今天是父親節, 當然我唔會好似以前咁同我爸慶祝,  我咩都做唔到, 只可以去探佢, 盡量用我嘅時間照顧佢, 令佢舒服, 唔好咁辛苦. 不過我都要同佢講一句: 父親節快樂

今日睇蘋果日報, 有好多關於父親的感人故事, 其實係慘事, 都離不開生離死別, 睇到都好心酸, 呢個世界太多不幸了...其實我而家屋企嘅情況嘅慘嘅程度同呢幾單都差唔遠, 絕對可以上報紙... 各人有各人嘅難處.

不過睇完d故事, 我都開始同其中一個主角的諗法相似:

「遇 到 呢 事 ， 實 會 係 咁 問 點 解 ， 我 都 諗 好 耐 ， 但 其 實 冇 得 諗 ， 惟 有 盡 量 安 排 好 。 」

唔係咁樣, 可以點?

希望各位會珍惜你身邊的一切, 唔單止係人, 係自己擁有嘅一切能力, 唔好以為呢d係必然, 可能下一秒你已經喪失哂呢d野!!

星期一黎左個新人, 係fresh grad, 又係poly technology, 完全係我嘅翻版, 不過係靚女黎嘅,  公司個個男人都對呢個靚女好有興趣, 由其是我好同事jayson啦, 成個人醒哂,做野唔同哂....~~

我要負責教佢, 原來教人係好辛苦的!! 自己有野做, 又要俾野佢做, 又要解釋點做, 講到我無氣!! 我呢d咁好嘅師姐又好照顧d新人, 唔會俾佢坐响度悶, keep住教佢野, 因為我自己試過坐响度等係幾咁慘, 佢遇著我真係佢好彩!! ~~ 呢幾日比平時做野辛苦幾倍~ 不過教左3日, 佢就話有其他offer, 唔做呢到... 都好嘅, 係走就快d走, 唔好浪費我的精力, 最怕係教到7788先話走, 咁就side 氣!!

而家又回復番平靜, 可以專心自己做野, 唔使教人了, 睇下幾時有下一個啦~~ 不過d男同事就好失望了~~

PS : MARK 生日快樂, 肥鬼到賀~~~

今日同 jeanie 跟 henry 去深圳玩, 尋晚仲有d細個去旅行的興奮, 猛諗住要幾點起身, 要帶幾多錢......一早9點出門口, 同jeanie搭9:30的觀塘直通巴去皇崗~ 好快10:15就到了, 過關亦都唔多人, 會合henry就出發~~

我地搭的士去第一站: 飲茶~ $40/person
去到首先見到個奇景, 就係有人結婚擺酒!! 無錯, 係上午10點擺結婚酒!! d人企哂响門口迎賓, 仲有架好嘔心的花車, 真係奇景~ 我地一路飲茶一路睇人地擺酒, 好攪笑~~ 講番d野食, 真係俾henry嚇親, 我地tick完點心就俾張紙佢tick, 點知佢再加左2個腸粉, 2碗弼!! 總共3個人叫左成十幾個點心!! 不過我地都食得好開心, 食到勁飽!!樣樣有得試, 個炒陳村粉好好食, 燒賣好大粒但太多肥豬肉, 好難食~~ 最後henry仲倒瀉水tim~~

之後我地就行去第二站: 打保齡~ $10/局
去到竟然要我地等, 因為1點前特價$10局, 都幾多人, 我同jeanie都好耐無打過, 大家都係中學時pe堂有得打~~ 我對上一次可能係响番禺打了~ 但我第一球就全中了, 好好彩~~ 我地打了三局, jeanie話要打到一個全中先准走, 但可惜佢打破唔到佢個宿命, 一係就9支, 一係就落坑, 最後我地話留佢自己一個打佢自肯走~~haha~

第三站: 臨時加插的打桌球~ $35/hr
henry估唔到我地識打snooker, 我地就俾佢見識下~~ 行去桌球會時henry帶我地去睇兒童世界裡的水池, 真係估佢唔到, 笑死我地, 咁都有人玩!! 之後我地篤左唔多一個鐘就走了, 原來仲有得計番pro-rata tim, 3個人只係$23, 真係好抵!!!

第四站: 批發市場
我地重點就係去呢度買野行街, 有2幢批發市場, 好多文具, 玩具, 精品, 絕對值得去, 雖然話唔係十分十分平, 但都會睇野睇得好開心~  有好多d無無謂謂嘅野, 好得意~ 我買左把好靚的加菲貓縮骨遮, 只係$20!! 香港可能會賣$60以上!! 仲有買左個扭計骰~~

第五站: 腳底按摩~ $30/hr
呢度真係ok, 手勢, 環境, 價錢都好得, 我地每人仲俾左$10 tips~ 一路按一路睇d無聊節目~~ 好舒服~

第六站: 稻香集團buffet~ $138/person
Henry重點推介!! 話上午飲完茶之後唔可以食其他野, 要留肚食buffet, 我地諗有無咁誇張呀...去到攞位買飛, 仲有locker俾你擺野, 等你可以輕鬆咁去攞野食, 唔使搵人睇住d袋~ good~~ 之後坐低, henry話帶我地行一個圈先, 睇完我地真係眼都突!!!! 完全無一間香港酒店的buffet可以比得上呢度!! 我都唔知點形容, 真係咩都有, 仲要係好多好多, 源源不絕, 質素一流!! 好似有燒蠔啦, 芝士焗蠔啦, 咖哩蟹, 泰式蟹, 凍蟹, 蜆, 扇貝, 好多好多魚, 好多好多魚生, 壽司, PIZZA, 茶樓點心, 熱盤, 生果, 甜品....仲有TCBY雪糕, 有成廿種不同茶葉(花茶/中國茶/涼茶)俾你自己沖黎飲!! 仲有即搾果汁, D西瓜汁好多渣, 無溝水ga!!! 每人仲有一個金幣俾你去換一款貴野, 可以揀: 燕窩/龍蝦湯/鮑魚/活魚刺身!! 真係唔知揀咩好!! 我地好忙咁食, 好怕自己會飽, 因為實在太多好野食!!! 仲有d service超好, 執碟超快, 有d要等嘅野食(eg. 即焗扇貝), 只要放個牌仔落個tray就會有人送到我地張枱~~

食到飽死後我地就搭的士去皇崗口, 過左好充實好好玩的一天了~~

今日同阿頭confirm了3/7last day~~ 佢亦都accept~~ 下個星期一仲有新人番工tim, 都要係fresh grad~ 我要開始pass哂d野俾佢同要教佢野~~ jeanie知道好唔開心, 佢話唔想要新人, 佢想叫番舊嗰個m番黎做, 但一定無可能啦, 走左個am, 點會請個m呀~~

我地响度估個新人會係d咩人? 會係正常人, 名牌王, 定係蠢人? 我地話所有對betty & cora的不滿都要唔好再講, 費事到時嚇親人, 最多將佢地2個的事當鬼故講, 譬如聽到d"啪啪"聲(betty剪指甲)同"sip sip"聲(cora怪叫)時, 千其唔好向後望, 當聽唔到, 睇唔到就算...仲有厠所的嘔吐聲 (有人扣喉)...

期待明天的深圳之旅~~

唔夠一個星期, tal就打黎話取錄我了~ 第一時間嘅反應係: 要考慮下~~ 可能因為阿頭都好落力留我, 而又幾睇得起我啦~~ 仲有都幾唔捨得而家呢個工作環境, 都有d怕要重新適應~~ 諗左一日之後, 為左自己前途著想, 都係決定要走, 難得搵到一份自己想做嘅工, 點都要試下~ 希望呢個會係一個對的決定~

同大佬講清楚後, 再要見hr manager, 佢都係再問我有無興趣調去d high fashion team, 我話我已經決定左, 最後佢話隨時歡迎我番黎~~ 

真係make 了decision, 希望是一個明智的決定啦~ jayson話我走左之後怕以後無咁多好笑野, 我都怕以後番工無得講咁多笑~ 不過唔理了, 番新工先算啦, 諗得太多又係無謂的~~