就算啦，其他嘢都係少理好啲！

今日我出咗去見工呀，當然見得成啦，係做幼稚園書記，係元朗度做，雖然暫時只係試用期，用日薪計數，但係都過冇得做呀，真係好好呀！

因為，我可以離開呢個鬼地方，出去透吓氣啦，但係就要重新投入番呢個社會，我驚我會唔適應呀，但係我相信我一定可以克服架，大家比啲支持我呀，ok？

好啦，唔講住啦，今日好累呀，想早啲瞓呀，聽日睇吓有咩新聞咗同大家講啦！

zzzzzzzz

今日係表姐(大姨個女)出嫁嘅大日子，雖然我冇去到觀禮，但我都有去飲，原本一直都冇咩特別嘅，但係當去去到一個場面嘅時候，我真係好感動呀！

個場面係•••個司儀叫咗表姐上台坐，但係唔見咗姐夫喎，點解呢？原因係•••開估啦，就係個場插緊鄭伊健嘅一生愛你一個，唱嘅係姐夫，而班兄弟姐妹一人送一枝玫瑰花比表姐，當然去到最後嗰個一定係姐夫啦，當姐夫上到台前嘅時候啱啱唱完最後一句『常在你心裡，愛著我』，踎低係表姐前面送束花比表姐嘅時候，簡直係全場嘩然呀。

我、大姨、姨丈、大細舅父舅母、亞媽老豆，個個見到呢個場面都喊呀，當然喊到最勁嘅梗係表姐啦，佢要個司儀即係比張紙巾佢抺眼淚呀，我當時見到表姐同姐夫，我就知道表姐佢冇揀錯人啦，咁我都放心將表姐交比姐夫啦！

姐夫呀！姐夫，你要好好對我呢個表姐呀，因為我得呢個親表姐咋，你唔好蝦佢呀，如果唔係我唔放過你呀！

睇到呢張相嘅開心又擔心，開心嘅就係多謝上天比呢兩個咁可愛嘅女我，擔心嘅就係驚養唔大佢哋，因為大恐龍宜家先得4歲半(到4月就5歲)，而細恐龍就啱啱4個月咋，見到佢哋真係唔知幾時先可以出嚟選港姐呀，哈哈！

不過宜家都冇咩嘢諗啦，只係望佢哋健健康康，快過長大，我就心滿意足啦！其他我都唔介意啦！

唔知點解今日嘅心情特別 down架。可能因為老公今日要返大陸做嘢，今晚唔返嚟瞓，我驚我湊唔掂兩個女啦！因為平時都有老公幫我湊幾個鐘呀，等我可以做自己嘢呀，但係今晚就...。

今日我打咗細女幾下，點解？原因係佢唔知仲咩係咁喊，氹極佢都要喊。至慘佢又唔係肚餓，又唔係濕片，又唔係要瞓覺，都唔知佢蝦咩，總之佢就只係喺度喊，我嬲嬲地咪打佢囉，點知打完佢之後，見到佢喊到收唔到聲，把聲又沙，我即刻心都痛埋，咪即刻氹番佢囉，氹咗一陣再陪佢瞓咗一陣，佢就好靜咁瞓咗 lu。

今日同契妹去咗新北江買嘢整壽司，我當時其實好想喊架，因為我担心今晚我會搞唔掂，但係我唔想契妹佢担心同唔開心，咁我死忍，一直忍到佢走，到我沖涼嘅時候，我自己喺廁所入面自己一個人喊，因為我真係好驚呀，好驚湊唔掂兩個女呀，我好想叫契妹係我到瞓，幫我湊女，但係又唔想麻煩到佢，所以到最後死忍，自己湊。希望可以湊得掂啦！

我真係好唔開心呀！有冇人可以幫下我呀！